Asa Ka Modangop Alang sa Maayong Tambag?

Ang “industriya sa pagpanambag” nahimo na karong multibilyong-dolyar-kada-tuig nga negosyo. Ang mga tawo nagkinahanglag tabang. Ang propesyonal sa mental nga kahimsog nga si Heinz Lehmann miingon: “[Sa katilingban karon] dunay edukasyonal ug katilingbanong mga kakulangan. Ang relihiyosong mga prinsipyo dili na sama kaniadto. Ang mga pamilya dili na kaayo lig-on . . . , ug busa ang mga tawo wala nay direksiyon.” Ang awtor nga si Eric Maisel nag-ingon: “Kadtong kanhi midangop sa ilang pari nga tambalan sa tribo, pastor o doktor sa pamilya alang sa tabang tungod sa mental, espirituwal ug pisikal nga mga suliran sa pagkakaron naglaom na sa mga libro nga naghatag ug tambag bahin sa personal nga kauswagan nga maoy motagana sa mga solusyon.”

ANG American Psychological Association nagpormag usa ka grupo nga maoy moimbestigar niining nag-uswag nga industriya. Kini nag-ingon nga bisan tuod dunay “dakong posibilidad nga motabang sa mga tawo nga makasabot sa ilang kaugalingon ug sa uban . . . , ang promosyonal nga mga pangangkon ug mga titulo nga nalakip niining mga programaha nag-anam ka hinobra ug ka kulbahinam.” Usa ka magsusulat sa Toronto Star nag-ingon: “Hibaloi nga daghan ang relihiyoso-espirituwal nga mga panglimbong. . . . Pagbantay ilabina sa tanang libro nga naghatag ug tambag bahin sa personal nga kauswagan, mga teyp o mga seminar nga nagtanyag ug daghan ra kaayo, sa mubo ra kaayong panahon, nga gamay ra kaayog himoong paningkamot o pagdisiplina-sa-kaugalingon.” Tinuod, dunay daghan kaayo nga tiunayng nagtinguha sa pagpaluyo niadtong nanginahanglan. Apan, anaa ang makapasubong kamatuoran nga ubay-ubayng walay-prinsipyong mga tawo ang nagpahimulos sa kamingaw ug pag-antos sa mga tawo, nga wala magtaganag tinuod nga tabang o mga solusyon.

Tungod niini, unsa ang hinungdanong tuboran sa tabang nga atong masaligan? Asa kita makakaplag ug praktikal nga tambag nga kanunayng mosaler?

Tuboran sa Dili-Mapakyas nga Giya

Ang ika-19ng-siglong Amerikanong magwawali nga si Henry Ward Beecher miingon: “Ang Bibliya maoy mapa sa Diyos nga mogiya kanimo, mopahilayo kanimo sa pagkalunod, ug mopakita kanimo kon hain ang pantalan, ug kon unsaon pag-abot didto nga dili masangad sa mga bato o kamabwan.” Ang laing tawo miingon bahin sa Bibliya: “Wala gayoy usa nga dili na magkinahanglan sa Kasulatan inigkatigulang na; ang maong basahon mas molapad ug mas molalom samtang kita magkaedaran.” Nganong angay nimong hatagag seryosong konsiderasyon kining tuborana?

Nagrekomendar sa kaugalingon niini, ang Bibliya nag-ingon: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong, aron nga ang tawo sa Diyos mahimong bug-os makasarang, kompleto nga masinangkapan alang sa tanang maayong buhat.” (2 Timoteo 3:16, 17) Ang kaundan sa Bibliya naggikan sa Tuboran mismo sa kinabuhi, si Jehova nga Diyos. (Salmo 36:9) Kay ingon niana, nahibalo gayod siya sa atong pagkahulma, ingon sa gipahinumdom kanato sa Salmo 103:14: “Siya nahibalo sa pagkaumol  nato, nga nahinumdom nga kita mga abog lamang.” Busa, kita bug-os nga makasalig sa kabililhon sa Bibliya.

