1, 2. (a) Sa gabii unâ sa iyang kamatayon, unsay gisulti ni Jesus sa iyang mga tinun-an? (Tan-awa ang hulagway sa sinugdan sa artikulo.) (b) Nganong importanteng hinumdoman nato ang mga rason kon nganong mosangyaw ta? (c) Unsay atong hisgotan?

SA KATAPOSANG gabii unâ sa iyang kamatayon, taastaas ang pagpakig-estorya ni Jesus sa iyang mga apostoles ug gipasaligan niya sila sa iyang dakong gugma kanila. Gisulti pod niya ang ilustrasyon bahin sa punoan sa ubas, nga atong gihisgotan sa miaging artikulo. Pinaagi niana nga ilustrasyon, gidasig ni Jesus ang iyang mga tinun-an sa “pagpamungag daghan”​—sa paglahutay sa pagsangyaw.​—Juan 15:8.

² Pero, gisultian ni Jesus ang iyang mga tinun-an kon unsay kinahanglan nilang buhaton ug kon nganong kinahanglan nilang buhaton kana. Gihatagan niya silag mga rason kon nganong mosangyaw. Nganong importanteng konsiderahon nato ang maong mga rason? Kon hinumdoman nato kon nganong kinahanglan tang magpadayon sa pagsangyaw, matabangan ta sa paglahutay sa “pagpamatuod ngadto sa tanang kanasoran.” (Mat. 24:13, 14) Busa atong hisgotan karon ang upat ka rason sa pagsangyaw.  Hisgotan sab nato ang upat ka regalo ni Jehova nga makatabang nato sa pagpadayon sa pagpamunga.

3. (a) Unsang rason sa pagsangyaw ang makita sa Juan 15:8? (b) Unsay girepresentahan sa mga bunga sa ubas sa ilustrasyon ni Jesus, ug nganong haom kana nga pagkomparar?

³ Ang pangunang rason kon nganong mosangyaw ta mao ang paghimaya kang Jehova ug pagbalaan sa iyang ngalan. (Basaha ang Juan 15:1, 8.) Matikdi nga gikomparar ni Jesus ang iyang Amahan nga si Jehova sa usa ka magtitikad, o mag-uuma, nga nagtanom ug ubas. Gipakasama ni Jesus ang iyang kaugalingon sa punoan sa ubas ug ang iyang mga sumusunod sa mga sanga. (Juan 15:5) Busa, ang mga ubas haom nga nag-ilustrar sa bunga sa Gingharian nga ipakita sa mga sumusunod ni Kristo. Giingnan ni Jesus ang iyang mga apostoles: “Ang akong Amahan mahimaya niini, nga kamo magpadayon sa pagpamungag daghan.” Ang punoan nga mamungag maayong ubas makahatag ug pasidungog sa magtitikad. Busa makahatag tag pasidungog, o himaya, kang Jehova dihang buhaton nato ang atong kinamaayohan sa pagsangyaw sa Gingharian.​—Mat. 25:20-23.

4. (a) Sa unsang mga paagi mabalaan nato ang ngalan sa Diyos? (b) Unsay imong gibati sa pribilehiyo nga makabalaan sa ngalan sa Diyos?

⁴ Sa unsang paagi ang atong pagsangyaw makabalaan sa ngalan sa Diyos? Dili nato mahimong mas balaan ang ngalan sa Diyos. Kini sagrado, o balaan, na sa bug-os nga diwa. Pero, matikdi ang giingon ni propetang Isaias: “Si Jehova sa mga panon​—siya ang Usa nga angay ninyong tagdon ingong balaan.” (Isa. 8:13) Ang usa ka paagi nga atong mabalaan ang ngalan sa Diyos mao ang pag-isip niini nga labaw sa uban pang ngalan ug sa pagtabang sa uban nga isipon kining balaan. (Mat. 6:9) Pananglitan, pinaagi sa pagsangyaw bahin sa talagsaong mga hiyas ni Jehova ug sa iyang dili mausab nga katuyoan sa katawhan, gidepensahan nato ang ngalan sa Diyos batok sa mga bakak ug pagbutangbutang ni Satanas. (Gen. 3:1-5) Dugang pa, dihang tabangan nato ang uban nga masabtang si Jehova ang angayan nga “modawat sa himaya ug sa dungog ug sa gahom,” atong gibalaan ang iyang ngalan. (Pin. 4:11) Si Rune, nga 16 ka tuig nang payunir, miingon: “Nakapalipay nako ang pagkahibalo nga nakapribilehiyo kong mahimong saksi sa Maglalalang sa uniberso. Nagdasig ni nako nga magpadayon sa pagsangyaw.”

