Nganong Angay Kang Mag-ampo?

‘KAMO nagapangayo, apan kamo wala makadawat, tungod kay nagapangayo man kamo sa sayop nga katuyoan . . . Duol sa Diyos, ug siya moduol kaninyo.’ (Santiago 4:3, 8) Kining mga pulonga sa tinun-an ni Jesus nga si Santiago makaaghat kanato sa pagpalandong sa atong mga katarongan sa pag-ampo.

Ang pag-ampo dili kay usa lamang ka paagi sa pagsugid sa Diyos sa atong gikinahanglan. Diha sa iyang gibantog nga Wali sa Bukid, si Jesus miingon: ‘Ang inyong Amahan nahibalo sa mga butang nga inyong gikinahanglan sa wala pa gani kamo mangayo kaniya.’ Apan, si Jesus miingon usab: ‘Padayon sa pagpangayo, ug kini igahatag kaninyo.’ (Mateo 6:8; 7:7) Busa buot ni Jehova nga atong sultihan siya kon unsay atong gihunahuna nga atong gikinahanglan. Apan labaw pa ang pag-ampo kay niana.

Ang tinuod nga mga higala dili makigkomunikar sa panahon lamang nga sila dunay gikinahanglan. Sila interesado sa usag usa, ug ang ilang panaghigalaay molambo sa dihang ilang ipahayag ang ilang mga pagbati. Sa susama, ang pag-ampo dunay mas dako nga katuyoan kay sa pagpangayo lamang sa mga kinahanglanon. Kini maoy higayon sa paglig-on sa atong relasyon kang Jehova pinaagi sa pagpadayag sa atong kinasingkasing nga debosyon kaniya.

Oo, gihatagan kita sa Diyos ug pribilehiyo sa pag-ampo aron kita masuod kaniya. Mahitabo lamang kini kon atong ipahayag ang atong kaugalingong mga pagbati ngadto sa Diyos imbes sumaysumayon ang sinag-ulong mga pag-ampo. Pagkamakapalipay ang pagpakigsulti kang Jehova diha sa pag-ampo! Dugang pa, usa ka sanglitanan sa Bibliya nag-ingon:  “Ang pag-ampo sa mga matul-id maoy kahimut-anan kaniya.”—Proverbio 15:8.

“Bahin kanako, ang pagduol sa Diyos maayo alang kanako,” miawit ang salmistang Asap. (Salmo 73:28) Apan aron makaduol sa Diyos, kinahanglang mohimo kita ug labaw pa kay sa pag-ampo lamang. Matikdi kon sa unsang paagi ang mosunod nga asoy nagpakita niini:

“Usa sa mga tinun-an [ni Jesus] miingon kaniya: ‘Ginoo, tudloi kami unsaon sa pag-ampo.’” Sa pagtubag si Jesus miingon: “Sa dihang kamo mag-ampo, umingon, ‘Amahan, balaana ang imong ngalan. Paanhia ang imong gingharian.’” (Lucas 11:1, 2) Makaampo ba kita nga makahuloganon niining paagiha nga dili una sayron kon unsa ang ngalan sa Diyos ug kon unsaon kini pagbalaan? Ug kita ba makaampo kaharmonya niining mga pulong ni Jesus kon wala kita makasabot kon unsa ang Gingharian sa Diyos? Ang katin-awan niining mga butanga mabatonan kon atong susihon pag-ayo ang Bibliya. Sa ingon ang kahibalo nga makuha makatabang kanato nga mailhan ang Diyos ug masabtan ang iyang mga dalan. Dugang pa, ang pagkabaton ug kahibalo bahin kang Jehova nga Diyos mopabati kanato nga mas suod ug mas debotado kaniya. Sa baylo, kini motabang kanato sa pagpakigsulti kaniya nga walay pagpanagana diha sa pag-ampo.

Ang Pag-ampo Makasulbadsa mga Problema

Ang pag-ugmad ug suod nga relasyon kang Jehova makatabang kanato sa pagsulbad sa mga problema. Matikdi kon unsa kini ka tinuod diha sa matag mosunod nga mga kahimtang. Kini nagpakita nga kadtong nag-ampo nakapalig-on sa ilang relasyon kang Jehova.

