Sa Unsang Paagi ang Espiritu sa Diyos Nagalihok Karon?

BAKOL siya sukad pa sa tagoangkan sa iyang inahan. Adlaw-adlaw, molingkod siya diha sa ganghaan sa templo nga gitawag ug Matahom aron mangayog mga gasa sa kaluoy gikan niadtong manulod sa templo. Apan, usa ka higayon kining inutil nga makililimos nakadawat ug gasa nga labaw kaayog bili kay sa pipila ka gagmayng mga sensilyo. Giayo siya!—Buhat 3:2-8.

Bisan tuod ang mga apostol nga si Pedro ug Juan mao ang ‘nagpatindog kaniya’ mao nga “ang mga lapalapa sa iyang mga tiil . . . nalig-on,” wala nila angkona ang pasidungog tungod sa maong pagkaayo. Nganong wala? Si Pedro mismo nagpatin-aw: “Mga tawong taga-Israel, nganong kamo nangatingala niini, o nganong kamo nagasud-ong kanamo nga daw pinaagig kaugalingong gahom o diyosnong pagkamahinalaron nga kami nakapalakaw kaniya?” Sa pagkatinuod, si Pedro ug Juan nahibalo nga kadtong butanga nahimo, dili pinaagi sa ilang gahom, kondili pinaagi sa balaang espiritu sa Diyos.—Buhat 3:7-16; 4:29-31.

Niadtong panahona, ang maong “gamhanang mga buhat” gitagana aron ipakita nga ang bag-ong Kristohanong kongregasyon gipaluyohan sa Diyos. (Hebreohanon 2:4) Apan human matuman ang katuyoan niini, kini “wagtangon ra,” nag-ingon si apostol Pablo. a (1 Corinto 13:8) Busa, wala na kitay makita karon diha sa matuod Kristohanong kongregasyon nga bisan unsang gisugo-sa-Diyos nga mga pagpang-ayo, matagnaong mga mensahe, o paghingilin sa mga demonyo.

Apan, nagpasabot ba kini nga ang balaang espiritu sa Diyos wala na maglihok? Wala gayod! Atong tagdon ang pipila ka uban pang mga paagi nga ang espiritu sa Diyos aktibo sa unang siglo ug aktibo sa atong adlaw.

“Ang Espiritu sa Kamatuoran”

Ang usa ka kalihokan sa balaang espiritu sa Diyos mao ang pagpahibalo, paglamdag, pagpadayag sa mga kamatuoran. Sa hapit na siyang mamatay, giingnan ni Jesus ang iyang mga tinun-an: “Daghan pang butang nga akong isulti kaninyo, apan kamo dili pa makadaog pagdala niini sa pagkakaron. Hinunoa, sa dihang kana moabot, ang espiritu sa kamatuoran, siya magagiya kaninyo ngadto sa tanang kamatuoran.”—Juan 16:12, 13.

“Ang espiritu sa kamatuoran” gibubo sa Pentekostes 33 K.P. sa dihang mga 120 ka tinun-an nga nagtigom sa itaas nga lawak sa Jerusalem gibawtismohan sa balaang espiritu. (Buhat 2:1-4) Usa si apostol Pedro niadtong presente nianang tinuig nga kapistahan. Kay napuno sa balaang espiritu, si Pedro “mibarog” ug mibatbat, o mipatin-aw, sa pipila ka kamatuoran bahin kang Jesus. Iyang gisugilon, pananglitan, kon sa unsang paagi si “Jesus nga Nasaretnon” ‘gibayaw ngadto sa tuong kamot sa Diyos.’ (Buhat 2:14, 22, 33) Ang espiritu sa Diyos nagpalihok usab kang Pedro nga maisogong mipahayag ngadto sa iyang Hudiyong mga mamiminaw: “Angayng mahibalo sa tino ang tibuok nga balay sa Israel nga ang Diyos naghimo kaniyang Ginoo ug Kristo, kining maong Jesus nga inyong gilansang.” (Buhat 2:36) Tungod sa dinasig-sa-espiritu nga mensahe ni Pedro, mga tulo ka libong tawo ang “misagop sa iyang pulong nga kinasingkasing” ug nagpabawtismo. Niining paagiha, ang balaang espiritu sa Diyos mitabang sa paggiya kanila ngadto sa kamatuoran.—Buhat 2:37-41.

Ang balaang espiritu sa Diyos nagsilbi usab nga magtutudlo ug tigpahinumdom. Si Jesus nag-ingon: “Ang magtatabang, ang balaang espiritu, nga ipadala sa Amahan sa akong ngalan, kana siya motudlo kaninyo sa tanang butang ug ibalik sa inyong mga panumdoman ang tanang butang nga akong gisulti kaninyo.”—Juan 14:26.

