Kasaysayan sa Kinabuhi

Paghupot sa Kinabuhi nga Yano Aron Makaalagad Kang Jehova

SUMALA SA GIASOY NI CLARA GERBER MOYER

Nagpangedaron na akog 92 anyos ug dili na halos makalakaw, apan aduna gihapon akoy tin-aw, hait nga panumdoman. Mapasalamaton gayod ako nga nakapribilehiyo sa pag-alagad kang Jehova sukad sa pagkabata! Ang pagkinabuhing yano, di-komplikadong kinabuhi nakaamot ug dako nianang bahandia.

NATAWO ako sa Agosto 18, 1907, sa Alliance, Ohio, T.B.A., ang kinamagulangan sa lima ka anak. Sa nagpangedaron na akog otso, usa ka bug-os-panahong ministro sa mga Estudyante sa Bibliya, segun sa pagtawag kaniadto sa mga Saksi ni Jehova, misulod sa among bakahan nga nagbisikleta. Iyang nahimamat ang akong inahan, si Laura Gerber, diha sa pultahan ug gisukna kon nasayod ba siya kon nganong gitugotan ang pagkadaotan. Nahibulong kanunay si Mama bahin niana.

Human konsultaha si Papa, nga didto sa kamalig, miorder si Mama ug hugpong sa unom ka tomo sa Studies in the Scriptures. Iya kining gibasa pag-ayo ug dulot nga natandog gayod sa mga kamatuoran sa Bibliya nga iyang nakat-onan. Gitun-an niya ang Tomo 6, nga The New Creation, ug nakasabot pag-ayo sa panginahanglan sa Kristohanong bawtismo pinaagi sa pagtuslob sa tubig. Kay wala mahibalo kon unsaon pagpangita ang mga Estudyante sa Bibliya, iyang gihangyo si Papa nga bawtismohan siya diha sa gamayng sapa sa bakahan, bisag kadto maoy tugnaw nga bulan sa Marso 1916.

Wala madugay human niana nakita ni Mama ang paanunsiyo sa mantalaan nga nagpahibalo sa pakigpulong sa Daughters of Veterans Hall sa Alliance. Ang pakigpulong nag-ulohang “The Divine Plan of the Ages.” Misanong siya dihadiha, kay ang Tomo 1 sa Studies in the Scriptures samag ulohan sa pakigpulong. Ang karwahe gitaod ug ang tibuok pamilya miadto sa among unang tigom sakay sa kabayo ug karwahe. Gikan niadto mitambong  kami sa mga tigom diha sa mga balay sa mga igsoon sa mga gabii sa Dominggo ug Miyerkoles. Wala madugay human niana, gibawtismohan pag-usab si Mama sa usa ka hawas sa Kristohanong kongregasyon. Si Papa, kinsa puliki kanunay sa pagpamuhig-baka, sa kapulihay naikag sa pagtuon sa Bibliya, ug nabawtismohan siya pipila ka tuig sa ulahi.

Pagpakighimamat Nilang Nagapanguna

Sa Hunyo 10, 1917, si J. F. Rutherford, presidente niadto sa Watch Tower Society, miduaw sa Alliance aron mopakigpulong sa ulohang “Nganong Makiggubat ang mga Nasod?” Nagpangedaron na akog nuybe anyos niadto ug mitambong uban sa akong mga ginikanan ug duha ka igsoong lalaki, si Willie ug Charles. Kami maoy dakong panon sa mga tumatambong nga kapin sa usa ka gatos. Human sa pakigpulong ni Igsoong Rutherford, kadaghanan nilang mitambong nagpaletrato sa gawas sa Columbia Theater, diin gihatag ang iyang pakigpulong. Sa pagkasunod semana, sa mao gihapong dapit, si A. H. Macmillan mihatag ug pakigpulong sa ulohang “Umaabot nga Gingharian sa Diyos.” Usa ka pribilehiyo ang pagduaw niining mga igsoona sa among gamayng lungsod.

