KALIBOTAN NGA PUNOG PROBLEMA
2 | Ampingi ang Imong Panginabuhi
KON NGANONG IMPORTANTE
Daghan ang naglisod sa pagtagana sa ilang panginahanglan kada adlaw. Makapaguol kay ang mga problema sa kalibotan mas nakapalisod niana. Ngano?
-
Kon daghag problema sa usa ka lugar, mosaka ang presyo sa mga panginahanglan—sama sa pagkaon ug puy-anan.
-
Panahon sa krisis, daghan ang mawad-ag trabaho o mous-os ang suweldo.
-
Ang mga kalamidad makaguba sa mga negosyohanan, balay, o ubang kabtangan maong daghan ang mapobre.
Ang Angay Nimong Mahibaloan
-
Kon maayo kang mobadyet sa imong kuwarta, mas andam ka kon dunay krisis.
-
Hinumdomi nga ang imong kita, tinigom, ug mga kabtangan puwedeng mawad-ag bili.
-
Naay mga butang nga dili mapalit sa kuwarta, sama sa kalipay ug panaghiusa sa pamilya.
Ang Imong Mahimo Karon
Ang Bibliya nag-ingon: “Kon duna tay makaon ug masul-ob, kita magmakontento na niini.”—1 Timoteo 6:8.
Kon kontento ta, limitahan nato ang atong mga gusto ug malipay na ta nga mabatonan ang atong mga panginahanglan sa matag adlaw. Importante kaayo ni ilabina kon mius-os ang atong kita.
Aron mahimong kontento, kinahanglan tingali nimong pasimplehon ang imong kinabuhi. Kon ang imong gasto labaw kay sa imong kita, madugangan lang ang imong problema sa pinansiyal.