1. Unsay gitugot ni Jehova nga atong buhaton?

SI Jehova nagtugot kanato sa pagdesisyon kon unsaon nato pagkinabuhi. Nagtudlo siya kanato kon unsaon paghimog maayong mga desisyon, ug tabangan ta niya nga molampos dihang mohimo tag mga desisyon nga makapalipay kaniya. (Sal. 119:173) Kon atong ipadapat ang kaalam nga naa sa Pulong sa Diyos, makahimo tag mas maayong mga desisyon.​—Heb. 5:14.

2. Unsa tingaliy lisod buhaton human ta makadesisyon?

² Pero bisag makahimo tag maalamong desisyon, usahay maglisod ta pagtapos sa atong nasugdan. Tagda ni nga mga pananglitan: Ang usa ka batan-ong brader midesisyon nga basahon ang tibuok Bibliya. Nahimo niya kana sulod sa pipila ka semana, unya miundang siya. Ang usa ka sister midesisyon nga mag-regular payunir pero pirme niyang iirog ang petsa kon kanus-a siya magsugod. Ang mga ansiyano midesisyon nga i-shepherding ang mga igsoon sa kongregasyon. Pero daghang bulan na ang milabay, wala gihapon nila ni mahimo. Lainlain ni nga mga situwasyon, pero dunay bahin nga magkaparehas kining tulo. Ang mga desisyon wala bug-os maimplementar. Mao sab nay problema sa unang siglong mga Kristohanon sa Corinto. Hisgotan nato kon unsay atong makat-onan kanila.

3. Unsang desisyon ang gihimo sa mga taga-Corinto, pero unsay nahitabo?

³ Niadtong mga 55 C.E., ang mga taga-Corinto mihimog importanteng desisyon. Nahibaloan nila nga ang ilang mga igsoon sa Jerusalem ug Judea nag-antos sa kalisdanan ug kakabos ug nga ang ubang mga kongregasyon nangolektag kuwarta aron itabang kanila. Kay maluluy-on ug mahinatagon, ang mga taga-Corinto midesisyon nga motabang sab sa mga nanginahanglan, ug nangutana sila kang apostol Pablo kon unsaon kana paghimo. Gisulatan ni  Pablo ang kongregasyon kon unsay ilang himoon ug giasayn niya si Tito nga motabang sa pagkolekta. (1 Cor. 16:1; 2 Cor. 8:6) Pero paglabay sa pipila ka bulan, nahibaloan ni Pablo nga wala pa makahatag ang mga taga-Corinto sa donasyon nga ilang gisaad. Busa ang ilang gasa basig dili maapil pagdala sa Jerusalem kauban sa donasyon sa ubang kongregasyon.​—2 Cor. 9:4, 5.

4. Sumala sa 2 Corinto 8:7, 10, 11, unsay gidasig ni Pablo nga himoon sa mga taga-Corinto?

⁴ Maayo ang nahimong desisyon sa mga taga-Corinto, ug gidayeg sila ni Pablo tungod sa ilang lig-ong pagtuo ug sa ilang tinguha nga mahimong mahinatagon. Pero gidasig sab niya sila nga taposon ang ilang nasugdan. (Basaha ang 2 Corinto 8:7, 10, 11.) Ang ilang kasinatian nagtudlo kanato nga bisan ang matinumanong mga Kristohanon maglisod tingali sa pag-implementar sa usa ka maayong desisyon.

5. Unsang mga pangutana ang atong tubagon?

⁵ Sama sa mga taga-Corinto, tingali maglisod sab ta sa pag-implementar sa atong mga desisyon. Ngano? Tungod kay dili ta hingpit, basig mag-unyaunya ta. O kaha malisdan ta sa pag-implementar sa atong desisyon tungod sa wala damhang mga panghitabo. (Eccl. 9:11; Roma 7:18) Unsaon nato pagsusi pag-usab ang nahimo na natong mga desisyon aron mahibaloan kon kinahanglan ba ning usbon? Ug sa unsang paagi mahimo tang mas epektibo sa pagtapos sa atong nasugdan?

6. Kanus-a tingali nga kinahanglan natong usbon ang usa ka desisyon?

⁶ Dunay importanteng mga desisyon nga dili gyod nato usbon. Pananglitan, barogan nato ang atong desisyon nga moalagad kang Jehova, ug determinado ta nga magmaunongon sa atong kapikas. (Mat. 16:24; 19:6) Pero, ang ubang desisyon basin kinahanglang usbon. Ngano? Tungod kay mausab ang mga sirkumstansiya. Unsay makatabang nato sa paghimog kinamaayohang mga desisyon?

