1, 2. Unsa nga okasyon sa 2018 ang makapahiusa kanato sa talagsaong paagi, ug ngano? (Tan-awa ang hulagway sa sinugdan sa artikulo.)

SA Marso 31, 2018, ang katawhan sa Diyos ug ang daghang interesado magtigom para sa tinuig nga pagselebrar sa Panihapon sa Ginoo. Inigsalop sa adlaw, minilyon ang magselebrar sa Memoryal sa kamatayon ni Kristo. Matag tuig, kini nga selebrasyon makapahiusa sa mga tawo sa talagsaong paagi, nga labaw pa sa bisan unsang okasyon sa tibuok yuta!

² Seguradong malipay si Jehova ug Jesus dihang makita nila nga matag oras minilyon sa tibuok kalibotan ang manambong niining espesyal nga okasyon hangtod matapos nang adlawa. Ang Bibliya nagtagna nga “usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan” ang mosinggit: “Ang kaluwasan utang namo sa atong Diyos, nga naglingkod sa trono, ug sa Kordero.” (Pin. 7:9, 10) Makapalipay nga mapasidunggan si Jehova ug Jesus pinaagi sa pagselebrar sa Memoryal!

3. Unsang mga pangutana ang tubagon niining artikuloha?

 ³ Niining artikuloha, tubagon ang pipila ka pangutana. (1) Sa unsang paagi ang matag usa kanato makapangandam sa Memoryal ug makabenepisyo sa pagtambong niana? (2) Sa unsang mga paagi ang Memoryal makapahiusa sa katawhan sa Diyos? (3) Sa unsang paagi makaamot kita sa maong panaghiusa? (4) May kataposan ba nga Memoryal? Kon oo, kanus-a?

4. Nganong importante nga motambong ta sa Memoryal?

⁴ Pamalandonga ang kaimportante sa pagtambong sa Memoryal. Hinumdomi nga bahin sa atong pagsimba ang mga tigom sa kongregasyon. Seguradong nakita ni Jehova ug Jesus ang tanang naningkamot sa pagtambong niining labing importanteng tigom sa tuig. Sa tinuod lang, gusto natong makita nila nga motambong gyod ta sa Memoryal, gawas lang kon dili gyod kaya tungod sa sakit o sirkumstansiya. Dihang atong gipakita pinaagi sa buhat nga importante para nato ang mga tigom sa pagsimba, atong gihatagan si Jehova ug dugang rason nga magpabilin ang atong ngalan sa “basahon sa handomanan”​—ang “basahon sa kinabuhi”—​diin gisulat ang ngalan niadtong may kahigayonang mabuhi sa walay kataposan.​—Mal. 3:16; Pin. 20:15.

5. Sa mga adlaw unâ ang Memoryal, unsaon nato ‘pagsulay kon anaa ba ta sa pagtuo’?

⁵ Sa mga adlaw unâ ang Memoryal, makagahin tag panahon sa pag-ampo ug pagpamalandong bahin sa atong relasyon kang Jehova. (Basaha ang 2 Corinto 13:5.) Unsaon nato nâ paghimo? Pinaagi sa ‘pagsulay kon anaa ba ta sa pagtuo.’ Aron mahimo kana, pangutan-a ang kaugalingon: ‘Nagtuo ba gyod ko nga bahin ko sa bugtong organisasyon nga gigamit ni Jehova sa pagtuman sa iyang kabubut-on? Gibuhat ba nako ang tanan sa pagsangyaw ug pagtudlo sa maayong balita sa Gingharian? Ang ako bang binuhatan nagpakita nga nagtuo gyod kong nia na ta sa kataposang mga adlaw ug hapit nang taposon ang pagmando ni Satanas? Masaligon ba gihapon ko kang Jehova ug Jesus sama niadtong nagpahinungod ko sa akong kinabuhi kang Jehova?’ (Mat. 24:14; 2 Tim. 3:1; Heb. 3:14) Ang paghunahuna sa tubag nianang mga pangutanaha makatabang nato sa pagpamatuod kon unsa gyod ta.

6. (a) Unsa ang bugtong paagi nga mabuhi sa walay kataposan? (b) Sa unsang paagi mangandam ang usa ka ansiyano para sa Memoryal matag tuig, ug unsaon tingali nimo siya pagsundog?

