1. Unsa ang pipila ka panalangin nga atong nadawat tungod kay bahin ta sa organisasyon ni Jehova?

 PANALANGIN gyod nga mahimong bahin sa organisasyon ni Jehova niining lisod kaayo nga kataposang mga adlaw. Nagkagrabe na ang kahimtang sa kalibotan, pero si Jehova naghatag natog mga igsoon nga andam motabang nato. (Sal. 133:1) Gitabangan sab ta niya nga mahimong malipayon ang atong pamilya. (Efe. 5:33–6:1) Ug gihatagan ta niyag kaalam ug pagsabot aron naa tay kalinaw sa hunahuna.

2. Unsay kinahanglan natong himoon, ug ngano?

² Kinahanglan tang maningkamot nga makapadayon sa pag-alagad nga matinumanon kang Jehova. Ngano? Kay usahay tungod sa pagkadili-hingpit, naay masulti o mahimo ang uban nga makapasakit nato. Maluya pod tingali ta dihang masayop ta, labina kon balikbalik na ang sayop nga atong nahimo. Kinahanglang molahutay ta sa pag-alagad kang Jehova (1) dihang mapasakitan ta sa igsoon, (2) dihang madismayar ta sa atong kapikas, ug (3) dihang madismayar ta sa atong kaugalingon. Niining artikuloha, atong hisgotan ang matag usa niini nga mga situwasyon. Hisgotan pod nato kon unsay atong makat-onan sa matinumanong mga karakter sa Bibliya.

LAHUTAY BISAN KON MAPASAKITAN KA SA IGSOON

3. Unsa nga problema ang maatubang sa katawhan ni Jehova?

³ Ang problema. Ang ubang mga igsoon naa tingali mga kinaiya nga makapalagot nato. Usahay, dili maayo ang ilang masulti o mahimo maong masakitan ta. Ang mga ansiyano masayop pod usahay. Tungod ani, magduhaduha tingali ang uban kon mao ba gyod ni ang organisasyon sa Diyos. Imbes nga “magkahiusa sa pag-alagad” sa Diyos kauban sa mga igsoon, basin mopili  sila nga likayan kadtong nakapasakit nila o moundang pa gani sa pagtambong sa mga tigom. (Sof. 3:9) Pero maalamon ba na? Atong tan-awon kon unsay atong makat-onan sa usa ka karakter sa Bibliya kinsa nakasinatig susama nga mga problema.

4. Unsa nga mga problema ang giatubang ni apostol Pablo?

⁴ Ehemplo diha sa Bibliya. Si apostol Pablo nahibalo nga ang mga igsoon diha sa kongregasyon dili hingpit. Pananglitan, sa bag-o pa siya nahimong Kristohanon, naay mga igsoon nga nanghukom niya. (Buh. 9:26) Sa ulahi, gipanabi siya sa ubang mga igsoon aron daoton ang iyang reputasyon. (2 Cor. 10:10) Nakita pod ni Pablo ang usa ka ansiyano nga mihimog sayop nga desisyon nga posibleng nakapandol sa uban. (Gal. 2:​11, 12) Ug nadismayar pod kaayo siya sa gihimo sa iyang suod nga higala nga si Marcos. (Buh. 15:​37, 38) Puwede unta nga dili na makig-uban si Pablo niadtong mga nakapasakit niya. Bisan pa niana, positibo gihapon ang iyang panglantaw sa mga igsoon ug nagpabilin siyang dasig sa pag-alagad kang Jehova. Unsay nakatabang kang Pablo sa paglahutay?

5. Unsay nakatabang kang Pablo nga dili mobiya sa mga igsoon? (Colosas 3:​13, 14) (Tan-awa sab ang hulagway.)

⁵ Gimahal ni Pablo ang mga igsoon. Tungod ana, nagpokus siya sa ilang maayong mga hiyas, dili sa ilang mga kahuyangan. Ang gugma nakatabang pod kang Pablo nga ipadapat ang iyang gisulat sa Colosas 3:​13, 14. (Basaha.) Matikdi kon sa unsang paagi siya nagpakitag gugma kang Marcos. Bisan tuod ug gibiyaan siya ni Marcos sa iyang unang panaw ingong misyonaryo, si Pablo wala magdumot. Sa ulahi, dihang nagpadala si Pablo ug makapadasig nga sulat sa kongregasyon sa Colosas, iyang gisulti ang iyang apresasyon kang Marcos ingong iyang isigkamagbubuhat, kinsa “nakahupay pag-ayo” niya. (Col. 4:​10, 11) Ug dihang napriso siya sa Roma, espesipiko niyang gihangyo si Marcos nga moadto aron tabangan siya. (2 Tim. 4:11) Klaro nga wala gyod mibiya si Pablo sa mga igsoon. Unsay atong makat-onan gikan niya?

