1. Unsa ang atong “espirituwal nga panginahanglan,” ug unsay koneksiyon niini sa atong kalipay?

 ANG tinuod nga kalipay dili lang kay nindot nga pagbati nga molabay ra. Puwede ning bation sa usa ka tawo sa tibuok niyang kinabuhi. Nganong makaingon ta ana? Si Jesus miingon sa iyang Wali sa Bukid: “Malipayon kadtong mahunahunaon sa ilang espirituwal nga panginahanglan.” (Mat. 5:3) Nahibalo si Jesus nga ang mga tawo gilalang nga may “espirituwal nga panginahanglan.” Buot ipasabot, naa silay tinguha nga mailhan ang ilang Maglalalang, si Jehova nga Diyos, ug simbahon Siya. Ug kay si Jehova “malipayong Diyos,” kadtong nagsimba niya magmalipayon pod.​—1 Tim. 1:11.

2-3. (a) Sumala kang Jesus, kinsa pay magmalipayon? (b) Unsay atong hisgotan niining artikuloha, ug nganong importante ni?

² Kinahanglan bang maayo kaayo ang atong kahimtang aron magmalipayon? Dili. Mao nay gipakita ni Jesus sa iyang wali. Siya miingon nga “kadtong nagbangotan,” tingali tungod kay naguol kaayo sa ilang sala o tungod kay nakasinatig lisod nga mga problema​—mahimong magmalipayon. Mao pod nay giingon ni Jesus bahin niadtong “gilutos tungod sa pagkamatarong” o kaha ‘gipakaulawan’ kay mga sumusunod sila sa Kristo. (Mat. 5:4, 10, 11) Pero posible ba gyod nga tinuod tang magmalipayon niana nga mga kahimtang?

³ Gitudloan ta ni Jesus nga bation nato ang kalipay, dili tungod sa maayo kaayong kahimtang, kondili sa pagtagbaw sa atong espirituwal nga panginahanglan ug pagpakigsuod sa Diyos.  (Sant. 4:8) Unsaon nato nâ paghimo? Niining artikuloha, hisgotan nato ang tulo ka paagi aron tinuod tang magmalipayon.

4. Unsa ang unang paagi aron tinuod tang magmalipayon? (Salmo 1:1-3)

⁴ PAAGI 1: Aron tinuod nga magmalipayon, kinahanglan tang mokaon ug espirituwal nga pagkaon. Ang mga tawo ug mga hayop nagkinahanglag pisikal nga pagkaon aron mabuhi. Pero mga tawo lang ang makakaon ug espirituwal nga pagkaon. Ug gikinahanglan nato nâ. Mao nay rason nga si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mat. 4:4) Busa dili nato angayng palabyon ang adlaw nga dili mokaon ug espirituwal nga pagkaon gikan sa Pulong sa Diyos, ang Bibliya. Ang salmista miingon: ‘Malipayon ang tawo kansang kalipay anaa sa balaod ni Jehova ug nagabasa niini adlaw ug gabii.’​—Basaha ang Salmo 1:1-3.

5-6. (a) Unsay atong makat-onan sa Bibliya? (b) Sa unsang mga paagi ang pagbasa sa Bibliya makatabang nato?

⁵ Kay gihigugma ta ni Jehova, iyang gipakita kanato diha sa Bibliya kon unsay atong buhaton aron magmalipayon ta. Mahibaloan nato kon unsay iyang katuyoan para nato. Mahibaloan pod nato kon unsay atong buhaton aron masuod ta niya ug mapasaylo ang atong mga sala. Ug makat-onan nato ang nindot nga paglaom sa umaabot nga iyang gisaad. (Jer. 29:11) Ang mga kamatuoran nga atong makat-onan sa Bibliya makapalipay gyod nato!