Halandomong Unang mga Kombensiyon

Ang unang kombensiyon nga akong gitambongan maoy sa 1918 sa Atwater, Ohio, pipila ka milya gikan sa Alliance. Gisukna ni Mama ang hawas sa Sosyedad didto kon hamtong na ba gayod ako aron mabawtismohan. Gibati kong nakahimo na akog balidong pagpahinungod sa Diyos sa pagbuhat sa iyang kabubut-on, busa gitugotan akong bawtismohan niadtong adlawa sa sapa duol sa lapad nga prutasan sa mansanas. Nag-ilis kog sinina diha sa tolda nga gitukod sa mga igsoon alang sa maong katuyoan ug gibawtismohan nga nagsul-ob ug daan, baga nga sininang pangkatulog.

Sa Septiyembre 1919, ang akong mga ginikanan ug ako misakay sa tren padulong sa Sandusky, Ohio, sa Lake Erie. Didto misakay kamig lansa, ug sa wala madugay, miabot kami sa Cedar Point diin ang among halandomong kombensiyon gihimo. Sa among pagkawas sa sakayan, dihay gamayng kan-anag paniudto sa pantalan. Mipalit kog hamburger, nga alang nako luho na kaayo niadtong mga adlawa. Lami kaayo kadto! Ang kinatas-ang ihap sa tumatambong sa among walo-ka-adlawng kombensiyon maoy 7,000. Walay amplipayr, mao nga kinahanglang maminaw ako pag-ayo.

Niadtong kombensiyona ang kaubang magasin sa The Watch Tower, nga nag-ulohang The Golden Age (karon Pagmata!), giluwatan. Aron makatambong niadtong kombensiyona, mipalta ako sa unang semana sa pag-eskuyla, apan takos kadto. Dapit-bakasyonan ang Cedar Point, ug diha silay mga tigluto sa restawran nga nagdegamog pagkaon alang sa mga delegado. Apan tungod sa pipila ka katarongan, nagwelga ang mga tigluto ug mga silbidora, busa ang Kristohanong mga igsoon nga mahibalong moandam ug pagkaon miabag ug nagdegamog pagkaon alang sa mga delegado. Sa daghang dekada human niana, ang katawhan ni Jehova mao nay nag-andam sa ilang mga pagkaon sa mga asembliya ug mga kombensiyon.

Nakapribilehiyo usab kami sa pagbalik sa Cedar Point sa Septiyembre 1922 alang sa siyam-ka-adlaw nga kombensiyon nga gitambongan sa kinatas-ang ihap nga kapin sa 18,000. Didto kami gidasig ni Igsoong Rutherford nga “imantala, imantala, imantala, ang Hari ug ang iyang gingharian.” Bisan pa niana, ang akong personal nga ministeryo nagsugod pinaagi sa pagpanagtag ug mga tract ug The Golden Age daghang tuig nga sayosayo.

Pagpabili sa Ministeryo

Sayo sa 1918, nakigbahin ako sa pagpanagtag sa tract nga The Fall of Babylon ngadto sa sikbit nga kaumahan. Tungod sa bugnawng klima, among initon ang usa ka humok nga bato diha sa sug-angan sa balay ug dad-on kini sakay sa karwahe aron painitan ang among mga tiil. Nagsul-ob kamig baga nga mga kupo ug mga kalo, kay ang atop ug kilid ra man sa karwahe ang may tabon apan walay heater. Apan kadto maoy malipayong mga panahon.

Sa 1920 ang linaing edisyon sa The Finished Mystery, nga gitawag ZG, giandam nga pormag magasin. a Ang akong mga ginikanan ug ako miadto sa Alliance dala kining publikasyona. Niadtong mga adlawa ang matag usa moadto sa mga pultahan nga mag-inusara, busa mahadlokon akong misaka sa balkon diin naglingkod ang daghang tawo. Human sa akong presentasyon, usa ka babaye miingon: “Di ba maayo ang iyang gihatag nga mubong pakigpulong,” ug gikuha ang publikasyon. Nakapahimutang akog 13 ka ZG niadtong adlawa, ang unang  higayon nga ako mihatag ug taastaas, pormal nga presentasyon sa balaybalay.

