1, 2. (a) Sa unsang paagi ang mga Kristohanon maapektohan sa kalit nga kausaban sa kahimtang? (Tan-awa ang hulagway sa sinugdan sa artikulo.) (b) Sumala sa Salmo 131, unsay makatabang nato aron magpabiling malinawon ang hunahuna?

DIHANG nahibaloan sa magtiayong Lloyd ug Alexandra nga nareasayn sila, sa sinugdan naguol sila. Kon buot hunahunaon, Bethelite sila sa kapig 25 ka tuig. Si Lloyd miingon: “Para nako, bahin na sa akong kinabuhi ang Bethel ug ang akong asaynment. Sa hunahuna, nasabtan nako ang mga rason sa maong kausaban, pero sa misunod nga mga semana ug bulan, sagad mobati kong sinalikway. Mag-usab-usab ang akong gibati​—may panahong positibo ko, dayon kalit kong maguol.”

² Dihang kalit nga mausab ang atong kahimtang, tingali mabalaka ta ug ma-stress. (Prov. 12:25) Basin malisdan pa gani ta sa pagdawat sa maong mga kausaban. Niana nga kahimtang, unsaon nato pagpabiling kalmado ug malinawon? (Basaha ang Salmo 131:1-3.) Atong konsiderahon kon sa unsang paagi ang pipila ka karakter sa Bibliya ug alagad ni Jehova karon nakapabiling malinawon ang hunahuna bisan sa mga kausaban.

3. Unsang panghitabo ang nakausab sa kahimtang ni Jose?

³ Mga 17 anyos si Jose dihang gibaligya siya sa iyang mga igsoon ingong ulipon. Nasina sila kay si Jose ang paborito sa ilang amahan. (Gen. 37:2-4, 23-28) Sulod sa mga 13 ka tuig, kinahanglang antoson ni Jose ang pagkaulipon ug pagkabilanggo sa Ehipto, nga layo sa iyang minahal nga amahang si Jacob. Pero wala siya mawad-ig paglaom ug masuko. Unsay nakatabang kang Jose?

4. (a) Samtang didto sa prisohan, sa unsa nagpokus si Jose? (b) Sa unsang paagi gitubag ni Jehova ang mga pag-ampo ni Jose?

⁴ Samtang nag-antos sa prisohan, lagmit nagpokus si Jose sa mga ebidensiya nga gipanalanginan siya ni Jehova. (Gen. 39:21; Sal. 105:17-19) Ang matagnaong mga damgo ni Jose sa bata pa siya nagpasalig sab niya nga giuyonan siya ni Jehova. (Gen. 37:5-11) Lagmit kadaghan niyang gitugyan kang Jehova ang iyang kasakit. (Sal. 145:18) Ingong tubag sa kinasingkasing nga mga pag-ampo ni Jose, si Jehova naghatag niyag kombiksiyon nga Siya “nag-uban kaniya” sa tanan niyang kalisdanan.​—Buh. 7:9, 10. *

5. Sa unsang paagi makaapektar “ang kalinaw sa Diyos” sa atong pagkab-ot ug espirituwal nga mga tumong?

⁵ Bisan pa sa lisod kaayong kahimtang, mahupayan ta tungod sa “kalinaw sa Diyos” nga nagbantay sa atong gahom sa pangisip. (Basaha ang Filipos 4:6, 7.) Busa, kon modangop ta kang Jehova dihang mabug-atan ta sa mga kabalaka, ang kalinaw sa Diyos makapalig-on sa atong determinasyon nga mokab-ot ug espirituwal nga mga tumong ug masuklan ang tendensiya nga mohunong sa pag-alagad. Konsiderahon nato ang pipila ka modernong ehemplo nga nakaeksperyensiya niini.

6, 7. Sa unsang paagi ang espesipikong mga pag-ampo makatabang nato nga magmalinawon pag-usab ang hunahuna? Paghatag ug pananglitan.

⁶ Dihang nahibaloan sa magtiayong Ryan ug Juliette nga natapos na ang ilang asaynment ingong temporaryong espesyal payunir, sila naguol. “Nag-ampo dayon mi kang Jehova,” matod ni Ryan. “Nahibalo mi nga espesyal ni nga oportunidad nga ikapakita ang among pagsalig kaniya. Daghan ang bag-ohan sa among kongregasyon, maong miampo mi kang Jehova nga tabangan mi niya sa pagpakitag maayong ehemplo sa pagtuo.”

⁷ Giunsa pagtubag ni Jehova ang ilang pag-ampo? Si Ryan nag-ingon: “Human dayon sa pag-ampo, nawala ang negatibong pagbati ug kabalaka nga among gibati sa sinugdan. Ang kalinaw sa Diyos nagbantay sa among kasingkasing ug gahom sa pangisip. Naamgohan namo nga mapuslanon gihapon mi kang Jehova kon magpabiling positibo ang among panglantaw.”

