1. Unsang pagdasig ang gihatag ni Jehova panahon sa rebelyon sa Eden?

SUKAD makasala ang mga tawo ug nahimong dili hingpit, gipakita ni Jehova nga siya Diyos nga nagahatag ug pagdasig. Human dayon sa rebelyon sa Eden, gihatagan niya ang umaabot nga mga kaliwat ni Adan ug rason nga magmaisogon ug makabatog paglaom. Dihang masabtan na, ang tagna sa Genesis 3:15 maghatag sa katawhan ug paglaom nga sa ngadtongadto malaglag “ang orihinal nga halas,” si Satanas nga Yawa, ug mahanaw ang tanan niyang daotang buhat.​—Pin. 12:9; 1 Juan 3:8.

2. Giunsa pagdasig ni Jehova si Noe?

² Ang alagad ni Jehova nga si Noe nagpuyo sa dili diyosnong kalibotan diin ang mga membro lang sa iyang pamilya ang nagsimba kang Jehova. Kay kaylap kaayo ang kapintasan ug imoralidad, posibleng maluya si Noe. (Gen. 6:4, 5, 11; Jud. 6) Pero  gihatagan siya ni Jehova ug impormasyon nga naghatag niyag kaisog aron makalahutay sa ‘paglakaw uban sa Diyos.’ (Gen. 6:9) Giingnan ni Jehova si Noe nga laglagon Niya ang maong daotang kalibotan. Gihatagan sab siyag instruksiyon kon unsay kinahanglang buhaton aron maluwas ang iyang pamilya. (Gen. 6:13-18) Gipakita ni Jehova kang Noe nga Siya Diyos sa pagdasig.

3. Unsa nga pagdasig ang nadawat ni Josue? (Tan-awa ang hulagway sa sinugdan sa artikulo.)

³ Sa ulahi, si Josue may lisod kaayong asaynment​—ang paggiya sa katawhan sa Diyos ngadto sa Yutang Saad. Apil niini ang pagpildi sa puwersadong kasundalohan sa mga nasod nga nagpuyo nianang lugara. Si Josue may rason nga mahadlok. Kay nahibalo niini, gisugo ni Jehova si Moises sa pagdasig kang Josue. Ang Diyos miingon: “Itudlo si Josue ug dasiga siya ug palig-ona siya, tungod kay siya ang motabok nga magauna niining katawhan ug siya ang magpahinabo nga mapanunod nila ang yuta nga imong makita.” (Deut. 3:28) Sa wala pa himoa ni Josue ang iyang asaynment, gidasig siya ni Jehova: “Wala ba ako magsugo kanimo? Magmaisogon ug magmakusganon ka. Ayaw kakurat o kalisang, kay si Jehova nga imong Diyos magauban kanimo bisan diin ka moadto.” (Jos. 1:1, 9) Makapadasig kaayo nâ!

4, 5. (a) Unsa nga pagdasig ang gihatag ni Jehova sa iyang katawhan kaniadto? (b) Giunsa pagdasig ni Jehova ang iyang Anak?

⁴ Dili lang matag indibiduwal ang gidasig ni Jehova. Gidasig pod niya ang iyang katawhan ingong grupo. Sa tagna nga maghatag ug pagdasig sa mga Hudiyong nabihag sa Babilonya, si Jehova miingon: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.” (Isa. 41:10) Gipasaligan pod ang unang mga Kristohanon, ug mao man usab ang katawhan sa Diyos karon.​—Basaha ang 2 Corinto 1:3, 4.

⁵ Si Jesus nakadawat pod ug pagdasig gikan sa iyang Amahan. Human sa iyang bawtismo, nakadungog siyag tingog gikan sa langit nga nag-ingon: “Kini mao ang akong Anak, ang hinigugma, nga akong giuyonan.” (Mat. 3:17) Seguradong nakapalig-on kana kang Jesus sa iyang ministeryo dinhi sa yuta!

