SI Diana kapig 80 anyos na. Ang iyang bana may sakit nga Alzheimer ug pipila ka tuig nga nagpuyo sa nursing home una mamatay. Namatyan sab si Diana ug duha ka anak nga lalaki ug may breast cancer pod siya. Pero, mamatikdan sa mga igsoon nga pirmeng malipayon si Diana diha sa Kingdom Hall o sa ministeryo.

Si John nag-alagad ingong nagapanawng tigdumala sulod sa kapig 43 ka tuig. Ganahan kaayo siya ana nga pribilehiyo​—mao na kanay iyang kinabuhi! Pero miundang siya aron atimanon ang masakiton niyang paryente ug karon nag-alagad siya sa usa ka lokal nga kongregasyon. Dihang magkita si John ug ang iyang mga kaila kaniadto, tingali sa mga asembliya o kombensiyon, morag wala ra siya mausab. Malipayon gihapon siya.

Nganong malipayon si Diana ug John? Sa unsang paagi magmalipayon gihapon kadtong nag-antos sa emosyonal ug pisikal? Ug sa unsang paagi magmalipayon gihapon ang usa nga kinahanglang mobiya sa iyang pribilehiyo? Ang Bibliya nagtubag: “Ang matarong magamaya diha kang Jehova.” (Sal. 64:10) Mas masabtan nato kining importanteng kamatuoran kon atong mahibaloan kon unsay makahatag ug dumalayong kalipay ug kon unsay dili.

Seguradong nahibalo ka nga dunay pipila ka butang nga makahatag tingalig kalipay. Pananglitan, kanang magminyo ang nagkahigugmaay. O kaha dihang ang usa mahimo nang ginikanan o makadawat ug pribilehiyo. Ang maong mga butang makahatag ug kalipay kay gikan nâ kang Jehova. Siya ang nagsugod sa kaminyoon, naghatag natog katakos nga manganak, ug naghatag natog mga buluhaton pinaagi sa Kristohanong kongregasyon.​—Gen. 2:18, 22; Sal. 127:3; 1 Tim. 3:1.

Pero ang pipila ka hinungdan sa kalipay temporaryo lang. Makapasubo, ang usa ka kapikas mahimong magluib o mamatay. (Ezeq. 24:18; Os. 3:1) Ang pipila ka anak mosupak sa ilang ginikanan ug sa Diyos, tingali  ma-disfellow pa gani. Ang pagsimba sa mga anak nga lalaki ni Samuel dili dalawaton kang Jehova, ug ang sala ni David nagpahinabog kalisdanan sa iyang panimalay. (1 Sam. 8:1-3; 2 Sam. 12:11) Ang maong mga panghitabo makapaguol, dili gyod makapalipay.

Sa susama, ang mga pribilehiyo sa pag-alagad mahimong matapos, tingali tungod sa luyang panglawas, obligasyon sa pamilya, o kausaban sa organisasyon. Daghan niadtong nakasinati niana nga mga kausaban ang miingon nga gimingaw sila sa ilang pribilehiyo.

Dali ra natong masabtan nga ang maong mga hinungdan sa kalipay usahay temporaryo lang. Busa, duna bay klase sa kalipay nga dumalayon bisan pag moabot ang kalisdanan? Duna gyod, kay si Samuel, David, ug ang uban pa nakapabiling malipayon bisan pa sa kalisdanan.

Si Jesus nahibalo kon unsay tinuod nga kalipay. Sa didto pa siya sa langit, diin maayo pa ang kahimtang, siya ‘nagakalipay sa atubangan [ni Jehova] sa tanang panahon.’ (Prov. 8:30) Pero dihang dinhi na siya sa yuta, may mga higayon nga nakaatubang siyag grabeng kalisdanan. Bisan pa niana, nalipay siya sa pagtuman sa kabubut-on sa iyang Amahan. (Juan 4:34) Unsa poy nahitabo una sa iyang sakit nga kamatayon? Atong mabasa: “Tungod sa kalipay nga gibutang sa iyang atubangan siya nag-antos sa estaka sa pagsakit.” (Heb. 12:2) Busa duna tay maayong rason nga konsiderahon ang duha ka butang nga gisulti ni Jesus bahin sa tinuod nga kalipay.

Kas-a, 70 ka tinun-an ang mibalik kang Jesus gikan sa pagsangyaw. Lipay kaayo sila kay nakahimo silag milagrosong mga buhat, nakapalayas pa ganig mga demonyo. Pero giingnan sila ni Jesus: “Ayaw pagmaya tungod niini, nga ang mga espiritu nailalom kaninyo, apan pagmaya tungod kay ang inyong mga ngalan nahisulat na sa mga langit.” (Luc. 10:1-9, 17, 20) Oo, mas importante ang pag-uyon ni Jehova kay sa espesyal nga pribilehiyo. Dili niya kalimtan ang matinumanong mga tinun-an​—usa ka hinungdan sa tinuod nga kalipay.