Sa diha na ako sa ikasiyam nga grado, napulmonya si Mama ug naglubog sa banig sa kapin sa usa ka bulan. Ang akong kinamanghorang igsoong babaye, si Hazel, masuso pa, busa miundang ako pag-eskuyla aron motabang sa pagpamuhig baka ug pag-atiman sa mga bata. Sa gihapon, dulot nga gituohan sa among pamilya ang kamatuoran sa Bibliya, ug mitambong kami sa tanang mga tigom sa kongregasyon nga regular.

Sa 1928 sa Memoryal sa kamatayon ni Kristo, ang tract nga nag-ulohang “Where Are the Nine?” gihatag ngadto sa tanang nanambong. Nagsaysay kini sa Lucas 17:11-19, diin ang Bibliya nag-ingong usa lamang sa napulo ka nahinloang mga sanlahon ang mapaubsanong nagpasalamat kang Jesus tungod sa milagrosong pagkaayo. Nakatandog kadto sa akong kasingkasing. Gisukna ko ang akong kaugalingon, ‘Unsa ako ka mapasalamaton?’

Sanglit maayo na niadto ang dagan sa panimalay ug ako himsog ug walay kabilinggan, nakahukom ako sa pagbiya sa balay ug pagsulod sa payunir nga pag-alagad, nga maoy pagtawag sa bug-os-panahong ministeryo. Gidasig ako sa akong mga ginikanan sa pagbuhat sa ingon. Busa, ang akong kauban, si Agnes Aleta, ug ako nakadawat sa among asaynment, ug sa Agosto 28, 1928, misakay kami ug tren sa alas 9:00 s.g. Dihay among tagsa ka maleta ug bag aron sudlan sa among literatura sa Bibliya. Sa estasyon, nanghilak ang akong mga igsoong babaye ug akong mga ginikanan, mao man usab kami. Abi nakog di na nako sila makita pag-usab, kay nagtuo kaming duol na ang Armagedon. Sa pagkabuntag, midangat kami sa among asaynment sa Brooksville, Kentucky.

Among giabangan ang gamayng lawak sa boarding house ug mipalit ug mga delatang spaghetti ug naghimo usab ug kaugalingong mga sandwich. Matag adlaw molakaw kami nga lahi ang direksiyon, nga nag-inusarang magsangyaw ug magtanyag sa mga tagbalay ug lima ka libro sa amot nga $1.98. Hinayhinay nga among nakobrehan ang lungsod, nga nahimamat ang daghang tawo nga maikagon kaayo sa Bibliya.

Sa mga tulo ka bulan, among naduaw ang matag usa sa sulod ug palibot sa Brooksville maingon man sa Augusta. Busa mibalhin kami aron kobrehan ang mga lungsod sa Maysville, Paris, ug Richmond. Sa misunod nga tulo ka tuig, gikobrehan namo ang daghang lungsod sa Kentucky diin walay mga kongregasyon. Subsob kaming gitabangan sa mga higala ug mga membro sa pamilya gikan sa Ohio kinsa miabot ug miduyog kanamo sa ministeryo sulod sa usa ka semana o kapin pa sa usa ka higayon.

Ubang Halandomong mga Kombensiyon

Halandomon gayod kaayo ang kombensiyon sa Columbus, Ohio, sa Hulyo 24-30, 1931. Gipahibalo didto nga kami pagailhon sumala sa gipasukad sa Bibliyang ngalan nga mga Saksi ni Jehova. (Isaias 43:12) Una pa niana, inigpangutana sa mga tawo kanamo kon unsay among relihiyon, kami moingon, “Internasyonal nga mga Estudyante sa Bibliya.” Apan wala gyod kana magpaila kanamo sa hustong paagi, kay dihay mga estudyante sa Bibliya nga sakop sa nagkalainlaing ubang relihiyosong mga grupo.

