1. Unsang mga problema ang kinahanglan natong antoson, pero nganong malipay man si Jehova sa iyang matinumanong mga alagad? (Tan-awa ang mga hulagway sa sinugdan sa artikulo.)

SA INYO nang nahibaloan, dili sayon ang kinabuhi niining sistemaha sa mga butang. Daghan ninyo minahal nga mga igsoon ang nag-antos sa grabeng sakit. Ang pipila, bisag edaran na, nag-atiman sa tigulang nga mga paryente. Samtang ang uban naglisod sa pagtagana, dili sa mga luho, kondili bisan sa pangunang panginahanglan sa ilang pamilya. Ug nahibalo mi nga daghan ang nag-atubang, dili lang usa, kondili ubay-ubayng problema sa samang higayon! Gawas sa dakong galastohan, kini nagkinahanglag dakong panahon ug kusog. Bisan pa niana, lig-on ang inyong pagsalig sa mga saad sa Diyos ug ang inyong pagtuo sa mas maayong kaugmaon. Seguradong nalipay si Jehova niana!

2. Nganong makapadasig nato ang Isaias 40:29, pero unsang seryosong sayop ang basin mahimo nato?

² Apan, mibati ka ba usahay nga dili na nimo maantos ang mga problema? Kon mao, wala ka mag-inusara. Gipakita sa Bibliya nga ang matinumanong mga alagad kaniadto sagad mobati nga dili na sila makalahutay. (1 Hari 19:4; Job 7:7) Pero, imbes mosurender,  sila nangayog kusog kang Jehova. Wala sila pakyasa, kay ang atong Diyos “naghatag ug gahom sa gikapoy.” (Isa. 40:29) Ikasubo, gibati sa pipila ka alagad sa Diyos karon nga aron maantos nila ang mga problema ‘mopahulay unâ sila sa pag-alagad,’ nga daw kabug-at ang pag-alagad imbes panalangin. Busa, mohunong sila sa pagbasa sa Pulong sa Diyos, pagtambong sa mga tigom, ug pagsangyaw​—nga mao gyoy gilaoman ni Satanas nga ilang buhaton.

3. (a) Unsay atong buhaton aron dili molampos si Satanas sa pagpaluya kanato? (b) Unsay atong hisgotan niining artikuloha?

³ Nahibalo ang Yawa nga kon aktibo ta sa pag-alagad, kita mas molig-on, ug dili niya gustong mahitabo kana. Busa, kon kapoyon ka ug maguol, ayawg pahilayo kang Jehova. Pakigsuod pag-ayo kaniya, kay ‘siya magpalig-on kanimo, siya magpakusgan kanimo.’ (1 Ped. 5:10; Sant. 4:8) Niining artikuloha, atong hisgotan ang duha ka situwasyon nga mahimong makapaluya nato sa pag-alagad ug kon sa unsang paagi ang pagpadapat sa mga prinsipyo sa Bibliya makatabang nato sa paglahutay. Pero, hisgotan unâ nato ang katakos ni Jehova sa pagpalig-on kanato, ingon sa gipakita sa Isaias 40:26-31.

4. Unsay atong makat-onan sa Isaias 40:26?

⁴ Basaha ang Isaias 40:26. Walay nakaihap sa tanang bituon sa uniberso. Ang mga siyentipiko nagtuo nga dunay mga 400 ka bilyong bituon sa ato pa lang galaksiyang Milky Way. Bisan pa niana, ginganlan ni Jehova ang matag bituon. Unsay atong makat-onan niini? Kon gipabilhan ni Jehova ang way kinabuhing linalang, hunahunaa kon unsay iyang pagbati nimo kinsa nag-alagad kaniya, dili tungod kay obligado ka, kondili kay gihigugma nimo siya! (Sal. 19:1, 3, 14) Ang atong minahal nga Amahan nakaila gayod kanimo. ‘Ang mismong mga buhok sa imong ulo giihap [niya] ang tanan.’ (Mat. 10:30) Ug ang salmista nagpasalig kanato: “Si Jehova nahibalo sa mga adlaw sa mga walay-ikasaway.” (Sal. 37:18) Oo, nahibalo siya sa matag pagsulay nga imong giatubang, ug makahatag siyag kusog aron makalahutay ka niana.

