1-2. (a) Nganong makadahom ta nga maghatag si Jesus ug simpleng paagi sa paghandom sa iyang kamatayon? (b) Unsang mga hiyas ni Jesus ang atong hisgotan?

UNSAY mahitabo sa tinuig nga Memoryal sa kamatayon sa Kristo? Seguradong kadaghanan nato makahinumdom kon unsay gihimo panahon sa Panihapon sa Ginoo. Ngano? Tungod kay simple ra ang maong okasyon. Pero, importante kaayo ni. Busa, makapangutana tingali ta, ‘Nganong simple man kaayo ning okasyona?’

² Sa iyang ministeryo dinhi sa yuta, si Jesus nailhan sa pagtudlog importanteng mga kamatuoran sa paaging simple, klaro, ug sayon sabton. (Mat. 7:28, 29) Sa samang paagi, gihatagan ta niyag simple pero importanteng paagi sa paghandom * sa iyang kamatayon. Pamalandongon nato pag-ayo kining okasyona ug ang pipila ka butang nga gisulti ug gibuhat ni Jesus. Mas masabtan nato kon unsa ka mapainubsanon, maisogon, ug mahigugmaon si Jesus. Makat-onan sab nato kon sa unsang paagi mas masundog nato siya.

3. Sumala sa Mateo 26:26-28, unsa ka simple ang okasyon nga gisugdan ni Jesus, ug unsay gisimbolohan sa tinapay ug bino?

³ Kauban ni Jesus ang 11 ka matinumanong apostoles dihang gisugdan niya ang Memoryal sa iyang kamatayon. Gikuha niya ang salin sa ilang gikaon sa Paskuwa ug gisugdan ang simple nga pagsaulog. (Basaha ang Mateo 26:26-28.)  Gigamit niya ang tinapay nga walay lebadura ug ang bino nga tua didto. Giingnan ni Jesus ang iyang mga apostoles nga kini nagsimbolo sa iyang hingpit nga lawas ug dugo, nga hapit na niyang ihalad para nila. Lagmit wala na matingala ang mga apostoles sa kasimple niining importante ug bag-ong okasyon. Ngano?

4. Nganong ang tambag ni Jesus kang Marta makatabang nato sa pagsabot kon nganong simple lang ang Memoryal?

⁴ Tagda kon unsay nahitabo pipila ka bulan una pa niana, sa ikatulong tuig sa ministeryo ni Jesus, dihang mibisita siya sa iyang suod nga mga higalang si Lazaro, Marta, ug Maria. Nianang relaks nga kahimtang, si Jesus nagsugod sa pagpanudlo. Didto si Marta, pero puliki kaayo siya sa pagpangandam ug daghang pagkaon para sa iyang espesyal nga bisita. Dihang namatikdan kini ni Jesus, mabination niyang gibadlong si Marta, nga gitabangan siya nga masabtang dili pirmeng gikinahanglan ang daghang pagkaon. (Luc. 10:40-42) Sa ulahi, pipila ka oras una sa iyang kamatayon, gipadapat ni Jesus ang iyang tambag. Gihimo niyang simple ang Memoryal. Unsay atong makat-onan niini bahin kang Jesus?

5. Unsay gipakita nianang simple nga okasyon bahin kang Jesus, ug sa unsang paagi nahiuyon kini sa Filipos 2:5-8?

⁵ Sa tanang gisulti ug gibuhat ni Jesus, siya mapainubsanon. Busa, dili ikatingala nga gipakita sab niya kana sa kataposang gabii sa iyang kinabuhi dinhi sa yuta. (Mat. 11:29) Nahibalo siya nga hapit na niyang himoon ang kinadak-ang sakripisyo sa kasaysayan sa tawo ug banhawon siya ni Jehova ngadto sa mahimayaong posisyon sa langit. Bisan pa niana, wala siya magtinguha nga dayegon pinaagi sa paghimog komplikadong seremonyas sa paghandom sa iyang kamatayon. Hinunoa, giingnan niya ang iyang mga tinun-an nga kada tuig kinahanglang handomon nila siya pinaagi niining simpleng okasyon. (Juan 13:15; 1 Cor. 11:23-25) Kining simple pero haom nga okasyon nagpakita nga si Jesus dili hambogiro. Malipay ta nga ang pagkamapainubsanon maoy usa sa nindot nga mga hiyas sa atong langitnong Hari.​—Basaha ang Filipos 2:5-8.

