1-2. Unsa ang lukat, ug nganong gikinahanglan nato kini?

SA DIHANG ang hingpit nga tawong si Adan nakasala, nawad-an siyag kahigayonan nga mabuhi sa walay kataposan, hasta ang iyang umaabot nga mga anak. Sayop gyod ang gihimo ni Adan. Ang iyang sala tinuyo. Pero komosta ang iyang mga anak? Wala silay nahimong sala, ug wala nila hayloa si Adan sa pagpakasala. (Roma 5:12, 14) Naa pa bay mahimo aron maluwas sila gikan sa sentensiya nga kamatayon nga maoy angayang silot kang Adan? Oo! Wala madugay human makasala si Adan, anam-anam nga gipadayag ni Jehova kon unsaon niya pagluwas ang minilyong kaliwat ni Adan gikan sa tunglo sa sala ug kamatayon. (Gen. 3:15) Sa iyang gitakdang panahon, ipadala ni Jehova ang iyang Anak gikan sa langit aron ‘ihatag [niini] ang iyang kinabuhi ingong lukat baylo sa daghan.’—Mar. 10:45; Juan 6:51.

² Unsa ang lukat? Sa Kristohanon Gregong Kasulatan, ang lukat nagtumong sa bili nga gibayad ni Jesus aron mapalit ug balik ang giwala ni Adan. (1 Cor. 15:22) Nganong gikinahanglan nato ang lukat? Tungod kay sa sukdanan ni Jehova sa hustisya nga gitakda diha sa Balaod, ang kinabuhi kinahanglang bayran ug kinabuhi. (Ex. 21:23, 24) Giwala ni Adan ang iyang hingpit nga tawhanong kinabuhi. Aron masunod ang hustisya sa Diyos, gihalad ni Jesus ang iyang hingpit nga tawhanong kinabuhi. (Roma 5:17) Pinaagi niana, si Jesus nahimong “Amahang Walay Kataposan” sa tanang nagpakitag pagtuo sa lukat.—Isa. 9:6; Roma 3:23, 24.

3. Sumala sa Juan 14:31 ug 15:13, nganong kinabubut-ong gihalad ni Jesus ang iyang hingpit nga tawhanong kinabuhi?

³ Si Jesus kinabubut-ong mihalad sa iyang kinabuhi tungod sa iyang dakong gugma sa iyang langitnong Amahan ug kanato. (Basaha ang Juan 14:31; 15:13.) Tungod niana nga gugma, determinado siya sa pagpabiling matinumanon hangtod sa  kamatayon ug sa pagtuman sa kabubut-on sa iyang Amahan. Ingong resulta, matuman ang orihinal nga katuyoan ni Jehova para sa katawhan ug sa yuta. Niining artikuloha, atong hisgotan kon nganong gitugotan sa Diyos nga mag-antos pag-ayo si Jesus una mamatay. Lakbitan sab nato ang ehemplo sa usa ka magsusulat sa Bibliya nga nagpabili pag-ayo sa lukat. Ug sa kataposan, atong hisgotan kon unsaon nato pagpakita ang atong pagkamapasalamaton sa lukat ug kon unsaon nato pagpalalom ang atong apresasyon sa halad nga gitagana ni Jehova ug Jesus para kanato.

4. Sa unsang paagi namatay si Jesus?

⁴ Imadyina ang nahitabo sa kataposang adlaw ni Jesus dinhi sa yuta. Bisag makapangayo siyag mga lehiyon sa mga anghel sa pagpanalipod kaniya, misugot siya nga dakpon sa Romanong mga sundalo, kinsa walay kaluoy nga nagkulata kaniya. (Mat. 26:52-54; Juan 18:3; 19:1) Migamit silag latigo nga nakagisi sa iyang kaunoran. Sa ulahi, gipapas-an nila siyag bug-at nga kahoyng estaka bisag nagkadugo na ang iyang likod. Gisugdan pagguyod ni Jesus ang estaka paingon sa dapit diin siya ilansang, pero wala madugay, dihay tawo nga gipugos sa Romanong mga sundalo nga mopuli niya sa pagpas-an. (Mat. 27:32) Pag-abot ni Jesus sa dapit diin siya patyon, gilansang sa mga sundalo ang iyang kamot ug tiil diha sa estaka. Tungod sa kabug-at sa lawas ni Jesus, nagisi ang samad nga inagian sa lansang. Ang iyang mga higala naguol pag-ayo ug ang iyang inahan naghilak, pero ang kadagkoan sa mga Hudiyo nagbugalbugal kaniya. (Luc. 23:32-38; Juan 19:25) Si Jesus nag-antos sulod sa pipila ka oras. Naapektohan pag-ayo ang iyang kasingkasing ug baga, maong nag-anam ka lisod ang iyang pagginhawa. Nahibalo si Jesus nga nagmatinumanon siya, ug sa hapit na siyang mabugtoi sa gininhawa, nag-ampo siya kang Jehova sa kataposang higayon. Dayon, siya miduko ug namatay. (Mar. 15:37; Luc. 23:46; Juan 10:17, 18; 19:30) Dugay gyod siyang nag-antos, ug ang iyang kamatayon sakit kaayo ug makauulaw!

