1. Unsay panglantaw sa daghang tawo sa trabaho?

SA INYONG dapit, unsay panglantaw sa kadaghanang tawo sa trabaho? Sa daghang nasod, ang mga tawo naggugol ug mas taas nga oras sa pagtrabaho kay sukad masukad. Ang mga tawo nga nasobrahag trabaho sagad wala nay panahon sa pagpahulay, pagpakig-uban sa pamilya, o sa pagtagbaw sa ilang espirituwal nga panginahanglan. (Eccl. 2:23) Sa laing bahin, ang uban dili gyod ganahang motrabaho ug daghan silag pasumangil aron dili makatrabaho.​—Prov. 26:13, 14.

2-3. Unsang panig-ingnan ang gipakita ni Jehova ug Jesus bahin sa trabaho?

² Lahi sa dili balanseng panglantaw sa kalibotan, tagda kon unsay panglantaw ni Jehova ug Jesus sa trabaho. Nahibalo ta nga si Jehova ganahan gyong motrabaho. Giklaro kana ni Jesus dihang siya miingon: “Ang akong Amahan nagpadayon sa pagbuhat hangtod karon, ug ako usab nagpadayon sa pagbuhat.” (Juan 5:17) Hunahunaa ang tanang gibuhat sa Diyos dihang gilalang niya ang daghan kaayong espiritung linalang ug ang lapad kaayong uniberso. Makita sab nato ang daghang nindot nga butang nga gilalang sa Diyos dinhi sa yuta. Haom lang nga miingon ang salmista: “Pagkadaghan sa imong mga buhat, Oh Jehova! Gihimo nimo kining tanan sa imong kaalam. Ang yuta napuno sa imong mga gibuhat.”​—Sal. 104:24.

³ Si Jesus nagsundog sa iyang Amahan. Ang Anak, nga gitumong ingong kaalam, mitabang dihang ‘giandam sa Diyos ang langit.’ Kauban siya ni Jehova ingong “batid nga magbubuhat.” (Prov. 8:27-31) Sa ulahi, dihang si Jesus mianhi sa yuta, maayo kaayo ang iyang gibuhat. Ang buluhaton nga gihatag ni Jehova  kaniya gipakasama niya sa pagkaon, ug ang tanan niyang gibuhat nagpamatuod nga gipadala siya sa Diyos.​—Juan 4:34; 5:36; 14:10.

4. Unsay atong makat-onan kang Jehova ug Jesus bahin sa pagpahulay?

⁴ Ang panig-ingnan ba nga gipakita ni Jehova ug Jesus sa pagtrabaho pag-ayo nagpasabot nga dili na ta kinahanglang mopahulay? Wala. Si Jehova dili gyod kapoyon, busa dili siya kinahanglang mopahulay. Pero ang Bibliya nag-ingon nga human lalanga ni Jehova ang langit ug yuta, “siya nagpahulay.” (Ex. 31:17) Dayag nga nagpasabot kana nga si Jehova mihunong sa pagpanglalang ug migahig panahon nga kalipayan ang iyang gihimo. Ug bisag si Jesus nagtrabaho pag-ayo samtang dinhi sa yuta, migahin gihapon siyag panahon sa pagpahulay ug sa pagpangaon uban sa iyang mga higala.​—Mat. 14:13; Luc. 7:34.

5. Daghang alagad sa Diyos ang malisdan sa pagbuhat sa unsa?

⁵ Ang Bibliya nagdasig sa katawhan sa Diyos nga magmalipayon sa pagtrabaho. Ang iyang mga alagad angayng magkugi imbes magtinapolan. (Prov. 15:19) Tingali nagtrabaho ka aron matagan-an ang imong pamilya. Ug ang tanang tinun-an sa Kristo dunay responsibilidad sa pagsangyaw sa maayong balita. Pero, nagkinahanglan sab kag igong pahulay. Malisdan ka ba usahay sa pagbalanse sa imong panahon para sa sekular nga trabaho, pagsangyaw, ug pagpahulay? Unsaon nato pagkahibalo kon unsa ka taas nga panahon ang igugol sa pagtrabaho ug sa pagpahulay?

