Wala. Walay giingon ang Bibliya o ang kasaysayan nga gihimo nâ kaniadto.

Tungod sa paagi sa paghubad niini nga teksto diha sa daghang Bibliya, ang uban naghunahuna nga sa adlaw ni Pablo gihimo ang pagbawtismo alang sa mga patay. Niay pananglitan: “Karon kon walay pagkabanhaw, unsa man ang buhaton niadtong nabautismohan alang sa mga patay?”​—Ang Biblia, Bag-ong Hubad nga Binisaya.

Pero matikdi ang giingon sa duha ka eksperto sa Bibliya. Si Dr. Gregory Lockwood miingon nga walay pamatuod sa Bibliya o sa kasaysayan nga dunay nabawtismohan alang sa tawong patay. Sa susama, si Propesor Gordon D. Fee misulat: “Walay pamatuod sa kasaysayan o sa Bibliya nga ginahimo ang ingon niana nga bawtismo.” Miingon sab siya nga wala gyod nâ hisgoti sa Bag-ong Tugon, ug walay pamatuod nga gihimo nâ sa unang mga Kristohanon o sa bisan unsang mga simbahan nga naporma wala madugay human mamatay ang mga apostoles.

Si Jesus nagsugo sa iyang mga sumusunod: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila. . . . Tudloi ninyo sila sa pagtuman sa tanan nakong gisugo kaninyo.” (Mat. 28:19, 20) Sa dili pa mabawtismohan ang usa ka tinun-an, kinahanglan siyang mokat-on bahin kang Jehova ug sa Iyang Anak, motuo, ug mosunod kanila. Dili nâ mahimo sa tawong patay ug naa na sa lubnganan, ug dili sab nâ mahimo sa buhi nga Kristohanon para kaniya.​—Eccl. 9:5, 10; Juan 4:1; 1 Cor. 1:14-16.

Busa, unsay gipasabot ni Pablo?

Ang pipila ka taga-Corinto miingon nga ang mga patay dili banhawon. (1 Cor. 15:12) Gipakita ni Pablo nga sayop ang maong ideya. Iyang gipatin-aw nga ‘kada adlaw nag-atubang siyag kamatayon.’ Siyempre, buhi pa siya niadtong tungora. Pero bisan pag kanunay siyang nag-atubang ug mga kapeligrohan, masaligon siya nga kon mamatay siya, banhawon siya ingong gamhanang espiritung linalang, sama kang Jesus.​—1 Cor. 15:30-32, 42-44.

Kinahanglang masabtan sa mga taga-Corinto nga ang pagkahimong dinihogang mga Kristohanon nagpasabot nga adlaw-adlaw silang makaatubang ug mga pagsulay ug sila mamatay ayha pa banhawon. Busa dihang sila “gibawtismohan kang Kristo Jesus,” sila sab “gibawtismohan sa iyang kamatayon.” (Roma 6:3) Nagpasabot ni nga sama kang Jesus, sila makasinatig mga pagsulay ug mamatay aron mabanhaw ngadto sa langit.

Kapig duha ka tuig human mabawtismohi si Jesus, iyang giingnan ang duha sa iyang mga apostoles: “Kamo bawtismohan sa paagi nga ako ginabawtismohan.” (Mar. 10:38, 39) Dili bawtismo sa tubig ang gitumong ni Jesus dinhi. Ang iyang gipasabot mao nga ang iyang pagkamatinumanon sa Diyos moresulta sa iyang kamatayon. Si Pablo misulat nga ang mga dinihogan ‘duyog nga mag-antos aron duyog sab silang himayaon.’ (Roma 8:16, 17; 2 Cor. 4:17) Nagpasabot ni nga kinahanglan sab silang mamatay aron mabanhaw ngadto sa langit.

Busa, mao ni ang hustong hubad sa giingon ni Pablo: “Kay kon dili pa ingon niana, unsay buhaton nila nga gibawtismohan aron mahimong patay? Kon ang mga patay dili gayod banhawon, ngano man nga gibawtismohan usab sila alang sa maong katuyoan?”