Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Unsay pamatuod sa Bibliya nga dunay empatiya ang Diyos kanato?

Dihang naulipon ang mga Israelinhon sa Ehipto, ang Diyos nahibalo sa ilang kalisdanan ug mibati sa ilang kasakit. (Ex. 3:7; Isa. 63:9) Gihimo ta sa larawan sa Diyos, ug makapakita pod tag empatiya. Gipakitaan ta niyag empatiya bisan pa tingalig mobati tang dili takos sa iyang gugma.​—wp18.3, p. 8-9.

Sa unsang paagi ang pagtulon-an ni Jesus makapildi sa diskriminasyon?

Daghang Hudiyo sa panahon ni Jesus ang may diskriminasyon. Gipasiugda sa Kristo ang kaimportante sa pagpaubos ug gisaway niya ang garbo sa rasa. Gidasig niya ang iyang mga sumusunod nga isipon ang usag usa ingong igsoon.​—w18.06, p. 9-10.

Unsay atong makat-onan sa wala pagtugot sa Diyos kang Moises sa pagsulod sa Yutang Saad?

Si Moises suod kang Jehova. (Deut. 34:10) Sa hapit nang matapos ang 40 ka tuig nga panaw sa kamingawan, ang katawhan mireklamo sa ikaduhang higayon kay walay tubig. Ang Diyos nagsugo kang Moises nga sultian ang bato. Pero, gihapak hinuon niya ang bato. Tingali nasuko si Jehova kang Moises kay wala sunda niini ang Iyang instruksiyon o kaha wala ihatag ni Moises ang pagdayeg ngadto sa Diyos tungod sa maong milagro. (Num. 20:6-12) Kini nagtudlo nato sa kaimportante sa pagsunod kang Jehova ug paghatag kaniya sa pagdayeg.​—w18.07, p. 13-14.

Nganong posibleng masayop ta kon mohukom ta base sa makita?

May tulo ka butang diin maimpluwensiyahan ta sa atong makita: Rasa o kultura, bahandi, ug edad. Importanteng lantawon nato ang uban nga walay pagpihig, sama sa Diyos! (Buh. 10:34, 35)​—w18.08, p. 8-12.

Unsa ang pipila ka paagi nga makatabang ang tigulang nga mga igsoon?

Ang tigulang nga igsoon nga nakadawat ug bag-ong asaynment gipabilhan gihapon sa Diyos ug makatabang sa uban. Puwede siyang motabang sa mga dili Saksing kapikas ug sa mga dili aktibo, modumalag mga pagtuon sa Bibliya, ug mopauswag sa iyang ministeryo.​—w18.09, p. 8-11.

Unsay makita sa mga Kristohanon diha sa Teaching Toolbox?

Dunay mga contact card ug imbitasyon. Makita pod ang walo ka maayong pagkadisenyo nga tract ug mga magasing Bantayanang Torre ug Pagmata! Duna sab ni pipila ka brosyur, duha ka pang-Bible study nga libro, ug upat ka mapuslanong video, apil ang Nganong Tun-an ang Bibliya?​—w18.10, p. 16.

Sa unsang paagi ‘mapalit ang kamatuoran,’ ingon sa giawhag sa Proverbio 23:23?

Dili nato bayrag kuwarta ang kamatuoran. Pero kinahanglan tang mogahig panahon ug maningkamot aron mabatonan kini.​—w18.11, p. 4.

Unsay atong makat-onan sa pagpakiglabot ni Oseas sa iyang asawang si Gomer?

Si Gomer balikbalik nga nanapaw, pero gipasaylo siya ni Oseas ug wala diborsiyohi. Kon ang kapikas sa usa ka Kristohanon nakahimog seksuwal nga imoralidad, ang inosenteng kapikas puwedeng mopasaylo niya. Kon magdulog silag balik, wala nay Kasulatanhong basehanan para sa diborsiyo.​—w18.12, p. 13.