Ikaw ba Nagkinabuhi Sumala sa Imong Pahinungod?

“Bisan unsay inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo.”—COLOSAS 3:23.

1. Sa sekular nga diwa, unsay gipasabot sa pulong “pahinungod”?

 SA UNSANG paagi mahimo sa mga atleta ang ilang kinamaayohan? Sa tenis, saker, basketbol, besbol, lumba sa dagan, golp, o bisan unsang esport, ang kinamaayohang mga atleta mohawod sa tanan pinaagi lamang sa dili-matarog nga pahinungod. Ang pagkondisyon sa lawas ug hunahuna mao ang unang hatagag pagtagad. Haom kaayo kini sa usa sa mga kahubitan sa pulong “napahinungod,” nga “bug-os nga komitido sa usa ka partikular nga hunahuna o lihok.”

2. Unsay kahulogan sa “pahinungod” diha sa Bibliya? Iilustrar.

² Apan, unsay kahulogan sa “pahinungod” sa Biblikanhong diwa? Ang “pahinungod” naghubad sa Hebreohanong berbo nga nagkahulogang “pagpabiling bulag; mahimulag; mopalayo.” a Sa karaang Israel, ang Hataas nga Saserdote nga si Aaron nagtaod diha sa iyang turbante “sa balaang ilhanan sa pagpahinungod,” nga maoy usa ka sinawng plaka sa lunsayng bulawan nga gikulitan sa Hebreohanong mga pulong “Pagkabalaan iya ni Jehova.” Kadto nagsilbing pahinumdom sa hataas nga saserdote nga kinahanglang likayan niya ang pagbuhat ug bisan unsa nga magpasipala sa sangtuwaryo “tungod kay ang ilhanan sa pahinungod, ang igdidihog nga lana sa iyang Diyos, [diha] man kaniya.”—Exodo 29:6; 39:30; Levitico 21:12.

3. Sa unsang paagi ang pahinungod angayng mag-apektar sa atong panggawi?

³ Masabtan nato niini nga diwa nga ang pagpahinungod maoy seryosong butang. Nagkahulogan kini ug boluntaryong pagpaila ingong alagad sa Diyos, ug nagkinahanglan kini ug hinlong panggawi. Busa, masabtan nato kon nganong si apostol Pedro mikutlo kang Jehova nga nag-ingon: “Kinahanglan kamong magmabalaan, tungod kay ako balaan.” (1 Pedro 1:15, 16) Ingong napahinungod nga mga Kristohanon, duna kitay bug-at nga responsibilidad nga magkinabuhi sumala sa atong pahinungod, nga magmatinumanon hangtod sa kataposan. Apan unsay nalangkit sa Kristohanong pahinungod?—Levitico 19:2; Mateo 24:13.

4.Sa unsang paagi maabot nato ang ang-ang sa pahinungod, ug sa unsa kana gipakasama?

⁴ Human nato mabatoni ang tukmang kahibalo bahin kang Jehova nga Diyos ug sa iyang mga katuyoan ug bahin kang Jesu-Kristo ug sa iyang papel sa maong mga katuyoan, atong gihimo kining personal nga desisyon sa pag-alagad sa Diyos uban sa atong bug-os nga kasingkasing, hunahuna, kalag, ug kusog. (Marcos 8:34; 12:30; Juan 17:3) Mahimo ganing lantawon kana ingong personal nga panaad, usa ka walay pag-ukon-ukon nga pagpahinungod ngadto sa Diyos. Ang atong pahinungod wala himoa ingong resulta sa kalit nga bul-og sa pagbati. Kini mainampingon ug mainampoon nga gitimbangtimbang, ginamit ang gahom sa pagpangatarongan. Busa, dili kini temporaryong desisyon. Dili kita angayng mahisama sa usa ka tawo nga nagsugod pagdaro sa usa ka uma ug dayon moundang sa tungatunga tungod kay hago kaayo kini o tungod kay ang pag-ani morag dugay pa kaayo o dili gayod tino. Tagda ang mga panig-ingnan sa uban nga ‘mikupot sa daro’ sa teokratikanhong responsibilidad bisan pa sa kalisdanan.—Lucas 9:62; Roma 12:1, 2.

