1-2. (a) Sumala sa Efeso 6:16, nganong nagkinahanglan tag “dakong taming sa pagtuo”? (b) Unsang mga pangutana ang atong tubagon?

DUNA ka bay “dakong taming sa pagtuo”? (Basaha ang Efeso 6:16.) Seguradong duna. Samag dakong taming nga manalipod sa dakong bahin sa lawas, ang imong pagtuo manalipod nimo batok sa imoral, bayolente, ug dili diyosnong mga impluwensiya niining daotang sistema sa mga butang.

² Pero, nagkinabuhi ta sa “kataposang mga adlaw,” ug padayong masulayan ang atong pagtuo. (2 Tim. 3:1) Unsaon nimo pag-inspeksiyon ang imong taming sa pagtuo aron maseguro nga lig-on kini? Ug sa unsang paagi makuptan nimo pag-ayo ang imong taming? Hisgotan nato ang tubag sa maong mga pangutana.

3. Unsay ginabuhat sa mga sundalo sa ilang mga taming, ug ngano?

³ Sa kapanahonan sa Bibliya, ang mga sundalo sagad may mga taming nga giputos ug panit sa hayop. Pahiran nilag lana ang mga taming aron mapreserbar ang panit ug dili tay-on ang metal nga mga parte niana. Kon makita sa sundalo nga nadaot ang iyang taming, seguroon niya nga mareper kana aron pirme siyang andam para sa sunod nga gubat. Sa unsang paagi mapadapat kana sa imong pagtuo?

4. Nganong angay nimong inspeksiyonon ang imong taming sa pagtuo, ug sa unsang paagi buhaton nimo kana?

⁴ Sama sa mga sundalo sa karaang panahon, kinahanglan nga regular nimong inspeksiyonon ug atimanon ang imong taming sa pagtuo aron pirme kang andam sa pagpakiggubat. Ingong mga Kristohanon, kita may espirituwal nga pagpakiggubat ug  apil sa atong mga kaaway ang daotang mga espiritu. (Efe. 6:10-12) Dili puwede nga lain ang mag-atiman sa imong taming sa pagtuo. Unsaon nimo pagseguro nga andam kang moatubang sa mga pagsulay? Una, kinahanglang mangayo kag tabang sa Diyos. Dayon, kinahanglan nimong gamiton ang Pulong sa Diyos aron matabangan ka sa paglantaw sa imong kaugalingon sama sa paglantaw ni Jehova kanimo. (Heb. 4:12) Ang Bibliya nag-ingon: “Salig kang Jehova sa bug-os nimong kasingkasing, ug ayawg salig sa kaugalingon nimong pagsabot.” (Prov. 3:5, 6) Karon, hunahunaa ang pipila sa mga desisyon nga bag-o pa nimong gihimo. Pananglitan, nakaatubang ka bag grabeng kalisod sa pinansiyal? Nahinumdoman ba nimo ang saad ni Jehova sa Hebreohanon 13:5: “Dili gyod ka nako biyaan, ug dili gyod ka nako talikdan”? Nakahatag ba nâ nimog kompiyansa nga tabangan ka ni Jehova? Kon mao, nagpakita kana nga giatiman nimo ang imong taming sa pagtuo.

5. Unsa tingaliy imong madiskobrehan dihang inspeksiyonon nimo ang imong pagtuo?

⁵ Basin mahibulong ka sa imong madiskobrehan dihang inspeksiyonon nimo pag-ayo ang imong pagtuo. Basin makadiskobre kag mga kahuyangan nga taudtaod nang wala nimo mamatikdi. Pananglitan, maamgohan tingali nimo nga ang sobrang kabalaka, mga kabakakan, ug pagkadismayar nakadaot na sa imong pagtuo. Kon nahitabo ni kanimo, unsaon nimo pagpanalipod ang imong pagtuo batok sa dugang nga kadaot?

