Sugilanon sa Kinabuhi

Gitabangan sa Pagbuntog sa Akong Pagkamaulawon

SUMALA SA GIASOY NI RUTH L. ULRICH

Wala nako kapugngi ang akong kaugalingon ug mihilak ako diha gayod sa bakanan sa balay sa klerigo. Bag-o pa lang siyang misulti ug nagpusotpusot nga bakak nga mga akusasyon batok kang Charles T. Russell, kinsa nag-alagad ingong unang presidente sa Watch Tower Bible and Tract Society. Pasaysaya ko ninyo kon sa unsang paagi ako, nga dalagita pa, nagduaw sa mga tawo.

NATAWO ako diha sa relihiyoso kaayong pamilya sa usa ka umahan sa Nebraska, T.B.A., niadtong 1910. Ang among pamilya duyog nga nagbasa sa Bibliya kada buntag ug gabii human sa pagpangaon. Si Papa mao ang superintendente sa Sunday-school sa Metodistang simbahan sa gamayng lungsod sa Winside, mga sayis kilometros gikan sa among uma. May karwahe kami nga may mga kortina sa mga bentana, mao nga bisan unsa pay klima, makasimba kami sa Dominggo sa buntag.

Sa dihang mga otso anyos ako, ang akong masusong igsoong lalaki nasakit ug polyo, ug gidala siya ni Mama sa usa ka tambalanan sa Iowa aron magpatambal. Bisan pa sa maayong pag-atiman ni Mama, ang akong igsoon namatay samtang didto sila. Apan, sa kasamtangan, didto sa Iowa, nahimamat ni Mama ang usa ka Estudyante sa Bibliya, sumala sa pagtawag kaniadto sa mga Saksi ni Jehova. Makadaghan sila nagkaestorya, ug si Mama mikuyog gani sa maong babaye sa pipila ka tigom sa mga Estudyante sa Bibliya.

Pagpauli ni Mama, nagdala siya ug ubay-ubayng tomo sa Studies in the Scriptures, nga gipatik sa Watch Tower Society. Sa wala madugay nakombinsir siya nga ang mga Estudyante sa Bibliya nagtudlo sa kamatuoran ug nga ang mga pagtulon-an sa pagkadili-mamatay sa tawhanong kalag ug sa walay-kataposang pagsakit sa daotan dili tinuod.—Genesis 2:7; Ecclesiastes 9:5, 10; Ezequiel 18:4.

Apan, nasuko pag-ayo si Papa, ug misupak siya sa mga paningkamot ni Mama sa pagtambong sa mga tigom sa mga Estudyante sa Bibliya. Kanunay ko niyang  ikuyog ug ang akong magulang nga lalaki, si Clarence, sa simbahan. Apan kon si Papa wala sa balay, si Mama magtuon sa Bibliya uban kanamo. Tungod niini, kaming mga bata may maayong kahigayonan sa pagtandi sa mga pagtulon-an sa mga Estudyante sa Bibliya nianang sa among iglesya.

Si Clarence ug ako magtambongan sa Sunday school diha sa simbahan, ug gisukna niya ang magtutudlo ug mga pangutana nga dili matubag sa magtutudlo. Sa pagpauli namo, among gisuginlan ang among inahan, ug mitultol kini sa tagdugayng mga panaghisgot bahin niining mga ulohana. Sa kataposan, mibiya ako sa simbahan ug misugod sa pagtambong sa mga tigom sa mga Estudyante sa Bibliya uban ni Mama, ug wala madugay human niana mao usab kana ang gihimo ni Clarence.

Pagsagubang sa Pagkamaulawon

Sa Septiyembre 1922, si Mama ug ako mitambong sa halandomong kombensiyon sa mga Estudyante sa Bibliya sa Cedar Point, Ohio. Daw makita gihapon nako kadtong dakong bandera nga gibukhad samtang si Joseph F. Rutherford, presidente niadto sa Watch Tower Society, nag-awhag sa kapin sa 18,000 nga nanambong, sa mga pulong diha sa bandera: “Imantala ang Hari ug ang Gingharian.” Natandog ako pag-ayo ug mibati sa pagkadinalian sa pagsulti sa uban bahin sa maayong balita sa Gingharian sa Diyos.—Mateo 6:9, 10; 24:14.

