1-2. Unsang mga topiko ang importante kaayo para sa mga Saksi ni Jehova?

DUNAY importante kaayong mga isyu nga giatubang nato karon​—ang pagkasoberano ni Jehova ug ang pagbalaan sa iyang ngalan. Ingong mga Saksi ni Jehova, ganahan kaayo tang maghisgot niining makapainteres nga mga topiko. Pero managlahi ba nga isyu ang pagkasoberano sa Diyos ug ang pagbalaan sa iyang ngalan? Dili.

² Nasabtan natong tanan nga ang ngalan sa Diyos kinahanglang hinloan batok sa tanang pasipala. Nakat-onan sab nato nga ang pagkasoberano ni Jehova, o ang iyang paagi sa pagmando, kinahanglang mapamatud-an nga mao ang kinamaayohan. Busa importante kining duha ka isyu.

3. Unsay nalakip sa ngalang Jehova?

³ Sa pagkatinuod, ang ngalang Jehova naglakip sa tanang butang bahin sa atong Diyos, apil sa iyang paagi sa pagmando. Busa kon moingon ta nga ang paghinlo sa ngalan ni Jehova batok sa tanang pasipala mao ang pinakaimportante nga isyu, buot sab natong ipasabot nga ang paagi sa pagmando ni Jehova kinahanglang mapamatud-an nga mao ang kinamaayohan. Ang ngalan ni Jehova konektado kaayo sa iyang paagi sa pagmando ingong ang labing gamhanang Soberano.​—Tan-awa ang kahong “ Mga Isyu nga Konektado sa Importante Kaayong Isyu.”

4. Unsay giingon sa Salmo 135:13 bahin sa ngalan sa Diyos, ug unsang mga pangutanaha ang atong tubagon niining artikuloha?

⁴ Ang ngalang Jehova espesyal kaayo. (Basaha ang Salmo 135:13.) Nganong importante kaayo ang ngalan sa Diyos? Sa unsang paagi una kining gipasipalahan? Unsaon kini pagbalaan sa Diyos? Ug sa unsang paagi makatabang ta sa pagdepensa sa iyang ngalan? Tubagon nato ang maong mga pangutana.

5. Unsa tingali ang atong ipangutana bahin sa pagbalaan sa ngalan sa Diyos?

⁵ “Balaanon unta ang imong ngalan.” (Mat. 6:9) Mao nay giingon ni Jesus nga usa sa pinakaimportanteng butang nga angay natong iampo. Pero unsay gipasabot ni Jesus? Ang pagbalaan sa usa ka butang nagpasabot nga himoon kining balaan, hinlo, o dalisay. Pero ang uban mangutana tingali, ‘Di ba ang ngalan ni Jehova daan nang balaan, hinlo, ug dalisay?’ Sa pagtubag niana, kinahanglan nga maghunahuna ta kon unsay nalakip sa usa ka ngalan.

6. Unsay makahimo sa usa ka ngalan nga bililhon?

⁶ Ang ngalan dili lang basta mga letra nga isulat o isulti. Matikdi ang giingon sa Bibliya: “Ang maayong ngalan mao ang pilion imbes ang daghang bahandi.” (Prov. 22:1; Eccl. 7:1) Nganong ingon ana ka bililhon ang ngalan? Tungod kay kini naglakip sa reputasyon, o sa kon unsay gihunahuna sa uban, sa usa nga nagbaton nianang ngalana. Busa ang pagkasulat o bisan ang pagkalitok sa usa ka ngalan dili mao ang pinakaimportante, kondili kon unsay mahunahunaan sa ubang tawo dihang ilang makita o madungog kanang ngalana.

7. Sa unsang paagi gidaot sa mga tawo ang ngalan sa Diyos?

⁷ Dihang ang mga tawo mosultig bakak bahin kang Jehova, ilang ginadaot ang iyang reputasyon. Dihang daoton nila ang iyang reputasyon, gidaot sab nila ang iyang ngalan. Ang unang pagdaot sa ngalan ug reputasyon sa Diyos nahitabo sa garden sa Eden. Konsideraha kon unsay atong makat-onan niana.