Sa unsang paagi naglihok ang balaang espiritu ingong magtutudlo? Gibuksan sa balaang espiritu ang hunahuna sa mga tinun-an sa mga butang nga nadunggan na nila kanhi kang Jesus apan wala bug-os nga masabti. Pananglitan, ang mga apostoles nasayod nga panahon sa paghusay kaniya, giingnan ni Jesus ang Romanong gobernador sa Judea,  si Poncio Pilato: “Ang akong gingharian dili bahin niining kalibotana.” Bisan pa niana, panahon sa pagkayab ni Jesus sa langit kapin 40 ka adlaw sa ulahi, ang mga apostoles nagbaton gihapon sa sayop nga panglantaw nga ang Gingharian pagatukoron dinhi sa yuta. (Juan 18:36; Buhat 1:6) Dayag, wala makasabot sa bug-os ang mga apostoles sa kahulogan sa mga pulong ni Jesus hangtod nahuman ang pagbubo sa balaang espiritu sa Diyos sa Pentekostes 33 K.P.

Ang espiritu sa Diyos nagsilbi usab nga tigpahinumdom pinaagi sa pagpahinumdom sa lainlaing pagtulon-an ni Jesus. Ang mga tagna mahitungod sa kamatayon ug pagkabanhaw ni Kristo, pananglitan, nakabaton ug bag-ong kahulogan sa tabang sa balaang espiritu. (Mateo 16:21; Juan 12:16) Ang paghinumdom sa mga pagtulon-an ni Jesus nakapaarang sa mga apostoles nga maisogong depensahan ang ilang baroganan atubangan sa mga hari, mahistrado, ug relihiyosong mga lider.—Marcos 13:9-11; Buhat 4:5-20.

Dugang pa, ang balaang espiritu sa Diyos nagtabang sa unang mga Kristohanon nga matultolan ngadto sa mabungahong teritoryo diha sa ministeryo. (Buhat 16:6-10) Ang espiritu sa Diyos nagpalihok usab sa unang mga Kristohanon nga makigbahin sa pagsulat sa Pulong sa Diyos, ang Bibliya, alang sa kaayohan sa tanang katawhan. (2 Timoteo 3:16) Nan, tataw nga ang balaang espiritu aktibo sa nagkadaiyang mga paagi niadtong unang siglo. Wala kini gitagana aron lamang sa paghimog mga milagro.

Balaang Espiritu sa Atong Adlaw

Ang balaang espiritu nagalihok usab alang sa matuod nga mga Kristohanon sa atong adlaw. Nadayag  kini ngadto sa gamayng grupo sa mga estudyante sa Bibliya sa Allegheny, Pennsylvania, T.B.A., sa ulahing bahin sa ika-19ng siglo. Kining matinud-anong mga estudyante sa Bibliya nangandoy nga mahibaloan “ang kamatuoran.”—Juan 8:32; 16:13.

Usa ka membro niining grupoha, si Charles Taze Russell, nag-ingon mahitungod sa iyang pagsusi sa Kasulatanhong kamatuoran: “Nag-ampo ako . . . nga tugotan unta akong wad-on sa akong kasingkasing ug hunahuna ang bisan unsang pagkamapihigon nga mahimong makababag ug nga matultolan sa iyang espiritu ngadto sa hustong pagsabot.” Gipanalanginan sa Diyos ang iyang mapainubsanong pag-ampo.

Samtang si Russell ug ang iyang mga kauban makugihong nagsusi sa Kasulatan, nahimong tin-aw ang pipila ka butang. “Among nakaplagan nga latas sa kasiglohan,” si Russell misaysay, “ang nagkadaiyang mga sekta ug mga pundok nagbahinbahin sa mga doktrina sa Bibliya taliwala nila, nga kapin kon kulang nagsambog niana ug tawhanong pangagpas ug sayop.” Kini misangpot sa iyang gitawag ug “sayop nga pagpahiluna sa kamatuoran.” Sa pagkatinuod, ang Kasulatanhong mga kamatuoran natabonan ilalom sa nagkalainlaing paganong mga pagtulon-an nga nakayuhot sa Kakristiyanohan latas sa kasiglohan. Apan determinado si Russell nga mahibalo ug ipahayag ang kamatuoran.

Pinaagi sa mga panid sa Zion’s Watch Tower and Herald of Christ’s Presence, si Russell ug ang iyang mga kauban maisogong nagsaway sa bakak nga relihiyosong mga doktrina nga nagpaila sa Diyos sa sayop nga paagi. Ilang nasabtan nga—sukwahi sa popular nga relihiyosong opinyon—ang kalag mamatay, nga inigkamatay kita moadto sa lubnganan, ug nga si Jehova mao ang bugtong matuod nga Diyos ug sa ingon dili bahin sa Trinidad.

