Kay manghatag man tag binase sa Bibliyang publikasyon nga walay bayad, gibati sa pipila nga puwede ra ang pagkopya ug pag-post niana sa ubang website o social media. Pero, naglapas kana sa Kondisyones sa Paggamit * sa atong mga website ug miresultag seryosong mga problema. Giklaro diha sa Kondisyones nga dili puwedeng “mag-post sa artwork, electronic nga mga publikasyon, mga trademark, musika, hulagway, video, o mga artikulo gikan niini nga website ngadto sa Internet (sa bisan unsang website, file-sharing site, video-sharing site, o social network).” Nganong gidili man nâ?

Ang tanang materyal sa atong mga website may copyright. Ang mga apostata ug ubang magsusupak misulay pagbutang sa atong publikasyon diha sa ilang website aron hayloon ang mga Saksi ni Jehova ug ang uban. Gibutang sa maong mga website ang impormasyon nga magtanom ug pagduhaduha sa hunahuna sa mga magbabasa. (Sal. 26:4; Prov. 22:5) Ang uban naggamit ug materyal sa atong mga publikasyon o sa atong jw.org logo diha sa advertisement, mga produktong ibaligya, ug sa mga mobile device app. Pinaagi sa pagkuhag copyright and trademark protection, duna tay legal nga basehanan aron pahunongon kanang sayop nga paggamit. (Prov. 27:12) Pero kon tinuyo natong tugotan ang uban, bisan ang atong mga igsoon, nga i-post ang atong digital content sa ubang site o gamiton ang jw.org trademark sa pagpamaligya, basin dili mosuportar ang korte sa atong paningkamot nga pahunongon ang mga magsusupak ug mga negosyante  sa paggamit sa mga materyal sa atong website.

Peligroso ang pag-download sa atong mga publikasyon gikan sa ubang website gawas sa jw.org. “Ang matinumanon ug maalamong ulipon” lang ang gihatagan ni Jehova ug responsibilidad sa pagtaganag espirituwal nga pagkaon. (Mat. 24:45) Kana nga “ulipon” naggamit lang sa ilang opisyal nga mga website sa pagtaganag espirituwal nga pagkaon​—www.dan124.com, tv.dan124.com, ug wol.dan124.com. Ug duna lang tay tulo ka opisyal nga app para sa mga gadyet—​JW Language^®, JW Library^®, ug JW Library Sign Language^®. Makasalig ta nga kini nga mga website ug app walay advertisement ug wala mahugawi sa kalibotan ni Satanas. Kon ang espirituwal nga pagkaon mapasa sa laing paagi, dili ta makaseguro nga walay mausab o wala kini mahugawi.​—Sal. 18:26; 19:8.

Dugang pa, kon i-post nato ang atong mga publikasyon sa website nga puwedeng mag-comment ang uban, makahigayon ang mga apostata ug ubang kritiko sa pagtanom ug pagduhaduha sa organisasyon ni Jehova. Ang pipila ka igsoon nadani sa pagpakigdebate online ug nakahatag ug dugang pasipala sa ngalan ni Jehova. Ang online forum dili haom nga lugar para sa ‘malumong pagtudlo niadtong nagasupak.’ (2 Tim. 2:23-25; 1 Tim. 6:3-5) Namatikdan sab nga may pekeng mga social media account ug website nga nagdala sa ngalan sa atong organisasyon, sa Nagamandong Lawas, ug sa indibiduwal nga membro niini. Bisan pa niana, walay membro sa Nagamandong Lawas ang may personal nga Web page o account sa bisan unsang social media site.

Ang pagpahibalo sa mga tawo bahin sa jw.org makatabang sa pagpakaylap sa “maayong balita.” (Mat. 24:14) Padayong gipanindot ang atong mga digital tool para sa ministeryo. Gusto natong makabenepisyo ang tanan niini. Busa, sumala sa giingon sa Kondisyones sa Paggamit, puwede kang mag-email ug electronic copy sa usa ka publikasyon o mag-share ug link sa materyal nga gikan sa jw.org. Pinaagi sa pagpahibalo sa mga interesado bahin sa atong opisyal nga mga website, ato silang gigiyahan sa tinuod nga nagtaganag espirituwal nga pagkaon, “ang matinumanon ug maalamong ulipon.”