1, 2. Unsang kausaban ang posible, ingon sa gipakita sa eksperyensiya sa usa ka estudyante?

ANG usa ka estudyante nga ginganlag Tony gusto nang moundang sa hayskul. Wala siyay amahan, ug dili siya ganahang moeskuyla. Kada Sabado ug Dominggo motan-aw siyag sine o kaha makig-uban sa iyang mga higala. Dili siya bayolente, ug dili siya adik, pero walay direksiyon ang iyang kinabuhi. Ug nagduhaduha siya kon duna bay Diyos. Dayon nakaila niya ang usa ka magtiayong Saksi ug gisulti niya kanila ang iyang mga pagduhaduha. Gihatagan nila siya ug duha ka brosyur, ang The Origin of Life​—Five Questions Worth Asking ug Gilalang ba ang Kinabuhi?

² Pagbalik sa magtiayon, nausab na ang panglantaw ni Tony. Gitun-an diay niya pag-ayo ang mga brosyur maong nakusnot na ni ug daghan nag pinil-an. “Duna gyoy Diyos,” matod niya. Nagpa-Bible study siya, ug anam-anam nga nabag-o ang iyang panglantaw. Nahimo pod siyang usa sa kinahaworang mga estudyante sa ilang eskuylahan. Bisan ang prinsipal, kinsa nahibalo sa bag-ong tinuohan ni Tony, natingala sab. “Dako kaayo ang kausaban sa imong panglantaw ug mitaas pod ang imong mga grado,” matod sa prinsipal. “Tungod ba nâ sa imong pagpakig-uban sa mga Saksi ni Jehova?” Mitando si Tony ug dayon gisangyawan niya ang  prinsipal. Nakagraduwar siya sa hayskul ug karon siya regular payunir na ug ministeryal. Nalipay sab siya nga duna na siyay mahigugmaong Amahan, si Jehova.​—Sal. 68:5.

3. Unsay tambag ni Jehova kaninyong mga batan-on?

³ Ang eksperyensiya ni Tony nagpahinumdom nato nga interesado kaayo si Jehova ninyong mga batan-on. Gusto niyang matagamtam ninyo ang malamposon ug malipayong kinabuhi. Busa nagtambag siya: ‘Hinumdomi ang inyong Dakong Maglalalang sa mga adlaw sa inyong pagkabatan-on.’ (Eccl. 12:1) Dili nâ sayon, pero posible. Sa tabang sa Diyos, molampos mo, dili lang panahon sa inyong pagkabatan-on kondili sa tibuok ninyong kinabuhi. Aron mas masabtan kana, konsideraha kon unsay atong makat-onan sa pagsakop sa mga Israelinhon sa Yutang Saad ug sa pagpakig-away ni David kang Goliat.

4, 5. Unsang importanteng leksiyon ang atong makat-onan sa pagsakop sa mga Israelinhon sa Canaan ug sa pagpakig-away ni David kang Goliat? (Tan-awa ang mga hulagway sa sinugdan sa artikulo.)

⁴ Dihang hapit nang mosulod ang mga Israelinhon sa Yutang Saad, wala sila sugoa sa Diyos nga magbansay alang sa gubat. (Deut. 28:1, 2) Hinunoa, giingnan niya sila nga kinahanglan nilang sundon ang iyang mga sugo ug mosalig niya. (Jos. 1:7-9) Sa tawhanong panglantaw, morag dili maayo ang maong tambag! Pero, mao kadto ang kinamaayohang tambag. Balikbalik nga gitabangan ni Jehova ang iyang katawhan nga magmadaogon batok sa mga Canaanhon. (Jos. 24:11-13) Oo, ang pagsunod sa Diyos nagkinahanglag pagtuo, pero ang maong pagtuo kanunayng moresultag kalamposan. Tinuod nâ kaniadto, ug mao man usab karon.

⁵ Si Goliat usa ka gamhanang manggugubat nga 2.9 metros (9.5 ka piye) ang gitas-on ug armado kaayo. (1 Sam. 17:4-7) Hinunoa, ang kang David lambuyog lang ug pagtuo sa iyang Diyos, si Jehova. Para niadtong kulag pagtuo, kabuangan ang gihimo ni David. Pero nasayop sila! Si Goliat ang buangbuang.​—1 Sam. 17:48-51.