Apan, imong mahanduraw nga ang maong pagyagyag sa bakak nga mga pagtulon-an nakapasuko sa klero sa Kakristiyanohan. Kay naikag nga magpabilin diha sa ilang dakog-impluwensiyang mga puwesto, daghang Katoliko ug Protestanteng mga klerigo ang nag-organisar ug mga kampanya nga gituyo aron sa pagdaot kang Russell. Apan siya ug ang iyang mga kauban wala mohunong. Sa masaligon, midangop sila sa espiritu sa Diyos alang sa giya. “Ang pasalig sa among Ginoo,” miingon si Russell, “mao nga . . . ang balaang espiritu sa Amahan mao ang among instruktor, nga gipadala tungod ug sa paghangyo ni Jesus nga among Manunubos, Tigpataliwala ug Ulo.” Ug kini nagtudlo gayod! Kining sinserong mga Estudyante sa Bibliya nagpadayon sa pag-inom sa putling mga tubig sa kamatuoran gikan sa Bibliya ug nagmantala niini sa tibuok kalibotan.—Pinadayag 22:17.

Ang modernong-adlaw nga organisasyon sa mga Saksi ni Jehova nagpabiling abtik nga mosanong sa mga pagtultol sa balaang espiritu sa Diyos kapin na sa usa ka siglo karon. Samtang ang espiritu ni Jehova mauswagong nagdan-ag sa ilang espirituwal nga panan-aw, ang mga Saksi andam nga mohimo sa gikinahanglan nga mga pagpasibo aron mopahiuyon sa bag-ong mga pagsabot.—Proverbio 4:18.

“Kamo Mahimong mga Saksi Nako”

Gipaila ni Jesus ang lain pang pagpadayag sa balaang espiritu sa Diyos sa dihang giingnan niya ang iyang mga tinun-an: “Kamo magadawat ug gahom sa dihang ang balaang espiritu moabot nganha kaninyo, ug kamo mahimong mga saksi nako . . . ngadto sa kinalay-ang dapit sa yuta.” (Buhat 1:8) Ang saad ni Jesus nga hatagan ug “gahom” ug “balaang  espiritu” ang iyang mga tinun-an aron matuman ang ilang hinatag-Diyos nga buluhaton ikapadapat gihapon karon.

Ingong usa ka grupo, ang mga Saksi ni Jehova ilado kaayo tungod sa ilang mga kalihokan sa pagsangyaw. (Tan-awa ang kahon.) Sa pagkatinuod, ang mga Saksi ni Jehova nagsulti sa mensahe sa kamatuoran diha sa kapin sa 230 ka kayutaan ug mga grupo sa isla. Ubos sa tanang mahanduraw nga kahimtang, lakip sa pagpameligro sa ilang mga kinabuhi diha sa gidaot-sa-gubat nga mga dapit, maisogon nilang gipatugbaw ang ilang mga tingog ingong pagpaluyo sa Gingharian sa Diyos. Ang ilang kasibot sa Kristohanong ministeryo naghatag ug gamhanang pamatuod nga ang balaang espiritu nagalihok karon. Ug dayag nga gipanalanginan ni Jehova nga Diyos ang ilang mga paningkamot.

Sa miaging tuig, pananglitan, kapin sa usa ka bilyong oras ang gigugol sa pagsangyaw sa maayong balita sa Gingharian sa Diyos. Uban ang unsang resulta? Mga 323,439 ka tawo ang nagpasimbolo sa ilang pagpahinungod sa Diyos pinaagi sa pagpabawtismo sa tubig. Dugang pa, 4,433,884 ka senemanang mga pagtuon sa Bibliya sa balay ang gidumala uban sa bag-ong mga interesado. Tanantanan, 24,607,741 ka libro, 631,162,309 ka magasin, ug 63,495,728 ka brosyur ug mga pulyeto ang gipahiluna. Pagkagamhanang pamatuod sa nagalihok nga espiritu sa Diyos!

Espiritu sa Diyos ug Ikaw

Sa dihang ang usa ka tawo paborableng mosanong sa maayong balita, mopahiuyon sa iyang kinabuhi sa mga sukdanan sa Diyos, ug magpahayag ug pagtuo sa tagana nga lukat, ang dalan mabuksan alang sa usa ka hinlo nga baroganan atubangan sa Diyos. Sa ingon niana nga mga tawo si apostol Pablo misulti: “Ang Diyos . . . nagabutang sa iyang balaang espiritu kaninyo.”—1 Tesalonica 4:7, 8; 1 Corinto 6:9-11.