5. Nganong makaseguro ta nga makahimo si Jehova sa pagpalig-on nato?

⁵ Basaha ang Isaias 40:28. Si Jehova ang Tuboran sa dinamikong kusog. Pananglitan, tagda ang gidaghanon sa enerhiya nga gihatag niya sa atong Adlaw pa lang. Si David Bodanis nga usa ka magsusulat bahin sa siyensiya nag-ingon: “Ang gidaghanon sa enerhiya nga ipagula sa atong Adlaw matag segundo katumbas sa [binilyong atomikong] bomba.” Ang laing siyentipiko nagbanabana nga ang enerhiya nga ipagawas sa adlaw sa usa lang ka segundo igo nang makatagana sa enerhiya nga gikinahanglan sa tanang tawo sulod sa 200,000 ka tuig! Segurado nga si Jehova, kinsa naghatag ug enerhiya sa adlaw, makahatag natog kusog sa pag-atubang sa bisan unsang problema.

6. Sa unsang paagi gaan ang yugo ni Jesus, ug unsay epekto niana kanato?

⁶ Basaha ang Isaias 40:29. Makapalipay kaayo ang pag-alagad kang Jehova. Si Jesus miingon sa iyang mga tinun-an: “Isangon diha kaninyo ang akong yugo.” Ug siya midugang: “Kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.” (Mat. 11:28-30) Tinuod gayod kana! Usahay, gikapoy tingali ta dihang motambong sa tigom o mosangyaw. Apan unsay atong bation inig-uli nato? Kita marepreskohan ug mas andam nang moatubang sa mga problema. Gaan gayod ang yugo ni Jesus!

7. Paghisgot ug eksperyensiya nga nagpakitang tinuod ang giingon sa Mateo 11:28-30.

 ⁷ Usa ka sister nga tawgon natog Kayla nag-antos sa chronic fatigue syndrome (sobrang kakapoy sa lawas), depresyon, ug grabeng sakit sa ulo. Busa, malisdan siya usahay sa pagtambong sa tigom. Apan, human siya maningkamot sa pagtambong sa usa ka tigom, siya misulat: “Ang pakigpulong naghisgot bahin sa kaluya sa emosyon. Ang impormasyon gipresentar sa mabination kaayong paagi maong nakahilak ko. Nagpahinumdom ni nako nga kinahanglan kong motambong sa tigom.” Nalipay kaayo siya nga naningkamot siya sa pagtambong!

8, 9. Unsay gipasabot ni Pablo dihang siya misulat: “Dihang ako maluya, ako gamhanan hinuon”?

⁸ Basaha ang Isaias 40:30. Bisag daghan tingali tag katakos, limitado ra ang atong mahimo sa kaugalingon natong kusog. Butang kana nga angay natong makat-onan. Bisag may katakos si apostol Pablo, siya may mga limitasyon nga nakapugong niya sa pagbuhat sa tanang gusto niyang buhaton. Dihang gisulti niya sa Diyos ang iyang gibati, siya giingnan: “Ang akong gahom ginahingpit diha sa kaluyahon.” Nasabtan ni Pablo ang punto. Siya miingon: “Dihang ako maluya, ako gamhanan hinuon.” (2 Cor. 12:7-10) Unsa may iyang gipasabot?

⁹ Nahibalo si Pablo nga limitado lang ang iyang mahimo kon walay tabang sa Diyos. Ang balaang espiritu sa Diyos makahatag sa kusog nga gikinahanglan ni Pablo. Dili kay kana ra. Ang espiritu sa Diyos makatabang kang Pablo sa paghimo sa mga butang nga dili niya mapalampos sa iyang kaugalingong kusog. Mao man usab kanato. Kon hatagan ta ni Jehova ug kusog, molig-on gyod ta!

10. Giunsa pagtabang ni Jehova si David sa paglahutay sa mga problema?

¹⁰ Ang salmistang si David kadaghan nga gipalig-on sa Diyos pinaagi sa balaang espiritu. Siya miawit: “Pinaagi kanimo makaasdang ako batok sa usa ka pundok sa mga bandido; ug pinaagi sa akong Diyos makakatkat ako ug paril.” (Sal. 18:29) Dunay pipila ka paril​—mga problema—​nga dili nato ‘makatkat’ sa atong kaugalingong kusog; gikinahanglan nato ang tabang ni Jehova.

11. Sa unsang paagi ang balaang espiritu makatabang nato sa paglahutay sa atong mga problema?

¹¹ Basaha ang Isaias 40:31. Ang agila dili makalupad ug lagyong distansiya kon magdepende sa kaugalingong kusog. Ang init nga hangin makapasaka sa agila ug pinaagi niana, makadaginot siyag enerhiya. Busa, kon hatagan kag lisod nga asaynment, hinumdomi ang agila. Hangyoa si Jehova nga hatagan kag dugang kusog pinaagi sa “magtatabang, ang balaang espiritu.” (Juan 14:26) Ikalipay nga makapangayo ta niana bisag unsang orasa nga gikinahanglan nato kana. Ug ilabina tingaling magkinahanglan tag tabang sa Diyos kon may membro sa kongregasyon nga wala nato ikasinabot. Apan nganong mahitabo man ang dili pagsinabtanay?