Wala Nila Isalikway ang Ilang Pahinungod

5. Sa unsang paagi si Jeremias usa ka talagsaong panig-ingnan sa usa ka napahinungod nga alagad sa Diyos?

⁵ Ang matagnaong ministeryo ni Jeremias sa Jerusalem  mikabat ug kapin sa 40 ka tuig (647-607 W.K.P.), ug dili kadto sayon nga asaynment. Nahibalo kaayo siya sa iyang mga limitasyon. (Jeremias 1:2-6) Nagkinahanglan siyag kaisog ug paglahutay sa pag-atubang sa gahig-ulo nga mga tawo sa Juda sa adlaw-adlaw. (Jeremias 18:18; 38:4-6) Apan, si Jeremias misalig kang Jehova nga Diyos, kinsa nagpalig-on kaniya mao nga siya napamatud-ang tinuod nga napahinungod nga alagad sa Diyos.—Jeremias 1:18, 19.

6. Unsang panig-ingnan ang gihatag ni apostol Juan alang kanato?

⁶ Komosta ang matinumanong apostol nga si Juan, kinsa nadestiyero sa umaw nga isla sa Patmos sa dihang tigulang na siya tungod sa “pagsulti bahin sa Diyos ug sa pagpamatuod bahin kang Jesus”? (Pinadayag 1:9) Siya nakalahutay ug nagkinabuhi sumala sa iyang napahinungod nga kahimtang ingong Kristohanon sulod sa mga 60 ka tuig. Buhi pa siya human malaglag ang Jerusalem sa mga kamot sa Romanong mga kasundalohan. Nakapribilehiyo siya sa pagsulat sa usa ka Ebanghelyo, tulo ka dinasig nga mga sulat, ug sa basahon sa Pinadayag, nga niana nakita na niyang daan sa panan-awon ang gubat sa Armagedon. Miundang ba siya sa dihang nahibaloan niya nga ang Armagedon dili mahitabo sa iyang panahon? Nawala ba ang iyang kaikag? Wala, si Juan nagpabiling matinumanon hangtod sa iyang kamatayon, nga nahibalo nga bisan tuod ‘ang tinudlong panahon duol na,’ ang katumanan sa iyang mga panan-awon maoy sa ulahi pa nga panahon.—Pinadayag 1:3; Daniel 12:4.

Modernong mga Panig-ingnan sa Pahinungod

7. Sa unsang paagi ang usa ka brader maoy usa ka maayong panig-ingnan sa Kristohanong pahinungod?

⁷ Sa modernong mga panahon, libolibong matinumanong mga Kristohanon ang masibotong nagpabilin sa ilang pahinungod bisan pag dili makalabang-buhi sa pagsaksi sa Armagedon. Ang usa kanila mao si Ernest E. Beavor sa Inglaterra. Nahimo siyang Saksi sa 1939 sa pagsugod sa Gubat sa Kalibotan II, ug gibiyaan niya ang naglambo nga negosyo sa pag-imprenta ug mga letrato aron mosulod sa bug-os-panahong ministeryo. Tungod sa pagpabilin niya diha sa iyang Kristohanong neyutralidad, nabilanggo siya ug duha ka tuig. Ang iyang pamilya nagpaluyo kaniya, ug sa 1950 ang iyang tulo ka anak mitambong sa Watchtower Bible School of Gilead alang sa misyonaryong pagbansay, sa New York. Si Brader Beavor masiboton kaayo sa iyang buluhatong pagsangyaw nga gitawag siya sa iyang mga higala ug Armagedon Ernie. Maunongon niyang gituman ang iyang pahinungod, ug hangtod sa iyang kamatayon sa 1986, iyang gimantala ang pagkaduol na sa gubat sa Diyos sa Armagedon. Wala niya isipa ang iyang pahinungod ingong limitadog-panahon nga kontrata uban sa Diyos! b—1 Corinto 15:58.