Sa pagkatinuod, ang Bibliya naundan ug daghang prinsipyo ug mga giya nga mapuslanong ikapadapat sa bisan unsang sirkumstansiya nga imong mahimutangan. Pinaagi niini ang Diyos nag-ingon kanato: “Kini ang dalan. Lakaw diha niana.” (Isaias 30:21) Matagbaw ba gayod sa Bibliya ang mga panginahanglan sa mga tawo karon? Tan-awon nato.

Ang Bibliya Nagtagbaw sa Atong mga Panginahanglan . . .

Sa Pagsagubang sa mga Kabalaka. Ang Bibliya nagtug-an kanato: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Napamatud-an bang epektibo ang pag-ampo sa pagsagubang sa emosyonal nga mga kabalaka nga nalangkit sa kalisod sa ekonomiya, seksuwal ug binaba nga pag-abuso, o sa kamatayon sa usa ka minahal? Tagda ang mosunod nga eksperyensiya.

Si Jackie, human mahibalo nga giamong-amongan ang iyang anak nga babaye, miangkon: “Dili matukib ang pagbati sa pagkasad-an nga walay nahimo sa pagpanalipod sa imong anak. Kinahanglang makigbisog ako sa mga pagbati sa kayugot, kalagot, ug kasuko. Kining mga pagbatia nagsugod pagdaot sa akong kinabuhi. Gikinahanglan ko gayod si Jehova sa pagbantay sa akong kasingkasing.” Human mabasa ug basaha pag-usab ang Filipos 4:6, 7, nanglimbasog siya sa pagpadapat sa tambag niini. “Nag-ampo ako kada adlaw, nga sublisubling naghangyo nga dili nako tugotan ang akong kaugalingon nga madaot sa negatibong mga pagbati, ug si Jehova mitabang kanako sa pagbaton ug kalmado ug malipayon nga kasingkasing. Gibati ko gayod ang kalinaw sa akong kahiladman,” misugilon si Jackie.

Ikaw usab mahimutang tingali sa usa ka kahimtang nga dili nimo makontrolar o masulbad ug dinuyogan sa emosyonal nga mga kabalaka. Pinaagi sa pagsunod sa tambag sa Bibliya nga mag-ampo, makasagubang ka sa epektibong paagi. Ang salmista nagdasig kanato pinaagi niining mga pulonga: “Itugyan kang Jehova ang imong dalan, ug salig kaniya, ug siya mismo molihok.”—Salmo 37:5.

Alang sa Pagdasig. Ang salmista nagpahayag niini nga apresasyon: “Jehova, nahigugma ako sa puloy-anan sa imong balay ug sa dapit diin magpuyo ang imong himaya. Ang akong tiil magatindog gayod sa dapit nga patag; taliwala sa nagkatigom nga mga panon magadayeg ako kang Jehova.” (Salmo 26:8, 12) Gidasig kita diha sa Bibliya sa pagtigom nga regular aron sa pagsimba kang Jehova. Sa unsang paagi kining maong panag-ubanay magtagbaw sa imong mga panginahanglan? Unsay nakaplagan sa uban?

Si Becky misugilon: “Ang akong mga ginikanan wala mag-alagad kang Jehova, busa ila kong lisod-lisoron sa dihang maningkamot ako sa paghimog bisan unsa nga may kalabotan sa pag-alagad sa Diyos. Nagkinahanglag dakong paningkamot aron ako makatambong sa mga tigom.” Gibati ni Becky nga daghang panalangin ang midangat kaniya tungod kay nanglimbasog siya sa pagtambong nga regular sa Kristohanong mga tigom. “Ang mga tigom nagpalig-on sa akong pagtuo, mao nga ako makabarog sa adlaw-adlaw nga mga pagpit-os ingong estudyante, anak, ug alagad ni Jehova. Ang mga tawo sa Kingdom Hall lahi kaayo sa mga estudyante sa eskuylahan! Sila matinagdanon ug matinabangon, ug ang among mga kabildohay kanunayng makapadasig. Sila maoy tinuod nga mga higala.”

