Pagpangita Kang Jehova Uban ang Andam nga Kasingkasing

ANG Israelinhong saserdote nga si Esdras maoy usa ka talagsaong tigdukiduki, eskolar, tigkopya, ug magtutudlo sa Balaod. Alang sa mga Kristohanon karon siya usab usa ka maayong panig-ingnan sa bug-os-kalag nga pag-alagad. Sa unsang paagi? Sa paagi nga iyang gihuptan ang iyang diyosnong debosyon bisan sa panahong nagpuyo siya sa Babilonya, usa ka siyudad nga napuno sa bakak nga mga diyos ug pagsimba sa demonyo.

Ang diyosnong debosyon ni Esdras dili lamang basta mitungha. Iya kining gihagoan. Sa pagkatinuod, gisultihan kita niya nga siya “nakaandam sa iyang kasingkasing sa pagkonsulta sa balaod ni Jehova ug sa pagbuhat niini.”—Esdras 7:10.

Sama ni Esdras, ang katawhan ni Jehova karon buot nga mohimo sa tanang gihangyo ni Jehova kanila samtang nagkinabuhi sa kalibotan nga masinupakon sa matuod nga pagsimba. Busa atong susihon ang mga paagi nga kita usab makaandam sa atong kasingkasing, ang sulod nga pagkatawo—lakip sa atong mga hunahuna, tinamdan, tinguha, ug mga panukmod—sa “pagkonsulta sa balaod ni Jehova ug sa pagbuhat niini.”

Pag-andam sa Atong Kasingkasing

Ang “pag-andam” nagpasabot ug “pagpangandam ug abante alang sa usa ka katuyoan: pagkondisyon alang sa usa ka partikular nga paggamit, pagpadapat, o pagpahiluna.” Tinuod, kon ikaw nakabaton ug tukmang kahibalo sa Pulong sa Diyos ug nakapahinungod na sa imong kinabuhi ngadto kang Jehova, nan ang imong kasingkasing tino nga anaa sa naandam nga kahimtang ug ikatandi “sa maayong yuta” nga gihisgotan ni Jesus diha sa iyang sambingay bahin sa magpupugas.—Mateo 13:18-23.

Bisan pa niana, ang atong kasingkasing nagkinahanglan ug kanunayng pagtagad ug pag-ugmad. Ngano man? Tungod sa duha ka katarongan. Una, tungod kay ang makadaot nga mga kiling, nga samag mga sagbot diha sa usa ka tanaman, daling makagamot, ilabina sa panahon niining “kataposang mga adlaw” diin ang makadaot nga mga binhi sa unodnong panghunahuna nagdagsang nga labaw pa kay sukad masukad diha “sa hangin” sa sistema ni Satanas. (2 Timoteo 3:1-5; Efeso 2:2) Ang ikaduhang katarongan adunay kalabotan sa yuta mismo. Kon dili atimanon, sa dili madugay ang yuta tingali mouga, mogahi, ug mahimong dili-mabungahon. O basin daghan kaayong tawo ang walay-pagtagad nga maglakawlakaw diha sa tanaman ug tamaktamakan ang yuta hangtod mobagtok. Kaamgid niini ang masambingayong yuta sa atong kasingkasing. Tingali dili na kini mahimong tabunok kon pasagdan o yatakyatakan sa mga tawong walay interes sa atong espirituwal nga kaayohan.

Nan, pagkahinungdanon nga kitang tanan magpadapat sa tambag sa Bibliya: “Labaw sa tanan nga pagaampingan, ampingi ang imong kasingkasing, kay niana naggikan ang mga tuboran sa kinabuhi.”—Proverbio 4:23.

Mga Butang nga Makapatambok sa “Yuta” sa Atong Kasingkasing

Atong tagdon ang pipila ka butang, o mga kinaiya, nga makapatambok sa “yuta” sa atong kasingkasing aron mapasayon ang maayong pagtubo niini. Tinuod, dunay daghang butang nga makapalambo sa atong kasingkasing, apan dinhi atong tagdon ang unom: ang pag-ila sa atong espirituwal nga panginahanglan, pagkamapaubsanon, pagkamatinud-anon, diyosnong kahadlok, pagtuo, ug gugma.