5. (a) Unsang rason sa pagsangyaw ang gihisgotan sa Juan 15:9, 10? (b) Giunsa pagpasiugda ni Jesus ang kaimportante sa paglahutay?

⁵ Basaha ang Juan 15:9, 10. Ang atong gugma kang Jehova ug Jesus mao ang importanteng rason sa pagsangyaw. (Mar. 12:30; Juan 14:15) Giingnan ni Jesus ang iyang mga tinun-an nga kinahanglan silang “magpabilin . . . sa [iyang] gugma.” Ngano? Tungod kay ang padayong pagkinabuhi ingong tinun-an ni Kristo nagkinahanglag paglahutay. Gani, diha sa Juan 15:4-10, kadaghan gigamit ni Jesus ang pulong nga “magpabilin” aron ipasiugda ang kaimportante sa paglahutay.

6. Unsaon nato pagpakita nga gusto tang magpabilin sa gugma ni Kristo?

⁶ Unsaon nato pagpakita nga gusto tang magpabilin sa gugma ni Kristo ug padayon niyang uyonan? Mapakita nato nâ pinaagi sa pagsunod sa mga sugo ni Jesus. Sa simpleng pagkasulti, giingnan ta ni Jesus, ‘Sunda ko ninyo.’ Pero, gipabuhat lang ni Jesus ang iyang gibuhat, kay siya midugang: “Ingon nga ako nagsunod sa mga sugo sa Amahan ug nagpabilin sa iyang gugma.” Busa, siya mismo ang nagpakitag ehemplo.​—Juan 13:15.

7. Sa unsang paagi ang pagsunod konektado sa gugma?

⁷ Kon bahin sa koneksiyon sa pagsunod ug  sa gugma, giingnan ni Jesus ang iyang mga apostoles: “Siya nga nakabaton sa akong mga sugo ug nagsunod niini, siya mao ang nahigugma kanako.” (Juan 14:21) Dugang pa, pinaagi sa pagsunod sa sugo ni Jesus nga mosangyaw, atong gipakita nga gimahal nato ang Diyos kay ang mga sugo ni Jesus nagpakita sa panghunahuna sa iyang Amahan. (Mat. 17:5; Juan 8:28) Kay gimahal nato si Jehova ug Jesus, padayon pod ta nilang mahalon.

8, 9. (a) Unsay dugang rason nga mosangyaw ta? (b) Nganong ang giingon ni Jehova sa Ezequiel 3:18, 19 ug 18:23 makadasig nato nga magpadayon sa pagsangyaw?

⁸ Naa pa tay dugang rason sa padayong pagsangyaw. Nagsangyaw ta aron pasidan-an ang uban. Sa Bibliya, si Noe gitawag ug “magwawali.” (Basaha ang 2 Pedro 2:5.) Sa wala pa ang Lunop, seguradong nagsangyaw siya bahin sa umaabot nga kalaglagan. Nganong makaingon ta ana? Matikdi ang giingon ni Jesus: “Kay ingon nga sila niadtong mga adlawa sa wala pa ang baha, ang mga lalaki nangaon ug nanginom, nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan, mao man usab unya ang presensiya sa Anak sa tawo.” (Mat. 24:38, 39) Bisag dili madinawaton ang mga tawo, si Noe matinumanong nagsangyaw sa pasidaan nga gihatag kaniya.

⁹ Karon, nagsangyaw ta aron hatagan ang mga tawo ug kahigayonan nga mahibalo sa kabubut-on sa Diyos para sa katawhan. Sama kang Jehova, nanghinaot tang dawaton sa mga tawo ang mensahe ug “mabuhi.” (Ezeq. 18:23) Sa samang higayon, dihang magsangyaw sa kabalayan ug sa publikong mga lugar, naningkamot tang mapasidan-an ang mga tawo nga ang Gingharian sa Diyos moabot na ug magtapos niining dili diyosnong kalibotan.​—Ezeq. 3:18, 19; Dan. 2:44; Pin. 14:6, 7.

10. (a) Unsang rason sa pagsangyaw ang makita sa Mateo 22:39? (b) Hisgoti kon giunsa pagtabang ni Pablo ug Silas ang magbalantay sa prisohan sa Filipos.

¹⁰ Nia pay laing importanteng rason nga magpadayon ta sa pagsangyaw: Nagsangyaw ta kay gimahal nato ang atong isigkatawo. (Mat. 22:39) Tungod sa maong gugma, molahutay ta sa pagsangyaw kay nahibalo ta nga posibleng mausab ang hunahuna sa mga tawo kon mausab ang ilang kahimtang. Konsideraha ang naeksperyensiyahan ni apostol Pablo ug sa iyang kaubang si Silas. Sa siyudad sa Filipos, gipriso sila sa mga magsusupak. Dayon pagkatungang gabii, kalit nga milinog ug naabli ang mga pultahan sa prisohan. Ang magbalantay sa prisohan nahadlok nga nakaikyas ang mga piniriso ug magpakamatay na unta siya. Pero si Pablo misinggit: “Ayaw unsaa ang imong kaugalingon!” Ang naguol nga magbalantay nakapangutana: “Unsay kinahanglan kong buhaton aron maluwas?” Ila siyang giingnan: “Tumuo ka sa Ginoong Jesus ug ikaw maluwas.”​—Buh. 16:25-34.