Naminyo ang akong kauban, si Agnes, ug nag-inusara na lang ako; busa nahinam ako sa dihang gipahibalo nga kadtong nangitag kaubang payunir kinahanglang moadto sa usa ka tinong dapit. Didto akong nahimamat si Bertha ug Elsie Garty ug Bessie Ensminger. Duha ang ilang kotse ug nangitag ikaupat nga payunir nga igsoong babaye nga mokuyog kanila. Nagkuyog kami ug biya sa kombensiyon, bisag wala pa kami magkita kaniadto.

Sa ting-init among gikobrehan ang tibuok estado sa Pennsylvania. Dayon, sa tingtugnaw, mihangyo kami ug mga asaynment sa init-init nga mga estado sa habagatan sa North Carolina, Virginia, ug Maryland. Sa tingpamulak mibalik kami sa amihanan. Ingon niana ang paagi sa mga payunir kaniadto. Sa 1934, si John Booth ug Rudolph Abbuhl, nga misunod niining paagiha, nagkuyog kang Ralph Moyer ug sa iyang manghod nga lalaking si Willard ngadto sa Hazard, Kentucky.

Daghang higayon ko nang nahimamat si Ralph, ug mas nagkailhanay kami panahon sa dakong kombensiyon sa Washington, D.C., nga gihimo sa Mayo 30–Hunyo 3, 1935. Nagtupad mi ug lingkod ni Ralph sa balkone sa dihang gipresentar ang pakigpulong bahin sa “dakong pundok,” o “dakong panon.” (Pinadayag 7:9-14) Hangtod niadtong tungora kami nagtuo nga kadtong iya sa dakong pundok maoy mga membro sa langitnong matang nga dili kaayo matinumanon kay sa 144,000. (Pinadayag 14:1-3) Busa dili ko buot nga mahimong usa kanila!

 Sa pagsaysay ni Igsoong Rutherford nga kadtong iya sa dakong pundok maoy yutan-ong matang sa matinumanong mga makalabang-buhi sa Armagedon, daghan ang natingala. Dayon iyang gidapit ang tanang sakop sa dakong pundok nga motindog. Buweno, wala ko motindog, apan mitindog si Ralph. Sa ulahi, mas natin-aw kini sa akong hunahuna, busa ang 1935 mao ang kataposang tuig nga nakig-ambit ako sa simbolikong tinapay ug bino sa Memoryal sa kamatayon ni Kristo. Apan, si Mama nagpadayon sa pag-ambit hangtod sa iyang kamatayon sa Nobyembre 1957.

Permanenteng Kauban

Padayon kaming nagsinulatay ni Ralph. Nag-alagad ako sa Lake Placid, New York, ug siya sa Pennsylvania. Sa 1936 naghimo siyag gamayng treyler nga maguyod niya sa iyang kotse. Iya kining gibalhin gikan sa Pottstown, Pennsylvania, ngadto sa Newark, New Jersey, alang sa kombensiyon nga gihimo didto sa Oktubre 16-18. Human sa programa usa ka gabii niana, daghan kanamong mga payunir miadto aron motan-aw sa bag-ong treyler ni Ralph. Siya ug ako nagtindog sa sulod sa treyler duol sa gamayng giunay-pagkabit nga lababo dihang siya misukna, “Nakaangay ka ba sa treyler?”

Sa dihang ako miyango, siya misukna, “Gusto ka bang mopuyo dinhi?”

“Oo,” ako mitubag, ug malumo niya akong gihagkan nga dili gyod nako malimtan. Pipila ka adlaw sa ulahi, nakakuha kamig lisensiya sa kaminyoon. Sa Oktubre 19, ang adlaw human sa kombensiyon, miadto kami sa Brooklyn ug misuroy sa imprentahan sa Watch Tower Society. Dayon nangayo kamig asaynment nga teritoryo. Si Grant Suiter ang enkargado sa teritoryo, ug nangutana siya kon kinsay mokobre niini. Si Ralph miingon, “Kami kon makasal mi.”