8. Unsay nahibaloan ni Adan ug Eva, ug unsang mga pangutana ang motungha?

⁸ Si Adan ug Eva nahibalo sa ngalan ni Jehova, ug nahibalo sab sila sa daghang importanteng kamatuoran bahin kaniya. Nahibalo sila nga siya ang Maglalalang, ang Usa nga naghatag kanilag kinabuhi, nindot nga paraisong puy-anan, ug perpektong kapikas. (Gen. 1:26-28; 2:18) Pero padayon ba nilang gamiton ang ilang perpektong hunahuna sa pagpamalandong sa tanang gihimo ni Jehova para kanila? Padayon ba nilang palig-onon ang ilang gugma ug apresasyon kang Jehova? Naklaro ang tubag dihang gisulayan sila sa kaaway sa Diyos.

9. Sumala sa Genesis 2:16, 17 ug 3:1-5, unsay gisulti ni Jehova sa unang magtiayon, ug giunsa pagtuis ni Satanas ang kamatuoran?

 ⁹ Basaha ang Genesis 2:16, 17 ug 3:1-5. Gamit ang usa ka halas, gipangutana ni Satanas si Eva: “Tinuod ba nga miingon ang Diyos nga dili mo angayng mokaon sa bunga sa tanang kahoy sa tanaman?” Kana nga pangutana nasagolag bakak nga samag hilo nga dili makita. Ang giingon gyod sa Diyos mao nga sila makakaon sa bunga sa matag kahoy, gawas lang sa usa ka kahoy. Daghan kaayong klase sa bunga ang puwedeng kaonon ni Adan ug Eva. (Gen. 2:9) Oo, si Jehova mahinatagon kaayo. Pero iyang gidid-an si Adan ug Eva sa pagkaon sa bunga sa usa ka partikular nga kahoy. Busa ang pangutana ni Satanas nagtuis sa kamatuoran. Gipasabot ni Satanas nga mora bag ang Diyos dili mahinatagon. Si Eva tingali nakahunahuna, ‘Duna bay maayong butang nga gihikaw sa Diyos kanako?’

10. Sa unsang paagi direktang gipasipalahan ni Satanas ang ngalan sa Diyos, ug unsay resulta?

¹⁰ Nianang puntoha, giisip gihapon ni Eva si Jehova ingong iyang Magmamando. Iyang gisultihan si Satanas sa klarong giingon sa Diyos. Siya midugang nga bisan ang paghikap sa kahoy dili nila angayng himoon. Nahibalo siya sa pasidaan sa Diyos nga mamatay sila kon ila nang supakon. Pero si Satanas miingon: “Dili tinuod nga mamatay mo.” (Gen. 3:2-4) Nianang higayona, direkta nang gipasipalahan ni Satanas ang ngalan sa Diyos, nga mora bag iyang giingnan si Eva nga si Jehova bakakon. Busa si Satanas nahimong yawa, o tigpasipala. Si Eva bug-os nga nalimbongan; siya mituo kang Satanas. (1 Tim. 2:14) Mas misalig siya kang Satanas kay kang Jehova. Tungod niana, nahimo ni Eva ang sayop kaayong desisyon. Misupak siya kang Jehova. Gikaon niya ang bunga sa kahoy nga gidili ni Jehova. Unya, gihatagan sab niya si Adan.​—Gen. 3:6.

11. Unsa untay angayng himoon ni Adan ug Eva, ug unsay wala nila himoa?

¹¹ Hunahunaa kadiyot kon unsa untay angayng isulti ni Eva kang Satanas. Imadyina nga mao ni iyang gisulti: “Wala ko kaila nimo, pero nakaila ko sa akong Amahan, si Jehova, ug ako nahigugma ug nagsalig niya. Ang tanan namong nabatonan ni Adan naggikan kaniya. Unya mosulti kag daotan bahin niya? Pahawa!” Malipay gyod unta si Jehova nga makadungog nianang mga pulonga gikan sa mahigugmaon ug maunongon nga anak! (Prov. 27:11) Pero si Eva walay maunongong gugma kang Jehova, mao pod si Adan. Tungod niana wala madepensahi ni Adan ug Eva ang ngalan ni Jehova dihang kini gipasipalahan.