⁶ Nahibalo pod ta nga ang Bibliya daghag praktikal nga tambag para sa adlaw-adlaw nga  pagkinabuhi. Kon sundon nato ang maong mga tambag, magmalipayon ta. Busa kon maguol ka tungod sa imong mga problema, dugangi ang imong panahon sa pagbasa sa Pulong ni Jehova ug pagpamalandong niini. Si Jesus miingon: “Malipayon kadtong namati sa pulong sa Diyos ug nagsunod niini!”​—Luc. 11:28.

7. Unsay makatabang aron mas makabenepisyo ka sa panahon nga imong gigahin sa pagbasa sa Pulong sa Diyos?

⁷ Dihang magbasa ka sa Pulong sa Diyos, ayaw pagdali. I-enjoy ang imong ginabasa. Pananglitan, nakasulay na ba ka nga gilutoan kag paborito nimong pagkaon? Kay nagdali ka o kaha daghan kaayo kag gihunahuna, imo ra ning gipaspasag kaon nga wala gani nimo ma-enjoy ang kada hungit. Pero pagkahuman, nakahunahuna ka nga maayo pag gihinayhinay nimo nig kaon aron mag-enjoy ka. Parehas pod ana ang pagbasag Bibliya. Nakasulay na ba ka nga nagdalidali kag basa maong wala nimo ma-enjoy ang mensahe niini? Ayaw pagdali, ug i-enjoy ang pagbasa sa Pulong sa Diyos; imadyina ang mga panghitabo ug ang mga tingog, ug pamalandonga ang imong nabasa. Kon kanay imong himoon, mas malipay ka.

8. Giunsa pagtuman sa “matinumanon ug maalamong ulipon” ang ilang responsibilidad? (Tan-awa sab ang footnote.)

⁸ Gitudlo ni Jesus ang “matinumanon ug maalamong ulipon” sa pagtaganag espirituwal nga pagkaon sa hustong panahon, ug busog kaayo ta sa espirituwal. b (Mat. 24:45) Ang tanang gitagana sa matinumanong ulipon gibase sa Pulong sa Diyos. (1 Tes. 2:13) Busa ang maong espirituwal nga pagkaon makatabang nato nga mahibaloan ang panghunahuna ni Jehova nga gipadayag diha sa Bibliya. Mao nay rason nga mobasa gyod tag Bantayanang Torre ug Pagmata! ug mga artikulo sa jw.org. Mangandam ta para sa midweek ug weekend nga mga tigom. Ug motan-aw ta sa matag programa sa JW Broadcasting^® nga i-release kada bulan. Kon maningkamot ta nga mokaon ug daghang espirituwal nga pagkaon, motabang ni nato nga mahimo ang ikaduhang paagi aron tinuod tang magmalipayon.

9. Unsa ang ikaduhang paagi aron tinuod tang magmalipayon?

⁹ PAAGI 2: Aron tinuod nga magmalipayon, kinahanglan tang magkinabuhi uyon sa mga sukdanan ni Jehova. Ang salmista misulat: “Malipayon ang matag usa nga mahadlok kang Jehova, nga maglakaw sa Iyang mga dalan.” (Sal. 128:1) Ang pagkahadlok kang Jehova nagpasabot nga tahoron nato siya pag-ayo ug dili nato himoon ang bisan unsa nga makapasuko niya. (Prov. 16:6) Busa padayon tang maningkamot nga mosunod sa mga sukdanan sa Diyos bahin sa husto ug sayop, nga iyang gipasulat diha sa Bibliya. (2 Cor. 7:1) Magmalipayon ta kon himoon nato ang mga butang nga gihigugma ni Jehova ug isalikway ang mga butang nga iyang gidumtan.​—Sal. 37:27; 97:10; Roma 12:9.