Sa mga kombensiyon nga gihimo gikan sa 1922 ngadto sa 1928, usa ka serye sa mga resolusyon ang gisagop, ug ang mga mensahe gilakip diha sa mga tract nga gipanagtag sa mga Estudyante sa Bibliya nga tinagpulo ka milyon ngadto sa mga tawo sa tibuok kalibotan. Ako niwang ug taas—gitawag nila ako ug irong igpangayam—ug magdalidali ako gikan sa balay ngadto sa balay nga managtag niining pinatik nga mga mensahe. Nalingaw gayod ako niining buluhatona. Apan, ang pagpakigsulti diha sa mga pultahan, nga personal nga mosulti sa uban bahin sa Gingharian sa Diyos, maoy laing kahimtang.

Abi ninyo, maulawon kaayo ko ug mahadlok gani ko sa dihang dapiton ni Mama ang dagkong grupo sa mga paryente kada tuig. Mosulod ko sa akong lawak-katulganan ug magpabilin didto. Usa ka higayon, buot ni Mama nga kuhaag letrato ang tibuok pamilya, ug gipagula ko niya. Kay dili gustong moduyog nila, nagsiyagit ako samtang literal niya akong giguyod gikan sa akong lawak.

Apan, miabot ang adlaw sa dihang determinado akong nagbutang ug pipila ka literatura sa Bibliya  diha sa akong bag. Sublisubli akong miingon, “Dili nako mahimo kini,” apan pagkataudtaod akong giingnan ang akong kaugalingon, “Kinahanglang buhaton ko kini.” Sa kataposan, misangyaw ko. Human niana, nalipay kaayo ko nga nangisog ko sa pagsangyaw. Ang gikalipayan nako pag-ayo mao ang pagtapos sa buluhaton, dili ang aktuwal nga paghimo niana. Maoy niadtong panahona nga akong nahibalag ang klerigo nga gihisgotan sa sinugdan ug milakaw ako nga naghilak. Sa paglabay sa panahon, sa tabang ni Jehova nakahimo ako sa pagpakigsulti sa mga tawo diha sa ilang mga pultahan, ug miuswag ang akong kalipay. Dayon, sa 1925, akong gipasimbolohan ang akong pagpahinungod kang Jehova pinaagi sa pagpabawtismo sa tubig.

Pagsugod sa Bug-os-Panahong Ministeryo

Sa dihang ako 18 anyos, akong gipalit ug kotse ang kuwarta nga akong napanunod sa usa ka iyaan ug misugod pagpayunir, ingon sa pagtawag sa bug-os-panahong ministeryo. Duha ka tuig sa ulahi, sa 1930, usa ka kauban ug ako midawat sa usa ka asaynment sa pagsangyaw. Niadtong tungora si Clarence nagsugod usab pagpayunir. Wala madugay human niadto gidawat niya ang pagdapit nga mag-alagad sa Bethel, ang tibuok-kalibotang hedkuwarter sa mga Saksi ni Jehova sa Brooklyn, New York.

Nianang panahona nagbulag ang among mga ginikanan, busa si Mama ug ako nagpahimog balay nga treyler ug nagsugod pagpayunir nga magkauban. Niadtong panahona nga ang Dakong Depresyon nahitabo sa Tinipong Bansa. Ang pagpadayon sa buluhatong pagpayunir nahimong dakong suliran, apan determinado kaming dili moundang. Pabayloan namo ang literatura sa Bibliya ug mga manok, itlog, ug abot sa tanaman, maingon man sa mga butang sama sa karaang mga baterya ug linabay nga aluminum. Ang naulahi among ibaligya aron ikapalit ug gasolina alang sa kotse ug aron mabayran ang ubang mga galastohan. Nakakat-on usab ako sa paggrasa sa kotse ug pag-ilis sa aseite aron makadaginot sa kuwarta. Among nakita nga si Jehova, sumala sa iyang saad, nag-abli sa dalan sa pagtabang kanamo sa pagbuntog sa mga babag.—Mateo 6:33.