8, 9. (a) Unsang panig-ingnan ang gihatag sa daghang batan-ong lalaki sa Espanya panahon sa rehimen ni Franco? (b) Unsang mga pangutana ang angayng isukna?

⁸ Ang laing panig-ingnan sa way-paglubad nga  kasibot naggikan sa Espanya. Panahon sa rehimen ni Franco (1939-75), gatosan ka napahinungod nga batan-ong mga Saksi ang mibarog ingong neyutral nga mga Kristohanon. Daghan kanila migugol ug napulo ka tuig o kapin pa diha sa militaryong mga bilanggoan. Kon sumahon, ang sentensiya sa usa ka Saksi, si Jesús Martín, nakaabot ug 22 ka tuig diha sa bilanggoan. Gikulata siya pag-ayo samtang nabalhog sa usa ka militaryong bilanggoan sa Amihanang Aprika. Malisod kining tanan, apan wala siya mokompromiso.

⁹ Kasagaran, kining batan-ong mga lalaki wala mahibalo kon kanus-a sila buhian, kon ugaling buhian man, kay sila gipahamtangan man ug daghan, sunodsunod nga mga sentensiya. Bisan pa niana, sila nagpabiling maunongon ug nagpadayong masiboton alang sa ministeryo samtang nabilanggo. Sa dihang sa kataposan miarang-arang ang kahimtang sa 1973, daghan niini nga mga Saksi, nga niadtong panahona bag-o pa lang nag-30 anyos, gibuhian sa bilanggoan ug misulod dihadiha sa bug-os-panahong ministeryo, ang uban nahimong mga espesyal payunir ug nagapanawng mga magtatan-aw. Nagkinabuhi sila sumala sa ilang pahinungod samtang didto sa bilanggoan, ug ang kadaghanan nagpadayon sa pagbuhat niana human sila buhii. c Komosta kita karon? Kita matinud-anon ba sa atong pahinungod sama niining maunongong mga tawo?—Hebreohanon 10:32-34; 13:3.

Hustong Panglantaw sa Atong Pahinungod

10. (a) Unsay angay natong panglantaw sa atong pagpahinungod? (b) Unsay panglantaw ni Jehova sa atong pag-alagad kaniya?

¹⁰ Unsay atong panglantaw sa atong pagpahinungod ngadto sa Diyos sa pagbuhat sa iyang kabubut-on? Mao ba kini ang unang butang sa atong kinabuhi? Bisan unsa pay atong mga sirkumstansiya, bata man o tigulang, minyo o di-minyo, himsog o masakiton, kinahanglang maningkamot kita sa pagkinabuhi sumala sa atong pahinungod, sumala sa atong mga sirkumstansiya. Ang kahimtang sa usa ka tawo mahimong magtugot kaniya sa pag-alagad diha sa bug-os-panahong ministeryo ingong payunir, ingong boluntaryo diha sa sangang buhatan sa Watch Tower Society, ingong misyonaryo, o diha sa nagapanawng ministeryo. Ang ubang mga ginikanan, sa laing bahin, puliki tingali kaayo sa pag-atiman sa pisikal ug espirituwal nga mga panginahanglan sa pamilya. Ang ila bang medyo gamay nga oras nga nagugol diha sa ministeryo kada bulan mas menos ug bili sa mga mata ni Jehova kay sa daghang oras nga nagugol sa usa ka bug-os-panahong alagad? Dili. Dili gayod dahomon sa Diyos kanato ang wala nato mabatoni. Gipahayag ni apostol Pablo kining prinsipyoha: “Kon ang pagkaandam anaa nang daan, kini ilabinang dalawaton sumala sa nabatonan sa usa, dili sumala sa wala kaniya.”—2 Corinto 8:12.

