Ang maunongong bana ug asawa nag-isip sa ilang kaminyoon ingong permanenteng bugkos. Tungod niana, duna silay pagsalig sa usag usa. Sila masaligon nga ang ilang kapikas mounong sa ilang kaminyoon, bisan sa lisod nga mga kahimtang.

Ang ubang magtiayon napugos lang nga mounong sa ilang kapikas tungod sa presyur sa pamilya o sa ubang tawo. Pero lahi ra gyod ang pagkamaunongon sa kapikas nga gibase sa gugma ug pagtahod.

PRINSIPYO SA BIBLIYA: “Ang bana dili gayod mobiya sa iyang asawa.”​—1 Corinto 7:11.

“Kon maunongon ka sa imong kapikas, dili ka daling masuko niya. Dali ra kang makapasaylo, ug mangayo dayon kag pasaylo niya. Kon dunay problema, di ka maghunahunang bulagan siya.”​—Micah.

Kon motungha ang mga problema, ang dili maunongong kapikas lagmit maghunahuna, ‘Di gyod mi para sa usag usa.’ Lagmit mangita sab siyag mga paagi aron magkabulag sila sa iyang kapikas.

“Daghan sa nagminyo ang naghunahuna nga kon motungha ang mga problema, panagbulag ang solusyon. Kadtong magminyo nga naghunahuna nang daan sa posibilidad nga magbulag, dili na maunongon pagsugod pa lang sa ilang panagtiayon.”​—Jean.

SUSIHA ANG IMONG KAUGALINGON

Dihang dunay dili pagsinabtanay . . .

• Mobati ba kag pagmahay nga imong giminyoan ang imong kapikas?

• Makahunahuna ba ka nga maayo pag laing tawo ang imong giminyoan?

• Makasulti ba kag mga pulong sama sa “magbuwag na ta” o “mangita kog lain nga makamaong moapresyar nako”?

Kon oo ang imong tubag sa usa o kapin niining mga pangutanaha, karon na ang panahon nga palig-onon ang imong determinasyon nga mounong sa imong kapikas.

HISGOTI UBAN SA IMONG KAPIKAS

• Nagkahuyang ba ang atong pagkamaunongon sa usag usa? Kon oo, ngano?

• Unsay atong himoon karon aron molig-on ang atong kaminyoon?

MGA SUGYOT

• Hatagig love letter ang imong kapikas

• Ipakita ang imong pagkamaunongon pinaagig pagdispley sa inyong picture diha sa imong lamesa sa trabahoan

• Tawagi o i-text ang imong kapikas kada adlaw kon magkalagyo mo o kon naa ka sa trabahoan

PRINSIPYO SA BIBLIYA: “Kon unsay gihiusa sa Diyos dili angayng bulagon sa tawo.”​—Mateo 19:6.