“Malipayon kadtong mahunahunaon sa ilang espirituwal nga panginahanglan,” miingon si Jesus. (Mateo 5:3) Sama sa pisikal nga kagutom nga mopahinumdom kanato sa atong panginahanglan nga mokaon, ang pagkaamgo sa atong espirituwal nga panginahanglan maghimo kanato nga kanunayng gigutom alang sa espirituwal nga pagkaon. Sa kinaiyanhon, ang mga tawo dunay pagpangandoy alang sa maong pagkaon tungod kay kini mohatag ug kahulogan ug katuyoan sa kinabuhi. Ang mga kapit-osan gikan sa sistema sa mga butang ni Satanas o  pagkatapolan kaayong motuon mahimong makapahabol sa atong kaamgohan niining maong panginahanglan. Bisan pa niana, si Jesus miingon: “Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.”—Mateo 4:4.

Sa literal nga paagi, ang regular, timbang, ug maayong mga pagkaon mopalambo sa kahimsog sa lawas, ug motabang usab kini sa lawas nga maugmad ang gana alang sa sunod nga tingkaon inig-abot sa oras. Tinuod usab kini sa espirituwal nga diwa. Ikaw wala tingali mag-isip sa imong kaugalingon ingong mahiligon sa pagtuon, apan kon imong batasanon ang pagbasa sa Pulong sa Diyos adlaw-adlaw ug imong tun-an ang binase-sa-Bibliya nga mga publikasyon sa regular nga paagi, imong makaplagan nga mouswag ang imong gana. Sa pagkatinuod, ikaw mahinamong magpaabot sa mga panahon sa imong pagtuon sa Bibliya. Busa ayawg hunong dayon; paghago aron makaugmad ug maayong espirituwal nga gana.

Pagkamapaubsanon Mopahumok sa Kasingkasing

Ang pagkamapaubsanon usa ka hinungdanong punto sa pagbaton ug naandam nga kasingkasing tungod kay mohimo kini kanato nga daling matudloan ug motabang kanato nga modawat dayon ug mahigugmaong tambag ug pagtul-id. Tagda ang maayong panig-ingnan ni Haring Josias. Sa panahon sa iyang paghari nakaplagan ang usa ka dokumento nga naundan sa Balaod sa Diyos nga gihatag pinaagi kang Moises. Sa dihang nadungog ni Josias ang mga pulong sa Balaod ug naamgohan kon unsa ka layo nga nahitipas ang iyang mga katigulangan gikan sa putli nga pagsimba, iyang gigisi ang iyang mga besti ug mihilak sa atubangan ni Jehova. Nganong natandog pag-ayo sa Pulong sa Diyos ang kasingkasing sa hari? Ang asoy nag-ingon nga “humok” ang iyang kasingkasing, mao nga iyang gipaubos ang iyang kaugalingon sa pagkadungog sa mga pulong ni Jehova. Namatikdan ni Jehova ang mapaubsanon, madinawaton nga kasingkasing ni Josias ug gipanalanginan siya tungod niana.—2 Hari 22:11, 18-20.

Ang pagkamapaubsanon nagpaarang sa “dili-edukado ug ordinaryo” nga mga tinun-an ni Jesus sa pagsabot ug pagpadapat sa espirituwal nga mga kamatuoran nga wala masabti niadtong mga ‘maalamon ug may-kinaadman’ apan sa “paaging unodnon” lamang. (Buhat 4:13; Lucas 10:21; 1 Corinto 1:26) Ang ulahing gihisgotan dili andam sa pagdawat sa pulong ni Jehova tungod kay ang ilang kasingkasing gipagahi sa garbo. Ikatingala ba nga si Jehova nagdumot sa garbo?— Proverbio 8:13; Daniel 5:20.