⁶ Basaha ug pamalandonga ang binase sa Bibliyang mga basahon nga naghisgot sa kaimportante sa Memoryal. (Basaha ang Juan 3:16; 17:3.) Mabuhi lang ta sa walay kataposan pinaagi sa “pagkuha ug kahibalo,” o pagkaila kang Jehova ug ‘pagpasundayag ug pagtuo’ kang Jesus​—ang Iyang bugtong Anak. Sa pagpangandam sa Memoryal, gamita sa personal nga pagtuon ang mga artikulo nga makatabang nimo nga mas masuod kang Jehova ug Jesus. Konsideraha ang ginahimo sa usa ka dugay nang ansiyano. Sulod sa katuigan, nagtigom siyag mga artikulo sa Bantayanang Torre nga naghisgot sa Memoryal ug sa gugma nga gipakita ni Jehova ug Jesus kanato. Sa mga semana unâ ang Memoryal, iyang basahon pag-usab ang maong mga artikulo ug pamalandongon ang kaimportante niini nga selebrasyon. Usahay, dugangan niya ang iyang koleksiyon ug usa o duha ka artikulo. Nakita niya nga pinaagi sa pagbasa pag-usab niining mga artikuloha ug sa pagbasa ug pagpamalandong sa gieskedyul nga pagbasa sa Bibliya sa Memoryal, duna siyay makat-onan kada tuig. Labaw sa tanan, gibati niyang mas midako ang iyang gugma kang Jehova ug Jesus kada tuig. Ang maong paagi sa pagtuon makatabang aron mas modako ang imong gugma ug apresasyon kang Jehova ug Jesus, ug sa ingon makatabang nimo nga mas makabenepisyo sa Memoryal.

7. (a) Unsay giampo ni Jesus sa gabii nga gisugdan ang Panihapon sa Ginoo? (b) Unsay nagpakita nga gitubag ni Jehova ang pag-ampo ni Jesus?

⁷ Sa gabii nga gisugdan ang Panihapon sa Ginoo, si Jesus nag-ampo nga unta magkahiusa ang tanan niyang sumusunod ug matagamtam nila ang panaghiusa nga sama nianang natagamtam niya ug sa iyang Amahan. (Basaha ang Juan 17:20, 21.) Gitubag gyod ni Jehova kana nga pag-ampo sa iyang minahal nga Anak, ug karon minilyon ang mituo nga gipadala ni Jehova ang iyang Anak. Labaw sa ubang tigom, ang Memoryal naghatag ug dili malalis nga ebidensiya nga nahiusa ang mga Saksi ni Jehova. Sa tibuok kalibotan, nagtigom ang mga tawo nga lainlaig nasod ug kolor sa panit. Sa pipila ka lugar, panagsa rang magkatigom ang mga tawong lainlaig rasa para sa usa ka relihiyosong okasyon, o kon duna man, tamayon kini sa uban. Pero ang maong panaghiusa nindot kaayo sa panan-aw ni Jehova ug Jesus!

8. Unsang mensahe ang gihatag ni Jehova kang Ezequiel bahin sa panaghiusa?

⁸ Kitang katawhan ni Jehova dili matingala sa atong panaghiusa. Gani, gitagna ni mismo ni Jehova. Tagda ang mensahe nga gihatag niya kang Ezequiel bahin sa pagtapo sa duha ka pudlos [o, estik], ang pudlos “alang sa Juda” ug ang pudlos “alang kang Jose.” (Basaha ang Ezequiel 37:15-17.) Ang “Mga Pangutana Gikan sa mga Magbabasa” sa Hulyo 2016 nga Bantayanang Torre nag-ingon: “Gihatagan ni Jehova si Ezequiel ug mensahe sa paglaom nga nagsaad nga mahiusa ang nasod sa Israel inigbalik niini sa Yutang Saad. Kini nga mensahe nagtumong usab sa panaghiusa sa katawhan sa Diyos nga magsugod panahon sa kataposang mga adlaw.”

9. Sa unsang paagi ang katumanan sa tagna ni Ezequiel makita kada tuig panahon sa Memoryal?

⁹ Sugod sa 1919, anam-anam unang giorganisar ug gihiusa pag-usab ni Jehova ang mga dinihogan, nga sa simbolikong paagi sama sa pudlos “alang sa Juda.” Dayon, samtang nagkadaghan ang may yutan-ong paglaom​—nga sa simbolikong paagi sama sa pudlos “alang kang Jose”—​nga miuban sa mga dinihogan, kanang duha ka grupo nahimong “usa ka panon.” (Juan 10:16; Zac. 8:23) Si Jehova nagsaad nga tapoon kining duha ka pudlos ug himoong usa diha sa iyang kamot. (Ezeq. 37:19) Karon, kanang duha ka grupo nahiusa sa pag-alagad ubos sa usa ka Hari​—ang gihimayang si Jesu-Kristo, nga sa tagna gitawag sa Diyos nga iyang “alagad nga si David.” (Ezeq. 37:24, 25) Ang bililhong panaghiusa nga gihisgotan ni Ezequiel klarong makita kada tuig dihang ang dinihogang nahibilin ug ang “ubang mga karnero” magtigom aron sa pagselebrar sa Memoryal. Pero, ingong indibiduwal, unsay atong mahimo aron magpabilin ug mapalambo ang maong panaghiusa?