11. Sa unsa nagdepende ang atong kaluwasan?

¹¹ Kon unsa man ugaling, ang atong kaluwasan nagdepende, dili sa bisan unsa nga buhaton tingali nato, kondili sa dili-takos nga kalulot ni Jehova pinaagi kang Kristo Jesus, nga atong Ginoo. Si Pablo tin-awng nagsaysay: “Ang tanan nakasala ug wala makaabot sa himaya sa Diyos, ug ingong walay bayad nga gasa nga sila gipahayag nga matarong pinaagi sa iyang dili-takos nga kalulot tungod sa pagpagawas  pinaagi sa lukat nga gibayad ni Kristo Jesus.” Apan, ang atong mga buhat maoy pamatuod sa atong aktibong pagtuo sa mga saad sa Diyos.—Roma 3:23, 24; Santiago 2:17, 18, 24.

12. Nganong dili kita mohimog mga pagtanditandi?

¹² Dili kinahanglan nga mohimo kitag mga pagtanditandi sa uban maylabot sa panahon nga atong gigugol diha sa pag-alagad sa Diyos, sa atong gipahimutang nga literatura sa Bibliya, o sa gidaghanon sa mga pagtuon sa Bibliya nga atong ginadumala. (Galacia 6:3, 4) Bisan unsa pay atong nalampos diha sa Kristohanong ministeryo, kitang tanan kinahanglang mahinumdom sa makaaghat ug pagpaubos nga mga pulong ni Jesus: “Busa kamo, usab, sa dihang mabuhat na ninyo ang tanang butang nga gipabuhat kaninyo, isulti ninyo, ‘Kami maoy walay-silbi nga mga ulipon. Ang among nabuhat mao ang angay namong pagabuhaton.’” (Lucas 17:10) Unsa ka subsob nga kita tinuod nga makaingon nga nabuhat nato “ang tanang butang nga gipabuhat” kanato? Busa ang pangutana mao, Angayng unsa ang kalidad sa atong pag-alagad sa Diyos?—2 Corinto 10:17, 18.

Pagpabili sa Matag Adlaw

13. Unsang tinamdan ang gikinahanglan nato samtang ginatuman nato ang atong pahinungod?

¹³ Human mohatag ug tambag sa mga asawa, bana, anak, ginikanan, ug mga ulipon, si Pablo misulat: “Bisan unsay inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo, kay kamo nahibalo nga inyong dawaton gikan kang Jehova ang nahiangayng ganti sa panulondon. Magpaulipon kamo sa Agalon, si Kristo.” (Colosas 3:23, 24) Wala kita mag-alagad aron dayegon sa mga tawo maylabot sa kon unsay atong nalampos diha sa pag-alagad kang Jehova. Naningkamot kita sa pag-alagad sa Diyos pinaagi sa pagsunod sa panig-ingnan ni Jesu-Kristo. Gituman niya ang iyang dili kaayo dugay nga ministeryo uban ang pagbati sa pagkadinalian.—1 Pedro 2:21.

14. Unsang pasidaan ang gihatag ni Pedro maylabot sa kataposang mga adlaw?

¹⁴ Si apostol Pedro usab nagpasundayag ug pagbati sa pagkadinalian. Sa iyang ikaduhang sulat, siya nagpasidaan nga sa kataposang mga adlaw,  motungha ang mga tigbiaybiay—mga apostata ug mga maduhaduhaon—kinsa, sumala sa ilang kaugalingong mga kagustohan, magpatunghag mga isyu bahin sa presensiya ni Kristo. Apan, si Pedro nag-ingon: “Si Jehova dili langaylangayan mahitungod sa iyang saad, sumala sa pag-isip sa pipila ka tawo nga paglangaylangay, kondili siya mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol. Bisan pa niana ang adlaw ni Jehova moabot ingon sa usa ka kawatan.” Oo, ang adlaw ni Jehova tinong moabot. Busa, angayng palandongon nato sa adlaw-adlaw kon unsa gayod ka tino ug ka lig-on ang atong pagtuo sa saad sa Diyos.—2 Pedro 3:3, 4, 9, 10.