12. Sa unsang paagi si Satanas nagpugas ug pagduhaduha sa hunahuna ni Eva, ug unsay wala himoa ni Adan ug Eva?

¹² Sa ato nang nakita, si Satanas nagsugod pinaagi sa pagpugas ug pagduhaduha diha sa hunahuna ni Eva. Tungod niana, nagduhaduha na si Eva kon maayo ba gyong Amahan si Jehova. Unya wala depensahi ni Adan ug Eva ang ngalan ug reputasyon ni Jehova. Busa mas dali silang  mituo kang Satanas ug mirebelde sa ilang Amahan. Mao gihapon nay taktika ni Satanas karon. Iyang ginadaot ang ngalan ni Jehova pinaagi sa pagpasipala niini. Ang mga tawo nga motuo sa mga bakak nga gisulti ni Satanas dali rang maimpluwensiyahan sa pagsalikway sa matarong nga pagmando ni Jehova.

13. Sa unsang paagi ang Ezequiel 36:23 nagpasiugda sa pangunang mensahe sa Bibliya?

¹³ Wala lang basta dawata ni Jehova ang maong pagpasipala. Iya gayong gidepensahan ang iyang kaugalingon. Ang tibuok Bibliya nagsulti kanato kon unsay gihimo ni Jehova aron pamatud-an nga dili tinuod ang mga bakak nga gisulti bahin kaniya didto sa garden sa Eden. (Gen. 3:15) Sa pagkatinuod, mahimo natong sumaryohon ang pangunang mensahe sa Bibliya niining paagiha: Si Jehova nagbalaan sa iyang ngalan pinaagi sa Gingharian nga gimandoan sa iyang Anak ug magpasig-uli sa pagkamatarong ug kalinaw sa yuta. Narekord sa Bibliya ang mga impormasyon nga makatabang kanato sa pagsabot kon unsaon ni Jehova pagbalaan ang iyang ngalan.​—Basaha ang Ezequiel 36:23.

14. Sa unsang paagi ang gihimo ni Jehova human sa rebelyon sa Eden nagbalaan sa iyang ngalan?

¹⁴ Si Satanas naghimo sa tanan niyang maarangan aron pugngan si Jehova sa pagtuman sa Iyang katuyoan. Pero si Satanas kanunayng mapakyas. Gipakita sa Bibliya kon unsay gihimo ni Jehova, ug kini nagpamatuod nga si Jehova sa pagkatinuod maoy mahigugmaong Amahan ug kinamaayohang Magmamando. Tinuod, ang pagrebelde ni Satanas ug sa tanan nga midapig kaniya nakapasakit pag-ayo kang Jehova. (Sal. 78:40) Pero sa pag-atubang ni Jehova niini nga isyu, gipakita niya ang kaalam, pailob, ug hustisya. Gipakita sab niya ang iyang dili hitupngang gahom sa daghang paagi. Labaw sa tanan, gipakita niya ang iyang gugma sa tanan niyang gihimo. (1 Juan 4:8) Si Jehova padayong mihimog mga paagi aron mabalaan ang iyang ngalan.

15. Sa unsang paagi gipasipalahan ni Satanas ang ngalan sa Diyos karon, ug unsay resulta?

¹⁵ Si Satanas padayong nagpasipala sa ngalan sa Diyos karon. Iyang gilimbongan ang  mga tawo sa pagduhaduha kon ang Diyos ba gamhanan, makataronganon, maalamon, ug mahigugmaon. Pananglitan, si Satanas naningkamot sa pagkombinsir sa mga tawo nga si Jehova dili mao ang Maglalalang. Ug kon modawat sila nga dunay Diyos, patuohon sila ni Satanas nga ang Diyos ug ang Iyang mga sukdanan estrikto ug dili makataronganon. Ginatudloan pa gani niya ang mga tawo nga si Jehova walay kasingkasing nga Diyos, nga nagsunog sa mga tawo sa impiyerno. Ug kon motuo sila niana nga mga bakak, sayon ra para nila nga isalikway ang matarong nga pagmando ni Jehova. Hangtod nga di pa malaglag si Satanas, magpadayon siya sa pag-impluwensiya sa mga tawo sa pagpasipala kang Jehova, ug puntiryahon sab ka niya. Molampos kaha siya?

