Usa ka Sulondang Tawo nga Midawat ug Pagtul-id

“ANG mga Buaya sa Zambia Mokaog 30 ka Tawo Kada Bulan.” Mao kini ang taho sa usa ka mantalaan sa Aprika pipila ka tuig kanhi. Sumala sa usa ka zoologo nga nanakop niining maong mga reptilya aron tun-an, “kinahanglag 12 ka tawo aron mapugngan ang usa ka buaya.” Kay may kusgang ikog ug lig-ong mga apapangig, ang buaya maoy usa ka makalilisang nga mananap!

Dayag nga naghisgot sa buaya ingong “Leviathan,” gigamit sa Maglalalang kining “hari sa tanang harianong ihalas nga mga mananap” aron sa pagtudlog usa ka hinungdanong pagtulon-an ngadto sa iyang alagad nga si Job. (Job 41:1, 34) Nahitabo kini mga 3,500 ka tuig kanhi sa yuta sa Uz, malagmit usa ka dapit sa amihanang Arabia. Samtang naghubit niining maong linalang, giingnan sa Diyos si Job: “Walay usa nga mapangahason kaayo aron sa pagtugaw niini. Ug kinsa ang makapabilin sa pagbarog sa akong atubangan?” (Job 41:10) Pagkatinuod! Kon mahadlok kita sa buaya, kita angay nga labawng mahadlok sa pagsulti batok sa Usa nga milalang niini! Gipakita ni Job ang pagpabili alang niining maong pagtulon-an pinaagi sa pagsugid sa iyang sayop.—Job 42:1-6.

Sa dihang hisgotan si Job, mahimong atong mahinumdoman ang iyang matinumanong panig-ingnan sa paglahutay sa pagsulay. (Santiago 5:11) Sa pagkatinuod, si Jehova nahimuot na kang Job bisan niadtong wala pa masulayi pag-ayo ang iyang pagtuo. Sa hunahuna sa Diyos, niadtong panahona “walay usa nga sama kaniya sa yuta, usa ka tawo nga walay ikasaway ug matul-id, mahadlokon sa Diyos ug naglikay sa daotan.” (Job 1:8) Angay kining magpalihok kanato sa pagtuon ug dugang bahin kang Job, tungod kay ang pagbuhat niana makatabang kanato sa pagkahibalo kon sa unsang paagi kita usab makapahimuot sa Diyos.

Giuna ang Relasyon Uban sa Diyos

Adunahan nga tawo si Job. Gawas sa bulawan, siya may 7,000 ka karnero, 3,000 ka kamelyo, 500 ka asno nga baye, 1,000 ka buok baka, ug daghan kaayong sulugoon. (Job 1:3) Apan si Job nagsalig kang Jehova, dili sa mga bahandi. Siya nangatarongan: “Kon ang bulawan gihimo ko nga akong paglaom, o sa bulawan ako miingon, ‘Ikaw mao ang akong pagsalig!’ Kon ako nalipay tungod kay daghan ang akong kabtangan, ug tungod kay ang akong kamot nakakaplag ug daghang butang . . . , kana usab usa ka sayop nga angayng hatagag pagtagad sa mga maghuhukom, kay igalimod  ko unta ang matuod nga Diyos sa itaas.” (Job 31:24-28) Sama kang Job, kinahanglang atong pabilhan ang suod nga relasyon kang Jehova nga Diyos labaw pa kay sa materyal nga mga butang.

Makiangayong Pagpakiglabot sa Isigkatawo

Sa unsang paagi si Job nakiglabot sa iyang mga sulugoon? Ilang nakita nga siya makiangayon ug daling maduol nga gipakita sa mga pulong mismo ni Job: “Kon gihikawan ko sa hustisya ang akong ulipong lalaki o ang akong ulipong babaye sa ilang pakigburoka kanako, nan unsa man unya ang akong mahimo sa dihang motindog ang Diyos? Ug sa dihang siya makighusay, unsay akong ikatubag kaniya?” (Job 31:13, 14) Gipabilhan ni Job ang kaluoy ni Jehova ug busa maluluy-ong nakiglabot sa iyang mga ulipon. Pagkamaayong panig-ingnan, ilabina alang niadtong adunay mga katungdanan sa pagdumala sulod sa Kristohanong kongregasyon! Sila usab kinahanglang walay dapigan, walay pagpihig, ug daling maduol.