“Kon makabalik mo sa alas 5:00 s.h., amo kining mahikay,” tubag ni Igsoong Suiter. Busa niadtong gabhiona gikasal kami sa puy-anan sa usa ka Saksi sa Brooklyn Heights. Nangaon kami uban sa pipila ka mga higala sa lokal nga restawran ug dayon misakay sa depasaherong sakyanan paingon sa treyler ni Ralph sa Newark, New Jersey.

Wala madugay human niadto, nagpadulong na kami sa Heathsville, Virginia, ang among unang payunir nga asaynment nga magkauban. Among gikobrehan ang Northumberland County ug dayon mibalhin sa mga lungsod sa Fulton ug Franklin sa Pennsylvania. Sa 1939, gidapit si Ralph nga mobuhat sa buluhaton sa sona, usa ka kalihokan nga niana kami molibot pagduaw sa daghang kongregasyon. Nag-alagad kami sa mga kongregasyon sa estado sa Tennessee. Sa pagkasunod tuig, ang among anak lalaki, si Allen, natawo, ug sa 1941 nahunong ang buluhaton sa sona. Dayon naasayn kami sa Marion, Virginia, ingong mga espesyal payunir. Niadtong mga adlawa, nagpasabot kana sa paggugol ug 200 ka oras kada bulan diha sa ministeryo.

Paghimog mga Pagpasibo

Sa 1943, akong nakita nga kinahanglang ihunong ang espesyal payunir nga ministeryo. Ang pagpuyo diha sa gamayng treyler, pag-atiman sa gamayng bata, paghupot ug hinlong mga sinina alang  kanamong tanan, ug paggugol ug 60 ka oras diha sa ministeryo kada bulan mao lamay akong mahimo. Apan nagpadayon si Ralph ingong espesyal payunir.

Mibalik kami sa Alliance, Ohio, sa 1945, gibaligya ang treyler nga maoy among pinuy-anan sulod sa siyam ka tuig, ug miipon pagpuyo didto sa balay sa uma uban sa akong mga ginikanan. Didto, sa atubangan nga balkon, nga ang among anak babaye, si Rebekah, natawo. Mitrabahog inoras si Ralph didto sa lungsod ug nagpadayon ingong regular payunir. Mitrabaho ako sa bakahan ug mibuhat sa akong maarangan aron matabangan siyang makapadayon sa pagpayunir. Bisag gitanyagan kami sa among pamilya ug libreng yuta ug balay, si Ralph mibalibad. Gusto niyang magpabiling walay kabilinggan aron makakab-ot kami sa intereses sa Gingharian nga mas bug-os.

Sa 1950 mibalhin kami sa Pottstown, Pennsylvania, ug miabang ug balay nga $25 ang bulan. Sulod sa misunod nga 30 ka tuig, ang abang misaka lamang sa $75. Gibati namo nga si Jehova mitabang kanamo aron mahuptang yano ang among kinabuhi. (Mateo 6:31-33) Mitrabaho si Ralph ug tulo ka adlaw sa usa ka semana ingong barbero. Nagtuon kami sa Bibliya uban sa among duha ka anak kada semana, nagtambong sa mga tigom sa kongregasyon, ug nagsangyaw sa maayong balita sa Gingharian ingong pamilya. Nag-alagad si Ralph ingong nagadumalang magtatan-aw sa lokal nga kongregasyon. Pinaagi sa paghupot sa among kinabuhi nga yano, nakaarang kami sa pagbuhat ug dako sa pag-alagad kang Jehova.