Sa laing higayon, si Jesus nakigsulti sa panon. Usa ka babayeng Hudiyo nga nakadayeg kaayo sa pagpanudlo ni Jesus ang miingon nga seguradong malipayon kaayo ang  inahan niini. Pero giingnan siya ni Jesus: “Dili, hinuon, Malipayon kadtong nagapatalinghog sa pulong sa Diyos ug nagasunod niini!” (Luc. 11:27, 28) Kon ikapasigarbo nato ang atong mga anak, malipay ta; pero ang suod nga relasyon kang Jehova tungod sa pagkamatinumanon mas makahatag ug tinuod nga kalipay.

Oo, ang pagbati nga giuyonan ta ni Jehova mao ang makahatag ug tinuod nga kalipay. Bisag ang mga pagsulay dili makapalipay, dili ni makapawala niana nga pagbati. Sa kasukwahi, ang pagpabiling matinumanon maoy usa ka kadaogan nga moresulta sa tinuod nga kalipay. (Roma 5:3-5) Dugang pa, si Jehova maghatag sa iyang espiritu niadtong mosalig kaniya, ug ang kalipay maoy bahin sa bunga niini. (Gal. 5:22) Makatabang nâ kanato nga masabtan ang giingon sa Salmo 64:10: “Ang matarong magamaya diha kang Jehova.”

Mao nay hinungdan kon nganong si Diana ug John, nga gihisgotan sa sinugdan, nagmalipayon gihapon bisan pa sa kalisdanan. Si Diana miingon: “Midangop ko kang Jehova, sama sa bata nga midangop sa iyang ginikanan.” Sa unsang paagi niya gibati ang pag-uyon sa Diyos? “Gibati nako nga gipanalanginan ko niya kay regular kong makasangyaw nga malipayon.” Si John, nga aktibo gihapon sa ministeryo bisag wala na sa nagapanawng buluhaton, misulti kon unsay nakatabang pag-ayo niya: “Sukad niadtong 1998, dihang instruktor ko sa Ministerial Training School, mas daghan kog gihimong personal nga pagtuon.” Miingon siya nga ang panglantaw nilang magtiayon sa pag-alagad kang Jehova bisag unsay pribilehiyo, nakatabang nila nga makaadyas dayon. Siya midugang: “Wala gyod mi magmahay.”

Daghan pod ang nakaeksperyensiya nga tinuod ang giingon sa Salmo 64:10. Sama pananglitan sa usa ka magtiayon nga nakaalagad sa Bethel sa United States sa kapig 30 ka tuig. Dayon, giasayn sila ingong espesyal payunir. Sila miingon: “Natural lang nga maguol ka kon mawala ang butang nga imong gimahal.” Pero sila midugang: “Dili puwedeng magsige na lang kag kaguol.” Misangyaw dayon sila uban sa kongregasyon. Miingon sab ang magtiayon: “Nag-ampo mi bahin sa pipila ka espesipikong butang. Dayon, dihang gitubag ang among pag-ampo, nadasig mi ug nalipay. Wala madugay human sa pag-abot namo sa maong kongregasyon, daghan ang nagsugod pagpayunir, ug gipanalanginan mi ug duha ka progresibong Bible study.”

Tinuod, dili sayon ang pagpabiling malipayon, ug may mga higayon nga maguol ta. Pero si Jehova nagpasalig nato pinaagi sa mga pulong sa Salmo 64:10. Bisag usahay madismayar ta, makasalig ta nga kadtong napamatud-ang “matarong” pinaagi sa pagpabiling matinumanon bisan pa sa kausaban sa kahimtang “magamaya diha kang Jehova.” Dugang pa, makalaom ta sa katumanan sa gisaad ni Jehova nga “bag-ong mga langit ug usa ka bag-ong yuta.” Dayon, bug-os nga mawala ang pagkadili-hingpit. Ang tanang katawhan sa Diyos ‘magsadya ug maglipay hangtod sa kahangtoran’ tungod sa iyang himoon ug itagana.​—Isa. 65:17, 18.

Hunahunaa ang mahitabo unya: matagamtam nato ang hingpit nga panglawas, ug lagsik ta inigmata nato kada adlaw. Bisag daghan tag kalisdanan sa nangagi, dili na kini makaapektar nato. Gipasaligan ta nga “ang unang mga butang dili na pagahinumdoman, ni kini sila motungha pa sa kasingkasing.” Pinaagi sa pagkabanhaw, makauban nato pag-usab ang atong mga minahal nga nangamatay. Bation sa daghan ang gibati sa ginikanan sa 12 anyos nga dalagita dihang siya gibanhaw ni Jesus: “Sila nalipay pag-ayo.” (Mar. 5:42) Dayon, ang tanang tawo sa yuta mahimo nang tinuod nga “matarong” ug “magamaya diha kang Jehova” hangtod sa hangtod.