6. Sa unsang paagi gipakita sa Marcos 6:30-34 nga si Jesus may balanseng panglantaw sa trabaho ug pahulay?

⁶ Importante nga mabatonan nato ang balanseng panglantaw sa trabaho. Si Haring Solomon gidasig sa pagsulat: “Dunay gitakdang panahon alang sa . . . matag kalihokan.” Naghisgot siyag pagtanom, pagtukod, paghilak, pagkatawa, pagsayaw, ug uban pang kalihokan. (Eccl. 3:1-8) Klaro nga ang trabaho ug pahulay maoy duha ka importanteng bahin sa kinabuhi. Si Jesus may balanseng panglantaw sa trabaho ug pahulay. Dihay higayon nga ang mga apostoles namauli gikan sa pagsangyaw. Sa ilang kapuliki, “wala silay higayon bisan sa pagpangaon.” Si Jesus miingon: “Mangadto ta sa usa ka mingaw nga dapit aron makapahulay kadiyot.” (Basaha ang Marcos 6:30-34.) Bisag siya ug ang iyang mga tinun-an dili kanunayng makapahulay, nahibalo si Jesus nga silang tanan nagkinahanglag pahulay.

7. Sa unsang paagi ang pagkonsiderar sa balaod sa Igpapahulay makatabang kanato?

⁷ Usahay, gikinahanglan ang pagpahulay o pag-usab sa atong adlaw-adlawng rutina. Makita nato kana sa kahikayan nga gihimo sa Diyos para sa iyang katawhan kaniadto​—ang senemanang Igpapahulay. Dili na ta ilalom sa Moisesnong Balaod, pero makabenepisyo ta sa pagkonsiderar kon unsay giingon niana bahin sa Igpapahulay. Ang atong makat-onan makatabang nato sa pag-analisar sa atong panglantaw sa trabaho ug pahulay.

8. Sumala sa Exodo 31:12-15, para sa unsa ang adlaw sa Igpapahulay?

⁸ Ang Pulong sa Diyos nag-ingon nga human sa unom ka “adlaw” sa paglalang, ang Diyos mihunong sa paglalang sa mga butang sa yuta. (Gen. 2:2) Pero, ganahan gyong motrabaho si Jehova, ug sa laing mga paagi siya “nagpadayon sa pagbuhat.” (Juan 5:17) Ang sugo nga senemanang Igpapahulay gibase sa pagpahulay ni Jehova sa ikapitong adlaw, nga gihisgotan sa Genesis. Ang Diyos miingon nga ang Igpapahulay maoy ilhanan tali kaniya ug sa  Israel. Adlaw kadto sa ‘bug-os nga pagpahulay, nga balaan kang Jehova.’ (Basaha ang Exodo 31:12-15.) Walay gitugotan nga motrabaho, apil ang mga bata, ulipon, ug bisan ang binuhing mga hayop. (Ex. 20:10) Pinaagi niini, ang mga tawo makahatag ug dugang pagtagad sa espirituwal nga mga butang.

9. Sa panahon ni Jesus, unsa ang dili balanseng panglantaw sa mga tawo bahin sa Igpapahulay?

⁹ Ang adlaw sa Igpapahulay makaayo sa katawhan sa Diyos. Pero daghang lider sa relihiyon sa panahon ni Jesus ang naghimog estrikto kaayong mga lagda bahin niini. Miingon sila nga supak sa balaod ang pagpangutlog mga uhay o pag-ayog tawong masakiton panahon sa Igpapahulay. (Mar. 2:23-27; 3:2-5) Ang maong mga panglantaw supak sa panghunahuna sa Diyos, ug giklaro kana ni Jesus niadtong naminaw kaniya.