Si Job nagpakita usab ug interes niadtong dili membro sa iyang panimalay. Sa pagpakita sa iyang kabalaka sa uban, siya miingon: “Kon gipugngan ko ang mga timawa sa ilang kalipay, ug gipahanap ko ang mga mata sa babayeng balo, . . . kon giwarawara ko ang akong kamot batok sa batang ilo-sa-amahan, sa dihang akong nakita nga gikinahanglan ang akong tabang diha sa ganghaan, matagak unta ang akong pakopako gikan sa abaga niini, ug mabali unta ang akong bukton gikan sa ibabawng bukog niini.” (Job 31:16-22) Hinaot nga magmahunahunaon usab kita sa atong nahibaloang naglisod diha sa kongregasyon.

Tungod sa iyang di-mahakogong interes sa iyang isigkatawo, si Job maabiabihon sa mga estranyo. Busa, siya makaingon: “Sa gawas walay langyawng pumoluyo nga magpalabay sa kagabhion; ang akong mga pultahan gibuksan ko kanunay alang sa alagianan.” (Job 31:32) Pagkamaayong panig-ingnan kini alang sa mga alagad sa Diyos karon! Sa dihang kadtong bag-ong mga interesado sa kamatuoran sa Bibliya motambong sa Kingdom Hall, ang atong maabiabihong pagdawat kanila mahimong makaamot sa ilang espirituwal nga pag-uswag. Siyempre, ang nagapanaw nga mga magtatan-aw ug ubang mga Kristohanon nagkinahanglan usab sa atong mahigugmaong pagkamaabiabihon.—1 Pedro 4:9; 3 Juan 5-8.

May hustong tinamdan si Job bisan sa iyang mga kaaway. Dili siya malipay sa kadaot nga mahimong mahitabo sa usa ka tawong nagdumot kaniya. (Job 31:29, 30) Hinunoa, siya andam nga mobuhat ug maayo ngadto sa maong mga tawo, ingon sa gipakita sa iyang pagkaandam nga moampo alang sa iyang tulo ka mini nga mga maghuhupay.—Job 16:2; 42:8, 9; itandi ang Mateo 5:43-48.

Maputli sa Seksuwal nga Paagi

Si Job maunongon sa iyang asawa, nga wala gayod magtugot sa iyang kasingkasing sa pag-ugmad ug di-angayng pagbati ngadto sa laing babaye. Matod ni Job: “Ako mihimog pakigsaad sa akong mga mata. Nan unsaon ko man pagpakita ug kamatinagdanon sa usa ka ulay? Kon ang akong kasingkasing  nahaylo sa usa ka babaye, ug ako kanunayng nag-atang diha sa ganghaan sa akong isigkatawo, pagalinga ang akong asawa alang sa laing lalaki, ug paludha sa ibabaw niya ang ubang mga lalaki. Kay kana maoy malaw-ayng panggawi, ug usa ka sayop nga angayng hatagag pagtagad sa mga maghuhukom.”—Job 31:1, 9-11.

Wala tugoti ni Job nga daoton sa imoral nga mga tinguha ang iyang kasingkasing. Hinunoa, iyang gitinguha ang usa ka matul-id nga dalan. Dili ikatingala nga si Jehova nga Diyos nahimuot niining matinumanong tawo kinsa nakigbugno batok sa imoral nga mga pangdani!—Mateo 5:27-30.

Nabalaka sa Espirituwalidad sa Pamilya

Usahay, ang mga anak nga lalaki ni Job mag-andam ug mga bangkete diin presente ang tanan niyang mga anak nga lalaki ug babaye. Paglabay niining maong mga adlaw sa bangkete, si Job nabalaka pag-ayo nga basin ang iyang mga anak nakasala sa usa ka paagi batok kang Jehova. Busa milihok si Job, tungod kay ang Kasulatanhong asoy miingon: “Sa dihang ang mga adlaw sa bangkete makalibot na, si Job magpasugo ug magbalaan kanila; ug siya mosayo pagbangon sa pagkabuntag ug motanyag ug mga halad-nga-sinunog sumala sa gidaghanon nilang tanan; kay, si Job miingon, ‘tingali ang akong mga anak nakasala ug nagtunglo sa Diyos diha sa ilang kasingkasing.’” (Job 1:4, 5) Napasiugda gayod diha sa mga membro sa pamilya ni Job ang iyang kabalaka nga sila maghupot ug matahaong kahadlok kang Jehova ug maglakaw diha sa Iyang mga dalan!

