ANG putyokan makatugpa sa halos tanang anggulo nga dili maunsa. Sa unsang paagi?

Hunahunaa: Aron ang putyokan makatugpa nga dili maunsa, kinahanglang momenor siya paglupad nga halos naghunong na una motugpa. Ang usa ka paagi sa paghimo niini mao ang pagsukod sa gikusgon sa paglupad ug pagsukod sa distansiya sa tugpahan ug dayon magpamenor sa paglupad. Pero, ang kadaghanang insekto maglisod paglupad ug sama niini kay ang ilang mata nagdug-ol, nakapokus nang daan nga dili makasukod ug distansiya.

Ang mata sa putyokan lahi kaayo kay sa tawo kay ang mata sa tawo makasukod ug distansiya. Ang putyokan morag nahibalo nga ang butang magkadako kon magkaduol siya niini. Dihang magkaduol ang putyokan sa usa ka butang, mas magkadako ang butang sa panan-aw niini. Nadiskobrehan sa mga eksperimento nga gihimo sa Australian National University nga momenor paglupad ang putyokan aron ang gikusgon sa pagdako sa usa ka butang sa panan-aw niini magpabiling mao ra gihapon. Dihang makaabot ang putyokan sa iyang tugpahan, siya nakamenor na sa paglupad nga halos naghunong na, busa siya makatugpa nga dili maunsa.

Ang basahong Proceedings of the National Academy of Sciences nagreport: “Ang simpleng paagi niini sa pagtugpa . . . maayong gamiton sa sistema sa paggiya sa makalupad nga mga robot.”

Unsay imong hunahuna? Sulagma lang ba nga nakat-onan sa putyokan ang iyang paagi sa pagtugpa? O kini ba gidisenyo?