Kon sa Unsang Paagi si Jesu-Kristo Makatabang Kanato

KAHIBULONGAN ang gihimo ni Jesu-Kristo sa pagtabang sa mga tawo sa dinhi pa siya sa yuta. Tinuod gayod kini kay human iasoy ang daghang hitabo sa kinabuhi ni Jesus, ang usa nga nakasaksi miingon: “Sa tinuod, adunay daghang uban pang mga butang usab nga gihimo si Jesus, nga, kon kini sila gikasulat pa sa bug-os nga detalye, sa akong hunahuna, ang kalibotan mismo dili arang makapaigo sa mga basahong-linukot nga masulat.” (Juan 21:25) Sanglit daghan kaayo ang nahimo ni Jesus sa yuta, kita makapangutana: ‘Sa unsang paagi siya mahimong atong magtatabang sa langit? Makabenepisyo ba kita sa malumong pagbati ni Jesus karon?’

Makapadasig ug makapasalig gayod ang tubag. Gisuginlan kita sa Bibliya nga si Kristo misulod “sa langit mismo, aron moatubang karon sa persona sa Diyos alang kanato.” (Hebreohanon 9:24) Unsa ang iyang gibuhat alang kanato? Misaysay si apostol Pablo: “[Si Kristo] misulod, dili, dili pinaagig dugo sa mga kanding ug sa toreyong mga baka, apan pinaagi sa iyang kaugalingong dugo, makausa alang sa tanang panahon ngadto sa balaang dapit [“sa langit mismo”] ug nagbaton ug walay-kataposang kapahigawasan alang kanato.”—Hebreohanon 9:12; 1 Juan 2:2.

Pagkamaayong balita niana! Inay taposon ang kahibulongang buluhaton ni Jesus alang sa mga tawo, ang iyang pagsaka sa langit nakapaarang kaniya sa pagbuhat ug labaw pa alang sa katawhan. Kana tungod kay ang Diyos, sa iyang dakong dili-takos nga kalulot, nagtudlo kang Jesus sa pag-alagad ingong “usa ka publikong alagad”—usa ka hataas nga saserdote—“sa tuong kamot sa trono sa Halangdon didto sa mga langit.”—Hebreohanon 8:1, 2.

“Usa ka Publikong Alagad”

Busa, sa langit si Jesus mahimong publikong alagad alang sa katawhan. Magbuhat siyag buluhaton sama sa gibuhat sa hataas nga saserdote sa Israel alang sa mga magsisimba sa Diyos sa karaang kapanahonan. Ug unsa kanang buluhatona? Si Pablo misaysay: “Ang matag hataas nga saserdote ginatudlo aron motanyag ug mga gasa ug mga halad; tungod niana gikinahanglan niini niya [ang mikayab nga si Jesu-Kristo] usab nga adunay ikatanyag.”—Hebreohanon 8:3.

Dihay ikatanyag si Jesus nga mas labaw pa kay sa gitanyag sa karaang hataas nga saserdote. “Kon ang dugo sa mga kanding ug sa torong mga baka” makadalag sukod sa espirituwal nga kahinlo sa karaang Israel, “unsa pa ka labaw nga ang dugo ni Kristo . . . mohinlo sa atong mga tanlag gikan sa patayng mga buhat aron nga kita makahatag ug sagradong pag-alagad ngadto sa buhing Diyos?”—Hebreohanon 9:13, 14.

Si Jesus maoy usa ka talagsaong publikong alagad, usab, kay gihatagan siyag imortalidad. Sa karaang Israel “daghan ang nahimong mga saserdote nga sunodsunod tungod kay napugngan sa kamatayon nga magpadayon nga ingon.” Apan komosta si Jesus? Si Pablo misulat: “Siya . . . nagahupot sa iyang pagkasaserdote nga walay mga manununod. Tungod niana siya makahimo usab sa pagluwas sa bug-os niadtong moduol sa Diyos pinaagi  kaniya, tungod kay siya buhi man kanunay aron sa pagpangamuyo alang kanila.” (Hebreohanon 7:23-25; Roma 6:9) Oo, sa tuong kamot sa Diyos sa langit kita adunay publikong alagad nga ‘kanunayng buhi sa pagpangamuyo alang kanato.’ Hunahunaa lamang kon unsay kahulogan niana alang kanato karon!

