DIHANG gitudloan ni Jesus ang iyang mga tinun-an kon unsaon pagsangyaw sa maayong balita sa Gingharian, iyang giila nga dili tanan ang maminaw. (Luc. 10:3, 5, 6) Sa atong ministeryo, may mga tawo tingali nga maningka o mopasakit pa gani nato. Tinuod, kon ingon ana ang reaksiyon, malisdan ta sa pagpakitag kaluoy sa atong sangyawan.

Ang tawong maluluy-on makakita sa panginahanglan ug problema sa uban, mosimpatiya nila, ug gustong motabang. Pero, kon dili na gani ta maluoy niadtong atong sangyawan, basin mawala na pod ang atong kadasig ug kaepektibo. Sa laing bahin, kon ugmaron nato ang pagkamaluluy-on, sama rag gipaypayan nato ang kalayo​—padayong magdilaab ang atong kadasig sa ministeryo!​—1 Tes. 5:19.

Sa unsang paagi ta magmaluluy-on bisag lisod ang pagpakita niana? Hisgotan nato ang tulo ka ehemplo nga angayng sundogon​—si Jehova, Jesus, ug apostol Pablo.

Sulod sa linibo ka tuig, giantos ni Jehova ang pagpakaulaw nga gihimo nganha sa iyang ngalan. Bisan pa niana, nagpakita gihapon siyag kaayo “sa mga dili-mapasalamaton ug sa daotan.” (Luc. 6:35) Gipakita niya kini pinaagi sa pagpailob. Gusto ni Jehova nga maluwas “ang tanang matang sa mga tawo.” (1 Tim. 2:3, 4) Bisag gidumtan sa Diyos ang pagkadaotan, giisip niyang bililhon ang mga tawo ug dili niya gustong dunay malaglag.​—2 Ped. 3:9.

Nahibalo si Jehova kon unsa ka epektibo si Satanas sa pagbuta sa hunahuna sa mga dili magtutuo. (2 Cor. 4:3, 4) Daghan ang gitudloan ug sayop nga mga pagtulon-an ug panghunahuna sukad sa pagkabata. Tungod niana, malisdan sila sa pagdawat sa kamatuoran. Gusto ni Jehova nga tabangan sila. Giunsa nato pagkahibalo?

Tagda ang panglantaw ni Jehova sa mga tawo sa Nineve. Bisag bayolente sila, giingnan ni Jehova si Jonas: “Dili ba diay ako masubo alang sa Nineve nga dakong siyudad, diin adunay kapin sa [120,000] ka tawo nga wala mahibalo sa kalainan tali sa ilang tuong kamot ug sa ilang wala?” (Jon. 4:11) Naluoy si Jehova sa mga tawo sa Nineve kay wala sila mahibalo sa kamatuoran bahin kaniya. Busa, gisugo niya si Jonas sa pagpasidaan kanila.

Sama kang Jehova, giisip nato nga bililhon ang mga tawo. Masundog nato siya pinaagi sa pagpaningkamot sa pagtabang niadtong maminaw, bisan pag sa tan-aw nato morag dili sila modawat sa kamatuoran.

 Kon dili modawat ang mga tawo sa atong mensahe, kinahanglang sabton nato kon ngano. Ang uban tingali negatibog hunahuna sa Bibliya o sa Kristiyanidad tungod sa dili maayong ehemplo niadtong nag-angkong mga Kristohanon. Basin ang uban gitudloag mga bakak bahin sa atong mga pagtulon-an. Ang uban pod tingali mahadlok nga bugalbugalan sa ilang mga silingan o membro sa pamilya kon maminaw sila nato.

Ang pipila nga atong masangyawan dili modawat kay sila may pait nga mga kasinatian nga nakaapektar pag-ayo sa ilang emosyon. Si Kim nga usa ka misyonarya miingon: “Sa usa ka bahin sa among teritoryo, daghan ang nakaeksperyensiyag paggubatay diin nawad-an sila sa tanan nilang kabtangan. Wala silay tinuod nga paglaom sa umaabot. Sila nadismayar ug madudahon. Niining dapita, pirmeng may mosupak sa mensahe. Sa usa ka higayon, gidagmalan pa gani ko samtang nagsangyaw.”

