1. Nganong ilabinang malipayon ta karon?

MAKAPALIPAY gyong madungog ang pag-uswag sa katawhan ni Jehova! Sa miaging tuig, nakadumala tag kapin sa 10,000,000 ka Bible study. Nagpakita gyod ni nga gipalamdag sa mga alagad sa Diyos ang ilang kahayag! Ug hunahunaa lang ang minilyong interesado nga mitambong sa Memoryal. Ilang nahibaloan ang gipakitang gugma sa Diyos pinaagi sa lukat.​—1 Juan 4:9.

2, 3. (a) Unsay dili makapugong nato sa ‘pagsidlak ingong mga magbabanwag’? (b) Base sa giingon ni Jesus sa Mateo 5:14-16, unsay atong hisgotan?

² Sa tibuok kalibotan, ang katawhan ni Jehova lainlaig pinulongan. Pero, wala ni makapugong nato sa paghatag ug nahiusang pagdayeg sa atong Amahan, si Jehova. (Pin. 7:9) Bisag unsay atong pinulongan o gipuy-an, mahimo tang mosidlak “ingong mga magbabanwag sa kalibotan.”​—Filip. 2:15.

³ Ang pag-uswag nga atong naeksperyensiyahan, ang panaghiusa nga atong natagamtam, ug ang atong paningkamot nga magpadayon sa pagbantay nakatabang nato sa paghimaya kang Jehova.  Niining artikuloha, atong hisgotan kon unsaon nato nâ paghimo.​—Basaha ang Mateo 5:14-16.

4, 5. (a) Gawas sa pagsangyaw, unsaon pa nato pagpalamdag ang atong kahayag? (b) Unsay mga kaayohan kon maayo ang atong panggawi? (Tan-awa ang hulagway sa sinugdan sa artikulo.)

⁴ “Walay magmatinumanon ug magmaunongon sa Ginoo niining nahibiling mga adlaw . . . gawas kon iyang pahimuslan ang kahigayonan nga ipalamdag ang iyang kahayag.” Mao nay giingon sa artikulong “Kahayag Diha sa Kangitngit,” sa Hunyo 1, 1925 nga The Watch Tower. Dayon, ang artikulo misaysay: “Kinahanglang buhaton niya kini pinaagi sa pagsangyaw sa maayong balita ug pagsunod sa dalan sa kahayag.” Klaro, ang usa ka paagi nga mapasidlak ang atong kahayag mao ang pagsangyaw sa maayong balita ug paghimog mga tinun-an. (Mat. 28:19, 20) Dugang pa, mahimaya nato si Jehova pinaagi sa atong Kristohanong panggawi. Makita sa mga tagbalay ug lumalabay ang atong pamatasan. Ang atong mahigalaong pahiyom ug mainitong timbaya dakog ikasulti kon kinsa ta ug kon unsang matanga sa Diyos ang atong ginasimba.

⁵ Giingnan ni Jesus ang iyang mga tinun-an: “Inigsulod ninyo sa balay, paghatag ug katahoran sa panimalay.” (Mat. 10:12) Sa lugar nga sagad magsangyaw si Jesus ug ang mga apostoles, normal lang nga pasudlon sa balay ang dili nila kaila. Karon, dili na ni ang naandan sa daghang lugar. Pero, ang imong positibo ug mahigalaong paagi sa pagsaysay kon nganong mibisita ka sagad makawala sa kabalaka o kasuko sa tagbalay. Ang tam-is nga pahiyom sagad mao ang pinakamaayong introduksiyon. Tinuod pod nâ dihang ang atong mga igsoon makigbahin sa publikong pagsangyaw gamit ang cart. Samtang mag-cart ka, mamatikdan tingali nimo nga ang mga tawo sagad mosanong sa nindot nga pahiyom ug timbaya. Basin moduol pa gani sila ug mokuhag publikasyon. Ang maayong panggawi makatabang pod nimo nga makasugod ug panaghisgot.