Pagkamatay sa Akong Minahal nga Kapikas

Sa Mayo 17, 1981, naglingkod kami sa Kingdom Hall, nga naminaw sa pakigpulong publiko. Dili maayo ang gibati ni Ralph, miadto sa likod sa hall, ug misugo ug atendant nga ihatag kanako ang mubong sulat nga nag-ingong mipauli siya sa balay. Dili ingon niana si Ralph mao nga mihangyo akog igsoon nga ihatod dayon ako sa balay. Namatay si Ralph sa grabeng estrok nianang orasa. Pagkatapos sa pagtuon sa Bantayanang Torre nianang buntaga, gipahibalo sa kongregasyon nga siya namatay na.

Niadtong bulana si Ralph nakagugol na ug kapin sa 50 ka oras sa ministeryo. Ang iyang bug-os-panahong karera ingong payunir mikabat ug kapin sa 46 ka tuig. Nakadumala siyag mga pagtuon sa Bibliya sa kapin sa usa ka gatos ka tawo nga sa ngadto-ngadto nahimong bawtismadong mga Saksi ni Jehova. Ang espirituwal nga mga panalangin nga among nadawat takos kaayo sa bisan unsang mga sakripisyo nga among gibuhat latas sa katuigan.

Mapasalamaton Tungod sa Akong mga Pribilehiyo

Sa miaging 18 ka tuig, nag-inusara ako sa pagpuyo, pagtambong sa mga tigom, pagsangyaw sa uban kon maarangan nako, ug pagtuon sa Pulong sa Diyos. Sa pagkakaron ako nagpuyo sa usa ka puy-anan alang sa mga miretiro. Nanag-iya ako ug pipila lamang ka pirasong muwebles ug mipalabing walay telebisyon. Apan tugob ang akong kinabuhi ug dato sa espirituwal. Ang akong mga ginikanan ug akong duha ka igsoong lalaki matinumanon hangtod sa ilang kamatayon, ug ang akong duha ka igsoong babaye nagpadayong matinumanon diha sa dalan sa kamatuoran.

Nalipay ako nga ang akong anak lalaki, si Allen, nag-alagad ingong Kristohanong ansiyano. Daghang tuig na nga nag-instalar siyag mga amplipayr sa Kingdom Hall ug Assembly Hall ug nakig-ambit sa pag-instalar ug amplipayr alang sa mga kombensiyon panahon sa ting-init. Ang iyang asawa maoy maunongong alagad sa Diyos, ug ang ilang duha ka anak lalaki nag-alagad ingong mga ansiyano. Ang akong anak babaye, si Rebekah Karres, nakagugol na ug 35 ka tuig sa bug-os-panahong ministeryo, lakip ang upat ka tuig sa hedkuwarter sa kalibotan sa mga Saksi ni Jehova sa Brooklyn. Siya ug ang iyang bana migugol sa miaging 25 ka tuig sa nagapanawng buluhaton sa nagkalainlaing mga bahin sa Tinipong Bansa.

Matod ni Jesus nga ang Gingharian nahisamag natagong bahandi nga mahimong makaplagan. (Mateo 13:44) Mapasalamaton ako nga nakaplagan sa akong pamilya kanang bahandia daghang tuig na kanhi. Pagkadakong pribilehiyo sa pagpalandong sa kapin sa 80 ka tuig sa dedikadong pag-alagad sa Diyos—nga walay pagbasol! Kon ako pang magamit pag-usab ang akong kinabuhi, ako kining gamiton sa mao gihapong paagi tungod kay, sa tinuoray, ‘ang mahigugmaong kalulot sa Diyos mas maayo pa kay sa kinabuhi mismo.’—Salmo 63:3.

[Footnote]

[Hulagway sa panid 23]

Nakapaminaw kami sa pakigpulong ni Igsoong Rutherford sa 1917 sa Alliance, Ohio

[Hulagway sa panid 23]

Uban kang Ralph atubangan sa treyler nga iyang gihimo

[Hulagway sa panid 24]

Uban sa akong duha ka anak karong adlawa