Pag-adto sa mga Misyonaryong Asaynment

Sa 1946, gidapit ako sa pagtambong sa ikapitong klase sa Watchtower Bible School of Gilead, nga nahimutang duol sa South Lansing, New York. Niadtong tungora si Mama ug ako kaubang nagpayunir sulod na sa kapin sa 15 ka tuig, bisan pa niana dili niya buot nga pugngan ang akong kahigayonan nga makadawat ug pagbansay alang sa misyonaryong buluhaton. Busa gidasig niya ako sa pagdawat sa pribilehiyo nga motambong sa Tunghaang Gilead. Human sa graduwasyon, nahimong kauban nako si Martha Hess nga taga-Peoria, Illinois. Kami, duyog sa duha pa, giasayn sa Cleveland, Ohio, sa usa ka tuig samtang naghulat kami sa usa ka asaynment sa langyawng nasod.

Kanang maong asaynment miabot sa 1947. Si Martha ug ako giasayn sa Hawaii. Sanglit sayon ra ang pagsulod niining mga islaha, si Mama miadto ug mipuyo duol namo sa siyudad sa Honolulu. Nag-anam siyag kahugo, busa duyog sa pag-atiman sa akong misyonaryong mga kalihokan, akong gitabangan si Mama. Nakaatiman ako niya hangtod nga namatay siya sa Hawaii niadtong 1956, sa edad nga 77 anyos. Pag-abot namo, dihay mga 130 ka Saksi sa Hawaii, apan sa pagkamatay ni Mama, dihay kapin sa usa ka libo, ug ang mga misyonaryo wala na kinahanglana.

Unya si Martha ug ako nakadawat ug sulat gikan sa Watch Tower Society nga nagtanyag kanamo ug usa ka asaynment sa Hapon. Ang among unang gikabalak-an mao nga sa among edad makakat-on pa ba kaha kami sa pagsultig Hinapon. Niadtong panahona 48 anyos ako, ug si Martha manghod lang nakog upat ka tuig. Apan gisalig namo ang maong butang kang Jehova ug gidawat ang asaynment.

Human gayod sa 1958 nga internasyonal nga kombensiyon sa Yankee Stadium ug Polo Grounds sa New York City, misakay kamig barko paingon sa Tokyo. Gibagyo kami samtang nagsingabot sa pantalan sa Yokohama, diin gisugat kami ni Don ug  Mabel Haslett, Lloyd ug Melba Barry, ug sa ubang mga misyonaryo. Nianang panahona, diha lamay 1,124 ka Saksi sa Hapon.

Dihadiha nagsugod kami pagtuon ug Hinapon ug pagpakigbahin sa pultahan-sa-pultahan nga ministeryo. Ginamit ang Ingles nga alpabeto, among gisulat ang among Hinapon nga mga presentasyon, nga among basahon. Sa pagtubag ang mga tagbalay moingong, “Yoroshii desu” o, “Kekko desu,” nga among nahibaloan nga nagkahulogang, “Maayo.” Apan dili namo kanunayng mahibaloan kon ang tagbalay interesado ba o dili, sanglit kanang mga pulonga gigamit usab sa pagdumili. Ang kahulogan nagdepende sa tingog o sa panagway sa tawo. Dugaydugay pa una namo mahibaloi ang pagsabot niini.