6. Sa unsang paagi makapadasig ang ilustrasyon bahin sa mga talanton?

⁶ Gisundog ni Jesus ang ehemplo sa iyang Amahan. Ang ilustrasyon bahin sa mga talanton, nga gihisgotan diha sa tagna ni Jesus bahin sa kataposan sa sistema sa mga butang, nagdasig sa iyang mga tinun-an nga magmatinumanon. Gipasidunggan sa agalon ang matag usa sa iyang matinumanong mga ulipon pinaagi sa pag-ingon: “Maayong pagkabuhat, maayo ug kasaligan nga ulipon! Kasaligan ka sa pipila ka butang. Igatudlo ko ikaw ibabaw sa daghang butang. Sulod sa kalipay sa imong agalon.” (Mat. 25:21, 23) Makapadasig gyod nâ nga padayong moalagad kang Jehova nga matinumanon!

7. Unsa nga pagdasig ang gihatag ni Jesus sa iyang mga apostoles, ilabina kang Pedro?

⁷ Ang mga apostoles ni Jesus sagad maglalis kon kinsay labaw kanila, pero sila mapailobong gidasig ni Jesus nga magpaubos ug mahimong mga sulugoon, dili mga amo. (Luc. 22:24-26) Gani, daghang higayon nga si Pedro nakapadismayar kang Jesus. (Mat. 16:21-23; 26:31-35, 75) Pero imbes isalikway si Pedro, si Jesus nagdasig kaniya ug  nagsugo pa gani niya nga palig-onon ang iyang mga igsoon.​—Juan 21:16.

8. Giunsa pagdasig ni Ezequias ang mga pangulo sa kasundalohan ug ang katawhan sa Juda?

⁸ Bisan niadtong wala pa moanhi sa yuta ang Anak ni Jehova ug maghatag ug hingpit nga ehemplo sa pagdasig, ang matinumanong mga alagad ni Jehova nahibalo na nga gikinahanglan ang pagdasig. Dihang gihulga sa mga taga-Asirya, gitigom ni Ezequias ang mga pangulo sa kasundalohan ug ang katawhan sa Juda sa pagdasig kanila. “Ug ang katawhan misalig sa [iyang] mga pulong.”​—Basaha ang 2 Cronicas 32:6-8.

9. Unsay gitudlo sa basahon sa Job bahin sa pagdasig?

⁹ Bisag nagkinahanglan siyag pagdasig, gitudloan ni Job ang iyang tulo ka “samokan nga mga maghuhupay” bahin sa pagdasig. Giingnan niya sila nga kon siya ang naa sa ilang kahimtang, iya silang ‘lig-onon pinaagi sa mga pulong sa iyang baba, ug ang paghupay sa iyang mga ngabil makapuypoy’ nila. (Job 16:1-5) Sa ulahi, si Job gidasig ni Elihu ug ni Jehova mismo.​—Job 33:24, 25; 36:1, 11; 42:7, 10.

10, 11. (a) Nganong nagkinahanglag pagdasig ang anak nga babaye ni Jepte? (b) Kinsa karon ang angayng hatagag samang pagdasig?

¹⁰ Ang laing pananglitan kaniadto nga nagkinahanglag pagdasig mao ang anak nga babaye ni Jepte. Sa wala pa makiggubat sa mga Ammonhanon, si Maghuhukom Jepte misaad nga kon padag-on siya ni Jehova, ihatag niya kang Jehova ang unang tawo nga mosugat niya human sa gubat aron sa pag-alagad sa sangtuwaryo. Ug nahitabo nga ang iyang bugtong anak nga babaye ang misugat niya sa pagselebrar sa iyang kadaogan. Nadugmok ang kasingkasing ni Jepte. Pero gituman niya ang iyang saad ug gipadala sa Shilo ang iyang ulay nga anak aron mag-alagad sa tabernakulo sa tibuok niining kinabuhi.​—Maghu. 11:30-35.