10. Sumala sa Roma 12:2, unsay atong responsibilidad?

¹⁰ Basaha ang Roma 12:2. Ang usa ka tawo tingali nahibalo nga si Jehova may awtoridad sa pagtakda kon unsay husto ug sayop. Pero kinahanglang andam pod siyang mosunod sa mga sukdanan sa Diyos. Pananglitan, ang usa ka tawo tingali nahibalo nga ang gobyerno dunay katungod sa pagtakdag speed limit. Pero basig dili siya gustong mosunod niana maong magpabulhot siyag drayb. Mapakita nato pinaagi sa atong binuhatan nga tinuod  tang nagtuo nga ang pagsunod sa mga sukdanan ni Jehova makahatag gyod natog kaayohan. (Prov. 12:28) Mao nay gibati ni David, kay siya miingon bahin kang Jehova: “Gipaila nimo kanako ang dalan sa kinabuhi. Anaa sa imong atubangan ang tumang kalipay; dunay kalipay sa imong tuong kamot hangtod sa hangtod.”​—Sal. 16:11.

11-12. (a) Dihang mabalaka o maguol ta, sa unsa ta angayng mag-amping? (b) Sa unsang paagi ang Filipos 4:8 makatabang nato sa pagpilig kalingawan?

¹¹ Dihang mabalaka o maguol ta, tingali mangita tag mga paagi nga malimtan kadiyot ang atong mga problema. Normal lang nâ, pero kinahanglang mag-amping ta nga dili mohimog bisan unsa nga makapasuko kang Jehova.​—Efe. 5:10-12, 15-17.

¹² Sa sulat ni apostol Pablo sa mga taga-Filipos, iyang giawhag ang mga Kristohanon nga padayong palandongon ang mga butang nga “matarong, . . . putli, . . . hiligugmaon, [ug] maayo.” (Basaha ang Filipos 4:8.) Bisag si Pablo wala espesipikong maghisgot ug kalingawan, ang iyang gisulat angayng magpahinumdom nato kon unsa nga kalingawan ang atong pilion. Sulayi ni: Ang pulong “butang” niini nga bersikulo pulihig pulong nga “kanta,” “salida,” “basahonon,” o “video game.” Makatabang ni nimo nga mahibaloan kon unsay dalawaton sa Diyos ug unsay dili. Gusto natong sundon ang taas nga mga sukdanan ni Jehova. (Sal. 119:1-3) Ug kay hinlo ang atong konsensiya, mahimo nato ang sunod nga paagi aron tinuod tang magmalipayon.​—Buh. 23:1.

13. Unsa ang ikatulong paagi aron tinuod tang magmalipayon? (Juan 4:23, 24)

¹³ PAAGI 3: Paneguroa nga kanunay nimong unahon ang pagsimba kang Jehova. Si Jehova ang atong Maglalalang, maong angay gyod siyang simbahon. (Pin. 4:11; 14:6, 7) Busa kinahanglan natong himoong prayoridad ang pagsimba kaniya sa paagi nga iyang gusto, “sa espiritu ug kamatuoran.” (Basaha ang Juan 4:23, 24.) Gusto nato nga ang atong pagsimba gigiyahan sa balaang espiritu sa Diyos aron nahiuyon ni sa mga kamatuoran diha sa iyang Pulong. Kinahanglang unahon nato ang atong pagsimba bisag nagpuyo ta sa lugar diin gidili o may restriksiyon ang atong buluhaton. Sa pagkakaron, kapig 100 sa atong mga igsoon ang gipriso tungod lang kay mga Saksi ni Jehova sila. c Bisan pa ana, malipayon gihapon sila ug naningkamot nga mag-ampo, magtuon, ug mosulti sa uban bahin sa atong Diyos ug sa iyang Gingharian. Dihang pakaulawan o lutoson ta, malipayon gihapon ta kay si Jehova nag-uban nato ug iya tang gantihan.​—Sant. 1:12; 1 Ped. 4:14.