Mga Eksperyensiya nga Nakapadasig Kanako

Naglisod pa sa pinulongan, miduaw ako sa usa ka dormitoryo sa Kompaniya sa Mitsubishi usa ka adlaw niana ug nahimamat ang usa ka 20-anyos nga babaye. Miuswag ang iyang kahibalo sa Bibliya ug nabawtismohan sa 1966. Usa ka tuig sa ulahi nagsugod siya pagpayunir ug sa wala madugay human niadto gitudlo ingong espesyal payunir. Nag-alagad siya nga ingon niana sukad niadto. Inspirasyon gayod alang kanako ang pagkakita kon sa unsang paagi gigamit niya ang iyang panahon ug kusog sukad sa pagkabatan-on padayon diha sa bug-os-panahong ministeryo.

Ang pagbarog dapig sa kamatuoran sa Bibliya maoy dako kaayong hagit ilabina sa mga tawo nga nagpuyo diha sa dili-Kristohanong katilingban. Bisan pa niana, libolibo ang nakasagubang niining hagita, lakip ang ubay-ubay niadtong akong gitun-an sa Bibliya. Gidispatsar nila ang ilang mahalong Budhistang mga altar ug Shinto nga mga altar nga kasagarang makaplagan diha sa mga balay sa mga Hapones. Sanglit masaypan usahay sa mga paryente ang maong mga lihok ingong kawalay-pagtahod sa namatayng mga katigulangan, nagkinahanglag  kaisog alang sa mga bag-ohan ang pagbuhat niini. Ang ilang maisogong paglihok magpahinumdom niadtong unang mga Kristohanon kinsa nagdispatsar sa mga butang nga nalangkit sa bakak nga pagsimba.—Buhat 19:18-20.

Nahinumdoman nako ang usa ka estudyante sa Bibliya, usa ka asawa, kinsa nagplanong mobiya sa Tokyo uban sa iyang pamilya. Gusto niyang mobalhin sa usa ka bag-ong balay nga walay mga butang nga nalangkit sa paganong pagsimba. Busa giingnan niya ang iyang bana sa iyang kagustohan, ug andam siyang mikooperar. Malipayon siyang misugilon nako bahin niana apan unya nahinumdom nga may naempake siyang usa ka dako, mahalon nga marmol nga plorera nga iyang gipalit tungod kay matod pa magseguro kini nga magmalipayon ang panimalay. Sanglit nagduda siya nga nalangkit kini sa bakak nga pagsimba, gimartilyo niya ang plorera ug gilabay kini.

Ang pagkakita niining babayhana ug sa uban pa nga andam nga molabay sa mahalong mga butang nga nalangkit sa bakak nga pagsimba ug maisogong nagsugod ug bag-ong kinabuhi sa pag-alagad kang Jehova maoy usa ka magantihon, makapatagbaw kaayo nga eksperyensiya alang kanako. Kanunay nakong pasalamatan si Jehova nga nakapahimulos ako ug kapin sa 40 ka tuig sa misyonaryong pag-alagad sa Hapon.

Modernong-Adlaw nga “mga Milagro”

Sa dihang handomon nako ang akong kapin sa 70 ka tuig sa bug-os-panahong pag-alagad, mahibulong ako sa morag modernong-adlawng mga milagro alang kanako. Ingong usa ka batan-on nga maulawon, wala gayod ako maghunahuna nga magugol nako ang akong tibuok kinabuhi nga maoy mouna pagsulti sa mga tawo bahin sa Gingharian ug nga kadaghanan dili gustong mamati niana. Apan, dili lang kay nahimo nako kana kondili nakita usab nako ang gatosan, kon dili linibo, nga uban pa nga nagbuhat sa ingon. Ug nabuhat nila kana nga epektibo kaayo nga ang kapin lag diyutay sa usa ka libo ka Saksi nga dinhi sa Hapon sa akong pag-abot sa 1958 miuswag ngadto sa kapin sa 222,000 karon!

Sa unang pag-abot namo ni Martha sa Hapon, giasayn kami nga mopuyo sa sangang buhatan sa  Tokyo. Sa 1963 usa ka bag-o, unom-ka-andana nga pasilidad sa sanga ang gitukod sa maong dapit, ug kami nagpuyo didto sukad niadto. Sa Nobyembre 1963 apil kami sa 163 nga mitambong sa pakigpulong sa pagpahinungod nga gipahayag sa among magtatan-aw sa sanga, si Lloyd Barry. Niadtong tungora nakaabot na kami ug 3,000 ka Saksi sa Hapon.