15. Unsay atong panglantaw sa matag adlaw sa atong kinabuhi?

¹⁵ Aron makakinabuhi sumala sa atong pahinungod sa bug-os nga paagi, kinahanglang gamiton nato ang matag adlaw sa pagdayeg kang Jehova. Sa kataposan sa matag adlaw, mahandom ba nato kana ug makita kon sa unsang paagi kita nakaamot sa usa ka paagi sa pagbalaan sa ngalan sa Diyos ug sa pagpahayag sa maayong balita sa Gingharian? Tingali pinaagi sa atong hinlong panggawi, sa atong makapalig-ong kabildohay, o sa atong mahigugmaong kabalaka sa atong pamilya ug mga higala. Gigamit ba nato ang bukas nga mga kahigayonan sa pagpaambit sa atong Kristohanong paglaom sa uban? May natabangan ba kita sa pagpalandong bahin sa mga saad sa Diyos? Magtigom kita ug usa ka butang nga bililhon sa espirituwal nga diwa matag adlaw, nga magpondo, ingnon ta, ug igo-igo diha sa espirituwal nga bangko.—Mateo 6:20; 1 Pedro 2:12; 3:15; Santiago 3:13.

Himoang Tin-aw ang Imong Panan-aw

16. Sa unsang mga paagi gisulayan ni Satanas pagpaluya ang atong pahinungod sa Diyos?

¹⁶ Nagkinabuhi kita sa mga panahon nga nag-anam ka lisod alang sa mga Kristohanon. Si Satanas ug ang iyang mga ahente naningkamot sa pagpahanap  sa kalainan sa maayo ug daotan, sa hinlo ug hugaw, sa moral ug imoral, sa maayong pamatasan ug sa dili-maayong pamatasan. (Roma 1:24-28; 16:17-19) Gipasayon gayod niya nga mahugawan nato ang atong kasingkasing ug hunahuna pinaagi sa remote control sa TV o sa keyboard sa kompiyuter. Ang atong espirituwal nga panglantaw mahimong mohanap, o dili masentro, aron nga dili nato maila ang iyang malinlangong mga buhat. Ang atong determinasyon nga magkinabuhi sumala sa atong pahinungod mahimong maluya ug ang atong pagkupot sa “daro” molugak kon atong ikompromiso ang atong espirituwal nga mga prinsipyo.—Lucas 9:62; Filipos 4:8.

17. Sa unsang paagi ang tambag ni Pablo makatabang kanato sa paghupot sa atong relasyon uban sa Diyos?

¹⁷ Busa tukma gayod sa panahon ang gisulti ni Pablo sa kongregasyon sa Tesalonica: “Kini mao ang pagbuot sa Diyos, ang pagbalaan kaninyo, nga ayran ninyo ang pakighilawas; nga ang matag usa kaninyo kinahanglang mahibalo kon unsaon paghupot sa iyang kaugalingong sudlanan diha sa kabalaan ug kadungganan, dili sa mahakogong kaibog sa seksuwal nga gana nga ingon usab nianang sa kanasoran nga wala makaila sa Diyos.” (1 Tesalonica 4:3-5) Tungod sa imoralidad ang pipila napalagpot gikan sa Kristohanong kongregasyon—kadtong mga tawo nga wala magpakabana sa ilang pahinungod ngadto sa Diyos. Gitugotan nila nga mohuyang ang ilang relasyon uban sa Diyos, mao nga dili na siya hinungdanon sa ilang kinabuhi. Bisan pa niana, si Pablo nag-ingon: “Ang Diyos nagtawag kanato, dili alang sa kahugawan, kondili labot sa pagkabalaan. Busa, ang tawo nga wala manumbaling, wala manumbaling sa tawo, kondili sa Diyos, kinsa maoy nagbutang sa iyang balaang espiritu diha kaninyo.”—1 Tesalonica 4:7, 8.

