‘Kalayo sa Kamausisahon Diha sa Kasingkasing ug Hunahuna’

“Dili ikaasoy sa mga pulong ang nagdakong kangaya ug kahinam samtang gibasa ko pag-ayo ang Is There a Creator Who Cares About You? Makapatungha kini diha sa usa ka tawo ug usa ka tinguha​—aw, usa ka panginahanglan—​nga mahibalo ug dugang. Salamat sa paghaling ug kalayo sa kamausisahon diha sa akong kasingkasing ug hunahuna.”

MAO kanay gibati sa usa sa mga Saksi ni Jehova nga taga-Amihanang Carolina, T.B.A., bahin sa libro nga giluwat sa Watch Tower Society sa “Iya sa Diyos nga Dalan sa Kinabuhi” nga Distritong mga Kombensiyon sulod sa 1998/​99. Bisag wala kay kopya sa libro, matikdi ang ubang mga reaksiyon.

Mga adlaw human madawat ang iyang kopya sa kombensiyon sa San Diego, California, T.B.A., usa ka lalaki misulat: “Akong nakita nga kining libroha makapalig-on kaayo sa pagtuo. Gipuno niini ang akong kasingkasing sa tim-os nga pagpabili alang sa mga buhat sa paglalang ni Jehova. Nia na ako sa panid 98, ug di ko gustong moabot ang adlaw nga ako kining mahuman ug basa! Mao kana ang makapatagbawng kalipay nga gihatag niining libroha.”

Usa ka babaye nga taga-Silangan misulat: “Ang mamumulong sa kombensiyon migamit sa ekspresyon nga ‘usa ka talagsaong libro,’ ug ang maong ekspresyon mohaom gayod sa kaundan niini. Ang usa ka talagsaong bahin mao nga ang basahon wala magpugos sa magbabasa nga motuo sa paglungtad sa Diyos, apan gipresentar lamang niini ang mga kamatuoran.”

bAng mga kamatuoran naglakip sa makapahinam nga siyentipikanhong mga kaplag bahin sa atong uniberso, kinabuhi, ug kanato. Nakadayeg niini ang daghan. “Dili nako ikapahayag kon unsa ka lalom ang epekto niining gamayng libro kanako,” misulat ang usa ka babaye nga taga-California. “Dili ako makahunong sa pagbasa sa libro kay ang matag panid nagbatbat ug dugang bag-ong mga kaplag bahin sa atong uniberso ug sa kinabuhi mismo. Ako nakakat-on gayod ug daghan! Akong pabilhan kining gamayng libro ug ipaambit kini ngadto sa daghan kutob sa maarangan.”

Ang bahin nga nakapahimuot sa daghan mao ang paagi sa basahon sa paghatag ug sumarya sa Bibliya, nga nagpasiugda sa personalidad sa Maglalalang. “Ang kinatibuk-ang panglantaw sa Bibliya, nga gipakita diha sa kataposang bahin sa libro, maoy usa sa kinamaayohan nga akong nabasa,” mao ang kasagarang komento. Wala madugay human sa unang kombensiyon sa New York, T.B.A., laing tawo misulat: “Ang bag-ong luwat nahimong mao ang labing madanihong publikasyon nga inyong gipatik. Ako naikag pag-ayo sa siyentipikanhong mga pamatuod nga adunay usa ka Maglalalang. Ang mugbong sumarya mismo sa Bibliya igo na gayod aron isaysay ang mga puntos nga gipatungha ug sa pagpadako sa tinguha sa pagbasa ug dugang pa.”

Masabtan nga Siyensiya

Ang siyentipikanhong impormasyon sa unang mga kapitulo morag lisod sabton, apan aniay sagad nga mga sanong.

Usa ka lalaki nga taga-Canada misulat: “Pagkalahi gikan sa teknikal nga mga libro kansang mga awtor nagtinguha nga kita makadayeg sa ilang  magarbohong mga pulong. Dayag kaayo ang inyong kinaadman sa paghimo sa mga ulohan bahin sa pisika, kemistriya, DNA, mga kromosom, ubp., nga masabtan namo pag-ayo. Kon kamo pa untay nagsulat sa mga basahon sa unibersidad nga akong gitun-an sa nangaging katuigan!”

Usa ka propesor sa pisika sa unibersidad misulat: “[Kini] tin-awng nagpresentar sa mga isyung nalangkit nga wala masango sa teknikal nga detalye. Ang basahon nangatarongan uban sa magbabasa ug nagkutlo gikan sa daghang pangunang mga siyentipiko. Kini maayong basahon sa tanan nga interesado bahin sa sinugdanan sa uniberso ug kinabuhi, usa man siya ka siyentipiko o usa ka ordinaryong tawo.”