6. Unsaon nato pagsundog ang pagkamapainubsanon ni Jesus dihang mag-atubag pagsulay?

⁶ Unsaon nato pagsundog ang pagkamapainubsanon ni Jesus? Pinaagi sa pag-una sa kaayohan sa uban. (Filip. 2:3, 4) Hunahunaa ang kataposang gabii ni Jesus dinhi sa yuta. Nahibalo siya nga sa dili madugay makaeksperyensiya siyag  sakit nga kamatayon. Pero naghunahuna gihapon siya sa iyang matinumanong mga apostoles, kinsa hapit nang magbangotan para niya. Busa, gigamit niya ang kataposang gabii sa paghatag nilag instruksiyon, pagdasig, ug pasalig. (Juan 14:25-31) Si Jesus mapainubsanong naghunahuna sa kaayohan sa uban imbes sa iyaha. Maayo gyod siyang ehemplo kanato!

7. Giunsa pagpakita ni Jesus ang dakong kaisog human sa Panihapon sa Ginoo?

⁷ Human sa Panihapon sa Ginoo, nagpakita si Jesus ug dakong kaisog. Sa unsang paagi? Gidawat niya ang kabubut-on sa iyang Amahan para niya, bisag nahibalo siya nga ang pagbuhat niana magpasabot nga patyon siya tungod sa makauulawng krimen nga pagpasipala. (Mat. 26:65, 66; Luc. 22:41, 42) Si Jesus nagmatinumanon gayod aron mapasidunggan ang ngalan ni Jehova, mabayaw ang pagkasoberano sa Diyos, ug mahimong posible nga ang mahinulsolong katawhan mabuhi sa walay kataposan. Sa samang higayon, giandam ni Jesus ang iyang mga sumusunod sa hapit na nilang maeksperyensiyahan.

8. (a) Unsay gisulti ni Jesus sa iyang matinumanong mga apostoles? (b) Sa katuigan human sa iyang kamatayon, giunsa pagsundog sa mga tinun-an ang pagkamaisogon ni Jesus?

⁸ Nagpakita pod ug kaisog si Jesus pinaagi sa pagpokus, dili sa iya tingaling mga kabalaka, kondili sa panginahanglan sa iyang matinumanong mga apostoles. Ang simpleng okasyon, nga gisugdan ni Jesus human niya pagawsa si Judas, magpahinumdom niadtong mahimo niyang dinihogan nga mga sumusunod sa mga benepisyo sa iyang giulang dugo ug sa pagkahimo nilang bahin sa bag-ong pakigsaad. (1 Cor. 10:16, 17) Aron tabangan sila nga mahimong takos sa ilang langitnong pagkatinawag,  gisultian ni Jesus ang iyang mga sumusunod kon unsay gidahom niya ug sa iyang Amahan. (Juan 15:12-15) Gisultian pod niya ang mga apostoles bahin sa mga pagsulay nga ilang maeksperyensiyahan. Dayon, aron dasigon sila nga sundogon siya, giingnan niya sila nga “magmaisogon!” (Juan 16:1-4a, 33) Katuigan sa ulahi, ang mga tinun-an ni Jesus nagsundog gihapon sa iyang pagsakripisyo sa kaugalingon ug nagpakitag kaisog. Bisag mag-antos sila, ilang gitabangan ang usag usa panahon sa mga pagsulay.​—Heb. 10:33, 34.