10. Sa unsang paagi mapalambo nato ang panaghiusa sa katawhan sa Diyos?

¹⁰ Ang usa ka paagi nga mapalambo nato ang panaghiusa sa katawhan sa Diyos mao ang pagkahimong mapainubsanon. Sa dinhi pa si Jesus sa yuta, gitambagan niya ang iyang mga tinun-an nga magpaubos. (Mat. 23:12) Kon mapainubsanon ta, dili ta maimpluwensiyahan sa mapahitas-ong espiritu sa kalibotan. Hinunoa, ang pagkamapainubsanon makatabang nato sa pagpasakop sa nagapanguna, ug ang maong pagkamasinundanon importante aron mahiusa ang kongregasyon. Labaw sa tanan, ang atong pagpaubos makapalipay sa Diyos, kay siya “magabatok sa mga mapahitas-on, apan magahatag siyag dili-takos nga kalulot sa mga mapainubsanon.”​—1 Ped. 5:5.

11. Sa unsang paagi ang pagpamalandong sa kahulogan sa mga emblema sa Memoryal makatabang nato sa pagpalambo sa panaghiusa?

¹¹ Ang ikaduhang paagi nga mapalambo  nato ang panaghiusa mao ang pagpamalandong sa kahulogan sa mga emblema sa Memoryal. Unâ pa nianang gabhiona​—ug ilabina nianang gabhiona—​hunahunaa pag-ayo ang kaimportante sa tinapay nga walay lebadura ug sa pulang bino. (1 Cor. 11:23-25) Ang tinapay nagrepresentar sa walay salang lawas nga gihalad ni Jesus, ug ang bino nagsimbolo sa iyang giulang dugo. Pero, dili igo nga masabtan lang nato ang kahulogan sa mga emblema. Hinumdomi, ang halad lukat ni Kristo konektado sa duha ka kinadak-ang pagpahayag sa gugma​—ang gugma nga gipakita ni Jehova pinaagi sa paghatag sa iyang Anak para kanato, ug ang gugma nga gipakita ni Jesus pinaagi sa kinabubut-ong paghatag sa iyang kinabuhi para kanato. Ang pagpamalandong sa ilang gugma angayng magpalihok nato sa paghigugma kanila. Ug ang gugma nato ug sa atong mga igsoon para kang Jehova samag pisi nga naghigot nato sa usag usa ug nagpalig-on sa atong panaghiusa.

12. Sa iyang ilustrasyon bahin sa hari nga nagpasaylo sa utang, giunsa pagpakita ni Jesus nga gidahom ni Jehova nga magmapinasayloon ta?

¹² Ang ikatulong paagi nga mapalambo nato ang panaghiusa mao ang pagkamapinasayloon. Kon atong pasayloon ang mga nakasala kanato, atong gipakita nga giapresyar nato ang kapasayloan sa atong mga sala pinaagi sa halad lukat ni Kristo. Tagda ang ilustrasyon ni Jesus diha sa Mateo 18:23-34. Pangutan-a ang kaugalingon: ‘Napalihok ba ko sa pagpadapat sa gitudlo ni Jesus? Mapailobon ug masinabtanon ba ko sa mga igsoon? Andam ba kong mopasaylo sa mga nakasala nako?’ Tinuod, lainlain ang gibug-aton sa sala, ug ang pipila ka sala lisod kaayong pasayloon sa dili hingpit nga tawo. Pero ang maong ilustrasyon nagtudlo nato kon unsay gidahom ni Jehova. (Basaha ang Mateo 18:35.) Klarong giingon ni Jesus nga dili ta pasayloon ni Jehova kon dili nato pasayloon ang atong mga igsoon dihang may basehanan sa pagbuhat niana. Maayo gyod nang hunahunaon! Atong giprotektahan ug gipreserbar ang atong bililhong panaghiusa dihang pasayloon nato ang uban sumala sa gitudlo ni Jesus kanato.

