Ang matinahorong kapikas maghigugma sa iyang bana o asawa bisan pag dunay dili pagsinabtanay. “Ang ingon niana nga magtiayon andam modawat sa opinyon sa iyang kapikas,” miingon ang librong Ten Lessons to Transform Your Marriage. “Kon dunay dili pagsinabtanay, ila kining estoryahan. Paminawon ug tahoron nila ang isulti sa ilang kapikas ug andam mopahiuyon aron masulbad ang problema.”

PRINSIPYO SA BIBLIYA: “Ang gugma . . . dili mangita sa kaugalingong kaayohan.”​—1 Corinto 13:4, 5.

“Ang pagtahod nako sa akong asawa nagpasabot nga ako siyang pabilhan ug likayan nako ang makadaot niya o sa among kaminyoon.”​—Micah.

Kon walay pagtahod, ang panag-estoryahay sa magtiayon lagmit moresultag pagpanaway, pagpanginsulto, ug pagtamay. Sumala sa mga researcher, kini maoy mga simtomas sa panagbulag.

“Bisan ang dili direktang pagpanaway, pagsultig dili maayo, o komedya bahin sa imong asawa makapamenos sa iyang kompiyansa sa kaugalingon, makapawala sa iyang pagsalig nimo, ug makadaot sa inyong kaminyoon.”​—Brian.

SUSIHA ANG IMONG KAUGALINGON

Sulod sa usa ka semana, obserbahi ang inyong panag-estoryahay ug mga lihok. Dayon pamalandonga:

• ‘Kapila ko nanghinaway sa akong kapikas, ug kapila sab ko mihatag niyag komendasyon?’

• ‘Unsang espesipikong mga paagi nga nagpakitang gitahod nako ang akong kapikas?’

HISGOTI UBAN SA IMONG KAPIKAS

• Unsang mga buhat ug pulong nga magpakitang gitahod nato ang usag usa?

• Unsang mga buhat ug pulong nga magpakitang wala tay pagtahod sa usag usa?

MGA SUGYOT

• Isulat ang tulo ka paagi nga gusto nimong pakitaan kag pagtahod. Pasulata sab ang imong kapikas. Dayon pagbayloay mo sa inyong gisulat. Paningkamoting mahimo kon unsay gisulat sa imong kapikas.

• Ilista ang maayong mga kinaiya sa imong kapikas. Dayon sultihi siya nga ganahan kaayo ka nianang mga kinaiyaha.

“Gitahod nako ang akong bana, ug ako nang ipakita pinaagi sa akong mga buhat nga gipabilhan nako siya ug gusto nakong malipay siya. Bisan sa ginagmayng mga butang akong ipakita niya nga ako siyang gitahod.”​—Megan.

Ang tinuod, dili importante kon para nimo matinahoron ka; ang importante kon gibati ba sa imong kapikas nga imo siyang gitahod.

PRINSIPYO SA BIBLIYA: “Isul-ob ninyo ang mabinationg pagmahal, pagkamaayo, pagkamapaubsanon, kalumo, ug pailob.”​—Colosas 3:12.