Sa tinuod lang, walay makaseguro karon kon unsa gyoy hitsura ni Pablo. Ang iyang mga hulagway diha sa atong publikasyon interpretasyon lang sa nagdrowing niini, nga wala ibase sa napamatud-ang arkeolohikal nga mga impormasyon.

Pero, may pipila ka impormasyon nga naghatag ug ideya sa hitsura ni Pablo. Pananglitan, ang Marso 1, 1902 nga Zion’s Watch Tower nag-ingon: “Bahin sa hitsura ni Pablo: . . . Sa ‘Acts of Paul and Thecla,’ . . . nga gisulat mga A. D. 150, may paghulagway kang Pablo nga tingali mao ang kinamaayohan, ug mao ang naandan. Siya gihulagway ingong ‘mubo, upaw, bakang, bus-ok ug lawas, nag-abot ang kilay; taason ug ilong.’”

Ang The Oxford Dictionary of the Christian Church (1997 nga edisyon) nag-ingon bahin nianang karaang sinulat: “Ang pipila ka impormasyon sa ‘Acts’ lagmit gibase sa kasaysayan.” Ang The Acts of Paul and Thecla gitahod pag-ayo niadtong unang mga siglo. Ingong pamatuod, dihay 80 ka Gregong manuskrito niana, ug diha poy bersiyon sa ubang pinulongan. Busa, ang atong paghulagway kang Pablo nahiuyon sa pipila ka karaang impormasyon bahin sa iyang hitsura.

Pero hinumdomi nga naa pay mas importante kay sa hitsura ni Pablo. Bisan panahon sa ministeryo ni Pablo, ang pipila ka magsusupak nag-ingon nga “sa personal siya maluya ug ang iyang pagsulti talamayon.” (2 Cor. 10:10) Pero angay natong hinumdoman nga nahimo siyang Kristohanon pinaagi sa usa ka milagro gikan kang Jesus. Hunahunaon sab nato ang nalampos ni Pablo ingong “piniling sudlanan alang [kang Kristo] aron magdala sa . . . ngalan [ni Jesus] ngadto sa tanang kanasoran.” (Buh. 9:3-5, 15; 22:6-8) Ug konsideraha ang mga benepisyo nga atong nadawat tungod sa mga basahon sa Bibliya nga gipasulat ni Jehova kang Pablo.

Wala ipanghambog ni Pablo ang iyang nalampos sa dili pa siya Kristohanon, ug wala pod niya hisgoti ang iyang hitsura. (Buh. 26:4, 5; Filip. 3:4-6) Siya miangkon: “Ako ang labing ubos sa mga apostoles, ug ako dili angay tawgon nga apostol.” (1 Cor. 15:9) Sa ulahi siya misulat: “Nganhi kanako, usa ka tawong ubos pa kay sa labing ubos sa tanang balaan, kining dili-takos nga kalulot gihatag, aron ipahayag ko ngadto sa kanasoran ang maayong balita bahin sa dili-matugkad nga bahandi ni Kristo.” (Efe. 3:8) Segurado nga ang maong mensahe mas importante kay sa paghunahuna kon unsay hitsura ni Pablo.