Ang Gahom sa Pag-ampo

Talisalop na ang adlaw sa siyudad sa Nahor sa Tungang Sidlakan. Usa ka Siryanhong lalaking ginganlag Eliezer miabot uban ang panon sa napulo ka kamelyo diha sa atabay sa gawas sa siyudad. Bisag sa walay duhaduha gikapoy ug giuhaw, mas mabalak-on si Eliezer sa mga panginahanglan sa uban. Gikan siya sa usa ka langyaw nga yuta aron mangitag asawa alang sa anak lalaki sa iyang agalon. Dugang pa, kinahanglang mangita siya niining maong asawa taliwala sa kaparyentehan sa iyang agalon. Sa unsang paagi siya molampos niining lisod nga tahas?

NAGTUO si Eliezer sa gahom sa pag-ampo. Uban ang talagsaon, samag-batang pagtuo, iyang gihimo kining mapaubsanong hangyo: “Jehova nga Diyos sa akong agalon nga si Abraham, ipahinabo, palihog, sa akong atubangan niining adlawa ug pakitaig mahigugmaong-kalulot ang akong agalon nga si Abraham. Ania karon ako nahimutang sa usa ka tuboran sa tubig, ug ang mga anak nga babaye sa mga tawo sa siyudad manggula aron sa pagkalos ug tubig. Ang mahitabo gayod mao nga ang batan-ong babaye nga akong sultihan, ‘Ipaubos ang imong banga, palihog, aron ako makainom,’ ug kinsa sa pagkatinuod moingon, ‘Uminom ka, ug paimnon ko usab ang imong mga kamelyo,’ mao kini ang imong itudlo alang sa imong alagad, kang Isaac; ug pinaagi niini ipahibalo kanako nga ikaw nagpakitag maunongong gugma sa akong agalon.”—Genesis 24:12-14.

Wala makawang ang pagsalig ni Eliezer sa gahom sa pag-ampo. Aw, ang una gayong babaye nga miabot sa atabay nahitabo nga mao ang apo nga babaye sa igsoong lalaki ni Abraham! Rebeca ang iyang ngalan, dalaga siya, putli ang moral, ug maanyag. Sa katalagsaon, wala lamang niya paimna si Eliezer apan malulotong mitanyag nga tagbawon ang kauhaw sa tanan niyang mga kamelyo. Sa ulahi, human sa pagkonsulta sa pamilya, daling miuyon si Rebeca nga mokuyog kang Eliezer ngadto sa halayong yuta aron maasawa sa anak ni Abraham nga si Isaac. Pagkatalagsaon ug dayag nga tubag sa pag-ampo ni Eliezer balik sa panahong ang Diyos sa popanahon misalga sa mga hitabo sa milagrosong paagi!

Daghan tag makat-onan sa pag-ampo ni Eliezer. Nagpakita kini sa iyang talagsaong pagtuo, pagpaubos, ug di-hinakog nga kabalaka alang sa mga panginahanglan sa uban. Gipakita usab sa pag-ampo ni Eliezer ang iyang pagpasakop sa paagi ni Jehova sa pagpakiglabot sa katawhan. Sa walay duhaduha nasayod siya sa linaing kalangkitan ni Abraham sa Diyos maingon man sa Iyang saad nga ang umaabot nga mga panalangin modangat sa tanang katawhan pinaagi kang Abraham. (Genesis 12:3) Busa, gisugdan ni Eliezer ang iyang pag-ampo sa mga pulong: “Jehova nga Diyos sa akong agalon nga si Abraham.”

Si Jesu-Kristo mao ang kaliwat ni Abraham nga nahimong galamiton sa pagpanalangin sa tanang masinundanong katawhan. (Genesis 22:18) Kon buot natong matubag ang atong mga pag-ampo karon, kinahanglang atong ipakita ang mapaubsanong pag-ila sa paagi sa Diyos sa pagpakiglabot sa katawhan pinaagi sa iyang Anak. Matod ni  Jesu-Kristo: “Kon kamo magapabilin nga nahiusa kanako ug ang akong mga sulti magapabilin diha kaninyo, pangayo ug bisan unsa nga buot ninyo ug kini matuman alang kaninyo.”—Juan 15:7.

Ang sumusunod ni Kristo nga nakasinati sa pagkatinuod niining mga pulonga ni Jesus mao si apostol Pablo. Ang iyang pagtuo sa gahom sa pag-ampo wala gayod makawang. Gidasig niya ang mga isigka-Kristohanon sa pagtugyan sa ilang tanang mga kabalaka ngadto sa Diyos diha sa pag-ampo ug nagpamatuod: “Sa tanang butang ako adunay kusog tungod kaniya nga nagahatag ug gahom kanako.” (Filipos 4:6, 7, 13) Nagpasabot ba kini nga gihatag ang tanang mainampoong mga hangyo ni Pablo sa Diyos? Atong susihon.