6-7. Sa unsang paagi makapadayon ta sa pagpakitag gugma sa mga igsoon bisan pa sa ilang mga kahuyangan? (1 Juan 4:7)

⁶ Ang leksiyon. Gusto ni Jehova nga padayon natong pakitaag gugma ang atong mga igsoon. (Basaha ang 1 Juan 4:7.) Kon naay mga panahon nga dili maayog pagtratar ang usa ka igsoon kanato, hunahunaon lang nato nga wala na niya tuyoa ug nga gusto gyod niyang sundon ang mga prinsipyo sa Bibliya. (Prov. 12:18) Gimahal sa Diyos ang iyang matinumanong mga alagad bisan sa ilang pagkadili-hingpit.  Dihang makahimo tag sayop, isipon gihapon ta niya nga higala ug dili siya magdumot. (Sal. 103:9) Importante kaayo nga sundogon nato ang atong mapinasayloong Amahan!—Efe. 4:32–5:1.

⁷ Hinumdoman pod nato nga samtang nagkaduol ang kataposan, kinahanglan tang magpabiling suod sa mga igsoon. Makadahom ta nga mograbe pa ang paglutos. Basin mapriso pa gani ta tungod sa atong pagtuo. Mas kinahanglan nato ang mga igsoon nianang panahona. (Prov. 17:17) Matikdi ang nahitabo kang Josep, a usa ka ansiyano sa Spain. Siya ug ang ubang brader napriso tungod sa neyutralidad. Siya miingon: “Sa prisohan, dali lang motungha ang mga dili pagsinabtanay labina kay nagdasok mi sa usa lang ka selda. Kinahanglan ming mag-inantosay ug kinasingkasing nga magpinasayloay. Tungod adto, suod gihapon mi ug naprotektahan namo ang usag usa. Dako tog tabang, ilabina kay ang among mga kauban sa prisohan dili mga alagad ni Jehova. Naay panahon nga na-injure ko ug nabali akong bukton mao nga dili ko makalihoklihok. Pero ang usa sa mga brader mitabang nako sa praktikal nga mga paagi. Pananglitan, iyang gilabhan ang akong mga sinina ug iya pod kong giatiman. Naeksperyensiyahan nako ang tinuod nga gugma sa panahon nga gikinahanglan kaayo nako ni.” Busa maayo gyod nga karon pa lang magpinasayloay na ta ug sulbaron ang mga dili pagsinabtanay!

LAHUTAY BISAN KON MADISMAYAR KA SA IMONG KAPIKAS

8. Unsa nga mga problema ang giatubang sa mga magtiayon?

⁸ Ang problema. Dili gyod kalikayan ang problema sulod sa kaminyoon. Ang Bibliya prangkang nag-ingon nga ang magtiayon makasinati gyod ug “kasakitan sa ilang unod.” (1 Cor. 7:28) Ngano? Kay ang bana ug asawa parehong dili hingpit, ug lainlain silag kinaiya, gusto, ug dili gusto. Tingali lainlain silag kultura o kahimtang nga gidak-an. Ug naa tingali mogawas nga mga batasan nga wala nila makita sa wala pa sila magminyo. Kining tanan puwedeng mahimong hinungdan sa mga dili pagsinabtanay. Imbes dawaton nga ang matag usa nila naay naamot sa problema ug maningkamot nga masulbad kana, basig ila hinuong basolon ang ilang kapikas. Basin ganig maghunahuna sila nga magbulag o magdiborsiyo na lang. Pero mao ba gyod na ang solusyon? b Naa tay makat-onan gikan sa usa ka karakter sa Bibliya kinsa milahutay bisan pag lisod kaayo ang iyang kaminyoon.

9. Unsang problema ang giatubang ni Abigail?

⁹ Ehemplo diha sa Bibliya. Si Abigail minyo kang Nabal, kinsa sumala pa sa Bibliya maot ug batasan ug dili maayog panggawi. (1 Sam. 25:3) Naglisod gyod tingali si Abigail nga makig-uban nianang tawhana. Naa bay kahigayonan si Abigail nga makalingkawas sa iyang kaminyoon? Oo. Mitungha ni nga kahigayonan dihang ang umaabot nga hari sa Israel, si David, misulong aron patyon ang bana ni Abigail kinsa nanginsulto niya ug sa iyang mga tawo. (1 Sam. 25:​9-13) Puwede untang moikyas na lang si Abigail ug pasagdan si David sa iyang plano. Pero wala na niya himoa. Iya hinuong gipugngan ug gihangyo si David nga dili patyon si Nabal. (1 Sam. 25:​23-27) Ngano kaha?