Oo, pinaagi sa pagsunod sa pagtultol sa Bibliya sa pagtigom nga regular, atong matugotan si Jehova nga tagbawon ang atong panginahanglan ug pagdasig. Dinhi nato maeksperyensiyahan ang pagkatinuod sa mga pulong sa salmista: “Ang Diyos alang kanamo maoy usa ka dalangpanan ug kalig-on, usa ka tabang nga makaplagan dayon panahon sa mga kalisdanan.”—Salmo 46:1.

Alang sa Makapatagbaw ug Mapuslanon nga Trabaho. “Magmalig-on, dili-matarog, nga kanunay may daghang buhaton diha sa buluhaton sa Ginoo, nga nahibalo nga ang inyong kahago dili kawang may kalabotan sa Ginoo,” nagtambag ang Bibliya. (1 Corinto 15:58) Makapatagbaw ba gayod ang “buluhaton sa Ginoo”? Duna bay mapuslanong butang  nga mapalampos sa Kristohanong ministeryo?

Si Amelia nagpahayag kon unsay iyang gibati: “Nagtuon ako sa Bibliya uban sa magtiayon nga hapit nang magbulag. Gitabangan usab nako ang usa ka babaye kansang anak babaye mapintas nga gipatay. Ang babaye gisakit sa kawalay-katinoan sa kahimtang sa patay. Niining duha ka kahimtang, ang pagpadapat sa mga prinsipyo sa Bibliya nagdalag kalinaw ug paglaom sa ilang kinabuhi. Akong gibati ang dakong kalipay ug katagbawan tungod kay may bahin ako sa pagtabang kanila.” Si Scott miingon: “Kon duna kay maayong eksperyensiya diha sa ministeryo sa kanataran, sa pagsugod ug bag-ong pagtuon sa Bibliya, o medyo milampos diha sa di-pormal nga pagsangyaw, hisgotan nimo kana sa umaabot nga mga tuig. Ang susamang pagbati ug kahinam masinati pag-usab sa matag panahon nga giestorya nimo kini! Naggikan sa ministeryo ang kinadak-an ug dumalayon nga kalipay.”

Tin-aw, ang pagpadapat sa pagtultol sa Bibliya aron mahimong aktibong mga ministro nagtagbaw sa mga panginahanglan niining mga tawhana alang sa makapatagbaw ug mapuslanon nga buluhaton. Ikaw usab gidapit sa pagpakig-ambit niining buluhatona sa pag-edukar sa uban bahin sa mga dalan ug prinsipyo sa Diyos, sa samang higayon makabenepisyo ka usab.—Isaias 48:17; Mateo 28:19, 20.

Pagbatog Kaayohan Gikan sa Pulong sa Diyos

Sa walay duhaduha, ang Bibliya maoy kasaligang tuboran sa praktikal nga mga pagtultol niining kalibotan karon. Aron makabenepisyo niana, kinahanglang manglimbasog kita kanunay. Kinahanglang regular kitang magabasa niana, magatuon niana, ug mamalandong niana. Si Pablo nagtambag: “Hinuktoki kining mga butanga; magpatuhop diha niini, aron ang imong pag-uswag madayag sa tanan nga mga tawo.” (1 Timoteo 4:15; Deuteronomio 11:18-21) Ang Diyos naggarantiya nga kon maningkamot ka sa pagpadapat sa iyang tambag nga makaplagan diha sa Bibliya, ikaw magmalamposon. Siya nagsaad: “Salig kang Jehova . . . Sa tanan mong mga dalan ilha siya, ug siya mismo magatul-id sa imong mga alagianan.”—Proverbio 3:5, 6.

[Mga hulagway sa panid 31]

Ang pagsunod sa tambag sa Bibliya maghimo sa kinabuhi nga makapatagbaw ug tugob