Sa dinhi pa si Jesus sa yuta, mihugop ang mga tawo ngadto kaniya alang sa tabang, ug usahay mipanaw silag layo aron makapahimulos sila sa iyang tabang. (Mateo 4:24, 25) Sa langit, si Jesus daling maduol sa mga tawo sa tanang nasod. Gikan sa iyang bantaaw nga dapit sa langit, siya anaa kanunay ingong publikong alagad.

Unsang Matanga sa Hataas nga Saserdote si Jesus?

Ang paghulagway kang Jesu-Kristo nga natala sa mga asoy sa Ebanghelyo makapatuo kanato sa iyang pagkamatinabangon ug malulotong kahangawa. Pagkadako sa iyang pagsakripisyo sa kaugalingon! Kapin sa usa ka okasyon, ang iyang pribasiya nabalda sa dihang siya ug ang iyang mga tinun-an misulay nga makabaton sa gikinahanglan-kaayong pahulay. Inay mobating nahikawan sa bililhong mga gutlo sa kalinaw ug kahilom, “gitukmod siya sa kaluoy” alang sa mga tawong nangita sa iyang tabang. Bisan kon si Jesus gikapoy, gigutom, ug giuhaw, “gidawat niya sila nga maluloton” ug andam nga ipaulahi ang pagkaon aron makatabang siya sa mahinulsolong mga makasasala.—Marcos 6:31-34; Lucas 9:11-17; Juan 4:4-6, 31-34.

Kay gitukmod sa kaluoy, si Jesus naghimog praktikal nga mga tikang aron tagbawon ang pisikal, emosyonal, ug espirituwal nga mga panginahanglan sa mga tawo. (Mateo 9:35-38; Marcos 6:35-44) Dugang pa, iyang gitudloan sila sa pagpangitag dumalayong tabang ug paghupay. (Juan 4:7-30, 39-42) Pananglitan, pagkamakapadani sa iyang personal nga pagdapit: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag.”—Mateo 11:28, 29.

Dako gayod ang gugma ni Jesus sa mga tawo nga sa kataposan gihatag niya ang iyang kinabuhi alang sa makasasalang katawhan. (Roma 5:6-8) Si apostol Pablo nangatarongan mahitungod niini: “Siya [Jehova nga Diyos] kinsa wala gani magpalingkawas sa iyang kaugalingong Anak apan nagtugyan kaniya alang kanatong tanan, nganong siya dili usab uban kaniya malulotong maghatag kanato sa tanang ubang butang? . . . Si Kristo Jesus mao ang usa nga namatay, oo, ang usa gayod kinsa gibangon gikan sa mga patay, nga anaa sa tuong kamot sa Diyos, kinsa usab nangamuyo alang kanato.”—Roma 8:32-34.

Hataas nga Saserdote nga Makasimpatiya

Ingon nga tawo, si Jesus nakasinatig kagutom, kauhaw, kakapoy, kaguol, kasakit, ug kamatayon. Ang kapit-os ug mga kalisod nga iyang gilahutay nagsangkap kaniya sa talagsaon kaayong paagi sa pag-alagad ingong Hataas nga Saserdote alang sa nagaantos nga katawhan. Si Pablo misulat: “[Si Jesus] obligado nga mahimong sama sa iyang ‘mga igsoon’ sa tanang paagi, aron siya mahimong usa ka maluluy-on ug kasaligang hataas nga saserdote sa mga butang maylabot sa Diyos, aron sa pagtanyag ug pangpasig-uli nga halad alang sa mga sala sa katawhan. Tungod niana nga siya mismo nakaantos sa dihang gibutang sa pagsulay, siya makahimo sa pagbulig niadtong kinsa ginabutang sa mga pagsulay.”—Hebreohanon 2:17, 18; 13:8.