Usa ka batan-ong babaye nga nagtuon sa pagkanars mikomento: “Nakurat ako sa dihang gipakli ang kapitulo 4 ug nabasa ang usa ka kinutlo gikan sa libro nga maoy among gigamit sa klase! Akong gihatag ang libro sa among propesor ug giingnan siya nga ako nasayod nga iyang makaplagang makapadasig ang impormasyon. Akong gipakita kaniya ang panid 54 bahin sa utok. Iya kining gibasa ug miingon, ‘Makaiikag kini! Ako ning susihon.’”

Usa ka membro sa parliamento sa Belgium misulat: “Ang nakapadani ug nakapaikag nako mao ang siyentipikanhong sumaryo nga nagpakita nga ang modernong siyensiya dili diay sukwahi sa panglantaw sa Bibliya bahin sa usa ka Diyos apan, hinunoa, nagauyon niini. Kini maoy usa ka bililhong panglantaw.”

Labaw nga Pagkaila sa Maglalalang

Ang libro nakatabang sa mga tawo sa daghang yuta sa pagkahibalo bahin sa Diyos sa mas maayong paagi ug sa pagbating mas suod kaniya. Usa ka magbabasa sa Fukuoka City, Hapon, miingon: “Morag ang mga lente gisentro pag-ayo ngadto kang Jehova sa unang higayon. Ang libro makapakombinsir gayod. Nakahimo ako sa pagkaila kang Jehova gikan sa punto-de-bista nga wala gayod nako dahoma hangtod karon.” Usa ka taga-El Salvador misulat: “Inyong gipatin-aw pag-ayo kon unsa ka maluluy-on, mapuangoron, mahinay sa pagkasuko, ug dagaya sa mahigugmaong-kalulot ang Diyos. Sa pagkatinuod, mao gayod kini ang among gikinahanglan aron mas masuod kaniya ug sa iyang Anak. Kini ang unang libro nga nagsaysay sa mga pagbati ni Jehova ug sa tawhanong mga pagbati sa iyang Anak, si Jesus.” Ug usa ka magbabasa sa Zambia misanong: “Alang kanako si Jehova aduna nay bug-os bag-ong kahulogan.”

Masabot, ang mga Saksi ni Jehova nadasig sa pagpaambit ngadto sa uban sa Is There a Creator Who Cares About You? Ang usa misulat: “Human nakog basa sa kapitulo 10 [“If the Creator Cares, Why So Much Suffering?”], wala nako mapugngi ang pag-ingon, ‘Mao gyod ning libroha ang among gikinahanglan sa Hapon!’ Gusto nakong itisok sa panumdoman ang materyal niining kapituloha ug gamiton kini diha sa pag-alagad sa kanataran sa dugang pa.” Laing babaye nagtuon sa Bibliya uban sa usa ka batang babaye nga gimatuto diha sa usa ka templo diin ang iyang amahan mao ang pari. “Nalisdan siya sa pagdawat sa ideya nga adunay Maglalalang. Ang pagsaysay niining libroha dili mapugsanon, apan ang mga kamatuoran tin-aw nga mabasa, busa ako nagtuo nga bisan ang mga Budhista makabasa niini sa walay pagpanuko. Kini usab nagpabati kanamo sa dugang pa sa gugma ni Jehova.”

Gikan sa Inglaterra nadawat kining panghunahunaa: “Mao pay akong pagkahuman ug basa sa librong Creator ug hapit na nakong sugdan ang pagbasa niini pag-usab. Pagkatalagsaong basahon! Ang usa mahigugma gayod kang Jehova inigbasa niini. Akong gihatag ang usa sa akong silingan, nga human mabasa ang duha pa lamang ka kapitulo miingon, ‘Dili ako makahunong niini, makapahinam kaayo kini.’ Ako makaseguro nga kini makatabang sa mga tawo aron mahibalo ug mahigugma sa atong Dakong Maglalalang.”

Usa ka lalaki sa Maryland, T.B.A., miingon: “Kini nakapalig-on gayod sa akong espirituwalidad! Ako nagplano sa paghatag ug kopya sa tanang tawo nga akong giserbisyohan. Usahay malisdan ako sa pagsugod ug sangyaw sa maong puliki, edukadong mga tawo. Pinaagi niining libroha ako nang makaplagan ang makapadani, epektibong paagi.”

Dayag, ang librong Is There a Creator Who Cares About You? makahimog positibong epekto sa mga tawo sa tibuok yuta.

[Picture Credit Line sa panid 25]

Letrato sa hapin sa ibabaw, Eagle Nebula: J. Hester ug P. Scowen (AZ State Univ.), NASA