5. Para kang Jesus, unsay mas makapaguol kay sa paagi sa pagpatay kaniya?

⁵ Para kang Jesus, ang paagi sa pagpatay kaniya dili mao ang kinalisdang bahin sa iyang pag-antos. Mas naguol siya sa sumbong nga maoy gibasehan sa pagpatay kaniya. Sayop siyang giakusahan ingong tigpasipala—tawo nga walay pagtahod sa Diyos o sa ngalan sa Diyos. (Mat. 26:64-66) Naguol pag-ayo si Jesus sa maong sumbong mao nga gihangyo niya ang iyang Amahan nga dili unta Niya tugotan nga mahitabo kini nga kaulawan. (Mat. 26:38, 39, 42) Nganong gitugotan ni Jehova nga mag-antos ug mamatay ang iyang minahal nga Anak? Hisgotan nato ang tulo ka rason.

6. Nganong kinahanglang ilansang si Jesus diha sa estaka sa pagsakit?

⁶ Una, si Jesus kinahanglang ilansang diha sa estaka aron mapahigawas ang mga Hudiyo gikan sa tunglo. (Gal. 3:10, 13) Nanaad sila nga sundon ang Balaod sa Diyos, pero wala nila kini tumana. Busa, gawas nga takos sila sa kamatayon kay kaliwat sila sa makasasalang si Adan, nailalom pod sila niini nga tunglo. (Roma 5:12) Ang Balaod sa Diyos ngadto sa Israel nag-ingon nga ang tawo nga nakahimog sala nga takos sa kamatayon kinahanglang patyon. Sa pipila ka kahimtang, ang patayng lawas ibitay diha sa estaka. * (Deut. 21:22, 23; 27:26) Busa kay si Jesus gilansang diha sa estaka, nahimong posible nga ang mismong nasod nga nagsalikway kaniya makabenepisyo sa iyang halad.

7. Unsa ang ikaduhang rason kon nganong gitugotan sa Diyos nga mag-antos ang iyang Anak?

 ⁷ Konsideraha ang ikaduhang rason kon nganong gitugotan sa Diyos nga mag-antos ang iyang Anak. Iyang gibansay si Jesus sa umaabot nga papel niini ingong atong Hataas nga Saserdote. Naeksperyensiyahan ni Jesus kon unsa ka lisod ang pagsunod sa Diyos ilalom sa grabeng pagsulay. Nalisdan siya pag-ayo nga nag-ampo siya alang sa tabang uban “sa kusog nga tingog nga inubanag mga luha.” Busa kay nakasinati si Jesus ug grabeng kaguol, makasabot siya sa atong mga panginahanglan ug “makatabang siya” kanato dihang kita “ginasulayan.” Mapasalamaton gyod ta kang Jehova sa pagtudlog maluluy-on nga Hataas nga Saserdote kinsa “makasabot sa atong mga kahuyangan”!—Heb. 2:17, 18; 4:14-16; 5:7-10.

8. Unsa ang ikatulong rason kon nganong gitugotan sa Diyos nga masulayan pag-ayo si Jesus?

⁸ Ikatulo, gitugotan ni Jehova si Jesus nga mag-antos pag-ayo aron matubag ang usa ka importanteng pangutana: Ang mga tawo ba makapabiling matinumanon kang Jehova bisag nailalom sa grabeng pagsulay? Para kang Satanas, dili! Siya nangangkon nga ang mga tawo nag-alagad lang sa Diyos tungod sa hakog nga mga motibo. Ug nagtuo siya nga—sama sa ilang katigulangan nga si Adan—wala sila mahigugma kang Jehova. (Job 1:9-11; 2:4, 5) Kay masaligon si Jehova nga magmaunongon ang iyang Anak, gitugotan niya si Jesus nga masulayan kutob sa makaya sa tawo. Si Jesus nagpabiling matinumanon ug gipamatud-an niya nga bakakon si Satanas.