6. Unsay atong hisgotan niining artikuloha?

⁶ Ang miaging artikulo naghisgot sa upat ka butang nga makatabang nato nga mahimong malipayon ug malamposon. Mao ni ang pagtagbaw sa atong espirituwal nga panginahanglan, pag-apresyar sa mga higala nga gihatag sa Diyos, pagkab-ot ug mapuslanong mga tumong, ug pagpabili sa atong kagawasan ingong katawhan sa Diyos. Maghisgot pa tag dugang bahin niini pinaagi sa pagkonsiderar sa pipila ka prinsipyo diha sa Salmo 16.

7. (a) Unsa ang tawong espirituwal? (b) Unsa ang “bahin” ni David, ug unsay epekto niini kaniya?

⁷ Ang tawong espirituwal may pagtuo sa Diyos ug nagsundog sa Iyang panghunahuna. Magpagiya siya sa Diyos ug determinadong mosunod Kaniya. (1 Cor. 2:12, 13) Maayong ehemplo niana si David. Siya miawit: “Si Jehova mao ang bahin sa akong kabilin ug sa akong kopa.” (Sal. 16:5) Ang maong “bahin” nag-apil sa suod nga relasyon ni David sa Diyos, kang kinsa siya midangop. (Sal. 16:1) Unsay resulta? ‘Ako nagmalipayon,’ siya misulat. Oo, nakapalipay pag-ayo kang David ang iyang suod nga relasyon sa Diyos.​—Basaha ang Salmo 16:9, 11.

8. Unsay makahatag ug tinuod nga katagbawan?

⁸ Ang kalipay nga gibati ni David dili matagamtam niadtong nagpokus sa kalingawan ug bahandi. (1 Tim. 6:9, 10) Matod pa sa usa ka brader sa Canada: “Ang tinuod nga katagbawan wala maggikan sa kon unsay mapahimuslan nato sa atong kinabuhi, kondili sa  kon unsay atong gihatag ngadto sa Tighatag sa tanang maayong regalo, si Jehova nga Diyos.” (Sant. 1:17) Oo, ang pagpalig-on sa imong pagtuo kang Jehova ug pag-alagad kaniya mao ang makahatag nimog tinuod nga katagbawan. Sa unsang paagi molig-on ang imong pagtuo? Kinahanglang mogahin kag panahon uban niya, ingnon ta, pinaagi sa pagbasa sa iyang Pulong, pagpaniid sa iyang mga linalang, ug paghunahuna sa iyang mga hiyas​—apil ang iyang gugma kanimo.​—Roma 1:20; 5:8.

9. Sa unsang paagi ang Pulong sa Diyos mag-impluwensiya nimo?

⁹ Usahay, ipakita sa Diyos ang iyang gugma pinaagi sa pagtul-id nato, sama nianang buhaton sa usa ka amahan. Gipabilhan kana ni David. Siya miingon: “Dayegon ko si Jehova, nga naghatag ug tambag kanako. Sa pagkatinuod, sa mga panahon sa kagabhion ang akong mga rinyon nagtul-id kanako.” (Sal. 16:7) Oo, gipalandong niya ang mga hunahuna sa Diyos, gisundog kini ug nagpaimpluwensiya niini. Kon buhaton nâ nimo, mas modako sab ang imong gugma sa Diyos ug ang tinguha nga sundon siya. Mohamtong pod ka sa espirituwal. Ang sister nga si Christin miingon: “Kon mag-research ko ug mamalandong sa akong nabasa, bation nako nga kini gipasulat ni Jehova para nako!”

10. Sumala sa Isaias 26:3, unsay mga kaayohan kon mahunahunaon ka sa espirituwal?

¹⁰ Dili paghinobra ang pag-ingon nga ang pagkamahunahunaon sa espirituwal maghatag sab nimog talagsaong kahibalo ug pagsabot. Kay pinaagi niana, masundog nimo ang panglantaw sa Diyos bahin sa kalibotan ug sa umaabot niini. Nganong gihatagan ka sa Diyos sa maong kahibalo ug pagsabot? Gusto niyang magtakda kag mga prayoridad, makahimog maayong mga desisyon, ug makalantaw sa umaabot nga masaligon. (Basaha ang Isaias 26:3.) Ang brader nga si Joshua, nga taga-United States, miingon: “Kon suod ka kang Jehova, mahibaloan nimo kon unsay importante ug dili.” Tinuod nâ, ug makapatagbaw gyod kana!