Gipakita ni Jesus nga siya takos ug andam nga motabang sa mga tawo nga mas masuod sa Diyos. Apan, nagpasabot ba kini nga kinahanglang iyang pugson ang usa ka mapintas ug di-maluluy-ong Diyos nga nagadumili sa pagpasaylo? Dili gayod, kay nagpasalig kanato ang Bibliya nga “si Jehova maayo ug andam sa pagpasaylo.” Kini usab nag-ingon: “Kon atong isugid ang atong mga sala, siya kasaligan ug matarong aron sa pagpasaylo kanato sa atong mga sala ug sa paghinlo kanato gikan sa tanang pagkadili-matarong.” (Salmo 86:5; 1 Juan  1:9) Ang tinuod, ang malumong mga pulong ug mga buhat ni Jesus nagsumbalik-silaw sa kalulot, kaluoy, ug gugma sa iyang Amahan.—Juan 5:19; 8:28; 14:9, 10.

Sa unsang paagi hupayon ni Jesus ang mahinulsolong mga makasasala? Pinaagi sa pagtabang kanila nga makaplagan ang kalipay ug katagbawan sa ilang tiunay nga mga paningkamot nga pahimut-an ang Diyos. Sa pagsulat sa isigkadinihogang mga Kristohanon, gisuma ni Pablo ang kahimtang sa pag-ingong: “Busa, kay kita aduna may dakong hataas nga saserdote kinsa nakalatas sa mga langit, si Jesus nga Anak sa Diyos, panguptan nato ang atong pagsugid kaniya. Kay kita adunay ingong hataas nga saserdote, dili usa nga dili makasimpatiya sa atong mga kaluyahon, apan usa nga nasulayan sa tanang paagi sama kanato, hinuon walay sala. Busa, manuol kita uban ang kagawasnon sa pagsulti ngadto sa trono sa dili-takos nga kalulot, aron kita makabaton ug kaluoy ug makakaplag ug dili-takos nga kalulot ingong tabang sa hustong panahon.”—Hebreohanon 4:14-16.

“Tabang sa Hustong Panahon”

Apan, unsay atong mahimo sa dihang atubangon sa mga suliran nga bation natong mas dako pa kay sa atong masagubang—grabeng sakit, makapaluyang palas-anon sa pagkasad-an, sobrang kahigawad, ug depresyon? Atong magamit ang tagana mismo nga kanunayng gisaligan ni Jesus—ang bililhong pribilehiyo sa pag-ampo. Pananglitan, sa gabii una pa niya ihatag ang iyang kinabuhi alang kanato, “siya mipadayon sa pag-ampo nga labi pang matinuoron; ug ang iyang singot nahimong ingon sa mga tulo sa dugo nga nangatagak sa yuta.” (Lucas 22:44) Oo, nasayod si Jesus kon unsay bation kon sinsero gayod nga mag-ampo sa Diyos. Siya “mitanyag ug mga pangamuyo ug usab mga pangaliya ngadto sa Usa kinsa arang makaluwas kaniya gikan sa kamatayon, uban ang makusog nga mga pagtuaw ug mga luha, ug gidungog siya nga may pabor tungod sa iyang diyosnong kahadlok.”—Hebreohanon 5:7.

Nasayod si Jesus kon unsa gayoy kahulogan niana alang sa mga tawo nga ‘dunggon nga may pabor’ ug mapalig-on. (Lucas 22:43) Dugang pa, siya misaad: “Kon kamo mangayo sa Amahan ug bisan unsa kini iyang ihatag kaninyo sa akong ngalan. . . . Pangayo ug kamo makadawat, aron ang inyong kangaya mabug-os.” (Juan 16:23, 24) Busa, masaligon kitang makapangamuyo sa Diyos nga tugotan niya ang iyang Anak nga gamiton ang iyang awtoridad ug ang bili sa iyang halad lukat alang kanato.—Mateo 28:18.

