Si Mary ug ang iyang bana, si John, a nagpuyo sa nasod diin daghang Pilipino ang namalhin aron manarbaho. Panahon sa COVID-19 nga pandemic, nakasugod si Mary ug mga Bible study dili lang sa nasod nga iyang gipuy-an, kondili apil na pod sa ubang mga nasod. Giunsa na niya paghimo?

Mangutana si Mary sa iyang mga Bible study, “Naa ba moy kaila nga ganahang magtuon ug Bibliya?” Kon moingon silag naa, iya silang hangyoon nga ipailaila siya kanila. Kining simple nga pangutana sagad naay maayong mga resulta. Ngano? Kay kasagaran sa mga tawo nga nagpabili sa Pulong sa Diyos ganahang mo-share sa ilang mga nakat-onan ngadto sa ilang pamilya ug mga higala. Unsay nahimong resulta sa gihimo ni Mary?

Ang Bible study ni Mary nga si Jasmin nagpailaila niyag upat ka interesado nga gustong magtuon ug Bibliya. Ang usa nila mao si Kristine, nga nag-enjoy pag-ayo sa pagtuon maong iyang gihangyo si Mary nga magtuon sila kaduha sa usa ka semana. Gipangutana siya ni Mary kon naa ba siyay kaila nga ganahang magpa-Bible study. Si Kristine miingon, “Naa, ako ti kang ipailaila nila.” Sulod sa pipila ka semana, gipailaila ni Kristine kang Mary ang upat niya ka amiga nga gustong magpa-study. Mao pod nay gihimo ni Kristine sa uban pa niyang mga amiga, ug ang uban nila naghatag pod ug mga ngalan sa ilang mga higala nga interesado sab nga magtuon.

Gusto ni Kristine nga ang iyang pamilya sa Pilipinas makakat-on pod bahin sa Bibliya. Maong iyang giestorya ang iyang anak nga si Andrea. Sa primero, si Andrea miingon, ‘Kulto man nang mga Saksi, wala sila magtuo kang Jesus, ug Daang Tugon ra ang ilang gigamit.’ Pero human lang sa usa ka pagtuon, naamgohan ni Andrea nga sayop diay siya. Sa matag higayon nga naa siyay bag-ong makat-onan, siya moingon, “Kay mao man ni ang giingon sa Bibliya, tinuod gyod ni!”

Wala madugay, gipailaila ni Andrea kang Mary ang duha niya ka amiga ug ang iyang kauban sa trabaho nga nagpa-Bible study pod. Gawas pa niana, wala mahibalo si Mary nga ang buta nga iyaan ni Andrea nga si Angela nagapaminaw diay nila samtang magtuon sila. Dayon usa ka adlaw, gihangyo ni Angela si Andrea nga ipailaila siya kang Mary, kay gusto pod niyang magpa-Bible study. Nagustohan kaayo ni Angela ang iyang mga nakat-onan. Wala pay usa ka bulan, nakamemorya na siyag daghang teksto ug gusto pa gani siyang magpa-study kaupat sa usa ka semana. Sa tabang ni Andrea, regular na siyang  nagtambongan sa tigom pinaagig videoconferencing.

Sa dihang nahibaloan ni Mary nga ang bana ni Kristine nga si Joshua nagapaminaw nila samtang magtuon sila, gipangutana siya ni Mary kon gusto ba niyang mouban sa pagtuon. Si Joshua miingon, “Sige, pero maminaw ra ko. Ayaw ra kog pangutan-a, kay kon imo kong pangutan-on, mosibat gyod ko.” Pero lima pa lang gani ka minuto nga miuban siya sa ilang pagtuon, mas daghan na siyag pangutana kay kang Kristine ug mihangyo siya nga magpa-Bible study.

Tungod sa simpleng pangutana ni Mary, daghan ang nadumalahag pagtuon sa Bibliya. Ang uban nila iyang gihatag sa mga igsoon. Sa katibuk-an, nakasugod si Mary ug 28 ka Bible study sa upat ka lainlaing nasod.

Si Jasmin, ang unang Bible study nga gihisgotan niini nga eksperyensiya, nabawtismohan niadtong Abril 2021. Si Kristine nabawtismohan niadtong Mayo 2022 ug mibalik siya sa Pilipinas aron makauban ang iyang pamilya. Ang duha ka amiga ni Kristine nga iyang gipailaila kang Mary nabawtismohan pod. Pipila ka bulan human mabawtismohan si Kristine, si Angela nagpabawtismo ug karon nag-alagad na ingong regular payunir. Ang bana ni Kristine nga si Joshua, ang ilang anak nga si Andrea, ug ang uban pa padayong nagmauswagon sa ilang pag-Bible study.

Niadtong unang siglo, daghan ang nagpaambit sa maayong balita ngadto sa ilang mga pamilya ug mga higala. (Juan 1:​41, 42a; Buh. 10:​24, 27, 48; 16:​25-33) Puwede nimong pangutan-on ang imong mga Bible study ug ubang interesado, “Naa ba moy kaila nga ganahang magtuon ug Bibliya?” Pinaagi niining simple nga pangutana, basin diay makasugod pod kag daghang pagtuon sa Bibliya.