11, 12. (a) Unsay koneksiyon sa asoy bahin sa magbalantay sa prisohan ug sa atong pagsangyaw? (b) Kinahanglang kanunay tang andam sa pagbuhat sa unsa?

¹¹ Unsay koneksiyon sa asoy bahin sa  magbalantay sa prisohan ug sa atong pagsangyaw? Matikdi kini: Ang magbalantay nausab ug nangayog tabang pagkahuman sa linog. Sa susama, ang pipila nga dili modawat kaniadto sa mensahe sa Bibliya nausab ug nangayog tabang dihang kalit nga natay-og ang ilang kalibotan. Pananglitan, may pipila sa atong teritoryo ang nakurat dihang kalit nga nawad-an sa ilang dugay nang trabaho. Ang uban tingali nahugno tungod sa dili pa dugayng pagkabungkag sa kaminyoon. Duna poy naguol pag-ayo human madayagnos ug grabeng sakit o mamatyan ug minahal. Dihang mahitabo nâ, ang pipila makapangutana kon unsay kahulogan sa kinabuhi​—nga wala ra nila hunahunaa kaniadto. Tingali makapangutana sila, ‘Unsay kinahanglan nakong buhaton aron maluwas?’ Dihang maestorya nato sila, basig gusto na nilang maminaw sa mensahe sa paglaom.

¹² Busa, pinaagi sa padayong pagsangyaw, makahatag ta nilag paghupay sa panahon nga andam na silang modawat niana. (Isa. 61:1) Si Charlotte, nga 38 ka tuig nang payunir, miingon: “Walay direksiyon ang kinabuhi sa mga tawo karon. Kinahanglang hatagan silag kahigayonan nga madunggan ang maayong balita.” Si Ejvor, nga 34 ka tuig nang payunir, miingon: “Mas daghan ang magul-anon karon. Gusto gyod nako silang tabangan. Nagdasig nâ nako sa pagsangyaw.” Klaro, ang gugma sa isigkatawo maoy maayong rason nga mopadayon ta sa pagsangyaw!

13, 14. (a) Unsa nga regalo ang gihisgotan sa Juan 15:11? (b) Sa unsang paagi maatoa ang kalipay ni Jesus? (c) Sa unsang paagi ang kalipay makatabang sa atong ministeryo?

¹³ Sa kataposang gabii unâ sa iyang kamatayon, gisulti pod ni Jesus sa iyang mga apostoles ang pipila ka regalo nga makatabang nila aron padayong mamunga. Unsa kana nga mga regalo, ug sa unsang paagi makabenepisyo ta niana?

¹⁴ Kalipay. Bug-at ba ang pagsunod sa sugo ni Jesus nga mosangyaw? Dili! Human isulti ang ilustrasyon bahin sa punoan sa ubas, si Jesus miingon nga ingong mga magsasangyaw sa Gingharian, makatagamtam tag kalipay. (Basaha ang Juan 15:11.) Gani, siya nagpasalig nga maatoa ang iyang kalipay. Sa unsang paagi? Sa nahisgotan na, gikomparar ni Jesus ang iyang kaugalingon sa punoan sa ubas ug ang iyang mga tinun-an sa mga sanga. Tagan-an sa punoan ang panginahanglan sa mga sanga. Basta dili putlon ang sanga, ang punoan makatagana niinig tubig ug sustansiya. Sa susama, basta magpabilin tang nahiusa kang Kristo pinaagi sa pagsunod pag-ayo sa iyang mga tunob, atong matagamtam ang kalipay nga iyang gibati sa pagbuhat sa kabubut-on sa iyang Amahan. (Juan 4:34; 17:13; 1 Ped. 2:21) Si Hanne, nga kapig 40 ka tuig nang payunir, miingon, “Ang kalipay nga kanunay nakong bation human ko magsangyaw nakapadasig nako nga mopadayon sa pag-alagad kang Jehova.” Oo, ang tinuod nga kalipay makahatag natog kusog nga padayong magsangyaw bisan pag dili maminaw ang mga tawo.​—Mat. 5:10-12.

15. (a) Unsang regalo ang gihisgotan sa Juan 14:27? (b) Unsay ikatabang sa kalinaw aron padayon tang mamunga?