Makaseguro kita nga sa iyang langitnong kapasidad, itagana ni Jesus ang hustong matang sa tabang sa hustong panahon. Pananglitan, kon kita makasala ug sinsero natong basolan, kita mahupayan sa pasalig nga “aduna kitay magtatabang uban sa Amahan, si Jesu-Kristo, usa nga matarong.” (1 Juan 2:1, 2) Ang atong Magtatabang ug Maghuhupay sa langit mangamuyo alang kanato aron  ang atong mga pag-ampo pinaagi sa iyang ngalan ug uyon sa Kasulatan pagatubagon.—Juan 14:13, 14; 1 Juan 5:14, 15.

Pagpakitag Apresasyon sa Tabang ni Kristo

Labaw pa ang nalangkit kay sa pagpangamuyo sa Diyos pinaagi sa iyang Anak. Pinaagi sa bili sa iyang halad lukat, si “Kristo pinaagig pagpalit” nahimong maorag, “tag-iya nga mipalit” sa tawhanong rasa. (Galacia 3:13; 4:5; 2 Pedro 2:1) Atong ikapakita ang atong pasalamat sa tanang nahimo ni Kristo kanato pinaagi sa pag-ila nga siya ang tag-iya kanato ug sa pagsanong nga malipayon sa iyang pagdapit: “Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka adlaw-adlaw ug mosunod kanako nga mapinadayonon.” (Lucas 9:23) Ang ‘pagdumili sa kaugalingon’ dili lamang basta binaba nga pag-ingong lahi na ang nanag-iya kanimo. Kon buot sabton, si Kristo “namatay alang sa tanan aron sila nga nagakinabuhi magkinabuhi dili na alang sa ilang kaugalingon, kundili alang kaniya kinsa namatay alang kanila.” (2 Corinto 5:14, 15) Busa, ang pag-apresyar sa lukat adunay dakong epekto sa atong panglantaw, mga tumong, ug estilo sa kinabuhi. Ang atong walay-kataposang pagkautangan kang “Kristo Jesus, kinsa mihatag sa iyang kaugalingon alang kanato,” angayng magpalihok kanato sa pagkahibalo ug dugang bahin kaniya ug sa iyang mahigugmaong Amahan, si Jehova nga Diyos. Angay usab nga kita gustong motubo sa pagtuo, nga magkinabuhi sumala sa mapuslanong mga sukdanan sa Diyos, ug ‘magmasiboton sa maayong mga buhat.’—Tito 2:13, 14; Juan 17:3.

Ang Kristohanong kongregasyon mao ang galamiton diin kita makadawat ug tukma sa panahong espirituwal nga pagkaon, pagdasig, ug paggiya. (Mateo 24:45-47; Hebreohanon 10:21-25) Pananglitan, kon adunay masakiton sa espirituwal, mahimo nilang ‘ipatawag ang mga tigulang [tinudlong mga ansiyano] sa kongregasyon.’ Si Santiago midugang sa pasalig: “Ug ang pag-ampo sa pagtuo magpaayo sa usa nga nagaluya, ug bangonon siya ni Jehova. Usab, kon siya nakahimo ug mga sala, kini ipasaylo kaniya.”—Santiago 5:13-15.

Sa pag-ilustrar: Usa ka tawong nabilanggo sa Habagatang Aprika misulat sa usa ka ansiyano sa kongregasyon nga nag-apresyar sa “tanang Saksi ni Jehova nga nagatuman sa maayong buhat nga  gisugdan ni Jesu-Kristo sa pagtabang sa mga tawo nga makakab-ot sa Gingharian sa Diyos.” Dayon siya misulat: “Tugob ang akong kalipay sa pagkadawat sa imong sulat. Ang imong kahangawa nga ako matubos sa espirituwal nakatandog pag-ayo kanako. Kini maoy dugang katarongan nga ako mosugod na sa pagsanong sa pagdapit ni Jehova nga Diyos nga maghinulsol. Sulod sa 27 ka tuig ako napandol ug nahitipas sa akong dalan sa kangitngitan sa sala, panglimbong, gidili nga mga kalihokan, imoral nga mga buhat, ug kuwestiyonableng mga relihiyon. Human ako ipailaila ngadto sa mga Saksi ni Jehova, akong gibati nga sa kataposan akong nakaplagan ang dalan—ang hustong dalan! Ang akong buhaton lamang mao ang pagsubay niana.”