¹¹ Bisan pag lisod ni kang Jepte, mas lisod tingali ni sa iyang anak, kinsa kinabubut-ong mituman sa desisyon sa iyang amahan. (Maghu. 11:36, 37) Sa pagbuhat niana, iyang gisakripisyo ang iyang katungod sa pagminyo, pagpanganak, ug pagpreserbar sa ngalan ug panulondon sa pamilya. Busa, gikinahanglan gyod niya ang paghupay ug pagdasig. Ang Bibliya nag-ingon: “Kini nahimong regulasyon sa Israel: Sa matag tuig ang mga anak nga babaye sa Israel moadto sa pagpasidungog sa anak nga babaye ni Jepte nga Gileadnon, upat ka adlaw sa usa ka tuig.” (Maghu. 11:39, 40) Ang dili minyong mga Kristohanon nga naggamit sa ilang pagkatagsaanon aron mas mabuhat ang “mga butang sa Ginoo” angay pong hatagag komendasyon ug pagdasig.​—1 Cor. 7:32-35.

12, 13. Giunsa pagpalig-on ni Pedro ang iyang mga igsoon?

¹² Sa gabii unâ mamatay si Jesus, iyang giingnan si apostol Pedro: “Simon, Simon, tan-awa! mapugsanong gipangayo ni Satanas nga maangkon kamo aron sa pag-ayag kaninyo ingon sa trigo. Apan nangamuyo ako alang kanimo nga unta ang imong pagtuo dili moangka; ug ikaw, sa mahibalik ka na, palig-ona ang imong mga igsoon.”​—Luc. 22:31, 32.

¹³ Si Pedro maoy haligi sa unang Kristohanong kongregasyon. (Gal. 2:9) Gidasig niya ang iyang mga igsoon pinaagi sa iyang kaisog panahon sa Pentekostes ug human niana. Human sa daghang tuig nga  pag-alagad, siya misulat sa iyang mga isigka-Kristohanon. Gipatin-aw niya kon ngano: “Gisulatan ko kamo sa pipila ka pulong, aron sa paghatag ug pagdasig ug usa ka matinuorong pagpamatuod nga kini ang matuod nga dili-takos nga kalulot sa Diyos; nga niana barog kamo nga malig-on.” (1 Ped. 5:12) Ang mga sulat ni Pedro nakapadasig sa mga Kristohanon sa iyang panahon. Gikinahanglan gyod nato nâ nga pagdasig samtang nagpaabot ta sa katumanan sa mga saad ni Jehova!​—2 Ped. 3:13.

14, 15. Sa unsang paagi ang mga sinulat ni Juan nakadasig sa mga Kristohanon sa daghang katuigan?

¹⁴ Si apostol Juan haligi pod sa unang Kristohanong kongregasyon. Ang iyang makapainteres nga Ebanghelyo sa ministeryo ni Jesus nakapadasig sa mga Kristohanon sa daghang katuigan​—hangtod karon. Sa iyang Ebanghelyo lang mabasa ang gisulti ni Jesus nga ang gugma maoy ilhanan sa iyang tinuod nga mga tinun-an.​—Basaha ang Juan 13:34, 35.

¹⁵ Ang tulo ka sulat ni Juan naghatag ug dugang bililhon nga mga kamatuoran. Dihang mabug-atan ta tungod sa sala, dili ba makapahupayng mabasa nga “ang dugo ni Jesus . . . nagahinlo kanato gikan sa tanang sala”? (1 Juan 1:7) Ug kon padayon tang hasolon sa atong kasingkasing, dili ba mahupayan ta ug magmapasalamaton dihang atong mabasa nga “ang Diyos mas labaw kay sa atong mga kasingkasing”? (1 Juan 3:20) Si Juan lang ang nagsulat nga “ang Diyos gugma.” (1 Juan 4:8, 16) Ang iyang ikaduha ug ikatulong sulat naghatag ug komendasyon sa mga Kristohanon nga padayong “nagalakaw diha sa kamatuoran.”​—2 Juan 4; 3 Juan 3, 4.

16, 17. Unsa nga pagdasig ang gihatag ni Pablo sa unang mga Kristohanon?