Karon, ang Kristohanong mga ulo sa pamilya kinahanglang magtudlo sa ilang mga pamilya sa Pulong sa Diyos, ang Bibliya. (1 Timoteo 5:8) Ug angayan gayod nga iampo ang mga membro sa pamilya.—Roma 12:12.

Nakalahutay nga Matinumanon Ubos sa Pagsulay

Kadaghanang magbabasa sa Bibliya ang pamilyar sa grabeng mga pagsulay nga nahitabo kang Job. Si Satanas nga Yawa miingon nga tunglohon ni Job ang Diyos ubos sa malisod nga mga kahimtang. Gidawat ni Jehova kini nga hagit, ug sa walay langan si Satanas naghimog kadaot kang Job. Nawad-an siya sa tanan niyang kahayopan. Ang daotan pa, siya nag-antos tungod sa pagkamatay sa tanan niyang anak. Wala madugay human niana, si Job gihampak ni Satanas ug grabeng hubag gikan sa ulo hangtod sa tiil.—Job, mga kapitulo 1, 2.

Unsa ang resulta? Sa dihang giawhag siya sa iyang asawa nga tunglohon ang Diyos, si Job miingon: “Ingon sa usa sa mga babayeng walay-buot nga nagasulti, ikaw usab nagasulti. Modawat ba lamang kita sa maayo gikan sa matuod nga Diyos ug dili modawat usab sa daotan?” Ang rekord sa Bibliya midugang: “Niining tanan si Job wala makasala pinaagi sa iyang mga ngabil.” (Job 2:10) Oo, si Job matinumanong nakalahutay ug sa ingon gipamatud-an ang Yawa nga bakakon. Hinaot nga kita sa susama makalahutay sa mga pagsulay ug pamatud-an nga ang nagtukmod kanato sa pag-alagad sa Diyos mao ang putling gugma alang kang Jehova.—Mateo 22:36-38.

Mapaubsanong Midawat ug Pagtul-id

Bisan tuod sulondan si Job sa daghang paagi, dili siya hingpit nga tawo. Siya mismo miingon: “Kinsa ang makapatungha ug mahinlo gikan sa usa nga mahugaw? Walay usa.” (Job 14:4; Roma 5:12) Busa sa dihang miingon ang Diyos nga si Job walay-ikasaway, tinuod kini sa diwa nga siya nakatuman sa tanan nga gidahom sa Diyos sa usa sa iyang dili-hingpit ug makasasala nga tawhanong mga alagad. Pagkadakong tinubdan sa pagdasig!

Nakalahutay si Job sa iyang pagsulay, apan gipadayag niini ang usa ka depekto. Sa pagkadungog sa tanang kadaot nga midangat kaniya, giduaw siya sa tulo ka gitawag konohay nga mga maghuhupay. (Job 2:11-13) Sila miingon nga si Jehova nagsilot kang Job tungod sa pagbuhat ug grabeng kasal-anan. Siyempre, nasakitan si Job tungod niining bakak nga mga akusasyon, ug siya nangusog sa pagtinguha nga makadepensa. Apan nahimo siyang dili-timbang sa paningkamot nga ipakamatarong ang iyang kaugalingon. Ngani, dili-direktang gipahayag ni Job nga mas matarong siya kay sa Diyos!—Job 35:2, 3.