8-10. (a) Sa unsang paagi ang espiritu sa Diyos makatabang nato dihang mabalaka ta? (b) Sa unsang mga paagi tabangan ta ni Jehova sa pagpokus sa espirituwal nga mga butang?

⁸ Gawas pa sa pagtabang nato nga mahimong kalmado, ang espiritu sa Diyos magpahinumdom nato sa mga teksto nga motabang nato sa pag-una sa espirituwal nga mga butang. (Basaha ang Juan 14:26, 27.) Matikdi ang magtiayong Philip ug Mary, kinsa nag-alagad sa Bethel sa halos 25 ka tuig. Sulod sa upat ka bulan, pareho silang namatyag mama ug laing paryente ug nagsugod pag-atiman sa papa ni Mary, nga may dementia (sakit sa pangisip).

 ⁹ Si Philip miingon: “Abi nakog OK na ko, pero di pa diay. Nabasahan nako ang Colosas 1:11 sa usa ka tun-anang artikulo sa Bantayanang Torre. Tinuod, nakalahutay ko pero dili sa bug-os. Kinahanglan kong molahutay ‘sa bug-os uban ang pailob ug kalipay.’ Kining tekstoha nagpahinumdom nako nga ang akong kalipay wala magdepende sa akong kahimtang, kondili sa epekto sa espiritu sa Diyos sa akong kinabuhi.”

¹⁰ Ingong balos sa ilang paningkamot nga magpokus sa espirituwal nga mga butang, gipanalanginan ni Jehova si Philip ug Mary sa daghang paagi. Wala madugay human mobiya sa Bethel, nakakaplag silag mauswagong mga Bible study nga gustong magtuon dili lang kas-a sa usa ka semana. Nahinumdom si Mary: “Sila ang among kalipay ug paagi ni Jehova sa pagpahinumdom namo nga mahimong OK ra ang tanan.”

11, 12. (a) Nganong gipanalanginan ni Jehova si Jose? (b) Sa unsang paagi gipanalanginan si Jose tungod sa iyang paglahutay?

¹¹ Dihang mag-atubang tag kalit nga kausaban, mahimong mabalaka ta pag-ayo sa umaabot. Puwede unta ning mahitabo kang Jose. Pero gibuhat niya ang kinamaayohan nga iyang mahimo sa iyang kahimtang, busa gipanalanginan siya ni Jehova. Bisag binilanggo, si Jose naningkamot sa pagtuman bisan unsay ipatrabaho sa pangulong opisyal, sama sa iyang gibuhat dihang nagtrabaho siya sa panimalay ni Potipar.​—Gen. 39:21-23.

¹² Usa ka adlaw niana, gisaligan si Jose sa pag-atiman sa duha ka piniriso nga kaniadto may prominenteng posisyon sa palasyo sa Paraon. Tungod sa kabuotan ni Jose, gisulti nila ang ilang mga gikabalak-an ug ang ilang makapalibog nga mga damgo sa miaging gabii. (Gen. 40:5-8) Wala magdahom si Jose, pero ang maong panag-estoryahay miresulta sa pagpagawas kaniya. Bisag nag-antos siyag duha pa ka tuig sa prisohan, sa ngadtongadto gipagawas ra siya, ug niana mismong adlawa, natudlo siya ingong magmamando ikaduha sa Paraon.​—Gen. 41:1, 14-16, 39-41.

13. Unsay atong buhaton aron panalanginan ta ni Jehova bisag unsay atong kahimtang?

¹³ Sama ni Jose, makasinati sab tag kahimtang nga dili gyod nato makontrolar. Pero, kon magmapailobon ta ug maningkamot nga himoon ang atong kinamaayohan sa atong kahimtang, panalanginan ta ni Jehova. (Sal. 37:5) Tinuod, may mga panahon nga ‘maglibog’ ta, pero dili ta mobating sama sa giingon ni apostol Pablo, nga “bug-os . . . walay kalingkawasan.” (2 Cor. 4:8) Mahitabo nâ sa atong kahimtang, ilabina kon magpokus ta sa atong ministeryo.

14-16. Sa unsang paagi nagpokus gihapon sa ministeryo si Felipe bisag nag-usab-usab ang iyang kahimtang?

¹⁴ Si Felipe nga tig-ebanghelyo maoy maayong ehemplo sa pagpokus sa ministeryo bisag nag-usab-usab ang kahimtang. Sa Jerusalem, nahitabo ang grabeng paglutos human sa kamatayon ni Esteban ingong martir. * Nianang panahona, nakadawat si Felipe ug bag-ong pribilehiyo. (Buh. 6:1-6) Pero dihang nagkatibulaag ang mga sumusunod sa Kristo, gusto ni Felipe nga magpabiling puliki sa pag-alagad. Misangyaw siya sa Samaria, usa ka siyudad diin daghan pa ang wala masangyawi niadtong panahona.​—Mat. 10:5; Buh. 8:1, 5.