¹⁶ Sa unang siglo, lagmit si Pablo ang apostol nga kinadaghanag nahimo sa pagdasig  sa iyang mga igsoon. Sa sayong bahin sa Kristiyanidad, kadaghanan sa mga apostoles nagpabilin sa Jerusalem, nga maoy lokasyon sa nagamandong lawas. (Buh. 8:14; 15:2) Ang mga Kristohanon sa Judea nagsangyaw bahin kang Jesus ngadto sa mga tawong nagtuo na sa usa ka Diyos tungod sa impluwensiya sa Judaismo. Sa laing bahin, gipadala si Pablo sa balaang espiritu aron sangyawan ang mga Grego, Romano, ug uban pa nga nagsimbag daghang diyos.​—Gal. 2:7-9; 1 Tim. 2:7.

¹⁷ Si Pablo miadto sa mga lugar nga nailhan karong Turkey, Greece, ug Italy. Siya nagsangyaw sa mga dili Hudiyo nianang mga lugara, nga nagtukod ug Kristohanong mga kongregasyon. Kining bag-ong mga Kristohanon “nag-antos usab diha sa mga kamot sa [ilang] kaugalingong mga katagilungsod” ug nagkinahanglag pagdasig. (1 Tes. 2:14) Niadtong mga 50 C.E., misulat si Pablo sa bag-ong kongregasyon sa Tesalonica: “Kami nagpasalamat kanunay sa Diyos sa dihang kami naghisgot kaninyong tanan sa among mga pag-ampo, kay kami walay-hunong nga nahinumdom sa inyong buhat sa pagtuo ug sa inyong mahigugmaong paghago ug sa inyong pag-antos.” (1 Tes. 1:2, 3) Gidasig pod niya sila sa pagpalig-on sa usag usa, nga nag-ingon: “Magpadayon sa paghupay sa usag usa ug sa paglinig-onay sa usag usa.”​—1 Tes. 5:11.

18. Giunsa pagdasig si Felipe sa unang siglong nagamandong lawas?

¹⁸ Ang unang siglong nagamandong lawas nagdasig sa mga nagapanguna ug sa mga Kristohanon sa katibuk-an. Dihang ang magwawaling si Felipe nagsangyaw bahin kang Kristo ngadto sa mga Samarianhon, iyang nadawat ang bug-os nga pagpaluyo sa nagamandong lawas. Gipadala nila ang duha sa ilang membro, si Pedro ug Juan, sa pag-ampo para sa bag-ong mga igsoon aron makadawat kini sa balaang espiritu. (Buh. 8:5, 14-17) Seguradong nadasig si Felipe ug ang bag-ong mga igsoon tungod sa pagpaluyo sa nagamandong lawas!

19. Unsay epekto sa sulat sa nagamandong lawas ngadto sa unang Kristohanong kongregasyon?

¹⁹ Sa ulahi, ang nagamandong lawas kinahanglang modesisyon kon angay bang magpatuli ang dili Hudiyong mga Kristohanon, sama sa gisugo sa mga Hudiyo diha sa Balaod ni Moises. (Buh. 15:1, 2) Sa giya sa balaang espiritu ug human susiha ang Kasulatan, ang responsableng mga brader midesisyon nga wala na ni kinahanglana, ug sila misulat sa mga kongregasyon bahin niini. Ang mga representante sa nagamandong lawas mao ang gipadala sa mga kongregasyon aron ihatod ang sulat. Unsay resulta? “Human kini mabasa, sila nagmaya maylabot sa maong pagdasig.”​—Buh. 15:27-32.

20. (a) Sa unsang paagi gidasig sa Nagamandong Lawas karon ang mga igsoon sa tibuok kalibotan? (b) Unsang pangutanaha ang tubagon sa sunod nga artikulo?

²⁰ Karon, ang Nagamandong Lawas sa mga Saksi ni Jehova nagdasig sa mga Bethelite, sa ubang special full-time servant, ug sa pagkatinuod, sa tanang tinuod nga Kristohanon sa tibuok kalibotan. Ug ang resulta sama pod sa unang siglo​—nagmalipayon tungod sa maong pagdasig! Dugang pa, niadtong 2015 gitagana sa Nagamandong Lawas ang brosyur nga Balik Kang Jehova, nga nakapadasig gyod sa daghan sa tibuok kalibotan. Pero ang nagapanguna lang ba ang kinahanglang mosundog kang Jehova sa paghatag ug pagdasig? Tubagon kana sa sunod nga artikulo.