Ang pagbaton sa espiritu sa Diyos mosangpot sa daghang maayong mga panalangin. Unsang matanga sa mga panalangin? Una, ang dinasig nga Pulong sa Diyos nag-ingon: “Ang bunga sa espiritu mao ang gugma, kangaya, pakigdait, taas-nga-pailob, kalulot, pagkamaayo, pagtuo, kalumo, [ug] pagpugong-sa-kaugalingon.” (Galacia 5:22, 23) Busa, ang balaang espiritu sa Diyos maoy usa ka gamhanang puwersa para sa kaayohan, nga makapaarang sa usa ka tawo sa pagpasundayag ug diyosnong mga hiyas.

Dugang pa, kon imong basahon ang Bibliya ug ipadapat ang imong nakat-onan, ang espiritu sa Diyos makatabang kanimo nga motubo sa kaalam, kahibalo, panabot, paghukom ug katakos sa panghunahuna. Si Haring Solomon nakadawat ug “kaalam ug pagsabot sa hilabihan gayod ug kadako sa kasingkasing” tungod kay gitinguha niya nga pahimut-an ang Diyos inay ang mga tawo. (1 Hari 4:29) Sanglit gihatagan ni Jehova ug balaang espiritu si Solomon, seguradong dili gayod niya ihikaw ang iyang balaang espiritu niadtong nagtinguha sa pagpahimuot kaniya karon.

Ang balaang espiritu sa Diyos motabang usab sa mga Kristohanon sa pagsukol kang Satanas ug sa mga demonyo, niining daotang sistema sa mga butang, ug sa makasasalang mga hilig sa ilang makasasalang unod. Sa unsang paagi posible kana? Si apostol Pablo mitubag: “Sa tanang butang ako adunay kusog tungod kaniya nga nagahatag ug gahom kanako.” (Filipos 4:13) Ang balaang espiritu mahimong dili magwagtang sa mga pagsulay o mga tentasyon; apan, makatabang kini kanimo sa paglahutay niini. Pinaagi sa pagsalig sa balaang espiritu sa Diyos, makadawat kita sa “gahom nga labaw sa kasarangan” aron maatubang ang bisan unsang kalisdanan o kasakit.—2 Corinto 4:7; 1 Corinto 10:13.

Kon imong palandongon ang tanang ebidensiya, walay duhaduha nga ang balaang espiritu sa Diyos nagalihok karon. Ang espiritu ni Jehova nagpabaskog sa iyang mga alagad nga manaksi bahin sa iyang hamiling mga katuyoan. Padayon kining nagpadayag sa mga kidlap sa espirituwal nga kahayag, ug nagpalig-on kini sa atong pagtuo, nga nagtabang kanato nga magpabiling maunongon sa atong Maglalalang. Pagkamapasalamaton nato nga ang Diyos nagtuman sa iyang saad pinaagi sa paghatag sa balaang espiritu ngadto sa iyang matinumanong mga alagad karon!

[Footnote]

[Kahon sa panid 10]

Kon Unsay Gisulti sa Uban Bahin sa mga Saksi ni Jehova

“Samtang ang ubang simbahan mosuhol ug mga eksperto aron sa paghaylo sa mga tawo nga mosimba o makigbisog batok sa modernong-adlaw nga mga isyu sama sa homoseksuwalidad ug aborsiyon, ang mga Saksi dili makigkompromiso sa nag-usab-usab nga kalibotan. Sila sistematiko gihapong nagsangyaw sa tibuok Yuta.”—The Orange County Register sa Orange County, California, T.B.A.

“Kon mahitungod sa pagpakaylap sa tinuohan, dili daghang denominasyon ang ingon ka masiboton . . . sa mga Saksi ni Jehova.”—The Republic sa Columbus, Indiana, T.B.A.

“Sila lamang ang mamalaybalay dala ‘ang maayong balita,’ nga nagpadapat sa mga prinsipyo sa Bibliya.”—Życie Literackie, Polandia.

“Sa kinadak-ang kampanya sa pagsangyaw nga nailhan sukad, ang mga Saksi ni Jehova nagdala sa mensahe ni Jehova sa tibuok yuta.”—News-Observer, Tamaqua, Pennsylvania, T.B.A.

[Mga hulagway sa panid 9]

Ang balaang espiritu sa Diyos nagalamdag kanato sa espirituwal nga paagi,

. . . nagapalambo sa Kristohanong mga hiyas,

. . . ug nagapaluyo kanato sa tibuok-kalibotang buluhatong pagsangyaw