13. Nganong ang pagmentinar sa kalinaw sa atong panag-igsoonay makatabang sa pagpalambo sa panaghiusa?

¹³ Kon pasayloon nato ang uban, atong  mamentinar ang kalinaw sa atong panag-igsoonay. Hinumdomi ang tambag ni Pablo nga kinahanglan tang “manlimbasog nga mosunod sa pagkausa sa espiritu sa nagahiusang bugkos sa pakigdait.” (Efe. 4:3) Unâ pa ug sa gabii mismo sa Memoryal, hunahunaa pag-ayo kon giunsa nimo pagtratar ang uban. Pangutan-a ang kaugalingon: ‘Klaro ba nakong gipakita nga dili ko madinumtanon? Makita ba sa mga tawo nga naningkamot kong mapalambo ang kalinaw ug panaghiusa?’ Maayong pamalandongon nato kining importanteng mga pangutana.

14. Unsaon nato pagpakita nga kita ‘nag-inantosay sa usag usa diha sa gugma’?

¹⁴ Ang ikaupat nga paagi nga mapalambo ang panaghiusa mao ang pagpakitag gugma ingong pagsundog kang Jehova, ang Diyos sa gugma. (1 Juan 4:8) Dili gyod ta moingon bahin sa atong mga igsoon, “Kinahanglan tingali nako silang higugmaon, pero dili kinahanglang ganahan ko nila”! Kana nga panghunahuna lahi sa tambag ni Pablo nga kinahanglan tang “mag-inantosay sa usag usa diha sa gugma.” (Efe. 4:2) Matikdi nga wala lang siya moingon nga angay tang “mag-inantosay sa usag usa.” Siya miingon nga kinahanglang buhaton nato kana “diha sa gugma.” May kalainan kana. Sa kongregasyon, makita nato ang tanang klase sa tawo nga gikabig ni Jehova. (Juan 6:44) Kay gikabig man niya sila, seguradong nakita niyang takos silang higugmaon. Busa, nganong hukman man nato ang atong igsoon nga dili takos sa atong gugma? Angay nato silang higugmaon sumala sa gisugo ni Jehova kanato!​—1 Juan 4:20, 21.

15. Nganong nahibalo ta nga may kataposang Memoryal?

¹⁵ Moabot ang panahon nga iselebrar nato ang Memoryal sa kataposang higayon. Nganong nahibalo ta niana? Sa iyang unang sulat sa mga taga-Corinto, giingnan ni Pablo ang mga dinihogan nga pinaagi sa paghandom sa kamatayon ni Jesus matag tuig, “padayon [nilang] gimantala ang kamatayon sa Ginoo, hangtod nga siya moabot.” (1 Cor. 11:26) Dinhi, ang pulong nga “moabot” nagtumong usab sa ‘pag-anhi’ nga gihisgotan ni Jesus sa iyang tagna panahon sa kataposan. Bahin sa dakong kasakitan nga hapit nang moabot, siya miingon: “Ang ilhanan sa Anak sa tawo mopakita sa langit, ug niana ang tanang tribo sa yuta magapukpok sa ilang kaugalingon sa pagminatay, ug sila makakita sa Anak sa tawo nga moanhi diha sa mga panganod sa langit uban ang gahom ug dakong himaya. Ug . . . ipadala [ni Jesus] ang iyang mga manulonda uban ang makusog nga tingog sa trompeta, ug ilang pagatigomon ang iyang mga pinili gikan sa upat ka hangin, gikan sa usa ka tumoy sa mga langit hangtod sa ilang laing tumoy.” (Mat. 24:29-31) Ang maong ‘pagtigom sa mga pinili’ nagtumong sa panahon dihang ang tanang dinihogan nga nia pa sa yuta makadawat sa ilang langitnong ganti. Kini mahitabo human sa unang bahin sa dakong kasakitan pero sa dili pa ang gubat sa Armagedon. Dayon, ang tanang membro sa 144,000 mouban kang Jesus sa pagpildi sa mga hari sa yuta. (Pin. 17:12-14) Ang Memoryal nga iselebrar sa dili pa ‘moabot’ si Jesus aron sa pagtigom sa mga dinihogan sa langit mao ang kataposang Memoryal.

16. Nganong maningkamot ta sa pagtambong sa Memoryal niining tuiga?

¹⁶ Hinaot maningkamot ta sa pagtambong sa Memoryal sa Marso 31, 2018 aron makabenepisyo niini. Ug moampo ta kang Jehova nga tabangan tang makaamot sa panaghiusa sa iyang katawhan! (Basaha ang Salmo 133:1.) Hinumdomi, moabot ang panahon nga ang Memoryal nga atong iselebrar mao na ang kataposan. Kasamtangan, hinaot maningkamot ta nga makatambong ug pabilhan nato ang nindot nga panaghiusa nga maeksperyensiyahan panahon sa Memoryal.