Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Unsa ang upat ka sugyot aron mouswag ang atong pag-awit?

Motindog tag tarong ug ipataas ang atong songbook. Kinahanglang husto ang atong pagginhawa. Kon bukhon natog maayo ang atong baba samtang magkanta, mas makakanta tag kusog.​—w17.11, p. 5.

Unsay makapainteres bahin sa lokasyon ug dalan sa mga siyudad nga dalangpanan sa Israel?

Ang unom ka siyudad nga dalangpanan sa Israel may maayong mga dalan. Busa, sayon ug dali rang makadangop niana ang usa ka tawo.​—w17.11, p. 14.

Nganong ang lukat pinaagi ni Jesus mao ang kinamaayohang regalo gikan sa Diyos?

Kini magtagbaw sa atong pangandoy nga mabuhi sa walay kataposan, ug magtagana sa atong panginahanglan nga makalingkawas sa sala ug kamatayon. Kay gihigugma sa Diyos ang kaliwat ni Adan, gihatag niya si Jesus bisan pag makasasala ta.​—wp17.6, p. 6-7.

Giunsa pagpakita ang pagkabanhaw ni Jesus diha sa Salmo 118:22?

Si Jesus gisalikway ingong Mesiyas ug gipatay. Aron mahimo siyang “pangulong bato sa pamag-ang,” kinahanglan siyang mabanhaw.​—w17.12, p. 9-10.

Kadto lang bang may katungod sa pagkapanganay ang puwedeng mahimong kagikan sa Mesiyas?

Usahay panganayng mga lalaki ang nahimong kagikan ni Jesus, pero dili sa tanang higayon. Si David dili ang panganay ni Jese; pero si David nahimong kagikan sa Mesiyas.​—w17.12, p. 14-15.

Unsa ang pipila ka prinsipyo sa Bibliya bahin sa medisina?

Sa Balaod, ang pipila ka sakit nagkinahanglag pagkuwarentinas. Kinahanglang manghunaw human makahikap ug patay. Kinahanglang tarongog hipos ang hugaw sa tawo. Ang pagtuli himoon sa ikawalong adlaw gikan sa pagkatawo sa bata kay nianang panahona normal na ang katakos sa dugo sa pag-apol (pag-clot).​—wp18.1, p. 7.

Nganong angay pong higugmaon sa mga Kristohanon ang kaugalingon?

Angay natong higugmaon ang atong silingan sama sa kaugalingon. (Mar. 12:31) Ang mga bana kinahanglang “maghigugma sa ilang mga asawa sama sa ilang kaugalingong mga lawas.” (Efe. 5:28) Siyempre, ang paghigugma sa kaugalingon puwedeng mahimong sayop.​—w18.01, p. 23.

Unsay atong himoon aron mouswag sa espirituwal?

Kinahanglang atong tun-an ug pamalandongon ang Pulong sa Diyos, ug ipadapat dayon ang atong nakat-onan. Buksan pod nato ang atong hunahuna ug kasingkasing sa giya sa balaang espiritu. Ug atong dawaton ug pasalamatan ang tabang sa uban.​—w18.02, p. 26.

Nganong dili maayong mogamit ug astrolohiya ug pagpanag-an aron mahibaloan ang umaabot?

Daghan ang rason, pero ang panguna mao: Gidili nâ sa Bibliya.​—wp18.2, p. 4-5.

Unsay atong panglantaw bahin sa pagdawat ug imbitasyon?

Kon modawat tag imbitasyon, kinahanglang tumanon nato ang atong saad. (Sal. 15:4) Dili nato ni bastabastang kanselahon. Basin ang nangimbitar nangandam pag-ayo.​—w18.03, p. 18.

Unsay makat-onan sa tinudlong mga brader gikan kang Timoteo?

Si Timoteo mahunahunaon gyod sa mga tawo ug giuna ang espirituwal nga mga kalihokan. Nagkugi siya sa sagradong pag-alagad ug gipadapat ang iyang nakat-onan. Pirme niyang gibansay ang iyang kaugalingon ug misalig sa espiritu ni Jehova. Ang mga ansiyano ug ang uban makasundog niya.​—w18.04, p. 13-14.