12, 13. (a) Nganong mahitabo ang dili pagsinabtanay tali sa mga igsoon? (b) Unsay atong makat-onan sa kaagi ni Jose bahin kang Jehova?

¹² Mahitabo ang dili pagsinabtanay kay kitang tanan dili hingpit. Busa, may mga higayon nga dili ta ganahan sa gisulti o gibuhat sa atong mga igsoon​—o sila ang masuko nato. Basin malisdan ta niini nga pagsulay. Pero sama sa ubang pagsulay, si Jehova naghatag natog kahigayonan sa pagpamatuod sa atong pagkamaunongon. Sa unsang paagi? Pinaagi sa pagpaningkamot nga mahiusa sa atong mga igsoon diha sa buluhaton, kay sila gihigugma ni Jehova bisan pa sa ilang kahuyangan.

¹³ Gipakita sa kaagi ni Jose nga dili pugngan ni Jehova nga sulayan ang iyang mga  alagad. Sa batan-on pa si Jose, siya gibaligya sa iyang nasinang mga igsoon sa amahan ingong ulipon, ug gidala sa Ehipto. (Gen. 37:28) Nakita ni Jehova ang nahitabo ug seguradong naguol siya kon giunsa pagtratar ang iyang matarong nga higala. Bisan pa niana, wala kana pugngi ni Jehova. Sa ulahi, dihang giakusahan si Jose sa asawa ni Potipar ug panglugos ug dayon gibilanggo, wala gihapon kana pugngi ni Jehova. Pero gipasagdan ba siya sa Diyos? Wala. Ang Bibliya nag-ingon: “Ang . . . ginabuhat [ni Jose] gipalampos ni Jehova.”​—Gen. 39:21-23.

14. Unsay espirituwal ug pisikal nga mga kaayohan kon mohunong ta sa pagkasuko?

¹⁴ Niay laing pananglitan. Daghan ang wala pa makasulay sa naagoman ni David. Bisan pa niana, ang maong higala sa Diyos wala magpadala sa iyang kasuko. Hinunoa, siya misulat: “Likayi ang kasuko [o, hunong na sa pagkasuko] ug biyai ang kaaligutgot; ayaw pagpanginit nga mosangko lamang sa pagbuhat ug daotan.” (Sal. 37:8) Dunay labing importanteng rason nga mohunong ta sa pagkasuko. Gusto natong sundogon si Jehova, kinsa ‘wala magpahamtang kon unsay angay kanato pinasukad sa atong kasaypanan.’ (Sal. 103:10) Apan may praktikal usab nga mga kaayohan kon mohunong ta sa pagkasuko. Pananglitan, ang kasuko makapataas sa presyon sa dugo ug makapahinabog problema sa respiratoryo. Makaapektar usab kini sa atay ug sa hagorila (pancreas), ug makapahinabog problema sa paghilis sa pagkaon. Kon masuko ta, dili ta makahunahunag tarong. Ug usahay ang pagsilaob sa kasuko mahimong sundan sa dugayng depresyon. Sa laing bahin, “ang kalmado nga kasingkasing mao ang kinabuhi sa unod,” matod sa Bibliya. (Prov. 14:30) Nan, unsaon man nato pagwagtang ang kahiubos, ug sa ingon makig-uli sa atong igsoon? Mahimo nato kana pinaagi sa pagpadapat sa maalamong tambag sa Bibliya.

15, 16. Unsaon nato pagduol ang igsoon nga nakapahiubos nato?

¹⁵ Basaha ang Efeso 4:26. Dili ikatingala kon pasakitan ta sa mga dili alagad ni Jehova. Pero kon ang usa ka igsoon sa pagtuo o membro sa pamilya mosulti o mobuhat ug usa ka butang nga makapasakit nato, tingali maglagot kaayo ta. Komosta kon dili nato kana makalimtan? Maghambin ba tag kasuko sulod sa taas nga panahon? O sundon ba nato ang maalamong tambag sa Bibliya nga husayon dayon ang problema? Kon dugay tang makighusay, mas lisod nga makig-uli sa atong igsoon.