Pagkamatinud-anon ug Diyosnong Kahadlok

Ang manalagnang si Jeremias misulat nga “ang kasingkasing labaw nga malimbongon kay sa bisan unsang butang ug desperado. Kinsay makatugkad niini?” (Jeremias 17:9) Kining maong pagkamalimbongon mopadayag sa kaugalingon niini sa nagkadaiyang paagi, sama sa dihang kita mohimog mga pasangil para sa atong kaugalingon sa dihang kita makasala. Motungha usab kini sa dihang atong ipakamatarong ang seryosong mga depekto sa personalidad. Apan, ang pagkamatinud-anon motabang kanato nga madaog ang usa ka malimbongong kasingkasing pinaagi sa pag-abag kanato nga atubangon ang kamatuoran bahin sa atong kaugalingon aron kita mouswag. Gipasundayag sa salmista ang ingon nianang pagkamatinud-anon sa dihang siya miampo: “Susiha ako, Oh Jehova, ug ibutang ako sa pagsulay; putlia ang akong mga rinyon ug ang akong kasingkasing.” Tin-aw, giandam sa salmista ang iyang kasingkasing sa pagdawat sa pagputli ug pagsulay ni Jehova, bisan pag nagkahulogan kinig pag-ila sa paglungtad sa hugawng mga kinaiya aron kini mabuntog.—Salmo 17:3; 26:2.

Ang diyosnong kahadlok, nga naglakip sa “pagdumot sa daotan,” maoy usa ka gamhanang tabang niining proseso sa pagputli. (Proverbio 8:13) Bisan tuod nagpabili sa mahigugmaong-kalulot ug pagkamaayo ni Jehova, ang tawong tinuod nga nahadlok kang Jehova kanunayng makaamgo nga si Jehova adunay gahom sa pagpahamtang ug silot, bisan kamatayon, niadtong mosupak kaniya. Gipakita ni Jehova nga kadtong mahadlok kaniya motuman usab kaniya sa dihang misulti siya bahin sa Israel: “Kon ugmaron lang unta nila ang ilang kasingkasing sa pagkahadlok kanako ug sa pagtuman kanunay sa tanan kong kasugoan, aron maayo ang ilang dangatan ug sa ilang mga anak hangtod sa panahong walay tino!”—Deuteronomio 5:29.

Tin-aw, ang tumong sa diyosnong kahadlok maoy, dili aron magpasakop kita tungod kay nalisang, kondili aron mapalihok kita sa pagtuman sa atong mahigugmaong Amahan, kinsa atong nailhan nga interesado gayod sa atong kaayohan. Sa pagkatinuod, ang maong diyosnong kahadlok makapauswag ug makapalipay pa gani, nga sa makadaghan gipasundayag ni Jesu-Kristo mismo.—Isaias 11:3; Lucas 12:5.

Ang Naandam nga Kasingkasing Maoy Dagaya sa Pagtuo

Ang kasingkasing nga may lig-ong pagtuo nahibalo nga bisan unsang ihangyo o itudlo ni Jehova pinaagi sa iyang Pulong kanunayng matarong ug alang  sa atong kaayohan. (Isaias 48:17, 18) Ang tawong may ingon nianang kasingkasing nagbaton ug dulot nga katagbawan ug pagkakontento gumikan sa pagpadapat sa awhag sa Proverbio 3:5, 6, nga nag-ingon: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Apan, ang kasingkasing nga walay pagtuo dili mokiling sa pagsalig kang Jehova, ilabina kon ang pagbuhat niana naglangkit ug mga sakripisyo, sama sa pagpayano sa kinabuhi sa usa aron nga masentro ang pagtagad diha sa mga intereses sa Gingharian. (Mateo 6:33) Adunay maayong katarongan nga si Jehova naglantaw sa usa ka kasingkasing nga walay pagtuo ingong ‘tuman-kadaotan.’—Hebreohanon 3:12.

