Mga Magmamantala sa Gingharian Nagtaho

Ang Ilang Pagtuo Gigantihan

SI APOSTOL Pablo maoy usa ka tawo nga may talagsaong pagtuo, ug gidasig usab niya ang kaubang mga magtutuo sa pag-ugmad ug pagtuo. Siya miingon: “Siya nga nagaduol sa Diyos kinahanglang motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Ang mosunod nga mga eksperyensiya gikan sa Mozambique nagpasundayag kon sa unsang paagi gantihan ni Jehova ang lig-ong pagtuo ug tubagon ang kinasingkasing nga mga pag-ampo.

• Usa ka balo nga sister nga taga-amihanang probinsiya sa Niassa nabalaka kon unsaon niya ug sa iyang unom ka anak sa pagtambong sa “Iya sa Diyos nga Dalan sa Kinabuhi” nga Distritong Kombensiyon. Ang iyang bugtong tuboran sa kita mao ang pagpamaligya diha sa usa ka lokal nga tiyanggihan, apan sa dihang ang petsa sa kombensiyon miabot, siya adunay igong salapi alang lamang sa usa-ka-biyahe nga pamasahe sa tren alang kaniya ug sa iyang pamilya. Bisan pa niana, siya determinado sa pagbutang sa iyang pagsalig sa mga tagana ni Jehova ug mipadayon sa iyang mga plano nga motambong sa kombensiyon.

Siya misakay sa tren uban sa iyang unom ka anak. Panahon sa biyahe ang konduktor miduol kaniya alang sa iyang tiket. Kay nakamatikod sa iyang lapel card, siya nangutana kon unsang matanga sa identipikasyon ang iyang gisul-ob. Ang sister miingon kaniya nga kini ang magpaila kaniya ingong usa ka delegado sa distritong kombensiyon sa mga Saksi ni Jehova. “Asa man ipahigayon kini nga kombensiyon?” nangutana ang konduktor. Human mahibaloi nga ang kombensiyon maoy sa silingang probinsiya sa Nampula, mga 300 kilometros ang gilay-on, sa wala damha ang konduktor misingil sa sister ug katunga lamang sa normal nga presyo sa tiket! Dayon iyang gihatagan ang sister ug ang iyang pamilya ug mga tiket sa pagbalik alang sa nahibiling katunga sa iyang pamasahe. Pagkamalipayon niya nga iyang gibutang ang iyang pagsalig kang Jehova!—Salmo 121:1, 2.

• Sulod sa mga 25 ka tuig, usa ka relihiyoso kaayong babaye nag-ampo sa Diyos nga ipakita kaniya ang hustong paagi sa pagsimba kaniya. Ang simbahan nga iyang gitambongan naghiusa sa relihiyosong mga seremonyas uban sa tradisyonal nga mga rituwal, ug siya nagduhaduha nga kining paagiha sa pagsimba kahimut-anan sa Diyos.

Siya nag-asoy: “Kanunay kong nahinumdoman ang mga pulong ni Jesus nga narekord sa Mateo 7:7: ‘Padayon sa pagpangayo, ug igahatag kini kaninyo; padayon sa pagpangita, ug kamo makakaplag; padayon sa pagpanuktok, ug pagabuksan kini kaninyo.’ Nga anaa sa hunahuna kini nga kasulatan, nag-ampo ako kanunay sa Diyos nga tultolan ako ngadto sa kamatuoran. Usa ka adlaw niana ang pastor sa among simbahan mihangyo sa tanan nga nagtrabaho sa lokal nga tiyanggihan sa pagdala kaniyag tinong kantidad sa salapi uban sa pipila sa ilang mga baligya aron iyang ikahatag ang panalangin kanila. Akong giisip kini nga hangyo nga dili kasulatanhon, busa wala ako magdala ug bisan unsa. Sa dihang nakita sa pastor nga wala ako magdala ug ‘halad,’ siya misugod sa pag-insulto kanako atubangan sa tanang membro sa simbahan. Nianang adlawa akong naamgohan nga dili kini ang paagi nga buot sa Diyos nga siya simbahon, busa ako mibiya sa simbahan. Kasamtangan, ako mapinadayonon sa pag-ampo nga makaplagan ang kamatuoran.

“Sa kataposan, ako nakabatog kaisog ug mikontak sa usa ka paryente nga usa sa mga Saksi ni Jehova. Gihatagan ko niya ug tract, ug sa pagbasa niana akong naamgohan dihadiha nga ang Diyos nagtubag sa akong mga pag-ampo. Ngadtongadto, ang akong puyopuyo misugod usab sa pagpabili sa mga kamatuoran sa Bibliya, ug among gipalegal ang among kaminyoon. Apan, sa ulahi ang akong bana grabeng nasakit. Apan hangtod gayod sa iyang kamatayon, iya kong gidasig nga molahutay diha sa dalan sa kamatuoran aron kami mahimong magkita pag-usab sa Paraiso.

“Ako sa walay kataposan mapasalamaton kang Jehova sa pagtubag sa akong mga pag-ampo ug sa pagpakita kanako sa hustong paagi sa pagsimba kaniya. Ang akong mga pag-ampo gitubag usab sa pagkaagi nga akong nakita ang akong tanang walo ka anak nga nahimong dedikadong mga alagad ni Jehova.”