¹⁵ Andam moadto si Felipe bisag asa siya ipadala sa espiritu sa Diyos, maong gigamit siya ni Jehova sa pag-adto sa mga dapit nga wala pa masangyawi. Ang iyang dili mapihigong paagi sa pagpakig-estorya nakapahupay sa mga Samarianhon, kinsa pirmeng tamayon sa mga Hudiyo. Mao diay nga ang panon “nagkahiusa” sa pagpaminaw niya!​—Buh. 8:6-8.

¹⁶ Dayon si Felipe gigiyahan sa espiritu sa Diyos ngadto sa Asdod ug Cesarea, duha ka siyudad nga daghang Hentil ang namuyo. (Buh. 8:39, 40) Mga 20 ka tuig human sa iyang unang pagsangyaw sa Samaria, nausab na pod ang kahimtang ni Felipe. Siya pamilyado na ug nagpabilin sa iyang teritoryo. Bisag nag-usab-usab ang iyang kahimtang, nagpokus gihapon si Felipe sa iyang ministeryo. Tungod niana, siya ug ang iyang pamilya abundang gipanalanginan ni Jehova.​—Buh. 21:8, 9.

17, 18. Sa unsang paagi ang pagpokus sa ministeryo makatabang nato sa pagpabiling balanse bisan pa sa kausaban sa kahimtang?

¹⁷ Daghang bug-os panahong mga alagad ang makapamatuod nga ang pagpokus sa ministeryo nakatabang nila sa pagpabiling balanse bisag mag-usab-usab ang kahimtang. Dihang migawas sa Bethel si Osborne ug Polite, magtiayong taga-South Africa, naghunahuna sila nga makakita dayon silag partaym nga trabaho ug puy-anan. “Ikasubo,” matod ni Osborne, “wala dayon mi makakitag trabaho.” Ang iyang asawang si Polite miingon: “Tulo ka bulan ming walay trabaho, ug wala mi tinigom. Lisod kaayo to.”

¹⁸ Unsay nakatabang nila niining lisod nga situwasyon? Si Osborne miingon: “Ang pagsangyaw uban sa kongregasyon nakatabang  gyod namo sa pagpabiling positibo ug pagpokus sa pag-alagad. Midesisyon mi nga magmapuliki sa pagsangyaw imbes magsigeg kabalaka, ug nakahatag nâ namog dakong kalipay. Bisag asa na lang mi nangitag trabaho, ug sa ngadtongadto nakakita ra gyod mi.”

19-21. (a) Unsay motabang nato nga magmalinawon ang hunahuna? (b) Unsay mga kaayohan kon moadyas ta sa wala damhang mga kausaban?

¹⁹ Sama sa gipakita niini nga mga ehemplo, kon himoon nato ang atong kinamaayohan sa atong kahimtang ug masaligong maghulat kang Jehova, magmalinawon ang atong hunahuna. (Basaha ang Miqueas 7:7.) Basin maamgohan pa gani nato nga mas mapalig-on ang atong espirituwalidad tungod sa atong pag-adyas sa bag-ong kahimtang. Base sa iyang naeksperyensiyahan, si Polite, nga gihisgotan ganina, miingon: “Ang kausaban sa asaynment nagtudlo nako kon unsay tinuod nga kahulogan sa pagsalig kang Jehova bisan sa kalisdanan. Mas nasuod ko niya.”

²⁰ Si Mary, nga gihisgotan ganina, padayong nag-atiman sa iyang tigulang nga papa samtang nagpayunir. Siya miingon: “Akong nakat-onan nga dihang mabalaka ko, kinahanglan kong mohunong, moampo, dayon morelaks. Ang pagtugyan sa mga butang ngadto kang Jehova mao ang kinadak-ang leksiyon nga akong nakat-onan, ug kinahanglanon kaayo ni sa umaabot.”

²¹ Si Lloyd ug Alexandra, nga gihisgotan sa sinugdan, miangkon nga ang kausaban sa ilang kahimtang nagsulay sa ilang pagtuo sa mga paaging wala nila damha. Pero miingon sila: “Ang mga pagsulay magpakita kon tinuod ba ang atong pagtuo ug kon makahimo ba ni sa pagpalig-on ug paghupay nato panahon sa kalisdanan. Nahimo ming mas maayong tawo.”

22. Kon padayon natong buhaton ang atong kinamaayohan sa atong kahimtang, sa unsa ta makasalig?

²² Kon kalit nga mausab ang imong kinabuhi​—tungod man sa mga asaynment sa organisasyon, sakit, o bag-ong responsibilidad sa pamilya—​makasalig ka nga atimanon ka ni Jehova ug tabangan ka sa hustong panahon. (Heb. 4:16; 1 Ped. 5:6, 7) Sa kasamtangan, padayong buhata ang imong kinamaayohan sa imong kahimtang. Pakigsuod sa imong langitnong Amahan pinaagig pag-ampo, ug isalig ang imong kaugalingon sa iyang mapinanggaong mga kamot. Niining paagiha, magmalinawon ang imong hunahuna bisag mag-usab-usab ang imong kahimtang.