Sa Brazil usa ka babayeng ginganlag Maria nangayog tabang sa Diyos diha sa pag-ampo. Dili siya gustong mosunod sa gidawat nga mga sukdanan sa paggawi sa usa ka bahin tungod sa pagkasalingkapaw nga iyang nakita sa katilingban. Gibiyaan pa gani ni Maria ang iyang bana, mga anak, ug panimalay. Siya nagsugod usab sa pagdroga. Apan sa dihang wala siya makatagamtam ug kalipay, iyang gibuksan ang iyang kasingkasing ngadto sa Diyos ug nangayog tabang pinaagig pag-ampo.

Ngadtongadto, duha ka mga Saksi ni Jehova miduaw ug gibinlan si Maria ug usa ka isyu sa Ang Bantayanang Torre nga nasudlan ug artikulo mahitungod sa importansiya sa pagdawat sa pagtultol sa Diyos. Natandog niini ang iyang kasingkasing, ug siya nagsugod sa pagtuon sa Bibliya uban sa mga Saksi nianang adlawa mismo. Tungod niini napasig-uli sa ulahi ang iyang pamilyahanong kinabuhi. Sa nakakat-on siya bahin kang Jehova, buot niyang mapadayag ang iyang gugma alang kaniya. “Nagbag-o ako sa akong panggawi,” miingon si Maria. “Ang akong bana ug pamilya sa primero misupak sa akong pagtuon sa Bibliya. Apan sa nakita nila ang kausaban nga akong nahimo, sila nagsugod sa pagdasig kanako.” Sa ulahi, gipahinungod ni Maria ang iyang kinabuhi ngadto sa Tigpatalinghog sa pag-ampo aron makaalagad kaniya.

Bisan pag matahom ang asawa si José ug dunay kusog nga negosyo sa Bolivia, dili siya malipayon. Gibiyaan siya sa iyang asawa tungod sa pagpamaye. Grabe siyang moinom ug mibati nga walay probitso. Matod pa ni José: “Nagsugod ako sa pag-ampo nga kinasingkasing, nangutana kon unsay akong himoon aron makapahimuot sa Diyos. Wala magdugay miduaw ang mga Saksi ni Jehova diha sa akong dapit sa negosyo nga nagtanyag ug libreng mga pagtuon sa Bibliya diha sa balay, apan gibalibaran ko sila. Nahitabo kini tulo ka beses. Matag panahong mangayo ako ug tabang pinaagi sa pag-ampo, sila mangabot. Sa kataposan, nakahukom ako nga mamati na ako sa sunod nga higayon. Nabasa na nako ang tibuok Bibliya ug daghan ako ug mga pangutana, apan kanunay nga duna gayod silay mga tubag nga nakapakombinsir kanako. Ang pagkakat-on bahin kang Jehova naghatag kanako ug bag-ong katuyoan sa kinabuhi, ug ang akong mga higala taliwala sa mga Saksi maoy makapadasig gayod nga mga panig-ingnan! Akong gibulagan ang akong baye ug ang akong mga higalang kainom. Wala magdugay, nakabalik ako sa akong asawa ug mga anak. Ako nabawtismohan sa unang mga bulan sa 1999.”

Sa Italya, ang kaminyoon ni Tamara nagkadaotdaot, busa siya nangayog kaalam pinaagi sa pag-ampo. Siya nakaugmad ug agresibong tinamdan, kay dinagmalan ug gipalayas sa pamilya sa edad 14. Si Tamara miingon: “Nakakita ako ug Bibliya ug gisugdan kana sa pagbasa. Usa ka gabii, akong nabasa nga ‘ang pagpangitag kaalam maoy ingon sa pagpangitag tinagong mga bahandi.’ Nag-ampo ako nga mabatonan kanang maong kaalam. (Proverbio 2:1-6) Pagkabuntag, miduaw ang mga Saksi ni Jehova. Nagsugod ako sa pagtuon sa Bibliya uban kanila, apan wala dayon nako gipadapat ang akong nakat-onan. Sa kataposan, nakahukom ako sa pagsubay  sa Kristohanong dalan sa kinabuhi ug nabawtismohan. Karon, uban sa akong bana, gitabangan nako ang uban nga makabaton ug kaayohan gikan sa kaalam sa Diyos.”