Sa unsang paagi nagmaluluy-on gihapon si Kim bisan pa sa maong pagtratar? Siya miingon: “Dihang dili maayo ang pagtratar sa mga tawo, hinumdoman nako ang giingon sa Proverbio 19:11: ‘Ang hait nga salabotan sa usa ka tawo magapahinay gayod sa iyang kasuko.’ Ang paghunahuna sa kaagi sa mga tawo sa among teritoryo nakatabang nako nga magmaluluy-on nila. Ug dili tanan magsusupak. Nianang teritoryoha, may mga balikduaw mi.”

Mahimong pangutan-on nato ang kaugalingon, ‘Unsa kahay akong reaksiyon sa mensahe sa Gingharian kon wala sab ko mahibalo sa kamatuoran?’ Pananglitan, komosta kon pirme tang makadungog ug bakak nga impormasyon bahin sa mga Saksi ni Jehova? Basin dili pod ta modawat sa mensahe ug kinahanglang kaluy-an. Kon hinumdoman nato ang sugo ni Jesus nga trataron ang uban sa paagi nga gusto natong trataron ta, mapalihok ta sa pagpakitag kaluoy bisag lisod ang pagbuhat ana.​—Mat. 7:12.

Si Pablo nagmaluluy-on bisan niadtong grabeng misupak sa mensahe. Ngano? Wala siya malimot kon unsa siya kaniadto. Siya miingon: “Kanhi ako usa ka tigpasipala ug maglulutos ug tawong bagis. Bisan pa niana, ako gipakitaan ug kaluoy, tungod kay ako walay alamag ug milihok uban ang kawalay-pagtuo.” (1 Tim. 1:13) Nahibalo siya nga si Jehova ug Jesus nagpakita kaniyag dakong kaluoy. Lagmit, masabtan niya ang dili maayong reaksiyon sa mga tawo kay ingon ana pod siya kaniadto.

Usahay, makahibalag si Pablo ug mga tawong may hugot nga pagtuo sa bakak nga mga pagtulon-an. Unsay iyang reaksiyon? Ang Buhat  17:16 nag-ingon nga samtang didto si Pablo sa Atenas, “ang iyang espiritu sa sulod niya giabot ug kalagot sa pagkakita nga ang siyudad napuno sa mga idolo.” Bisan pa niana, gigamit nâ niya ingong topiko sa iyang pagtudlo sa mga tawo. (Buh. 17:22, 23) Giadyas niya ang iyang paagi sa pagsangyaw nga gikonsiderar ang lainlaing kahimtang sa mga tawo aron iyang “maluwas . . . sa bisan unsa mang paagi ang pipila.”​—1 Cor. 9:20-23.

Masundog nato si Pablo kon magpakita tag konsiderasyon sa negatibong hunahuna o sayop nga pagtulon-an sa atong sangyawan. Dayon, isulti nato sa epektibong paagi ang “maayong balita sa butang nga mas maayo.” (Isa. 52:7) Ang sister nga si Dorothy miingon: “Sa among teritoryo, daghan ang gitudloan nga ang Diyos dili maluluy-on ug mangita lag sayop. Dayegon nako sila tungod sa ilang hugot nga pagtuo sa Diyos. Dayon ipakita nako nila ang giingon sa Bibliya bahin sa pagkamahigugmaon ni Jehova ug sa iyang mga saad sa umaabot.”

Hunahunaon sab nato kon unsaon pagdasig ang atong mga kauban sa pagsangyaw. Si Jessica miingon: “Kon usa namo ang makahibalag ug oposer, likayan nako ang pagsigeg hisgot ana. Maghisgot kog positibong mga butang, sama sa maayong resulta sa atong ministeryo bisan pag mosupak ang pipila.”

Nahibalo si Jehova nga usahay makaatubang tag mga pagsupak diha sa ministeryo. Seguradong malipay siya kon sundogon nato ang iyang pagkamaluluy-on! (Luc. 6:36) Siyempre, may kinutoban ang kaluoy ni Jehova. Makasalig ta nga nahibalo siya kon kanus-a taposon kining sistemaha sa mga butang. Samtang wala pa nâ mahitabo, dinalian ang atong buluhatong pagsangyaw. (2 Tim. 4:2) Hinaot nga padayon tang mosangyaw nga madasigon ug magmaluluy-on sa “tanang matang sa mga tawo.”