Mga Magmamantala sa Gingharian Nagtaho

Siya Nakakaplag ug Katuyoan sa Kinabuhi

SI Jesus nag-ingon nga nakaila siya sa iyang mga karnero. (Juan 10:14) Kon ang usa ka tawo adunay maayong kasingkasing ug gugma sa pakigdait ug pagkamatarong, kana siya madani sa mga sumusunod ni Jesus. Kanang tawhana makakaplag ug katuyoan sa kinabuhi, sama sa nahitabo sa usa ka babaye sa Belgium. Kini ang iyang estorya:

“Sa dihang ang mga Saksi ni Jehova nanuktok sa akong pultahan, ako magul-anon kaayo ug naghunahuna sa paghikog. Nagustohan ko ang gisulti sa mga Saksi mahitungod sa kasulbaran sa mga suliran niining masakitong kalibotan apan wala ako makaangay sa ideya nga ang Diyos may kalabotan niana. Mihunong ako sa pagsimba walo ka tuig na nga miagi, kay wala ako makaangay sa kasalingkapaw nga akong nakit-an didto. Bisan pa niana, sa mga Saksi akong nailhan ang tagingting sa kamatuoran diha sa ilang gipanulti ug naamgohan nga, kon buot sabton, lisod ang pagkabuhi kon walay Diyos.

“Makapasubo, human sa pila ka pagduaw, nawala ang pakigkontak sa mga Saksi. Ako masulob-on kaayo. Ako motabakog duha ka paketeng sigarilyo sa usa ka adlaw ug misugod paggamit ug mga droga. Kay buot makigsulti sa akong namatay nang lolo, ako nalangkit sa espiritismo. Labihan ang akong kalisang sa dihang ako mag-inusara sa magabii akong masinati ang mga pag-atake sa demonyo ingong sangpotanan! Kana milungtad ug daghang bulan. Matag gabii ako mahadlok sa hunahuna nga ako mag-inusara.

“Dayon, usa ka adlaw niana ako naglakawlakaw, nga miagi sa laing dalan kay sa naandan, ug ako nahisangko sa usa ka dako kaayong konstruksiyon. Sa akong katingala nakita ko ang usa ka dakong panon didto. Sa pagpaduol, akong nakita nga kadto mga Saksi ni Jehova diay nga nagtukod ug Kingdom Hall. Akong nahinumdoman ang mga pagduaw nga gihimo sa mga Saksi sa akong balay, ug ako naghunahuna unsa ka talagsaon unta kon ang tibuok kalibotan magkinabuhi nga sama kanila.

“Ako tinuod nga nanghinaot nga ang mga Saksi mobalik sa akong balay, busa nakigsulti ako sa pipila niadtong nagtrabaho sa tigomanan. Ako miampo sa Diyos, ug napulo ka adlaw sa ulahi ang lalaking unang miduaw kanako didto na sa akong pultahan. Siya misugyot nga ipadayon namo ang pagtuon sa Bibliya, ug ako misugot nga malipayon. Dihadiha ako gidapit niya nga moadto sa mga tigom sa Kingdom Hall. Ako midawat. Wala pa gayod ako makakita sukad sa ingon nga talan-awon! Dugay na kaayo akong nangita sa katawhan nga nahigugma sa usag usa ug malipayon. Ug sa kataposan sila didto!

“Human niadto ako mitambong sa tanang tigom. Human sa mga tulo ka semana, gihunong ko ang daotang bisyo sa pagtabako. Gilabay ko ang akong mga libro bahin sa astrolohiya ug ang akong mga rekord nga may satanasnong musika, ug gibati kong ang mga demonyo inanay nga milugak sa ilang pangupot kanako. Gihikay ko ang akong kinabuhi nga mauyon sa mga sukdanan ni Jehova sa Bibliya, ug human sa tulo ka bulan gisugdan ko ang pagwali sa maayong balita. Human sa unom ka bulan ako nabawtismohan. Duha ka adlaw human sa akong bawtismo, ako misugod sa pag-oksilyare payunir.

“Nagpasalamat ako kang Jehova tungod sa tanang maayong butang nga nahimo niya alang kanako. Sa kataposan ang akong kinabuhi adunay katuyoan. Oo, ang ngalan ni Jehova maoy malig-ong torre nga diha niana akong nakaplagan ang salipdanan ug panalipod. (Proverbio 18:10) Gibati ko gayod ang sama sa gibati sa salmista sa misulat siya sa Salmo 84:10: ‘Ang usa ka adlaw sa imong mga sawang labi pang maayo kay sa usa ka libo sa laing dapit! Palabihon ko ang pagtindog sa pultahan sa balay sa akong Diyos inay sa paglakawlakaw sa mga balongbalong sa kadaotan.’”

Kining aghop-ug-kasingkasing nga babaye nakakaplag ug katuyoan sa kinabuhi. Mao usab si bisan kinsa nga mangita kang Jehova uban ang maayong kasingkasing.