Alta sosyedad si Beatriz sa Caracas, Venezuela. Apan, siya diborsiyada ug nagmagul-anon. Kay nawad-an ug paglaom, kas-a dugay kaayo siyang nahuman sa pag-ampo. Pagkabuntag, mibagting ang doorbell. Nasuko, milili siya sa lilianan ug nakakitag duha ka tawo nga nagdalag mga bag. Nagpakaaron-ingnon siya nga wala sa balay, apan sa wala pa molakaw ang duha ka tawo, nagbilin sila ug usa ka handbill ilalom sa pultahan. “Sayra ang Imong Bibliya,” kini nag-ingon. Ang ila ba kahang pagduaw may koneksiyon sa iyang mga pag-ampo sa miaging gabii? Iyang gitawag sila aron mobalik. Wala magdugay siya nagtuon sa Bibliya, ug siya sa ulahi nabawtismohan. Malipayon na sa kataposan, si Beatriz karon nagatudlo sa uban kon sa unsang paagi matagamtam ang kalipay.

Si Carmen miampo bahin sa iyang kalisod tungod sa kakabos. Siya dunay napulo ka anak ug palahubog nga bana, si Rafael. “Naningkamot ako nga makakuwarta pinaagi sa paglabada,” matod pa ni Carmen. Apan misamot ang pagkapalainom ni Rafael. “Diha na lamang nga nagsugod kami sa pagtuon sa Bibliya uban sa mga Saksi ni Jehova nga nagbag-o ang akong bana. Among nakat-onan ang bahin sa saad nga Gingharian—nga sa dili madugay wagtangan ni Jehova ang kalibotan ug kakabos ug pagdaogdaog. Ang akong mga pag-ampo ngadto sa Diyos sa kataposan gidungog!” Ang pagkakat-on bahin sa mga dalan ni Jehova nakatabang kang Rafael sa paghunong sa pag-inom, ug iyang gisul-ob ang “bag-ong pagkatawo.” (Efeso 4:24) Siya ug ang iyang pamilya nakapauswag sa ilang sukdanan sa pagkinabuhi. Si Rafael miingon: “Bisag dili kami dato, ug dili amoa ang among gipuy-ang balay, apan nabatonan namo ang mga kinahanglanon sa kinabuhi, ug kami malipayon.”

Sa Dihang ang Tanang Pag-ampo Pagadunggon

Duna bay nahimo ang pag-ampo niining mga tawhana? Dayag na lang! Ug nakamatikod ka ba nga sa kadaghanang kahimtang ang ilang mga pag-ampo gidungog sa dihang ang usa sa Kristohanong kongregasyon mitabang kanila sa pagpakigsuod kang Jehova nga Diyos pinaagi sa pagtuon sa Bibliya?—Buhat 9:11.

Nan, kita dunay maayong mga katarongan nga mag-ampo. Sa dili madugay karon, ang pag-ampo nga moanhi ang Gingharian sa Diyos ug ang iyang kabubut-on matuman dinhi sa yuta pagadunggon. (Mateo 6:10) Human nga mahinloan sa Diyos ang atong yuta sa mga tawo nga nagabatok kaniya, “ang yuta mapuno sa kahibalo bahin kang Jehova.” (Isaias 11:9) Dayon kadtong tanan nga nahigugma kang Jehova makatagamtam ug “mahimayaong kagawasan sa mga anak sa Diyos”—ug ang ilang mga pag-ampo dayag nga pagadunggon gayod.—Roma 8:18-21.

[Hulagway sa panid 7]

Nahibalo ka ba kon nganong kita angayng mag-ampo?