¹⁵ Kalinaw. (Basaha ang Juan 14:27.) Sa sayong bahin sa gabii unâ sa iyang kamatayon, giingnan ni Jesus ang iyang mga apostoles: “Ihatag ko kaninyo ang akong kalinaw.” Sa unsang paagi ang maong regalo​—iyang kalinaw—​makatabang nato sa pagpamunga? Samtang magpadayon ta sa pagsangyaw, atong matagamtam ang dumalayong kalinaw kay nahibalo ta nga giuyonan ta ni Jehova ug Jesus. (Sal. 149:4; Roma 5:3, 4; Col. 3:15) Si Ulf, nga 45 ka tuig nang payunir, miingon: “Kapoyon ko kon magsangyaw,  pero nakahatag nig tinuod nga katagbawan ug kahulogan sa akong kinabuhi.” Mapasalamaton gyod ta nga atong natagamtam ang kalinaw sa hunahuna!

16. (a) Unsang regalo ang gihisgotan sa Juan 15:15? (b) Sa unsang paagi ang mga apostoles makapabiling mga higala ni Jesus?

¹⁶ Panaghigalaay. Human moingon si Jesus nga gusto niyang “mabug-os” ang kalipay nga natagamtam sa iyang mga apostoles, iyang gisaysay nila ang kaimportante sa gugma nga andam mosakripisyo. (Juan 15:11-13) Dayon, siya miingon: “Gitawag ko kamong mga higala.” Pagkabililhong regalo nga mahimong higala ni Jesus! Unsay kinahanglang buhaton sa mga apostoles aron magpabiling iyang mga higala? Kinahanglan silang ‘magpadayon sa pagpamunga.’ (Basaha ang Juan 15:14-16.) Mga duha ka tuig unâ pa niana, si Jesus nagsugo sa iyang mga apostoles: “Sa inyong pagpanglakaw, pagwali, nga magaingon, ‘Ang gingharian sa mga langit haduol na.’” (Mat. 10:7) Maong nianang gabhiona, iyang gidasig sila sa paglahutay sa buluhaton nga ilang gisugdan. (Mat. 24:13; Mar. 3:14) Dili sayon ang pagsunod sa sugo ni Jesus, pero posible silang molampos ug makapabiling iyang mga higala. Sa unsang paagi? Pinaagi sa tabang sa lain pang regalo.

17, 18. (a) Unsa nga regalo ang gihisgotan sa Juan 15:16? (b) Sa unsang paagi ang maong regalo makatabang sa mga tinun-an ni Jesus? (c) Unsang mga regalo ang makapalig-on nato karon?

¹⁷ Natubag nga mga pag-ampo. Si Jesus miingon: “Bisan unsay inyong pangayoon sa Amahan sa akong ngalan iyang ihatag kini kaninyo.” (Juan 15:16) Seguradong nalig-on niini nga saad ang mga apostoles! * Bisag wala kaayo nila masabti nga hapit nang matapos ang kinabuhi sa ilang Lider dinhi sa yuta, dili sila pasagdan. Andam si Jehova sa pagtubag sa ilang mga pag-ampo ug pagtabang nila nga matuman ang sugo nga isangyaw ang Gingharian. Ug tuod man, wala madugay human niadto, naeksperyensiyahan nila nga gitubag ni Jehova ang ilang mga pag-ampo.​—Buh. 4:29, 31.

¹⁸ Mao man usab karon. Samtang padayon tang mamunga, magpabilin tang higala ni Jesus. Dugang pa, makaseguro tang andam si Jehova sa pagtubag sa atong mga pag-ampo aron maatubang ang mga problema samtang magsangyaw ta sa maayong balita. (Filip. 4:13) Mapasalamaton gyod ta nga tubagon ni Jehova ang atong mga pag-ampo ug magpabiling higala ni Jesus! Kini nga mga regalo ni Jehova magpalig-on nato aron padayon tang mamunga.​—Sant. 1:17.

19. (a) Nganong padayon tang mosangyaw? (b) Unsay makatabang nato sa pagtuman sa buluhaton sa Diyos?

¹⁹ Sa nahisgotan na, magpadayon ta sa pagsangyaw aron mahimaya si Jehova ug mabalaan ang iyang ngalan, mapakita ang atong pagmahal kang Jehova ug Jesus, mapasidan-an ang mga tawo, ug mapakita ang atong gugma sa isigkatawo. Dugang pa, ang mga regalo nga kalipay, kalinaw, panaghigalaay, ug natubag nga mga pag-ampo makapalig-on nato sa pagtuman sa buluhaton sa Diyos. Malipay gyod si Jehova kon iyang makita nga naningkamot ta sa ‘pagpadayon sa pagpamungag daghan’!