11. Sa unsang paagi gipili ni David ang iyang mga higala?

¹¹ Basaha ang Salmo 16:3. Nahibalo si David kon unsaon pagpangitag tinuod nga mga higala. Siya ‘nalipayng’ makig-uban niadtong nahigugma kang Jehova. Gitawag niya silang “mga balaan,” kay sila hinlo sa moral ug matarong. Mao sab nay gibati sa laing salmista bahin sa iyang gipili nga mga higala. Siya misulat: “Kauban ako sa tanan nga nahadlok kanimo, ug sa mga nagatuman sa imong mga sugo.” (Sal. 119:63) Sa ato nang nahisgotan sa miaging artikulo, makakita sab kag daghang maayong higala taliwala niadtong nahadlok ug nagsunod kang Jehova. Siyempre, dili kadtong parehas lang nimog edad ang imong pilion.

12. Nganong nagkasuod si David ug Jonatan?

¹² Dili lang ang parehas niyag edad ang gipili ni David nga higalaon. Nahinumdom ka ba sa suod niyang higala nga “halangdon”? Siya si Jonatan. Gani, sa rekord sa Bibliya, ang ilang panaghigalaay maoy usa sa labing talagsaon. Pero, nahibalo ka ba nga si Jonatan magulang kang David ug mga 30 anyos? Busa, nganong suod kaayo sila? Tungod kana sa ilang pagtuo sa Diyos, pagtahod sa usag usa, ug sa ilang maisogong pagpakiggubat sa mga kaaway sa Diyos.​—1 Sam. 13:3; 14:13; 17:48-50; 18:1.

13. Unsay imong buhaton aron modaghan ang imong higala? Paghatag ug pananglitan.

¹³ Sama kang David ug Jonatan, ‘malipay’ pod ta kon higugmaon nato ang nahigugma ug nagpakitag pagtuo kang Jehova. Si Kiera, nga nag-alagad sa Diyos sa daghang katuigan, miingon: “Nakighigala ko sa mga igsoon nga lainlaig kagikan ug kultura.” Kon buhaton  nâ nimo, makita nimo nga makapahiusa gyod ang Pulong sa Diyos ug ang balaang espiritu.

14. (a) Unsay makatabang nimo sa paghimog mapuslanong mga tumong? (b) Unsay gibati sa pipila ka batan-on bahin sa paghimog mga tumong?

¹⁴ Basaha ang Salmo 16:8. Si David nagpokus sa pag-alagad sa Diyos. Magmalipayon sab ka kon unahon nimo ang pag-alagad kang Jehova ug mag-apil kaniya diha sa imong mga tumong. Ang brader nga si Steven miingon: “Nakahatag nakog katagbawan ang pagpaningkamot nga makab-ot ang usa ka tumong ug paghunahuna sa akong pag-uswag.” Usa ka batan-ong brader nga taga-Germany ug karon nag-alagad sa laing nasod miingon: “Dihang matigulang na ko, dili ko malipayng handomon ang akong pagkabatan-on kon pulos para sa kaugalingon lang ang akong gibuhat.” Hinaot mao pod nay imong gibati. Kon mao, gamita ang imong mga katakos sa pagpasidungog sa Diyos ug pagtabang sa uban. (Gal. 6:10) Paghimog espirituwal nga mga tumong, ug pag-ampo kang Jehova nga tabangan kang makab-ot kana. Malipay siyang tubagon ang maong mga pag-ampo.​—1 Juan 3:22; 5:14, 15.

15. Unsang mga tumong ang puwede nimong kab-oton? (Tan-awa ang kahong “ Pipila ka Praktikal nga Tumong.”)

¹⁵ Unsang mga tumong ang puwede nimong kab-oton? Mahimong mag-apil nâ sa pagkomento gamit ang kaugalingong mga pulong, pagpayunir, o pagboluntaryo sa Bethel. Puwede kang magtuon ug laing pinulongan aron makaalagad sa teritoryo nga nagsulti ana. Si Barak, nga usa ka batan-ong payunir, miingon: “Nindot kaayo ang akong bation inigmata nako kada adlaw kay nahibalo ko nga ihatag nako kang Jehova ang tibuok nakong kusog. Walay laing buluhaton nga makahatag ug samang kalipay.”

16. Unsay pagbati ni David sa mga sukdanan ni Jehova, ug ngano?

¹⁶ Basaha ang Salmo 16:2, 4. Sa ato nang nahisgotan sa miaging artikulo, ang mga balaod ug prinsipyo sa Diyos maghatag natog kagawasan pinaagi sa pagtabang nato nga higugmaon ang maayo ug dumtan ang daotan. (Amos 5:15) Giila ni David si Jehova ingong  iyang tinubdan sa pagkamaayo. Ang pagkamaayo maoy pagkaekselente sa moralidad, o panggawi. Si David naningkamot sa pagsundog sa pagkamaayo sa Diyos. Nakakat-on sab siya nga dumtan ang gidumtan sa Diyos. Apil ana ang idolatriya, nga nagpakaulaw sa tawo ug naghimaya sa uban imbes kang Jehova.​—Isa. 2:8, 9; Pin. 4:11.