9. Unsaon nato pagsundog ang kaisog ni Jesus?

⁹ Karon sab, gisundog nato ang pagkamaisogon ni Jesus. Pananglitan, nagkinahanglag kaisog ang pagtabang sa atong mga igsoon nga gilutos. Usahay, sila gipriso nga dili makataronganon. Kon mahitabo nâ, kinahanglang buhaton nato ang atong maarangan sa pagtabang nila, apil na sa pagdepensa kanila. (Filip. 1:14; Heb. 13:19) Ang laing paagi nga ikapakita nato ang kaisog mao ang pagpadayon sa pagsangyaw “uban ang kaisog.” (Buh. 14:3) Sama kang Jesus, determinado tang isangyaw ang Gingharian, bisan pag supakon o lutoson. Pero, usahay mahadlok ta. Unsay atong buhaton?

10. Sa mga semana una ang Memoryal, unsay angay natong buhaton, ug ngano?

¹⁰ Makahatag natog kaisog ang paghunahuna bahin sa paglaom nga nahimong posible tungod sa halad sa Kristo. (Juan 3:16; Efe. 1:7) Sa mga semana una ang Memoryal, may espesyal tang kahigayonan nga mas maapresyar ang lukat. Nianang higayona, sunda ang eskedyul sa pagbasa sa Bibliya panahon sa Memoryal. Pamalandonga sab ang mga panghitabo panahon sa kamatayon ni Jesus. Dayon, dihang magtigom ta alang sa Panihapon sa  Ginoo, mas masabtan nato ang kahulogan sa mga emblema ug ang talagsaong sakripisyo nga girepresentahan niana. Dihang atong masabtan ang gihimo ni Jesus ug Jehova para nato ug ang benepisyo niana kanato ug sa atong mga minahal, mas molig-on ang atong paglaom, ug mapalihok ta sa paglahutay nga maisogon hangtod sa kataposan.​—Heb. 12:3.

11-12. Unsa nay atong nakat-onan?

¹¹ Sa nahisgotan na, atong nakat-onan nga ang Panihapon sa Ginoo magpahinumdom nato dili lang sa bililhong lukat kondili sa talagsaong mga hiyas usab ni Jesus​—pagkamapainubsanon ug kaisog. Mapasalamaton gyod ta nga padayong gipakita ni Jesus kining mga hiyasa ingong atong langitnong Hataas nga Saserdote, kinsa mangamuyo alang kanato! (Heb. 7:24, 25) Aron ikapakita ang atong kinasingkasing nga apresasyon, kinahanglang kanunay natong handomon ang kamatayon ni Jesus, sama sa iyang gisugo. (Luc. 22:19, 20) Buhaton nato ni sa adlaw nga motumbas sa Nisan 14, ang labing importanteng petsa sa tuig.

¹² Sa pagkasimple sa Panihapon sa Ginoo, atong makat-onan ang laing hiyas nga maoy hinungdan nga si Jesus namatay alang nato. Sa dinhi pa sa yuta, nailhan siya niining hiyasa. Unsa kini?

13. Unsay gisulti sa Juan 15:9 ug 1 Juan 4:8-10 bahin sa gugma nga gipakita ni Jehova ug Jesus, ug kinsay makabenepisyo niana?

¹³ Hingpit nga gisundog ni Jesus ang dakong gugma ni Jehova kanato diha sa tanan niyang gibuhat. (Basaha ang Juan 15:9; 1 Juan 4:8-10.) Labaw sa tanan, ang gugma ni Jesus nagpalihok niya sa paghalad sa iyang kinabuhi alang kanato. Kita man bahin sa mga dinihogan o sa “ubang mga karnero,” makabenepisyo ta sa gugma nga gipakita ni Jehova ug sa iyang Anak pinaagi sa maong halad. (Juan 10:16; 1 Juan 2:2) Hunahunaa sab ang mga emblema; nagpadayag nâ sa gugma ug konsiderasyon ni Jesus sa iyang mga tinun-an. Sa unsang paagi?

14. Sa unsang paagi gipakita ni Jesus ang gugma para sa iyang mga tinun-an?

¹⁴ Gipakita ni Jesus ang gugma para sa iyang dinihogang mga sumusunod pinaagi sa paghimo sa maong okasyon nga simple, imbes komplikadong rituwal. Paglabay sa panahon, ang dinihogang mga tinun-an magselebrar sa Memoryal kada tuig diha sa lainlaing kahimtang, bisan pa ganig napriso sila. (Pin. 2:10) Natuman ba nila ang sugo ni Jesus? Oo!