7. Unsay angay natong iampo, ug ngano?

⁷ Pag-ampo alang sa kaalam. Gigiyahan ni Jehova si Santiago sa pagsulat: “Kon duna kaninyoy nakulangan ug kaalam, padayon siyang mangayo sa Diyos, kay siya madagayaong nagahatag sa tanan.” (Sant. 1:5) Sa pipila ka bahin, kitang tanan “nakulangan ug kaalam.” Busa, salig kang Jehova dihang mohimog desisyon ug dihang kinahanglan nimo kanang usbon. Tabangan ka ni Jehova sa paghimog maalamong desisyon.

8. Unsa nga pag-research ang angay natong himoon sa dili pa modesisyon?

⁸ Pag-research pag-ayo. Susiha ang Pulong sa Diyos, basaha ang mga publikasyon sa organisasyon, ug pakig-estorya sa mga tawo nga imong kasaligan. (Prov. 20:18) Importante ang pag-research sa dili pa modesisyon sa pagpangitag laing trabaho, pagbalhin, o pagpilig edukasyon nga makatabang nimo sa pagsuportar sa imong ministeryo.

9. Unsay benepisyo kon matinud-anon ta sa kaugalingon?

⁹ Analisaha ang imong mga motibo. Importante kang Jehova ang atong mga motibo. (Prov. 16:2) Gusto niya nga magmatinud-anon ta sa tanang butang. Busa dihang modesisyon ta, gusto sab natong magmatinud-anon sa kaugalingon ug sa uban bahin sa atong mga motibo. Kon dili ta magmatinud-anon, lagmit malisdan ta sa pag-implementar sa atong desisyon. Pananglitan, ang usa ka batan-ong brader nakadesisyon tingali nga mag-regular payunir. Pero paglabay sa panahon, naglisod siya sa pagkab-ot sa kinahanglanong oras ug dili na kaayo siya malipayon sa iyang ministeryo. Tingali naghunahuna siya nga ang iyang pangunang motibo sa pagpayunir mao ang iyang tinguha nga malipay si Jehova. Pero, posible kaha nga nagpayunir siya tungod lang kay gusto niyang malipay ang iyang ginikanan o ang laing tawo nga iyang gidayeg?

10. Unsay gikinahanglan aron makahimog mga kausaban?

 ¹⁰ Tagda ang kahimtang sa usa ka Bible study nga nakadesisyon sa paghunong sa pagpanigarilyo. Sa sinugdan, nakigbisog siya, nga wala manigarilyo sulod sa usa o duha ka semana. Apan unya, nakapanigarilyo na pod siya. Pero sa kataposan, nakahunong ra gyod siya! Ang iyang gugma kang Jehova ug ang iyang tinguha nga mapalipay Siya nakatabang niya sa pagbiya sa maong bisyo.​—Col. 1:10; 3:23.

11. Nganong kinahanglan nga duna kay espesipikong mga tumong?

¹¹ Magmaespesipiko. Kon mas espesipiko ka, mas dakog purohan nga imong matapos ang imong nasugdan. Pananglitan, nakadesisyon tingali ka nga himoong mas regular ang imong pagbasa sa Bibliya. Pero kon wala kay espesipikong eskedyul, lagmit dili ka molampos sa imong tumong. * O ang mga ansiyano sa usa ka kongregasyon midesisyon tingali nga himoong mas regular ang pag-shepherding sa mga igsoon, pero milabay na lang ang taastaas nga panahon, wala gihapon nila maimplementar ang ilang desisyon. Aron molampos, mahimo nilang isukna ang mga pangutana nga sama niini: “Naghimo ba mig listahan sa mga igsoon nga makabenepisyo sa among pagduaw? Naghimo ba mig espesipikong eskedyul sa pagduaw kanila?”

12. Unsa tingaliy kinahanglan nimong himoon, ug ngano?

¹² Magmarealistiko. Walay usa kanato ang dunay panahon, kabtangan, o kusog sa paghimo sa tanan nga gusto natong buhaton. Busa, magmarealistiko ug magmakataronganon. Basin kinahanglan nimong usbon ang desisyon nga dili nimo maimplementar. (Eccl. 3:6) Pero ibutang ta nga imong gisusi ang imong desisyon, giadyas kini, ug gibati nimo nga maimplementar na nimo kini. Niay lima ka lakang nga makatabang nimo sa pagtapos sa imong nasugdan.