6. Unsa ang pipila ka pananglitan sa maayong matang sa kabalaka?

⁶ Usahay, maayong mabalaka bahin sa pipila ka butang. Pananglitan, maayong mabalaka ta nga basig dili nato mapalipay si Jehova ug Jesus. (1 Cor. 7:32) Kon makahimo tag seryosong sala, mabalaka ta kon unsaon nga mahibalik ang atong suod nga relasyon sa Diyos. (Sal. 38:18) Mabalaka pod ta kon unsaon nga mapalipay ang atong kapikas ug maatiman ang atong pamilya ug mga igsoon sa pagtuo.​—1 Cor. 7:33; 2 Cor. 11:28.

7. Sumala sa Proverbio 29:25, nganong dili ta angayng mahadlok sa tawo?

⁷ Sa laing bahin, ang sobrang kabalaka makadaot sa atong pagtuo. Pananglitan, basig magsige na lang tag kabalaka kon duna ba tay igong pagkaon ug sinina. (Mat. 6:31, 32) Tungod niana, basin magpokus na ta sa pagbaton ug materyal nga mga butang. Basin maugmad pa gani nato ang gugma sa kuwarta. Kon tugotan nato kana, ang atong pagtuo kang Jehova mohuyang ug madaot ang atong espirituwalidad. (Mar. 4:19; 1 Tim. 6:10) O basin mabiktima ta sa laing matang sa kabalaka​—sobrang pagkabalaka kon unsay hunahunaon sa uban. Basin mas mahadlok na tang bugalbugalan o lutoson sa mga tawo imbes mahadlok nga mapasuko si Jehova. Aron mapanalipdan ang atong kaugalingon batok niana nga kapeligrohan, kinahanglang hangyoon nato si Jehova nga hatagan tag pagtuo ug kaisog nga gikinahanglan sa pag-atubang niana.​—Basaha ang Proverbio 29:25; Luc. 17:5.

8. Unsay angay natong buhaton kon sultihan tag mga bakak?

⁸ Si Satanas, “ang amahan sa bakak,” naggamit niadtong ilalom sa iyang pagkontrolar aron magpakaylap ug mga bakak bahin kang Jehova ug sa atong mga igsoon. (Juan 8:44) Pananglitan, ang mga apostata nagpakaylap ug mga bakak ug tinuis nga mga impormasyon bahin sa organisasyon ni Jehova diha sa mga website, TV, ug ubang klase sa media. Kana nga mga bakak apil sa “nagdilaab  nga [mga] pana” ni Satanas. (Efe. 6:16) Unsay angay natong buhaton kon sultihan tag bakak nga sama niana? Dili ta maminaw! Ngano? Tungod kay duna tay pagtuo kang Jehova ug pagsalig sa atong mga igsoon. Sa pagkatinuod, likayan nato ang bisan unsang kontak sa mga apostata. Dili ta makiglalis nila sa bisan unsang butang o bisan unsang rason, bisag tuyo lang nato nga mahibaloan kon unsay ilang isulti.

9. Unsay posibleng epekto kanato sa pagkadismayar?

⁹ Ang pagkadismayar makapahuyang sa atong pagtuo. Siyempre, dili nato puwedeng balewalaon ang atong mga problema. Gani, iresponsable ta kon ato nang himoon. Ug usahay, madismayar ta. Pero dili nato angayng tugotan ang atong mga problema nga magdominar sa atong hunahuna. Kay kon magsige tag hunahuna niana, basin makalimtan na nato ang nindot nga paglaom nga gisaad ni Jehova. (Pin. 21:3, 4) Unya madismayar ta pag-ayo ug tungod niana maluya ta ug mohunong sa pag-alagad kang Jehova. (Prov. 24:10) Pero, dili kinahanglang mahitabo nâ kanato.