10. Unsay atong makat-onan sa Mateo 12:9-12 bahin sa panglantaw ni Jesus sa Igpapahulay?

¹⁰ Si Jesus ug ang iyang Hudiyong mga sumusunod nagsunod sa Igpapahulay kay sila ilalom sa Moisesnong Balaod. * Pero gipakita ni Jesus sa pulong ug buhat nga ang pagsunod sa Igpapahulay kinahanglang rasonable, ug dili sayop ang paghimog maayo o pagtabang sa uban. Siya klarong miingon: “Gitugot sa balaod ang paghimog maayo panahon sa Igpapahulay.” (Basaha ang Mateo 12:9-12.) Wala niya isipa nga supak sa Igpapahulay ang pagpakitag kaayo ug pagtabang sa uban. Ang mga gibuhat ni Jesus nagpasiugda sa importanteng rason kon nganong gisugo sa Diyos ang pagpahulay. Ang katawhan  sa Diyos makapokus sa espirituwal nga mga butang kay mipahulay sila sa ilang adlaw-adlawng buluhaton. Si Jesus nagdako sa pamilya nga seguradong naggamit sa Igpapahulay para sa espirituwal nga mga kalihokan. Makita nâ diha sa atong mabasa bahin kang Jesus dihang didto siya sa iyang lungsod sa Nasaret: “Sumala sa . . . naandan [ni Jesus] sa adlawng Igpapahulay, siya misulod sa sinagoga ug mitindog aron mobasa.”​—Luc. 4:15-19.

11. Kinsay nagpakitag maayong ehemplo kang Jesus bahin sa trabaho?

¹¹ Segurado nga parehas sa panglantaw sa Diyos ang panglantaw ni Jose sa trabaho samtang gitudloan niya ang iyang sinagop, si Jesus, nga mahimong panday. (Mat. 13:55, 56) Ug dayag nga nakita ni Jesus nga adlaw-adlawng naghago si Jose aron suportahan ang iyang dako nga pamilya. Makapainteres nga sa ulahi giingnan ni Jesus ang iyang mga tinun-an: “Ang trabahador takos sa iyang suhol.” (Luc. 10:7) Oo, nahibalo si Jesus kon unsaon paghago.

12. Unsang mga teksto ang nagpakita kon unsay giingon sa Bibliya bahin sa paghago?

¹² Si apostol Pablo nahibalo sab kon unsaon paghago. Ang pangunang buluhaton ni Pablo mao ang pagsulti sa uban bahin kang Jesus ug sa iyang gitudlo. Bisan pa niana, si Pablo nagtrabaho aron masuportahan ang kaugalingon. Ang mga taga-Tesalonica nahibalo nga siya ‘nagtrabaho adlaw ug gabii aron dili makapabug-at kang bisan kinsa.’ (2 Tes. 3:8; Buh. 20:34, 35) Lagmit ang gitumong ni Pablo dinhi mao ang iyang pagpanghimog tolda. Samtang didto sa Corinto, siya miestar sa balay ni Aquila ug Priscila ug ‘mitrabaho uban kanila kay pareho man silag pangita nga mao ang paghimog tolda.’ Ang pag-ingon nga si Pablo nagtrabaho “adlaw ug gabii” wala magpasabot nga wala siyay undang-undag trabaho. May mga higayon nga dili siya manghimog tolda, sama pananglitan sa Igpapahulay. Kanang adlawa naghatag niyag kahigayonan nga makasangyaw sa mga Hudiyo, nga wala sab magtrabaho panahon sa Igpapahulay.​—Buh. 13:14-16, 42-44; 16:13; 18:1-4.

13. Unsay atong makat-onan kang Pablo?

¹³ Si Pablo nagpakitag maayong ehemplo. Bisag kinahanglan siyang motrabaho, giseguro niya nga regular siyang makapakigbahin sa “balaang buluhaton sa maayong balita sa Diyos.” (Roma 15:16; 2 Cor. 11:23) Giawhag niya ang uban sa pagbuhat sab niana. Busa si Aquila ug Priscila maoy mga ‘isigkamagbubuhat niya sa buluhaton ni Kristo Jesus.’ (Roma 12:11; 16:3) Si Pablo nag-awhag sa mga taga-Corinto ‘nga kanunayng magmapuliki diha sa buluhaton sa Ginoo.’ (1 Cor. 15:58; 2 Cor. 9:8) Gigiyahan pa gani ni Jehova si Pablo sa pagsulat: “Kon naay dili gustong magtrabaho, ayaw siyag pakan-a.”​—2 Tes. 3:10.