6. Sa unsang paagi nakapabiling aktibo ang usa ka tigulang nga magtiayon?

⁶ Sa England, may tigulang nga magtiayon nga dili na kaayo makapamalaybalay tungod sa ilang sakit. Nakadesisyon silang ipalamdag ang ilang kahayag diha sa gawas sa ilang balay. Magdispley silag mga publikasyon sa lamesa dihang kuhaon na sa mga ginikanan ang mga bata gikan sa eskuylahan nga duol sa ila. Kay nainteres, daghan ang mikuhag mga brosyur ug librong Mga Pangutanang Gisukna sa mga Batan-on​—Mga Tubag nga Mosaler, Tomo 1 ug 2. Giubanan sila sa usa ka payunir nga sister gikan sa ilang kongregasyon. Tungod sa mahigalaong panggawi sa sister ug sa sinserong paningkamot sa magtiayon, usa sa mga ginikanan ang nagpa-Bible study.

7. Unsay imong ikatabang sa mga bakwet sa inyong lugar?

⁷ Sa di pa dugayng katuigan, daghan ang namakwet sa laing nasod. Unsay imong mahimo aron matabangan sila nga makaila kang Jehova ug mahibalo sa iyang katuyoan? Una, puwede nimong tun-an ang timbaya sa pinulongan nga komong ginasulti sa mga bakwet sa inyong lugar. Makatabang nimo ang JW Language app. Dugang pa, pagkat-og pipila ka ekspresyon nga makapainteres nila. Dayon, puwede nimong ipakita nila ang jw.org ug ang lainlaing video ug publikasyon diha sa ilang pinulongan.​—Deut. 10:19.

8, 9. (a) Sa unsang paagi makatabang nato ang midweek nga tigom? (b) Unsaon pagtabang sa mga ginikanan ang ilang mga anak sa pagpakigbahin sa tigom?

⁸ Si Jehova mahigugmaong nagtagana sa Kinabuhi ug Ministeryo nga Tigom aron mahimo tang mas epektibo sa pagsangyaw. Ang  praktikal nga instruksiyon gikan niini nga tigom makahatag natog dugang kompiyansa sa pagbalikduaw ug pag-Bible study.

⁹ Daghang bag-ohan ang nakamatikod nga makigbahin sa tigom ang atong mga anak. Mga ginikanan, tabangi ang inyong mga anak nga mapalamdag ang ilang kahayag pinaagi sa pagtudlo nila sa pagkomento sa ilang kaugalingong pulong. Ang ilang simple ug kinasingkasing nga komento makatabang sa mga interesado nga mailhan ang kamatuoran.​—1 Cor. 14:25.

10. Sa unsang paagi makatabang ang pamilyahanong pagsimba sa pagpalig-on sa panaghiusa?

¹⁰ Mapalamdag pod nimo ang imong kahayag pinaagi sa pagpalig-on sa panaghiusa sa imong pamilya ug kongregasyon. Usa ka paagi nga mahimo ni sa mga ginikanan mao ang pag-eskedyul ug regular nga Pamilyahanong Pagsimba. Giapil sa daghan ang pagtan-awg JW Broadcasting kada bulan. Human sa pagtan-aw, puwede ninyong hisgotan kon unsaon pagpadapat ang gipasiugdang mga punto. Dihang magdumalag pamilyahanong pagsimba, angayng hinumdoman sa ginikanan nga ang giyang gikinahanglan sa bata lahi tingali sa gikinahanglan sa tin-edyer. Busa, paghimog haom nga pagpadapat sa gitun-ang materyal aron makabenepisyo ang tibuok pamilya.​—Sal. 148:12, 13.

11-13. Sa unsang paagi ang tanan makapalig-on sa panaghiusa sa kongregasyon ug makatabang sa uban sa pagpalamdag sa ilang kahayag?