13. Sa unsang paagi mahatagan kag kusog aron maimplementar ang imong desisyon?

¹³ Pag-ampo alang sa kusog. Ang Diyos makahatag nimog kusog aron maimplementar nimo ang imong desisyon. (Filip. 2:13) Busa pangayoa ang iyang balaang espiritu aron hatagan ka niini sa kusog nga imong gikinahanglan. Padayon sa pag-ampo bisag daw wala pa tubaga ang imong giampo. Si Jesus miingon: ‘Padayon sa pagpangayo, ug kamo hatagan [ug balaang espiritu].’​—Luc. 11:9, 13.

14. Sa unsang paagi ang prinsipyo diha sa Proverbio 21:5 makatabang nimo sa pag-implementar sa imong desisyon?

¹⁴ Paghimog plano. (Basaha ang Proverbio 21:5.) Aron molampos ka sa bisan unsang proyekto, kinahanglan kang magplano. Dayon, kinahanglang sundon nimo ang imong giplano. Sa susama, dihang mohimo kag desisyon, isulat ang espesipikong mga butang nga kinahanglan nimong himoon aron maimplementar kana. Bahinbahina ang dagkong trabaho ngadto sa gagmayng buluhaton aron mas dali nimong makita ang imong pag-uswag. Gidasig ni Pablo ang mga taga-Corinto nga maggahin ug amot “sa unang adlaw sa matag semana” imbes maghulat nga moabot siya ayha pa mangolekta. (1 Cor. 16:2) Kon imong bahinbahinon ang dagkong trabaho ngadto sa gagmayng buluhaton, dili sab ka mabug-atan.

15. Human makahimog plano, unsay puwede nimong himoon?

¹⁵ Kon imong isulat ang imong mga plano, mas sayon ang pag-implementar niini. (1 Cor. 14:40) Pananglitan, ang mga ansiyano gihatagag instruksiyon nga mag-asayn ug ansiyano nga magrekord sa matag desisyon nga ilang mahimo, apil na kon kinsay gitudlo nga moimplementar niana ug kon kanus-a kana taposon. Kon ila nang sundon, mas sayon nilang maimplementar ang ilang mga desisyon. (1 Cor. 9:26)  Puwede pod nâ nimong sundon sa imong personal nga mga kalihokan. Pananglitan, puwede kang maghimog listahan sa mga kinahanglan nimong himoon kada adlaw, ug unaha pagsulat ang mga butang nga una nimong buhaton. Makatabang ni aron matapos nimo ang imong nasugdan ug mas daghan kag malampos.

16. Unsay gikinahanglan aron maimplementar nimo ang imong desisyon, ug giunsa kana pagsuportar sa Roma 12:11?

¹⁶ Pagkugi. Kinahanglan ang paningkamot aron maimplementar ang imong mga plano ug matapos ang imong nasugdan. (Basaha ang Roma 12:11.) Gisultihan ni Pablo si Timoteo nga ‘magpadayon sa pagkugi’ aron mahimong mas maayong magtutudlo. Kana nga tambag mapadapat sab sa ubang espirituwal nga mga tumong.​—1 Tim. 4:13, 16.

17. Unsaon nato pagpadapat ang Efeso 5:15, 16 dihang mag-implementar ug desisyon?

¹⁷ Gamita ang imong panahon sa maalamong paagi. (Basaha ang Efeso 5:15, 16.) Pagpilig panahon kon kanus-a nimo iimplementar ang imong desisyon ug sunda kana. Ayawg hulata nga moabot ang maayo kaayong kahimtang ayha ka molihok, kay lagmit dili gyod nâ moabot. (Eccl. 11:4) Ayawg tugoti nga mahurot ang imong panahon sa dili kaayo importanteng mga butang, nga wala na hinuon kay panahon ug kusog para sa mas importanteng mga butang. (Filip. 1:10) Kon posible, pilia ang panahon nga wala kaayoy makabalda nimo. Sultihi ang uban nga kinahanglan kang magpokus. Basig puwedeng patyon una nimo ang imong cellphone ug dili una mag-check sa imong email o sa social media. *

18-19. Unsay makatabang aron dili ka mosurender sa pag-implementar sa imong maayong desisyon dihang dunay mga babag?

¹⁸ Pagpokus sa maayong mga resulta. Ang resulta sa imong desisyon ikatandi nato sa destinasyon dihang magbiyahe. Kon gusto gyod kang makaabot sa imong destinasyon, mopadayon ka bisan pag kinahanglan kang moagig laing dalan tungod sa mga babag. Sa susama, kon magpokus ta sa maayong mga resulta sa atong desisyon, dili dayon ta mosurender dihang makaeksperyensiya tag mga babag.​—Gal. 6:9.

¹⁹ Lisod ang paghimog maayong mga desisyon ug ang pag-implementar niana. Pero sa tabang ni Jehova, makabaton kag kaalam ug kusog nga imong gikinahanglan aron matapos ang imong nasugdan.