16. Unsay imong mahimo nga wala mahimo ni Adan ug Eva?

¹⁶ Gitugotan ni Jehova ang dili perpektong mga tawo nga motabang sa pagbalaan sa iyang ngalan. Buot ipasabot, mahimo nimo ang wala mahimo ni Adan ug Eva. Bisag ang kalibotan napuno sa mga tawo nga nagpasipala sa ngalan ni Jehova, makahimo ka sa pagdepensa sa iyang ngalan pinaagi sa pagsulti sa mga tawo nga si Jehova balaan, matarong, maayo, ug mahigugmaon. (Isa. 29:23) Makahimo ka sa pagsuportar sa iyang pagmando. Mahimo nimong tabangan ang mga tawo nga makasabot nga ang pagmando lang ni Jehova ang tinuod nga matarong ug kini lang ang makahatag ug kalinaw ug kalipay sa tanang linalang.​—Sal. 37:9, 37; 146:5, 6, 10.

17. Giunsa pagpaila ni Jesus ang ngalan sa iyang Amahan?

¹⁷ Dihang atong depensahan ang ngalan ni Jehova, atong gisundog si Jesu-Kristo. (Juan 17:26) Gipaila ni Jesus ang ngalan sa iyang Amahan dili lang pinaagi sa paggamit nianang ngalana kondili pinaagi sab sa pagdepensa sa reputasyon ni Jehova. Pananglitan, tungod sa mga Pariseo, ang mga tawo nagtuo nga si Jehova mangtas, sobra ka estrikto, way pagbati, ug way kaluoy. Pero gitabangan ni Jesus ang mga tawo nga makasabot nga ang iyang Amahan makataronganon, mapailobon, mahigugmaon, ug mapinasayloon. Gitabangan sab niya sila nga makaila kang Jehova pinaagi sa pagsundog sa mga hiyas sa iyang Amahan sa iyang adlaw-adlawng pagkinabuhi.​—Juan 14:9.

18. Sa unsang paagi mapamatud-an nato nga dili tinuod ang mga bakak nga gisulti bahin kang Jehova?

¹⁸ Sama kang Jesus, mahimo natong isulti ang  atong nahibaloan bahin kang Jehova, nga magtudlo kanila kon unsa Siya ka mahigugmaon ug ka buotan nga Diyos. Pinaagi niana, atong mapamatud-an nga dili tinuod ang mga bakak nga gisulti bahin kang Jehova. Atong mahinloan ang ngalan ni Jehova, nga maghimo niining balaan diha sa hunahuna ug kasingkasing sa mga tawo. Masundog sab nato si Jehova. Posible nâ bisag dili ta perpekto. (Efe. 5:1, 2) Dihang ipakita nato sa pulong ug buhat kon unsa gyong klaseha sa Diyos si Jehova, makatabang ta sa pagbalaan sa iyang ngalan. Atong mabindikar kanang ngalana pinaagi sa pagtabang sa mga tawo nga matul-id ang ilang sayop nga mga ideya bahin kang Jehova. * Mapamatud-an sab nato nga ang dili perpektong mga tawo makapabiling matinumanon sa Diyos.​—Job 27:5.

19. Sumala sa Isaias 63:7, unsa ang atong pangunang tumong sa pagtudlo?

¹⁹ Naa pa tay laing mahimo aron mabalaan ang ngalan ni Jehova. Dihang magtudlo ta sa kamatuoran sa Bibliya ngadto sa uban, sagad ipasiugda nato ang pagkasoberano sa Diyos, nga si Jehova ang may katungod sa pagmando sa uniberso, ug tinuod gayod kini. Pero bisag importante ang pagtudlo kanila bahin sa mga balaod sa Diyos, ang atong pangunang tumong mao ang pagtabang kanila nga mahigugma sa atong Amahan, si Jehova, ug magmaunongon kaniya. Busa kinahanglan natong itudlo ang makapatandog nga mga hiyas ni Jehova, nga magpasiugda kon unsa siyang klaseha sa Persona. (Basaha ang Isaias 63:7.) Kon ingon niana ang atong paagi sa pagtudlo, matabangan nato ang uban nga mahigugma kang Jehova ug mosunod kaniya tungod sa ilang tinguha nga magmaunongon kaniya.

20. Unsay atong hisgotan sa sunod nga artikulo?

²⁰ Pero, unsaon nato pagseguro nga ang atong panggawi ug paagi sa pagtudlo makatabang sa uban sa paghunahunag maayong mga butang bahin kang Jehova, ug ingong resulta, makigsuod sila kaniya? Tubagon kana sa sunod nga artikulo.