¹¹ Sa unsang paagi ang mga batan-on makapalig-on sa panaghiusa sa kongregasyon ug sa ingon makadasig sa uban sa pagpalamdag sa ilang kahayag? Kon batan-on ka, puwede ba nimong himoong tumong ang pagpakitag interes sa mga edaran? Mahimo nimong ipaestorya nila ang ilang eksperyensiya sa pag-alagad sa daghang tuig. Makapadasig gyod ni nimo ug kanila, ug mas makatabang ninyo sa pagpalamdag sa kahayag sa kamatuoran. Kitang tanan angayng maningkamot sa pag-abiabi niadtong motambong sa atong mga tigom. Makapalig-on nâ sa panaghiusa ug makadasig sa mga bisita sa pagpalamdag sab sa ilang kahayag. Puwede tang mopahiyom sa mga bisita, o kaha motabang nila sa pagpangitag kalingkoran. Ipailaila sila sa uban aron mobati silang komportable.

¹² Kon naasayn ka sa pagdumalag tigom para sa pagsangyaw, dako kag matabang sa mga tigulang aron makasangyaw. Naa ba silay haom nga teritoryo? Sa pipila ka kahimtang, puwede kang mag-asayn ug batabatang  igsoon aron makauban ug makatabang sa tigulang. Mahimo pod nimong konsiderahon kadtong limitadog mahimo tungod sa panglawas ug sirkumstansiya. Oo, ang imong konsiderasyon ug pagsabot makatabang sa mga bata ug tigulang, eksperyensiyado ug dili eksperyensiyado, nga magmadasigon sa pagsangyaw sa maayong balita.​—Lev. 19:32.

¹³ Ang salmista nakaingon: “Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!” (Basaha ang Salmo 133:1, 2.) Kay nagkahiusa, ang mga Israelinhon nakabenepisyo sa maayong impluwensiya sa uban nga nagsimba kang Jehova. Sama nig lana nga gigamit sa pagdihog, humot ug makarepresko. Paningkamot sa paghatag ug maayong impluwensiya​—nga makapalig-on sa panaghiusa sa kongregasyon. Maayo kon gibuhat na nimo kini. Pero puwede ka bang “magpasangkad” pinaagi sa paghimo niini nga labaw pa ug mas makanunayon?​—2 Cor. 6:11-13.

14. Sa unsang paagi mapalamdag nimo ang kahayag diha sa imong mga silingan?

¹⁴ Puwede ka bang maningkamot pa sa pagpalamdag sa kahayag sa kamatuoran diha sa imong mga silingan? Ang imong maayong sinultihan ug panggawi tingali makadani sa imong silingan ngadto sa kamatuoran. Pangutan-a ang kaugalingon: ‘Unsay panglantaw sa akong mga silingan kanako? Limpiyo ba pirme ang akong balay ug kabtangan nga makahatag ug maayong impresyon sa mga silingan? Mangita ba kog paagi nga makatabang sa uban?’ Kon makig-estorya sa ubang Saksi, puwede ba nimo silang pangutan-on kon unsay epekto sa ilang pagkabuotan ug maayong panggawi ngadto sa ilang mga paryente, silingan, kauban sa trabaho, o eskolmet? Lagmit makadungog kag maayong mga eksperyensiya.​—Efe. 5:9.

15. Nganong importante nga magpadayon sa pagbantay?

¹⁵ Aron padayon tang makapalamdag sa atong kahayag, kinahanglan tang mahibalo kon unsa na tang panahona nagkinabuhi. Balikbalik nga giawhag ni Jesus ang iyang mga tinun-an: “Magpadayon sa pagbantay.” (Mat. 24:42; 25:13; 26:41) Siyempre, kon maghunahuna tang layo pa kaayo ang “dakong kasakitan,” nga dili pa ni moabot sa atong panahon, mawala sa atong hunahuna ang pagkadinalian sa buluhatong pagsangyaw. (Mat. 24:21) Imbes hayag tang molamdag sa atong mga silingan, ang atong kahayag moawop ug basin mapalong pa gani.

16, 17. Unsay imong mahimo aron magmabinantayon?