9. Unsang ehemplo ang gipakita ni apostol Juan?

⁹ Ang pagtuo sa daghang Kristohanon napalig-on sa pagtulon-an sa lukat. Sila nakapadayon sa pagsangyaw bisan pa sa pagsupak ug nakalahutay sa tanang matang sa pagsulay sa tibuok nilang kinabuhi. Konsideraha ang ehemplo ni apostol Juan. Maunongon siyang nagsangyaw sa kamatuoran bahin sa Kristo ug sa lukat, tingali sa kapig 60 ka tuig. Bisag hapit na siyang mag-100 anyos, ang gobyerno sa Roma naghunahuna nga peligroso kaayo siya nga tawo maong gipriso nila siya didto sa isla sa Patmos. Unsay iyang sala? Ang “pagsulti bahin sa Diyos ug . . . pagpamatuod bahin kang Jesus.” (Pin. 1:9) Maayo gyod siyang ehemplo sa pagtuo ug paglahutay!

10. Sa unsang paagi gipakita sa mga sinulat ni Juan nga iyang gipabilhan ang lukat?

¹⁰ Sa mga basahon sa Bibliya nga gisulat ni Juan, gipahayag niya ang iyang dakong gugma kang Jesus ug ang iyang apresasyon sa lukat. Kapig 100 ka beses siyang naghisgot bahin sa lukat o sa mga kaayohan nga naposible tungod niini. Pananglitan, si Juan misulat: “Kon dunay makasala, duna tay magtatabang ngadto sa Amahan, si Jesu-Kristo, ang usa nga matarong.” (1 Juan 2:1, 2) Ang mga sinulat ni Juan nagpasiugda sab sa kaimportante sa “pagpamatuod bahin kang Jesus.” (Pin. 19:10) Klaro nga gipabilhan pag-ayo ni Juan ang lukat. Unsaon nato pagpakita nga gipabilhan sab nato kini?

11. Unsay makatabang nato nga masuklan ang tentasyon?

¹¹ Sukli ang tentasyon nga magpakasala. Kon gipabilhan gyod nato ang lukat, dili ta maghunahuna: ‘Dili ra ko kinahanglang maningkamot nga suklan ang tentasyon. Puwede ra kong magpakasala, dayon mangayog pasaylo.’ Hinunoa, sa dihang tentalon ta nga mohimog sayop, kita moingon: ‘Human sa tanang gihimo ni Jehova ug Jesus para nako, makaako ba ko sa pagpakasala? Dili gyod!’ Dayon, makapangayo tag kusog kang Jehova, nga maghangyo kaniya:  ‘Ayawg itugot nga madaog ko sa tentasyon.’—Mat. 6:13.

12. Unsaon nato pagpadapat ang tambag sa 1 Juan 3:16-18?

¹² Higugmaa ang mga igsoon. Sa dihang ipakita nato ang maong gugma, gipakita sab nato ang atong apresasyon sa lukat. Ngano? Tungod kay gihatag ni Jesus ang iyang kinabuhi, dili lang para kanato, kondili sa ato pong mga igsoon. Kon andam siyang mamatay para kanila, klaro nga gimahal niya sila pag-ayo. (Basaha ang 1 Juan 3:16-18.) Mapakita nato ang atong gugma sa mga igsoon sa paagi sa atong pagtratar kanila. (Efe. 4:29, 31–5:2) Pananglitan, tabangan nato sila sa dihang sila masakit o makaatubang ug grabeng mga kalisdanan, sama sa mga kalamidad. Pero unsay atong buhaton kon ang usa ka igsoon dunay nahimo o nasulti nga nakapasakit kanato?