10. Unsay imong nakat-onan sa sulat sa usa ka sister?

¹⁰ Tagda kon sa unsang paagi nagpabiling lig-on ang pagtuo sa usa ka sister sa United States samtang nag-atiman sa iyang bana nga grabeng nasakit. Sa iyang sulat sa hedkuwarter, siya miingon: “Usahay ma-stress ug madismayar mi tungod sa among kahimtang, pero lig-on ang among paglaom. Mapasalamaton kaayo ko sa impormasyon nga among nadawat aron sa pagpalig-on sa among pagtuo ug pagdasig kanamo. Gikinahanglan gyod namo ni nga tambag ug pagdasig. Nakatabang ni namo nga makapadayon sa pag-alagad kang Jehova ug makalahutay sa mga pagsulay ni Satanas.” Makat-onan nato sa giingon sa sister nga puwede natong madaog ang pagkadismayar! Sa unsang paagi? Isipa ang imong mga kalisdanan ingong pagsulay gikan kang Satanas. Ilha si Jehova ingong Tuboran sa paghupay. Ug apresyaha ang espirituwal nga pagkaon nga iyang gitagana.

11. Aron makita kon maayo bag kondisyon ang atong pagtuo, unsay atong ipangutana sa kaugalingon?

¹¹ Duna ka bay namatikdan nga mga bahin  sa imong pagtuo nga kinahanglan pang palig-onon? Sa miaging mga bulan, milampos ka ba sa paglikay nga malumsan sa sobrang kabalaka? Napugngan ba nimo ang imong kaugalingon sa pagpaminaw ug pagpakiglalis sa mga apostata bahin sa mga bakak nga ilang gipakaylap? Ug nasuklan ba nimo ang pagkadismayar? Kon mao, maayog kondisyon ang imong pagtuo. Pero kinahanglan tang magbantay kay si Satanas dunay laing mga hinagiban nga sulayan niyag gamit batok kanato. Atong hisgotan ang usa niana.

12. Unsay mahimong epekto kanato sa materyalismo?

¹² Ang materyalismo puwedeng mahimong hinungdan nga malinga ta ug mohuyang ang atong pagtuo. Si apostol Pablo miingon: “Walay tawo nga nagserbisyo ingong sundalo ang mosulod ug mga negosyo, aron uyonan siya sa nagdawat niya.” (2 Tim. 2:4) Gani, ang Romanong mga sundalo wala tugoti sa pagdawat ug ubang trabaho. Unsay mahitabo kon dili ni sundon sa usa ka sundalo?

13. Nganong ang usa ka sundalo dili puwedeng magnegosyo?

¹³ Imadyina ni nga kahimtang. Dunay grupo sa mga sundalo nga magbansay kada buntag sa paggamit sa ilang espada, pero wala ang usa nila ka kauban. Tua siya sa lungsod kay nanindag pagkaon sa merkado. Inigkagabii, inspeksiyonon sa mga sundalo ang ilang armadura ug bairon ang ilang espada. Pero kadtong naninda puliki sa pag-andam ug pagkaon nga iyang ibaligya pagkasunod adlaw. Pagkabuntag, kalit nga misulong ang kaaway. Kinsa sa mga sundalo ang andam sa gubat ug mauyonan sa iyang komander? Ug kinsay gusto nimong makauban​—ang sundalo nga nangandam o kadtong nalinga?

14. Ingong mga sundalo sa Kristo, unsay atong giisip nga mas bililhon?

¹⁴ Samag maayong mga sundalo, dili gyod ta magpalinga sa atong pangunang tumong​—ang pagkahimong inuyonan sa atong mga Komander, si Jehova ug Jesu-Kristo. Giisip nato kana nga mas bililhon kay sa bisan unsang butang nga atong makuha sa kalibotan ni Satanas. Paneguroon nato nga duna tay panahon  ug kusog sa pag-alagad kang Jehova ug sa pagmentinar sa atong taming sa pagtuo ug sa uban pa natong espirituwal nga armadura.