Ang atong pagtuo kang Jehova mabanaag sa daghang paagi, lakip sa mga butang nga atong himoon sa pribado diha mismo sa atong balay. Tagda, pananglitan, ang prinsipyo sa Galacia 6:7: “Ayaw pahisalaag: Ang Diyos dili usa nga kayagayagaan. Kay bisan unsay ginapugas sa usa ka tawo, kini usab iyang anihon.” Ang atong pagtuo niining prinsipyoha mapabanaag diha sa mga butang sama sa mga pelikula nga atong tan-awon, mga libro nga atong basahon, ang gidaghanon sa pagtuon sa Bibliya nga atong himoon, ug diha sa atong mga pag-ampo. Oo, ang usa ka lig-ong pagtuo nga mopalihok kanato sa pagpugas “alang sa espiritu” maoy usa ka yawing butang sa pagbaton ug kasingkasing nga naandam sa pagdawat sa Pulong ni Jehova ug sa pagtuman niini.—Galacia 6:8.

Gugma—Ang Kinalabwang Hiyas

Labaw pa kay sa tanang ubang mga hiyas, ang gugma mohimo gayod sa yuta sa atong kasingkasing nga masanongon sa Pulong ni Jehova. Busa, sa pagtandi niini sa pagtuo ug paglaom, gihubit ni apostol Pablo ang gugma ingong “kinalabwan niini” nga mga hiyas. (1 Corinto 13:13) Ang kasingkasing nga napunog gugma alang sa Diyos makabaton ug dako kaayong katagbawan ug kalipay tungod sa pagtuman kaniya; dili gayod kini mapikal tungod sa mga kinahanglanon sa Diyos. Si apostol Juan miingon: “Ang paghigugma sa Diyos nagakahulogan niini, nga atong sundon ang iyang mga sugo; ug gani ang iyang mga sugo dili man mabug-at.” (1 Juan 5:3) Bahin sa samang kahimtang, si Jesus miingon: “Kon ang usa nahigugma kanako, siya mosunod sa akong pulong, ug higugmaon siya sa akong Amahan.” (Juan 14:23) Matikdi nga ang ingon niana nga gugma balosan. Oo, gihigugma pag-ayo ni Jehova kadtong mosuod kaniya sa gugma.

Nasayod si Jehova nga kita dili hingpit ug kanunayng makasala batok kaniya. Bisan pa niana, siya wala magpalayo gikan kanato. Ang gipangita ni Jehova sa iyang mga alagad mao ang “usa ka bug-os nga kasingkasing,” usa nga mopalihok kanato sa pag-alagad kaniya nga kinabubut-on uban ang “usa ka mangayaong kalag.” (1 Cronicas 28:9) Siyempre, nahibalo si Jehova nga nagkinahanglan ug panahon ug paningkamot aron atong maugmad ang maayong mga kinaiya diha sa atong kasingkasing ug sa ingon makapatungha sa bunga sa espiritu. (Galacia 5:22, 23) Busa, siya mapailobon kanato, “kay siya nahibalo pag-ayo sa pagkagama kanato, nahinumdom nga kita mga abog.” (Salmo 103:14) Nagpabanaag sa samang tinamdan, si Jesus wala gayod magsaway ug hilabihan sa iyang mga tinun-an tungod sa ilang mga sayop apan mapailobong nagtabang ug nagdasig kanila. Dili ba ang maong gugma, kaluoy, ug pailob ni Jehova ug ni Jesus mopalihok kanimo nga higugmaon pa gayod sila?—Lucas 7:47; 2 Pedro 3:9.

Kon usahay imong makaplagan nga lisod kaayo ang pagluka sa nakagamot pag-ayo, samag sagbot nga mga batasan o ang pagbungkag sa mga tibugol sa gahi, nabagtok nga mga taras, ayaw pagkasubo o pagkaluya. Hinunoa, padayong maningkamot sa pag-uswag samtang ikaw ‘nagalahutay sa pag-ampo,’ nga naglakip ug kanunayng pagpangaliyupo ngadto kang Jehova alang sa iyang espiritu. (Roma 12:12) Pinaagi sa iyang kinabubut-ong tabang, ikaw, sama kang Esdras, magmalamposon sa pagbaton ug kasingkasing nga bug-os nga naandam “sa pagkonsulta sa balaod ni Jehova ug sa pagbuhat niini.”

[Hulagway sa panid 31]

Gihuptan ni Esdras ang iyang diyosnong debosyon bisag didto sa Babilonya

[Picture Credit Line sa panid 29]

Garo Nalbandian