Dugang Tabang sa Duol nga Umaabot

Ang nagakadaot nga mga kahimtang sa kalibotan maoy tin-awng pamatuod nga kita nagakinabuhi sa hinungdanong yugto sa panahon sa kasaysayan nga magauna sa “dakong kasakitan.” Karon mismo, usa ka dakong panon gikan sa tanang nasod, tribo, katawhan, ug sinultihan ang ‘naglaba sa ilang taas-nga-bisti ug nagpaputi niini sa dugo sa Kordero.’ (Pinadayag 7:9, 13, 14; 2 Timoteo 3:1-5) Pinaagi sa pagpakitag pagtuo sa halad lukat ni Jesus, nakadawat silag kapasayloan sa ilang mga sala ug ginatabangan aron makabatog suod nga relasyon sa Diyos—sa tinuoray, mahimong iyang mga higala.—Santiago 2:23.

Ang Kordero, si Jesu-Kristo, “magapastol [sa mga makalabang-buhi sa dakong kasakitan] ug magagiya kanila ngadto sa mga tuboran sa mga tubig sa kinabuhi. Ug ang Diyos magapahid sa matag luha gikan sa ilang mga mata.” (Pinadayag 7:17) Dayon bug-os nga tumanon ni Kristo ang iyang mga buluhaton ingong Hataas nga Saserdote. Tabangan unya niya ang tanang higala sa Diyos nga bug-os nga makabenepisyo sa “mga tuboran sa mga tubig sa kinabuhi”—sa espirituwal, pisikal, mental, ug emosyonal nga paagi. Ang gisugdan ni Jesus sa 33 K.P. ug ang iyang gipadayon pagbuhat gikan sa langit sukad niadto matuman na unya sa kabug-osan.

Busa, ayaw gayod paghunong sa pagpakitag dulot nga apresasyon sa tanang gibuhat—ug ginabuhat—sa Diyos ug ni Kristo alang kanato. Si apostol Pablo nag-awhag: “Pagmaya kanunay diha sa Ginoo. . . . Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:4, 6, 7.

Dunay talagsaong paagi nga imong ikapakita ang imong apresasyon kang Jesu-Kristo, ang atong Magtatabang sa langit. Human sa pagsalop sa adlaw sa Miyerkoles, Abril 19, 2000, magtigom ang mga Saksi ni Jehova sa tibuok kalibotan aron saulogon ang Memoryal sa kamatayon ni Kristo. (Lucas 22:19) Kahigayonan unya kini sa pagpalalom sa imong apresasyon sa halad lukat ni Kristo. Ikaw mainitong gidapit nga motambong ug maminaw kon sa unsang paagi ang kahibulongang kahikayan sa Diyos sa kaluwasan pinaagi kang Kristo makabenepisyo kanimo sa walay-kataposan. Palihog pakisusi sa mga Saksi ni Jehova sa inyong dapit bahin sa hustong oras ug dapit niining espesyal nga tigom.

[Hulagway sa panid 7]

Nasayod si Jesus kon unsay bation kon sinserong mag-ampo sa Diyos

[Mga hulagway sa panid 8]

Tabangan kita ni Kristo nga masagubang ang mga suliran nga mas dako pa kay sa atong madumala kon mag-inusara

[Hulagway sa panid 9]

Si Kristo motabang kanato pinaagi sa mahigugmaong mga ansiyano