KASAGARAN sa mga iring aktibo sa gabii. Posible nga ang ilang bungot maoy motabang nila sa pag-ila sa mga butang sa duol ug sa pagdakop ug biktimahon, ilabina kon ngitngit na.

Hunahunaa: Ang bungot sa iring konektado sa mga tisyu nga daghag nerve. Kini nga mga nerve sensitibo bisan sa hinay kaayong paghuyop sa hangin. Busa, ang iring makamatikod ug mga butang sa duol bisag wala makakita niini—dakong bentaha kanila ilabina kon ngitngit.

Sanglit ang bungot sensitibo, gamiton kini sa iring sa pagtino sa lugar ug lihok sa usa ka butang o sa biktimahonon. Ang bungot makatabang usab nila sa pagsukod sa gilapdon sa usa ka lungag sa dili pa sila mosulod niana. Ang Encyclopædia Britannica miingon nga “wala pa kaayo matugkad kon unsay mga gamit sa bungot; apan nahibaloan nga kon kini putlon, ang iring temporaryong mainutil.”

Ang mga siyentista nagdisenyog mga robot nga gitaoran ug mga sensor nga parehas sa bungot sa iring. Makatabang kini sa mga robot sa paglikay sa mga babag sa ilang agianan. Kini nga mga sensor, nga gitawag ug e-whisker, “magamit sa daghang paagi para sa advanced robotics, pagpapaspas sa interaksiyon sa tawo ug computer, ug sa pagsusi sa buhing butang,” nag-ingon si Ali Javey, propesor nga siyentista sa University of California, Berkeley.

Unsay imong hunahuna? Ang gamit ba sa bungot sa iring mitungha pinaagig ebolusyon? O kini ba gidisenyo?