14. Unsay nahitabo sa usa ka batan-ong brader sa Tajikistan, ug ngano?

¹⁴ Pipila sa mga igsoon ang nakaatubang ug lisod kaayo nga mga kahimtang. Pero nagmalipayon gihapon sila kay ilang gihimo ang tulo ka paagi nga atong gihisgotan. Tagda ang nahitabo sa 19 anyos nga si Jovidon Bobojonov nga taga-Tajikistan kay dili siya magsundalo. Niadtong Oktubre 4, 2019, gipugos siyag kuha sa iyang balay, gidetener sulod sa pipila ka bulan, ug gitratar ingong kriminal. Kini nga inhustisya gibalita pag-ayo sa daghang nasod. Sumala sa report, gikulata siya aron mapugos siya nga magsul-ob ug uniporme nga pangsundalo ug manumpa nga depensahan ang nasod. Human ana, gisentensiyahan siya ug gipriso sa labor camp hangtod nga gihatagan siyag presidential pardon ug gibuhian. Bisan pa sa tanan  niyang naagian, si Jovidon nagpabiling matinumanon ug malipayon. Ngano? Kay kanunay niyang gihunahuna ang iyang espirituwal nga panginahanglan.

15. Unsay nakatabang kang Jovidon aron padayon siyang makakaon ug espirituwal nga pagkaon diha sa prisohan?

¹⁵ Sa prisohan, si Jovidon padayong mikaon ug espirituwal nga pagkaon bisan pag wala siyay Bibliya o publikasyon. Nganong nahimo man to niya? Ang mga igsoon didto maghatod niyag pagkaon ug ilang isulat sa grocery bag ang teksto nianang adlawa, mao nga nakabasa gihapon siyag Bibliya ug nakapamalandong niana adlaw-adlaw. Dihang gipagawas na siya sa prisohan, naa siyay tambag para niadtong wala pa makasinatig grabeng pagsulay. Siya miingon: “Importante kaayo nga gamiton ninyo ang inyong kagawasan pinaagi sa pagbasa sa Bibliya ug sa atong mga publikasyon aron molalom ang inyong kahibalo bahin kang Jehova.”

16. Sa unsa nagpokus si Jovidon?

¹⁶ Si Jovidon nagsunod sa mga sukdanan ni Jehova. Imbes magsigeg hunahuna ug sayop nga mga tinguha ug mohimog daotan, nagpokus siya kang Jehova ug sa Iyang kabubut-on. Si Jovidon ganahan kaayong magtan-aw sa nindot nga kalalangan sa Diyos. Kada buntag  inigmata niya, maminaw siya sa tingog sa mga langgam. Ug inigkagabii, motan-aw siya sa bulan ug sa mga bituon. Siya miingon: “Kini nga mga regalo gikan kang Jehova nakapalipay ug nakadasig nako.” Kon mapasalamaton ta sa espirituwal ug pisikal nga mga tagana ni Jehova, magmalipayon ta, ug kana nga kalipay makatabang nato nga molahutay.

17. Sa unsang paagi ang 1 Pedro 1:6, 7 makadasig niadtong nag-atubang ug situwasyon nga parehas nianang kang Jovidon?

¹⁷ Gipaneguro pod ni Jovidon nga unahon ang pagsimba kang Jehova. Nahibalo siya nga importante nga magmaunongon siya sa matuod nga Diyos. Si Jesus miingon: “Si Jehova nga imong Diyos ang angay nimong simbahon, ug siya lamang ang angay nimong hatagag sagradong pag-alagad.” (Luc. 4:8) Ang mga komander ug mga sundalo naningkamot gyod nga paundangon siya sa pagka-Saksi. Pero adlaw ug gabii siyang nag-ampo kang Jehova nga tabangan siya nga molahutay ug dili mokompromiso. Bisan pa sa inhustisya nga naeksperyensiyahan ni Jovidon, wala gyod siya mokompromiso. Tungod ana, mas malipayon siya karon kay sa niadtong wala pa siya kulataha o prisoha, kay karon mas lig-on ug nasulayan na ang iyang pagtuo.​—Basaha ang 1 Pedro 1:6, 7.

18. Unsay atong himoon aron padayon tang magmalipayon?

¹⁸ Nahibalo si Jehova kon unsa gyoy makapalipay nato. Kon sundon nimo ang tulo ka paagi nga atong nahisgotan, padayon kang magmalipayon bisan pa sa lisod nga mga problema. Ug masulti pod nimo ni: “Malipayon ang katawhan kansang Diyos mao si Jehova!”​—Sal. 144:15.