Dili Tanang Hangyo Gihatag

Sa iyang di-hinakog nga ministeryo, giantos ni Pablo ang iyang gihubit nga “tunok sa unod.” (2 Corinto 12:7) Mahimong kadto maoy mental ug emosyonal nga kasakit nga gipahinabo sa mga magsusupak ug sa “bakak nga mga igsoon.” (2 Corinto 11:26; Galacia 2:4) O mahimong kadto maoy kahasol sa lawas tungod sa laygay nga sakit sa mata. (Galacia 4:15) Bisan unsa pa ang kahimtang, kadtong “tunok sa unod” adunay makapaluyang epekto kang Pablo. “Tulo ka higayon ako nangaliyupo sa Ginoo nga unta kini mobiya gikan kanako,” siya misulat. Apan, wala ihatag ang hangyo ni Pablo. Gipasabot si Pablo nga ang espirituwal nga mga kaayohang iya nang nadawat gikan sa Diyos, sama sa gahom sa pagsagubang sa mga pagsulay, igo na. Dugang pa, ang Diyos nag-ingon: “Ang akong gahom ginahimong hingpit diha sa kaluyahon.”—2 Corinto 12:8, 9.

Unsay atong makat-onan sa mga panig-ingnan ni Eliezer ug Pablo? Maminaw gayod si Jehova nga Diyos sa mga pag-ampo niadtong mapaubsanong mangita aron moalagad kaniya. Apan wala kini magpasabot nga kanunay niyang ihatag ang ilang mga hangyo kay ang Diyos may layog-abot nga panglantaw sa mga butang. Mas nasayod siyag maayo kay kanato kon unsay labing maayo alang kanato. Mas hinungdanon, kanunay siyang molihok uyon sa iyang gipahayag nga katuyoan sumala sa natala sa Bibliya.

Panahon sa Espirituwal nga Pagpang-ayo

Nagsaad ang Diyos nga ayohon ang tanang pisikal, mental, ug emosyonal nga mga balatian sa katawhan panahon sa Usa ka Libo ka Tuig nga Pagmando sa iyang Anak ibabaw sa yuta. (Pinadayag 20:1-3; 21:3-5) Mahinamong nagpaabot ang sinserong mga Kristohanon niining gisaad nga umaabot, uban ang bug-os nga pagtuo sa gahom sa Diyos sa pagtuman niana. Bisan tuod wala magdahom sa maong milagrosong pagpang-ayo karon, nagaampo sila sa Diyos alang sa iyang paghupay ug paglig-on aron makasagubang sa mga pagsulay. (Salmo 55:22) Kon sila masakit, mag-ampo usab sila sa giya sa Diyos nga makabaton sa kinamaayohang pagtambal segun sa maarangan sa ilang panalapi.

Gidasig sa ubang mga relihiyon ang masakiton nga mag-ampo aron maayo karon, nga magpunting sa milagrosong mga pagpanambal nga gihimo ni Jesus ug iyang mga apostol. Apan ang maong mga milagro gihimo alang sa linaing katuyoan. Nagpamatuod kadto nga si Jesu-Kristo mao ang tinuod nga Mesiyas ug nagpakita nga ang pag-uyon sa Diyos gibalhin na gikan sa Hudiyohanong nasod ngadto sa bag-ong Kristohanong kongregasyon. Balik niadto, ang milagrosong mga gasa gikinahanglan aron palig-onon ang pagtuo sa bag-ong natukod nga Kristohanong kongregasyon. Sa dihang ang bag-ong kongregasyon nakabarog ug nahingkod na, pagaingnon pa, ang milagrosong mga gasa ‘giwagtang.’—1 Corinto 13:8, 11.

Niining hinungdanong panahon, gitultolan ni Jehova nga Diyos ang iyang mga magsisimba sa mas hinungdanong buluhaton sa espirituwal nga pagpang-ayo. Samtang may panahon pa sila, kinahanglang mosanong dayon ang mga tawo niining pag-awhag: “Pangitaa ninyo si Jehova samtang siya makaplagan pa. Sangpita siya samtang siya anaa pa sa duol. Pabiyaa ang tawong daotan sa iyang dalan, ug ang tawong madaoton sa iyang mga hunahuna; ug pabalika siya kang Jehova, nga maluoy kaniya, ug ngadto sa atong Diyos, kay siya magpasaylo sa madagayaon gayod.”—Isaias 55:6, 7.

Kining espirituwal nga pagpang-ayo sa mahinulsolong mga makasasala ginapalampos pinaagi sa pagsangyaw sa maayong balita sa Gingharian sa Diyos. (Mateo 24:14) Pinaagi sa pagpalig-on sa iyang mga alagad sa pagtuman niining nagaluwas-kinabuhing buluhaton, gitabangan ni Jehova nga Diyos ang milyonmilyong katawhan gikan sa tanang kanasoran sa paghinulsol sa ilang mga sala ug sa pagbaton ug inuyonang relasyon uban kaniya sa dili pa ang kataposan niining daotang sistema. Ang tanang sinserong nagaampo sa maong espirituwal nga pagpang-ayo ug ang tanang nagaampo sa tabang aron sa pagbuhat niining buluhaton sa pagpang-ayo gitubag gayod sa ilang mga pag-ampo.

[Picture Credit Line sa panid 3]

Si Eliezer ug Rebeca/The Doré Bible Illustrations/Dover Publications