14. Unsay gipasabot ni Jesus sa iyang giingon diha sa Juan 14:12?

¹⁴ Ang labing importanteng buluhaton niining kataposang mga adlaw mao ang pagsangyaw ug paghimog mga tinun-an. Gani, gitagna ni Jesus nga ang iyang mga tinun-an mohimog mga buhat nga labaw pa sa iyang gihimo! (Basaha ang Juan 14:12.) Wala niya ipasabot nga maghimo tag mga milagro sama kaniya. Hinuon, ang iyang mga sumusunod magsangyaw ug manudlo sa mas daghang dapit, mas daghang tawo, ug sa mas taas nga panahon.

15. Unsay ipangutana nato sa kaugalingon, ug ngano?

¹⁵ Kon duna kay sekular nga trabaho, pangutan-a ang kaugalingon: ‘Nailhan ba ko sa trabahoan ingong kugihan nga trabahante? Ginahuman ba nako ang akong trabaho sa hustong oras ug ginahimo ang akong kinamaayohan?’ Kon makatubag kag oo niana, lagmit saligan ka sa imong amo. Ug tingali mas maminaw sa  mensahe sa Gingharian ang imong mga kauban sa trabaho nga naniid nimo. Kon bahin sa pagsangyaw ug pagpanudlo, pangutan-a ang kaugalingon: ‘Nailhan ba ko nga kugihang mosangyaw? Mangandam ba ko pag-ayo para sa unang pagduaw? Mobalik ba ko dayon sa mga interesado? Ug regular ba kong nakigbahin sa lainlaing paagi sa pagsangyaw?’ Kon makatubag kag oo niana, magmalipayon ka sa imong ministeryo.

16. Unsay kalainan sa panglantaw ni Jesus ug sa mga apostoles bahin sa pagpahulay kon itandi nianang sa daghang tawo karon?

¹⁶ Nahibalo si Jesus nga siya ug ang mga apostoles kinahanglang mopahulay usahay. Pero, daghang tawo niadtong panahona ug karon ang susama sa dato nga tawo sa ilustrasyon ni Jesus. Ang maong tawo miingon sa iyang kaugalingon: “Pahayahay, kaon, inom, ug paglipaylipay.” (Luc. 12:19; 2 Tim. 3:4) Nagpokus siya sa pagpahulay ug paglingawlingaw. Sa laing bahin, si Jesus ug ang mga apostoles wala magpokus sa paglingawlingaw.

17. Unsaon nato paggamit ang atong day off sa trabaho?

¹⁷ Karon, naningkamot ta sa pagsundog kang Jesus pinaagi sa paggamit sa atong day off sa trabaho dili lang sa pagpahulay kondili sa pagbuhat ug maayo pinaagi sa pagsangyaw ug pagtambong sa mga tigom. Gani importante kaayo para nato ang paghimog mga tinun-an ug pagtambong sa tigom, maong naningkamot ta nga regular nga mahimo kining sagradong mga buluhaton. (Heb. 10:24, 25) Bisan dihang magbakasyon ta, padayon natong ginahimo ang atong espirituwal nga rutina sa pagtambong sa mga tigom bisan asa ta, ug nangita tag mga kahigayonan nga makasangyaw sa atong mahibalag.​—2 Tim. 4:2.

18. Unsay gusto sa atong Hari, si Kristo Jesus, nga atong buhaton?

¹⁸ Mapasalamaton gyod ta nga ang atong Hari, si Kristo Jesus, makataronganon ug nagtabang kanato sa pagbaton ug balanseng panglantaw sa trabaho ug pahulay! (Heb. 4:15) Gusto niya nga mabatonan nato ang pahulay nga atong gikinahanglan. Gusto sab niya nga maghago ta aron matagan-an ang atong pisikal nga mga panginahanglan ug makigbahin sa makapalagsik nga buluhaton sa paghimog mga tinun-an. Sa sunod nga artikulo, atong hisgotan ang papel ni Jesus sa pagpahigawas kanato sa pintas nga matang sa pagkaulipon.