Tungod kay gihigugma sa Diyos si Job, Siya migamit ug usa ka batan-ong lalaki aron itudlo ang sayop ni Job. Ang asoy miingon: “Miinit ang kasuko ni Elihu. Misilaob ang iyang kasuko batok kang Job tungod sa iyang pagpahayag sa iyang kalag nga matarong inay sa Diyos.” Sumala sa namatikdan ni Elihu: “Si Job miingon, ‘Ako husto gayod, apan gipahilayo sa Diyos ang paghukom kanako.’” (Job 32:2; 34:5) Bisan pa niana, wala moduyog si Elihu sa tulo ka “maghuhupay” sa sayop nga panghinapos nga ang Diyos nagsilot kang Job tungod sa iyang mga sala. Hinunoa, si Elihu mipahayag ug pagsalig sa pagkamatinumanon ni Job, ug iyang gitambagan siya: “Ang legal nga kaso anaa sa atubangan [ni Jehova], ug busa angay nga matinguhaon kang  maghulat kaniya.” Sa pagkatinuod, naghulat unta si Job kang Jehova imbes nga madalidaliong misulti sa pagdepensa sa iyang kaugalingon. Gipasaligan ni Elihu si Job: “Ang hustisya ug ang dagayang pagkamatarong dili pagatamayon [sa Diyos].”—Job 35:14; 37:23.

Kinahanglang tul-iron ang panghunahuna ni Job. Busa, gihatagan siyag leksiyon ni Jehova bahin sa pagkagamay sa tawo kon itandi sa pagkadako sa Diyos. Si Jehova naghisgot bahin sa yuta, sa dagat, sa daghag-bituon nga kalangitan, sa mga mananap, ug sa daghang uban pang mga kahibulongan sa kalalangan. Sa kataposan, ang Diyos naghisgot bahin sa Leviathan—ang buaya. Si Job mapainubsanong midawat ug pagbadlong, ug niini siya nagpakita ug dugang pang panig-ingnan.

Bisan pa tingalig maayo ang kahimtang sa atong pag-alagad kang Jehova, kita masayop. Kon seryoso ang usa ka sayop, si Jehova mahimong magtul-id kanato sa usa ka paagi. (Proverbio 3:11, 12) Mahimong atong mahinumdoman ang usa ka teksto nga motulisok sa atong tanlag. Tingali Ang Bantayanang Torre o uban pang publikasyon sa Watch Tower Society mohisgot ug usa ka butang nga makapaamgo kanato sa atong sayop. O hayan malulotong ipaila kanato sa usa ka isigka-Kristohanon nga wala nato ikapadapat ang usa ka prinsipyo sa Bibliya. Unsay atong reaksiyon sa maong pagtul-id? Si Job nagpakitag mahinulsolong espiritu, nga nag-ingon: “Ako naghimog pagbakwi, ug ako naghinulsol sa abog ug sa abo.”—Job 42:6.

Gigantihan ni Jehova

Gigantihan ni Jehova si Job, nga nagtugot sa iyang alagad nga padayong mabuhi sa 140 pa ka tuig. Nianang panahona, nakadawat siyag labaw pa gayod kay sa nawala kaniya. Ug bisan tuod namatay si Job sa ulahi, siya seguradong mabanhaw sa bag-ong kalibotan sa Diyos.—Job 42:12-17; Ezequiel 14:14; Juan 5:28, 29; 2 Pedro 3:13.

Kita usab makaseguro sa pabor ug panalangin sa Diyos kon maunongon kitang moalagad kaniya ug modawat sa tanang binase-sa-Bibliya nga pagtul-id nga modangat kanato. Ingong resulta, atong mabatonan ang seguradong paglaom sa kinabuhi diha sa bag-ong sistema sa mga butang sa Diyos. Labaw sa tanan, atong mapasidunggan ang Diyos. Ang atong matinumanong panggawi pagagantihan ug makadugang sa pamatuod nga ang iyang katawhan nag-alagad kaniya, dili tungod sa mahakogong mga katarongan, kondili tungod sa bug-os-kasingkasing nga gugma. Pagkadako sa atong pribilehiyo nga lipayon ang kasingkasing ni Jehova, sama sa gihimo sa matinumanong si Job, nga mapaubsanong midawat ug pagtul-id!—Proverbio 27:11.

[Mga hulagway sa panid 26]

Si Job nagpakitag mahigugmaong kabalaka sa mga ilo, balo, ug uban pa

[Mga hulagway sa panid 28]

Si Job dagayang gigantihan tungod kay mapaubsanong midawat ug pagtul-id