13. Nganong angay tang magmapinasayloon?

¹³ Malisdan ba ka usahay sa pagpasaylo sa usa ka igsoon? (Lev. 19:18) Kon mao, sunda kini nga tambag: “Padayon sa pagpailob sa usag usa ug kinasingkasing nga magpinasayloay kon ang usa dunay reklamo batok sa lain. Sama nga si Jehova kinasingkasing nga nagpasaylo kaninyo, kinahanglang buhaton sab ninyo kana.” (Col. 3:13) Matag higayon nga atong pasayloon ang atong igsoon, atong gipamatud-an sa atong langitnong Amahan nga gipabilhan gyod nato ang lukat. Unsaon nato pagpalalom ang atong apresasyon niini nga regalo sa Diyos?

14. Unsa ang usa ka paagi nga mapalalom nato ang atong apresasyon sa lukat?

¹⁴ Pasalamati si Jehova sa lukat. “Para nako, importante nga iapil ang lukat sa akong mga pag-ampo kada adlaw ug pasalamatan si Jehova niini,” miingon ang 83 anyos nga sister nga si Joanna, kinsa nagpuyo sa India. Sa imong personal nga pag-ampo, hunahunaa ang espesipikong mga sayop nga imong nahimo nianang adlawa ug dayon pangayog pasaylo kang Jehova. Siyempre, kon nakahimo kag seryosong sala, gikinahanglan sab nimo ang tabang sa mga ansiyano. Sila maminaw nimo ug mohatag ug mahigugmaong tambag gikan sa Pulong sa Diyos. Sila mag-ampo uban nimo, nga maghangyo kang Jehova nga pasayloon ka pinasukad sa halad ni Jesus ‘aron maayo ka’ sa espirituwal.—Sant. 5:14-16.

15. Nganong angay kang maggahin ug panahon sa pagbasa ug pagpamalandong bahin sa lukat?

¹⁵ Pamalandonga ang lukat. “Sa dihang magbasa ko bahin sa pag-antos ni Jesus,” miingon  ang 73 anyos nga sister nga si Rajamani, “manglugmaw ang akong mga luha.” Tingali masakitan pod ka dihang maghunahuna ka sa pag-antos nga naeksperyensiyahan sa Anak sa Diyos. Pero kon mas palandongon nimo ang sakripisyo nga gihimo ni Jesus, mas molalom ang imong gugma kaniya ug sa iyang Amahan. Aron matabangan ka sa pagpamalandong sa lukat, puwede nimo kining himoong topiko sa imong personal nga pagtuon.

16. Sa unsang paagi ang pagtudlo sa uban bahin sa lukat makatabang kanato? (Tan-awa ang hulagway sa atubangan sa magasin.)

¹⁶ Tudloi ang uban bahin sa lukat. Matag higayon nga sultian nato ang uban bahin sa lukat, molalom ang atong apresasyon niini. Duna tay nindot nga mga publikasyon ug video nga magamit nato sa pagtudlo sa uban kon nganong kinahanglang mamatay si Jesus para kanato. Pananglitan, puwede natong gamiton ang leksiyon 4 sa brosyur nga Maayong Balita Gikan sa Diyos! Kana nga leksiyon nag-ulohang “Kinsa si Jesu-Kristo?” O puwede natong hisgotan ang kapitulo 5 sa librong Unsay Gitudlo Kanato sa Bibliya? Kana nga kapitulo nag-ulohang “Ang Lukat—Pinakamaayong Regalo Gikan sa Diyos.” Ug kada tuig, mas molalom ang atong apresasyon sa lukat pinaagi sa pagtambong sa Memoryal sa kamatayon ni Jesus ug sa madasigong pagdapit sa uban nga mouban kanato. Dako kaayong pribilehiyo ang gihatag ni Jehova kanato sa pagtudlo sa uban bahin sa iyang Anak!

17. Nganong ang lukat ang kinadak-ang regalo sa Diyos ngadto sa katawhan?

¹⁷ Seguradong duna tay maayong rason nga ugmaron ug padayong palalomon ang atong apresasyon sa lukat. Tungod sa lukat, puwede tang makabaton ug suod nga relasyon kang Jehova bisag dili ta hingpit. Tungod sa lukat, ang mga buhat sa Yawa gub-on sa bug-os. (1 Juan 3:8) Tungod sa lukat, matuman ang orihinal nga katuyoan ni Jehova para sa yuta. Ang tibuok yuta mahimong paraiso. Ang tanan nimong makauban didto nahigugma ug nag-alagad kang Jehova. Hinaot nga kada adlaw, mangita tag mga paagi nga ikapakita ang atong pagpabili sa lukat—ang kinadak-ang regalo sa Diyos ngadto sa katawhan!