UNSAY imong bation kon makadawat kag makapadasig nga sulat gikan sa imong suod nga higala? Ang tinun-ang si Timoteo nakadawat ug ingon niana nga sulat gikan kang apostol Pablo. Kini nga sulat mao ang 2 Timoteo. Segurado nga nangita dayon si Timoteo ug hilom nga lugar aron mabasa ang sulat sa iyang suod nga higala. Tingali naghunahuna siya: ‘Komosta na kaha si Pablo? Duna kaha siyay tambag nga makatabang nako sa akong mga asaynment? Kini ba nga sulat makatabang nako nga molampos sa akong ministeryo ug sa pagtabang sa uban?’ Sa ato unyang masayran, nakita ni Timoteo niining bililhon nga sulat ang tubag niini nga mga pangutana ug sa uban pa. Pero hisgotan una nato ang pipila ka mapuslanong tambag niini nga sulat.

Pagsugod pa lag basa ni Timoteo sa sulat, gibati dayon niya nga gimahal siya ni Pablo. Mabination siyang gitawag ni Pablo ug “minahal nga anak.” (2 Tim. 1:2) Dihang nadawat ni Timoteo ang sulat niadtong 65 C.E., kapin na siya sa 30 anyos ug eksperyensiyado na siya nga ansiyano. Kapig 10 ka tuig na silang magkauban ni Pablo sa buluhaton ug daghan siyag nakat-onan.

Seguradong nadasig gyod si Timoteo sa pagkahibalo nga si Pablo matinumanong milahutay sa mga kalisdanan. Si Pablo piniriso sa Roma ug hapit na siyang patyon. (2 Tim. 1:15, 16; 4:6-8) Nakita ni Timoteo nga si Pablo maisogon kay siya miingon: “Nagpadayon ko sa paglahutay sa tanang butang.” (2 Tim. 2:8-13) Sama kang Timoteo, ang paglahutay ni Pablo makapalig-on pod kanato.

Giawhag ni Pablo si Timoteo nga isipon niya nga bililhon kaayo ang iyang asaynment diha sa pag-alagad sa Diyos. Gidasig ni Pablo si Timoteo “nga padilaabon samag kalayo ang gasa sa Diyos” nga naa kaniya. (2 Tim. 1:6; footnote) Gigamit ni Pablo ang pulong nga khaʹri·sma para sa “gasa.” Ang maong Gregong pulong nagtumong sa gasa nga nadawat dili tungod kay ang usa naghago niana o takos siya niana. Nadawat ni Timoteo kini nga gasa dihang gipili siya nga mag-alagad sa kongregasyon sa espesyal nga paagi.​—1 Tim. 4:14.

Unsay gidasig ni Pablo nga himoon ni Timoteo niini nga gasa? Samtang gibasa niya ang ekspresyong ‘padilaaba samag kalayo,’ lagmit naghunahuna siya sa kalayo diha sa abohan nga usahay  mahimo na lang mga baga. Ang maong mga baga kinahanglang tayhopan aron moinit pa ug modilaab. Ang usa ka diksiyonaryo nag-ingon nga ang Gregong pulong (a·na·zo·py·reʹo) nga gigamit ni Pablo nagkahulogan ug “halingon, pasigaon, padilaabon,” busa kini nagpasabot nga “mahimong madasigon ug makugihon sa usa ka buluhaton.” Sama rag giingnan ni Pablo si Timoteo: ‘Magkugi diha sa imong asaynment!’ Kinahanglan sab nâ natong buhaton karon​—kinahanglan tang magkugi sa pag-alagad.

Samtang padayong gibasa ni Timoteo ang sulat sa iyang suod nga higala, nakakita siyag laing ekspresyon nga makatabang niya nga magmalamposon sa iyang ministeryo. Si Pablo misulat: “Bantayi kining bililhong butang nga gisalig kanimo pinaagi sa balaang espiritu nga naa kanato.” (2 Tim. 1:14) Unsa kanang bililhong butang nga gisalig kang Timoteo? Sa nag-una nga bersikulo gihisgotan ni Pablo ang “maayong mga pulong,” ang kamatuoran nga naa sa Kasulatan. (2 Tim. 1:13) Ingong Kristohanong ministro, kinahanglang isangyaw ni Timoteo ang kamatuoran sa sulod ug gawas sa kongregasyon. (2 Tim. 4:1-5) Dugang pa, si Timoteo gitudlo ingong ansiyano nga magbantay sa panon sa Diyos. (1 Ped. 5:2) Mabantayan ni Timoteo ang gisalig kaniya​—ang kamatuoran nga iyang itudlo—​pinaagi sa pagsalig sa balaang espiritu ni Jehova ug sa Iyang Pulong.​—2 Tim. 3:14-17.

Karon, gisalig pod kanato ang kamatuoran nga atong isangyaw. (Mat. 28:19, 20) Angay gyod natong hinumdoman nga bililhon ang kamatuoran nga atong ginatudlo, busa kinahanglang padayon tang mag-ampo ug regular nga magtuon sa Pulong sa Diyos. (Roma 12:11, 12; 1 Tim. 4:13, 15, 16) Makadawat sab tingali tag dugang asaynment sa pag-alagad ingong ansiyano o bug-os panahong ministro. Ang asaynment nga sama niana angay nga maghimo natong mapainubsanon, nga mosalig sa tabang sa Diyos. Busa atong mabantayan, o maprotektahan, ang gisalig kanato pinaagi sa pagpabili niini ug pagpangayo sa tabang ni Jehova.

Apil sa asaynment ni Timoteo ang pagbansay sa uban sa paghimo sa buluhaton nga iyang ginahimo. Maong gidasig ni Pablo si Timoteo: “Bahin sa mga butang nga imong nadungog kanako . . . , isalig kini sa matinumanong mga lalaki, nga makabaton sab unyag igong katakos sa pagtudlo sa uban.” (2 Tim. 2:2) Oo, kinahanglang itudlo sab ni Timoteo sa uban ang tanan niyang nakat-onan. Importante nga ang tanang tigdumala sa kongregasyon karon maningkamot pod sa paghimo niana. Dili angayng itago sa usa ka maayong tigdumala ang iyang kahibalo bahin sa usa ka asaynment. Hinunoa, tudloan niya ang uban aron mahimo ang maong asaynment. Dili siya mahadlok nga malabwan sa uban sa kahibalo o sa katakos. Busa dili lang pangunang mga butang bahin sa usa ka asaynment ang iyang itudlo. Bansayon sab niya sila nga makabatog maayong panghukom ug pagsabot​—sa ato pa, mahimong hamtong nga mga Kristohanon. Nianang paagiha, ang “matinumanong mga lalaki” nga iyang gitudloan mas makatabang pa sa kongregasyon.

Seguradong gipabilhan ni Timoteo ang mabinationg sulat ni Pablo. Maimadyin nato siya nga balikbalik nga nagbasa niining importante nga tambag ug namalandong kon sa unsang paagi mapadapat niya kini sa iyang mga asaynment.

Gusto pod natong ipadapat kini nga tambag. Sa unsang paagi? Maningkamot ta nga padilaabon samag kalayo ang gasa nga naa kanato, nga bantayan ang gisalig kanato, ug tudloan ang uban sa tanan nga atong nahibaloan. Nianang paagiha, sama sa giingon ni Pablo kang Timoteo, atong ‘matuman sa bug-os ang atong ministeryo.’​—2 Tim. 4:5.