¹⁶ Komosta kon nahiubos ka sa usa ka igsoon ug dili nimo kana makalimtan? Unsay imong himoon aron magkauli mo? Una, kinasingkasing nga mag-ampo kang Jehova.  Hangyoa siya nga tabangan kang magkaestorya mo pag-ayo sa imong igsoon. Hinumdomi, higala pod siya ni Jehova. (Sal. 25:14) Gimahal siya sa Diyos. Maayong motratar si Jehova sa iyang mga higala, ug gidahom niya nga ingon ana sab ta. (Prov. 15:23; Mat. 7:12; Col. 4:6) Dayon, hunahunaa pag-ayo kon unsay imong isulti. Ayaw paghinapos nga gituyo sa igsoon nga pasakitan ka; ayaw dayon siya hukmi. Ug hunahunaa nga basin naa pod kay nahimo nga dili maayo. Puwede kang moingon, “Tingali, sensitibo lang kaayo ko, pero dihang nakigsulti ka nako gahapon, gibati nakong . . . ” Kon dili mo magkauli nianang tungora, sulayi sa laing higayon. Sa kasamtangan, iampo ang imong igsoon; hangyoa si Jehova nga panalanginan siya. Hangyoa ang Diyos nga tabangan ka sa pagpokus sa maayong mga hiyas sa igsoon. Bisan unsa may resulta, makaseguro ka nga malipay si Jehova sa imong sinserong paningkamot nga makig-uli sa imong igsoon​—nga higala sa Diyos.

17. Sa unsang paagi si Jehova nagtabang nato nga maulian dihang makasala ta, ug nganong angay natong dawaton ang maong tabang?

¹⁷ Ang uban mobating dili takos moalagad kang Jehova kay nakahimo silag seryosong sala. Kon hasolon ta pag-ayo sa atong konsensiya, sama rag duna tay estrikto kaayong amo. Si Haring David, kinsa gihasol pag-ayo sa iyang konsensiya, miingon: “Sa dihang ako naghilom ang akong mga bukog nagabok sa akong pag-agulo sa tibuok adlaw. Kay sa adlaw ug sa gabii mabug-at ang imong kamot sa ibabaw nako.” Maayo na lang kay maisogong giatubang ni David ang problema samag espirituwal nga tawo. Siya misulat: “Sa kataposan gisugid ko kanimo ang akong sala, . . . ug ikaw mismo nagpasaylo sa pagkadaotan sa akong mga sala.” (Sal. 32:3-5) Kon nakahimo kag seryosong sala, si Jehova andam motabang nimo aron maulian ka. Pero kinahanglang dawaton nimo ang iyang tabang pinaagi sa kongregasyon. (Prov. 24:16; Sant. 5:13-15) Ayaw paglangan​—nagdepende niini ang imong dumalayong kaugmaon! Apan komosta kon hasolon gihapon ka sa imong konsensiya bisag dugay nang gipasaylo ang imong sala?

18. Sa unsang paagi ang panig-ingnan ni Pablo makatabang niadtong mibati nga dili sila takos moalagad kang Jehova?

¹⁸ Dayag nga dihay mga higayon nga si apostol Pablo naguol tungod sa kanhi niyang kasal-anan. Siya miingon: “Ako ang labing ubos sa mga apostoles, ug ako dili angay tawgon nga apostol, tungod kay gilutos ko ang kongregasyon sa Diyos.” Bisan pa niana, siya midugang: “Apan pinaagi sa dili-takos nga kalulot sa Diyos ako nahimong mao ako.” (1 Cor. 15:9, 10) Gidawat ni Jehova si Pablo kon unsa siya, ug gusto Niyang mahibalo si Pablo niana. Kon sinsero kang naghinulsol sa kanhi nimong kasal-anan ug nagsugid niana kang Jehova, ug sa mga ansiyano kon gikinahanglan, makaseguro ka nga maluoy siya nimo. Busa tuohi nga gipasaylo ka ni Jehova, ug dawata ang iyang pagpasaylo!​—Isa. 55:6, 7.

19. Unsay tinuig nga teksto sa 2018, ug nganong haom kini?

¹⁹ Samtang nagkaduol ang kataposan niining sistemaha, makadahom ta nga modaghan ang atong problema. Apan, magmasaligon nga ang Usa nga “naghatag ug gahom sa gikapoy; ug sa walay dinamikong kusog . . . nagpadagaya sa bug-os nga gahom” makahatag nimo sa imong gikinahanglan aron makalahutay. (Isa. 40:29; Sal. 55:22; 68:19) Sulod sa 2018, mapahinumdoman ta niining importanteng kamatuoran matag higayon nga motambong ta sa tigom ug makita ang atong tinuig nga teksto: “Kadtong naglaom kang Jehova maulian sa kusog.”​—Isa. 40:31.