15-16. Sa unsang paagi nakasaulog ang pipila sa Panihapon sa Ginoo bisan sa lisod nga kahimtang?

¹⁵ Hangtod karon ang tinuod nga mga Kristohanon naningkamot sa paghandom sa kamatayon ni Jesus. Kutob sa mahimo, ilang gisunod ang pamaagi sa pagsaulog sa Panihapon sa Ginoo, usahay diha sa lisod nga kahimtang. Matikdi ang mosunod nga mga pananglitan. Samtang gibartolina didto sa China, si Brader Harold King nakakitag paagi sa pagsaulog sa Memoryal. Sekreto niyang giandam ang mga emblema, nga gigamit kon unsay naa niya. Gikalkulo sab niya ang petsa sa Memoryal kutob sa iyang mahimo. Panahon sa pagsaulog, bisag nag-inusara, siya mag-awit, mag-ampo, ug magpakigpulong.

¹⁶ Niay laing pananglitan. Usa ka grupo sa mga sister nga napriso sa usa ka kampo konsentrasyon panahon sa Gubat sa Kalibotan II ang nagpameligro sa ilang kinabuhi aron masaulog ang Panihapon sa Ginoo. Pero, kay simple ra ang mga emblema, nakasaulog sila sa Memoryal nga wala mamatikdi. Sila miingon: “Nagdikit mi pagtindog  palibot sa tumbanan nga gihapinag puting panapton nga maoy gibutangan sa mga emblema. Kandila ang among gigamit kay basig masakpan mi kon pasigaon namo ang suga. . . . Among gisulti pag-usab ang among mga panaad sa among Amahan nga gamiton ang tanan namong kusog sa pagbindikar sa Iyang balaang ngalan.” Pagkatalagsaon sa ilang pagtuo! Ug pagkadako sa gugma nga gipakita ni Jesus kay puwede natong masaulog ang Memoryal bisan sa lisod nga kahimtang!

17. Unsay atong ikapangutana sa kaugalingon?

¹⁷ Samtang nagsingabot ang Memoryal, maayong pangutan-on nato ang kaugalingon: ‘Sa unsang paagi masundog pa nako si Jesus sa pagpakitag gugma? Mas naghunahuna ba ko sa panginahanglan sa mga igsoon kay sa akoa? Mas labaw ba ang akong gidahom sa mga igsoon kay sa ilang mahimo, o gikonsiderar nako ang ilang mga limitasyon?’ Hinaot sundogon nato kanunay si Jesus ug magpakitag “pagbati alang sa isigkaingon.”​—1 Ped. 3:8.

18-19. (a) Sa unsa ta makaseguro? (b) Unsay imong determinasyon?

¹⁸ Sa dili madugay, hunongon na ang paghandom sa kamatayon sa Kristo. Dihang “moabot” si Jesus panahon sa dakong kasakitan, tigomon niya didto sa langit ang nahibilin sa “mga pinili,” ug ang Memoryal dili na saulogon.​—1 Cor. 11:26; Mat. 24:31.

¹⁹ Bisag dili na saulogon ang Memoryal, makaseguro ta nga hinumdoman gihapon sa katawhan ni Jehova kanang simpleng okasyon ingong simbolo sa dili hitupngang pagkamapainubsanon, kaisog, ug gugma nga gipakita sa usa ka tawo. Unya, kadtong nakatambong niining talagsaon nga panihapon seguradong mosulti bahin niini alang sa kaayohan sa tanan nga buhi nianang panahona. Apan, aron makabenepisyo ta nianang okasyona, kinahanglang determinado tang sundogon ang pagkamapainubsanon, kaisog, ug gugma ni Jesus. Kon buhaton nato nâ, makasalig ta nga panalanginan ta ni Jehova.​—2 Ped. 1:10, 11.