Makalilipay nga makita ang buluhatong pagsangyaw sa Gingharian nga miuswag pag-ayo, nga nakaabot ug kapin sa 14,000 sa 1972 sa dihang usa ka bag-ong gipadak-ang sangang buhatan ang nahuman sa siyudad sa Numazu. Apan sa 1982 dihay kapin sa 68,000 ka magmamantala sa Gingharian sa Hapon, ug usa ka mas dako nga pasilidad sa sangang buhatan ang gitukod sa siyudad sa Ebina, mga 80 kilometros gikan sa Tokyo.

Kasamtangan, ang kanhing tinukod sa sangang buhatan sa kinapusoran sa Tokyo gibag-o. Ngadtongadto, nagsilbi kining puy-anan sa kapin sa 20 ka misyonaryo nga nag-alagad sa Hapon sulod sa 40 o 50 ka tuig o mas dugay pa, lakip nako ug sa akong dugay nang kauban, si Martha Hess. Usa ka doktor ug iyang asawa, nga usa ka nars, ang nagpuyo usab sa among puy-anan. Sila nag-amoma kanamo, nga mahigugmaong nag-atiman sa among panglawas. Di pa dugay, laing nars ang gidugang sa kawani, ug ang Kristohanong mga igsoong babaye moanhi ingong mga katabang sa nars sa maadlaw. Duha ka membro sa pamilyang Bethel sa Ebina ang magpulipulig anhi aron magluto ug pagkaon ug manglimpiyo sa among puy-anan. Sa pagkatinuod, si Jehova maayo kaayo namo.—Salmo 34:8, 10.

Usa ka halandomong yugto sa akong misyonaryong kinabuhi nahitabo niadtong Nobyembre, 36 ka tuig human sa pagpahinungod sa tinukod nga niana daghan kanamo nga dugay nang mga misyonaryo nagpuyo karon. Sa Nobyembre 13, 1999, nalakip ako sa 4,486, apil na ang gatosan ka dugay nang mga Saksi gikan sa 37 ka nasod, nga nanambong sa pagpahinungod sa gipadak-ang mga pasilidad sa Hapon nga sangang buhatan sa Watch Tower Bible and Tract Society sa Ebina. Sa pagkakaron, dunay mga 650 ka membro nianang pamilyaha sa sangang buhatan.

Sa duolan sa 80 ka tuig sukad ako maulawong misugod sa pagpamalaybalay nga naghatod ug mga mensahe sa Bibliya, si Jehova maoy makapalig-ong tabang alang kanako. Gitabangan niya ako sa pagbuntog sa akong pagkamaulawon. Hugot ang akong pagtuo nga mahimong gamiton ni Jehova si bisan kinsa nga nagasalig kaniya, bisan kadtong hilabihan ka maulawon sama kanako. Ug pagkamakapatagbawng kinabuhi ang akong nasinati sa pagpakigsulti sa mga estranyo bahin sa atong Diyos, si Jehova!

[Hulagway sa panid 21]

Uban kang Mama ug Clarence, kinsa miduaw kanamo gikan sa Bethel

[Hulagway sa panid 23]

Mga membro sa among klase nga nagtuon diha sa lagwerta sa Tunghaang Gilead duol sa South Lansing, New York

[Hulagway sa panid 23]

Wala: Ako, si Martha Hess, ug akong inahan, sa Hawaii

[Hulagway sa panid 24]

Tuo: Mga membro sa among misyonaryong puy-anan sa Tokyo

[Hulagway sa panid 24]

Ubos: Uban sa dugay na nakong kauban, si Martha Hess

[Hulagway sa panid 25]

Ang among gipadak-ang mga pasilidad sa sangang buhatan sa Ebina gipahinungod niadtong Nobyembre