Unsay Imong Determinasyon?

18. Angayng unsa ang atong determinasyon?

¹⁸ Kon nasabtan nato ang pagkaugdang sa atong pahinungod kang Jehova nga Diyos, determinado kitang mobuhat sa unsa? Ang atong lig-ong determinasyon angayng mao ang paghupot ug hinlong tanlag maylabot sa atong panggawi ug sa atong ministeryo. Si Pedro nagtambag: “Paghupot ug maayong tanlag, aron nga sa dihang pagalibakon kamo mangaulaw sila nga nagasulting mayam-iron sa inyong maayong panggawi maylabot kang Kristo.” (1 Pedro 3:16) Tingali kinahanglang mag-antos ug mag-atubang kita ug pag-abuso tungod sa atong Kristohanong panggawi, apan naagian usab kana ni Kristo tungod sa iyang pagtuo ug pagkamaunongon sa Diyos. “Busa,” miingon si Pedro, “sanglit si Kristo miantos man diha sa unod, sangkapi usab ninyo ang inyong kaugalingon sa samang kiling sa kaisipan; tungod kay ang usa nga miantos diha sa unod nakabiya na sa sala.”—1 Pedro 4:1.

19. Unsay buot natong ikasulti bahin kanato?

¹⁹ Sa pagkatinuod, ang atong lig-ong determinasyon sa pagkinabuhi sumala sa atong pahinungod manalipod kanato batok sa mga dayandayan sa kalibotan ni Satanas nga masakiton sa espirituwal, moral, ug sa pisikal. Apan labaw pa niana, maangkon nato ang pagsalig nga nabatonan nato ang pag-uyon sa Diyos, nga mas maayo pa kay sa bisan unsa nga itanyag kanato ni Satanas ug sa iyang mga ahente. Busa, hinaot nga dili gayod ikasulti bahin kanato nga mibiya kita sa gugma nga atong nabatonan sa dihang una natong nahibaloan ang kamatuoran. Hinunoa, hinaot nga ikasulti bahin kanato ang sama sa gisulti bahin sa unang-siglong kongregasyon sa Tiatira: “Nahibalo ako sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa mga nahauna.” (Pinadayag 2:4, 18, 19) Oo, hinaot nga dili kita mahimong dagaang maylabot sa atong pahinungod, kondili hinaot nga kita “magmainiton sa espiritu,” masiboton hangtod sa kataposan—ug duol na ang kataposan.—Roma 12:11; Pinadayag 3:15, 16.

[Mga footnote]

Nahinumdom Ka Ba?

• Unsay nalangkit sa pahinungod?

• Unsang karaan ug modernong mga panig-ingnan sa napahinungod nga mga alagad sa Diyos ang takos natong sundogon?

• Unsaon nato paglantaw ang atong pag-alagad sa Diyos?

• Angayng unsa ang atong determinasyon maylabot sa atong pahinungod sa Diyos?

[Mga Pangutana sa Pagtuon]

[Hulagway sa panid 15]

Si Jeremias nagpabiling matinumanon bisan pa sa mabangis nga tratamento

[Hulagway sa panid 16]

Si Ernest Beavor naghatag ug panig-ingnan alang sa iyang mga anak ingong masibotong Kristohanon

[Hulagway sa panid 17]

Gatosan ka batan-ong mga Saksi sa mga prisohan sa Espanya naghupot sa ilang integridad

[Mga hulagway sa panid 18]

Magtigom kita ug usa ka butang nga bililhon sa espirituwal nga diwa sa matag adlaw