10. Unsa kahay nakatabang kang Abigail nga malahutay ang iyang lisod nga kaminyoon?

¹⁰ Gimahal ni Abigail si Jehova ug gitahod  niya ang mga sukdanan ni Jehova sa kaminyoon. Posibleng nahibalo siya kon unsay gisulti sa Diyos kang Adan ug Eva dihang Iya silang gikasal. (Gen. 2:24) Nasayod si Abigail nga giisip ni Jehova ang kaminyoon ingong sagradong kahikayan. Gusto niyang lipayon ang Diyos, ug tungod ana gihimo niya ang tanan aron maluwas ang iyang panimalay, apil na ang iyang bana. Milihok dayon siya aron pugngan si David sa pagpatay kang Nabal. Andam sab siya nga mangayog pasaylo sa sala nga wala niya himoa. Seguradong gimahal gyod ni Jehova kining isog nga babaye kinsa naghunahuna sa kaayohan sa uban. Unsay makat-onan sa mga bana ug asawa kang Abigail?

11. (a) Unsay gidahom ni Jehova sa mga magtiayon? (Efeso 5:33) (b) Unsay imong makat-onan sa gihimo ni Carmen aron dili mabungkag ang iyang kaminyoon? (Tan-awa sab ang hulagway.)

¹¹ Ang leksiyon. Gidahom ni Jehova nga tahoron sa mga magtiayon ang kahikayan sa kaminyoon bisan kon ang ilang kapikas lisod ikasabot. Malipay gyod ang Diyos dihang iyang makita ang magtiayon nga naningkamot nga masulbad ang ilang mga problema ug magpakitag gugma ug pagtahod sa usag usa. (Basaha ang Efeso 5:33.) Matikdi ang kasinatian ni Carmen. Mga unom ka tuig human siya magminyo, nagpa-Bible study si Carmen uban sa mga Saksi ni Jehova ug sa ulahi nabawtismohan siya. “Wala gyod malipay adto ang akong bana,” miingon si Carmen. “Nagselos siya kang Jehova. Iya kong insultohon ug hadlokon nga biyaan ko niya.” Bisan pa niana, milahutay si Carmen sa iyang kaminyoon. Sulod sa 50 ka tuig, naningkamot siya nga magpakitag gugma ug pagtahod sa iyang bana. “Sa paglabay sa mga tuig, nakakat-on ko nga sabton ang akong bana ug makig-estorya niya sa buotan nga paagi. Nahibalo ko nga giisip ni Jehova nga sagrado ang kaminyoon, mao nga gihimo nako ang tanan aron dili ni mabungkag. Wala gyod ko mobiya sa akong bana kay gimahal nako si Jehova.” c Dihang motungha ang mga problema sa imong kaminyoon, makasalig ka nga tabangan ka ni Jehova nga makalahutay.

LAHUTAY BISAN KON MADISMAYAR KA SA IMONG KAUGALINGON

12. Unsa tingali bation nato kon makahimo tag seryosong sala?

¹² Ang problema. Kon makahimo tag seryosong sala, mobati tingali ta nga wala na gyod tay paglaom. Sumala sa Bibliya, makapabati ni natong “gun-ob ug dugmok.” (Sal. 51:17) Ang brader nga si Robert naningkamot sulod sa pipila ka tuig nga mokuwalipikar ingong ministeryal nga alagad. Pero nakahimo siyag seryosong sala, ug gibati niya nga giluiban niya  si Jehova. “Gitulisok kog maayo sa akong konsensiya,” siya miingon. “Gibati nako nga daotan kaayo ko. Nagbakho ko nga nag-ampo kang Jehova. Adtong panahona, naghunahuna ko nga di na gyod ko paminawon sa Diyos. Nganong paminawon pa man ko niya nga ako man siyang napasakitan?” Kon makasala ta, mobati tingali ta nga dili na ta makaalagad kang Jehova kay patuohon ta sa atong nadugmok nga kasingkasing nga gisalikway na ta niya. (Sal. 38:4) Kon mao nay imong gibati, matikdi ang pananglitan sa matinumanong karakter sa Bibliya kinsa milahutay sa pag-alagad kang Jehova bisag nakahimog seryosong sala.