17, 18. (a) Sumala kang David, unsay resulta sa bakak nga pagsimba? (b) Nganong midaghan ang kasakit sa mga tawo karon?

¹⁷ Sa kapanahonan sa Bibliya, ang bakak nga pagsimba sagad nag-apil ug seksuwal nga imoralidad. (Os. 4:13, 14) Segurado nga ang maong pagsimba nagtagbaw sa unodnong tinguha. Pero wala kadto makahatag ug tinuod nga kalipay. Si David miingon nga modaghan ang kasakit niadtong mosunod sa laing diyos. Daghan pong bata ang gisakripisyo tungod niana. (Isa. 57:5) Gidumtan gyod ni Jehova ang ilang kawalay-kaluoy! (Jer. 7:31) Kon nabuhi ka niadtong panahona, seguradong mapasalamaton kaayo ka kon ang imong ginikanan matinumanon kang Jehova.

¹⁸ Sagad gikonsentir sab karon sa bakak nga pagsimba ang seksuwal nga imoralidad, bisan ang homoseksuwalidad. Pero, mao ra gihapon ang resulta sa ilang pagpatuyang nianang gituohan nilang moral nga kagawasan. (1 Cor. 6:18, 19) Lagmit namatikdan nimo nga midaghan ang ilang kasakit. Busa mga batan-on, paminaw sa inyong langitnong Amahan. Magmasaligon nga makahatag ninyog kaayohan ang pagsunod kaniya. Hinumdomi nga balewala ra ang temporaryong kalipay nga inyong bation tungod sa kadaot nga resulta sa pagpakasala. (Gal. 6:8) Si Joshua, nga gihisgotan ganina, miingon: “Magamit nato ang atong kagawasan sa bisan unsang paagi nga gusto nato, pero dili gyod makapalipay ang sayop nga paggamit niana.”

19, 20. Unsang mga panalangin ang madawat sa mga batan-on nga matinumanon kang Jehova?

¹⁹ Si Jesus miingon: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.” (Juan 8:31, 32) Ang maong kagawasan nag-apil sa kagawasan gikan sa bakak nga relihiyon, kakulag kahibalo, ug patuotuo. Ug dili kay kana ra. Sa nahisgotan na, sa umaabot mag-apil kana sa “mahimayaong kagawasan sa mga anak sa Diyos.” (Roma 8:21) Bisan karon matagamtam ninyo ang maong kagawasan kon ‘magpabilin kamo sa pulong’ sa Kristo, o sa iyang mga pagtulon-an. Nianang paagiha, kamo “mahibalo sa kamatuoran” dili lang pinaagi sa pagtuon niini kondili sa pagpadapat sab niini.

²⁰ Mga batan-on, pabilhi ang kagawasan nga gihatag sa Diyos kaninyo. Gamita ang maong kagawasan sa maalamong paagi kay makatabang nâ ninyo sa paghimog maayong mga desisyon nga makahatag ninyog maayong kaugmaon. Usa ka batan-ong brader miingon: “Ang maalamong paggamit sa kagawasan samtang batan-on pa makatabang gyod kon sa umaabot kinahanglan kang mohimog seryosong mga desisyon, sama sa pagpangitag haom nga trabaho o sa pagdesisyon kon magminyo ba o kaha magpabilin usang tagsaanon.”

21. Sa unsang paagi makapabilin ka diha sa dalan sa “tinuod nga kinabuhi”?

²¹ Niining daang sistema, bisan ang gitawag ug maayong kinabuhi walay kasegurohan ug mubo ra. Wala ta mahibalo kon unsay naa sa ugma. (Sant. 4:13, 14) Busa, maalamon gyod nga magpabilin diha sa dalan nga motultol sa “tinuod nga kinabuhi”​—kinabuhing walay kataposan. (1 Tim. 6:19) Siyempre, dili ta pugson sa Diyos nga mosubay nianang dalana. Kita ang modesisyon. Himoa si Jehova nga imong “bahin.” Pabilhi ang daghang “maayong butang” nga gihatag niya kanimo. (Sal. 103:5) Ug magmasaligon nga magmalipayon ka hangtod sa hangtod.​—Sal. 16:11.