15. Unsay gipasidaan ni Pablo kanato, ug ngano?

¹⁵ Kinahanglan nga kanunay tang magbantay. Ngano? Si apostol Pablo nagpasidaan nga “kadtong determinadong madato” mahisalaag gikan sa pagtuo. (1 Tim. 6:9, 10) Nagpasabot ni nga posible tang malinga kay mas magpokus na ta sa pagbaton sa mga butang nga wala nato kinahanglana. Dayon maugmad diha sa atong kasingkasing ang “daghang binuang ug makadaot nga tinguha.” Imbes tugotan nga maugmad ang maong mga tinguha diha sa atong kasingkasing, angay nato nang isipon ingong mga hinagiban nga makapahuyang sa atong pagtuo.

16. Ang asoy sa Marcos 10:17-22 angayng magpalihok kanato sa pagpamalandong sa unsang mga pangutana?

¹⁶ Tingali duna tay ikapalit ug daghang materyal nga mga butang. Sayop ba nga mopalit tag mga butang nga gusto nato pero wala nato kinahanglana? Dili man. Pero hunahunaa kini: Bisan kon makaarang ta sa pagpalit sa usa ka butang, duna ba gyod tay panahon ug kusog sa paggamit ug pagmentinar niana? Dili kaha mahimo nang mas bililhon kanato ang atong kabtangan? Dili kaha nga tungod sa atong pagpabili sa materyal nga mga butang mahisama na ta sa batan-ong lalaki nga mibalibad sa imbitasyon  ni Jesus nga pauswagon ang iyang pag-alagad sa Diyos? (Basaha ang Marcos 10:17-22.) Mas maayo gyod nga magkinabuhi tang simple ug gamiton ang atong panahon ug kusog sa pagbuhat sa kabubut-on sa Diyos!

17. Unsay dili nato angayng kalimtan?

¹⁷ Dili gyod nato kalimtan nga nakiggubat ta, ug kinahanglang andam ta sa pagpakig-away matag adlaw. (Pin. 12:17) Dili mahimo nga ang atong mga igsoon maoy mokupot sa atong taming sa pagtuo. Kita gyod ang angayng mokupot pag-ayo niana.

18. Nganong kuptan pag-ayo sa mga sundalo sa karaang panahon ang ilang taming?

¹⁸ Sa karaang panahon, ang usa ka sundalo pasidunggan tungod sa iyang kaisog sa pagpakiggubat. Pero maulawan siya kon mouli siya nga walay taming. Ang Romanong historyano nga si Tacitus misulat: “Kon mabiyaan ang taming, dako kaayo ni nga kaulawan.” Usa ni sa mga rason nga kuptan pag-ayo sa mga sundalo ang ilang taming.

19. Sa unsang paagi makuptan nato pag-ayo ang atong taming sa pagtuo?

¹⁹ Makuptan nato pag-ayo ang atong taming sa pagtuo pinaagi sa regular nga pagtambong sa Kristohanong mga tigom ug pinaagi sa pagsangyaw sa ngalan ni Jehova ug sa iyang Gingharian. (Heb. 10:23-25) Dugang pa, mainampoon natong basahon ang Pulong sa Diyos matag adlaw ug ipadapat ang tambag ug instruksiyon niini sa tanan natong buhaton. (2 Tim. 3:16, 17) Pinaagi niana, walay hinagiban nga gamiton ni Satanas batok kanato ang makapahinabog permanenteng kadaot. (Isa. 54:17) Ang atong “dakong taming sa pagtuo” manalipod kanato. Lig-on tang makabarog uban sa atong mga igsoon. Ug gawas nga makadaog ta sa adlaw-adlaw natong pagpakiggubat, dungog nato nga maanaa sa kiliran ni Jesus dihang makadaog siya sa gubat batok kang Satanas ug sa mga sumusunod niini.​—Pin. 17:14; 20:10.