13. Unsang mga sayop ang nahimo ni apostol Pedro, ug unsang bug-at nga sala ang iyang nabuhat tungod niana?

¹³ Ehemplo diha sa Bibliya. Sa gabii una mamatay si Jesus, si apostol Pedro nakahimog sunodsunod nga mga sayop nga miresulta sa pinakagrabeng sala nga iyang nahimo sa tibuok niyang kinabuhi. Una, nanghambog pag-ayo si Pedro nga magmatinumanon gyod siya bisan kon ang ubang apostoles mobiya kang Jesus. (Mar. 14:​27-29) Ug samtang didto sila sa tanaman sa Getsemane, si Pedro balikbalik nga nakatulog ug wala makapadayon sa pagbantay. (Mar. 14:​32, 37-41) Dayon, pag-abot niadtong modakop kang Jesus, si Pedro mibiya niya. (Mar. 14:50) Sa ulahi, gilimod ni Pedro si Jesus sa tulo ka higayon ug nanumpa pa gani siya nga tinuod ang iyang giingon. (Mar. 14:​66-71) Unsay gibati ni Pedro dihang naamgohan niya nga bug-at kaayo ang iyang nahimong sala? Puwerte niyang guola ug grabe niyang hilak, tingali kay nakonsensiya gyod siya sa iyang nahimo. (Mar. 14:72) Hunahunaa lang kon unsa ka hugno si Pedro dihang pipila ka oras sa ulahi, si Jesus gipatay. Gibati gyod tingali ni Pedro nga wala siyay pulos nga higala!

14. Unsay nakatabang kang Pedro nga mopadayon sa pag-alagad kang Jehova? (Tan-awa ang hulagway.)

¹⁴ Si Pedro nakapadayon sa pag-alagad kang Jehova tungod sa pipila ka rason. Wala siya magpalain sa iyang kaugalingon; miadto siya sa ubang tinun-an, ug seguradong gihupay nila siya. (Luc. 24:33) Dugang pa, ang nabanhawng si Jesus nagpakita kang Pedro, tingali aron dasigon siya. (Luc. 24:34; 1 Cor. 15:5) Sa ulahi, imbes nga sukmatan si Pedro sa iyang mga nahimo, giingnan siya ni Jesus nga makadawat unya siyag mas dagkong responsibilidad. (Juan 21:​15-17) Nahibalo si Pedro nga grabe ang iyang sala, pero wala siya misurender sa iyang kaugalingon. Ngano? Kay kombinsido siya nga ang iyang Agalon nga si Jesus wala pod misurender niya. Ug si Pedro padayong  gitabangan sa mga igsoon. Unsay atong makat-onan sa iyang ehemplo?

15. Gusto ni Jehova nga makombinsir ta sa unsa? (Salmo 86:5; Roma 8:​38, 39) (Tan-awa sab ang hulagway.)

¹⁵ Ang leksiyon. Gusto ni Jehova nga mahimo tang kombinsido nga gimahal ta niya ug nga andam siyang mopasaylo. (Basaha ang Salmo 86:5; Roma 8:​38, 39.) Dihang makasala ta, makonsensiya gyod ta. Normal lang na, ug mao nay husto. Pero dili gyod nato angayng hunahunaon nga dili na ta higugmaon o pasayloon ni Jehova. Hinuon, mangayo dayon tag tabang. Si Robert, nga gihisgotan ganina, miingon: “Nakahimo kog sala tungod kay misalig ko sa akong kaugalingon nga masuklan nako ang tentasyon.” Naamgohan niya nga kinahanglan siyang moduol sa mga ansiyano. Siya miingon: “Dihang gihimo to nako, nakita dayon nako nga gigamit sila ni Jehova aron ipabati nako nga gimahal gihapon ko niya. Ang mga ansiyano wala misurender sa pagtabang nako. Ila kong gitabangan nga makombinsir nga wala ko talikdi ni Jehova.” Makasalig pod ta nga gimahal ta pag-ayo ni Jehova ug nga iya tang pasayloon kon maghinulsol ta sa atong mga sala, mangayog tabang, ug maningkamot nga dili na usbon ang atong sala. (1 Juan 1:​8, 9) Kon kombinsido ta niana, dili gyod ta moundang sa pag-alagad, bisan pag makasala ta.

16. Nganong determinado ka nga molahutay sa pag-alagad kang Jehova?

¹⁶ Gipabilhan pag-ayo ni Jehova ang atong mga paningkamot sa pag-alagad kaniya niining lisod kaayo nga panahon sa kataposan. Sa tabang ni Jehova, makapadayon ta sa pag-alagad niya bisan pag madismayar ta usahay. Ugmaron nato ang gugma para sa atong mga igsoon ug pasayloon sila kon makapasakit sila nato. Ipakita nato kon unsa ka lalom ang atong gugma para sa Diyos ug ang atong pagtahod para sa iyang mga kahikayan pinaagi sa pagpaningkamot nga masulbad ang mga problema nga motungha sa atong kaminyoon. Ug dihang makasala ta, mangayo tag tabang kang Jehova, dawaton ang iyang gugma ug pagpasaylo, ug mopadayon sa pag-alagad kaniya. Makasalig ta nga panalanginan ta pag-ayo ni Jehova kon “dili ta mohunong sa pagbuhat ug maayo.”—Gal. 6:9.