¹⁶ Samtang nagkagrabe kining kritikal nga panahon, kinahanglan tang magpadayon sa pagbantay. Dihang molihok si Jehova, untop gyod ni sa panahon. Segurado gyod nâ. (Mat. 24:42-44) Samtang magpaabot, magmapailobon ug magmabinantayon. Basaha ang Pulong sa Diyos kada adlaw, ug padayon sa pag-ampo. (1 Ped. 4:7) Konsideraha ang maayong mga ehemplo sa mga igsoon nga nagmalipayon pinaagi sa pagpadayon sa pagbantay ug pagpalamdag sa ilang kahayag. Usa ka maayong ehemplo ang eksperyensiya diha sa artikulong “Setenta ka Tuig nga Nagkupot sa Sidsid sa Usa ka Hudiyo,” sa Abril 15, 2012 nga Bantayanang Torre, panid 18-21.

¹⁷ Himoang makapalig-on ang imong mga kalihokan ug pagpakig-uban. Makahatag nâ nimog dakong kalipay, ug morag paspas nga molabay ang panahon. (Efe. 5:16) Usa ka gatos ka tuig kanhi, ang atong mga igsoon puliki kaayo ug daghag nalampos. Pero mas daghan tag nalampos karon tungod sa giya ni Jehova. Gipalamdag nato ang atong kahayag nga mas labaw pa kay sa gihunahuna kaniadto.

18, 19. Sa unsang paagi matabangan ta sa mga ansiyano nga mahimong mabinantayon ug aktibo? Paghatag ug pananglitan.

 ¹⁸ Makapalig-on sa pagtuo ang pagkahibalo nga makaalagad ta kang Jehova bisag dili ta hingpit. Busa, apresyaha ang tagana ni Jehova nga “gasa nga mga lalaki,” ang mga ansiyano sa kongregasyon. (Basaha ang Efeso 4:8, 11, 12.) Dihang may mobisita nimong ansiyano, pahimusli ang kahigayonan nga makakuhag kaalam ug makabenepisyo sa iyang tambag.

¹⁹ Pananglitan, usa ka magtiayon sa England ang nagkaproblema sa ilang kaminyoon, ug nangayo silag tabang sa duha ka ansiyano. Gibati sa asawa nga wala manguna sa espirituwal ang iyang bana. Ang bana miangkon nga dili siya maayong magtutudlo ug wala siya mag-eskedyul ug regular nga pamilyahanong pagsimba. Gihisgotan sa mga ansiyano ang ehemplo ni Jesus. Si Jesus nag-atiman sa iyang mga tinun-an ug naghunahuna sa ilang panginahanglan. Giawhag sa mga ansiyano ang bana nga sundogon si Jesus. Gidasig pod nila ang asawa nga magpailob. Gihatagan sab nilag pipila ka praktikal nga sugyot ang magtiayon kon unsaon nila pagtinabangay aron makahimog pamilyahanong pagsimba kauban sa ilang duha ka anak. (Efe. 5:21-29) Sa ulahi, gikomendahan sa mga ansiyano ang paningkamot sa bana. Gidasig nila siya sa paglahutay ug sa pagsalig sa balaang espiritu aron matabangan siya nga mahimong maayong espirituwal nga ulo. Ang gugma ug kaayo sa mga ansiyano nakatabang sa maong pamilya sa pagpalamdag sa ilang kahayag.

20. Unsay imong madahom samtang magpalamdag ka sa imong kahayag?

²⁰ “Malipayon ang matag usa nga nahadlok kang Jehova, nga nagalakaw sa iyang mga dalan,” miawit ang salmista. (Sal. 128:1) Kon imong ipalamdag ang imong kahayag​—pinaagi sa pagtabang sa uban nga moalagad sa Diyos, pagpalig-on sa panaghiusa, ug pagpadayon sa pagbantay—​mahimo kang mas malipayon. Makita sa uban ang imong maayong buhat, ug mapalihok sila sa paghimaya sa atong Amahan.​—Mat. 5:16.