Pagkinabuhing May mga Kapeligrohan

“Wala gayoy usa ka butang nga imong himoon sa matag ordinaryong adlaw—apil ang pagkatulog—nga dili maglangkit ug risgo nga magpameligro sa imong kinabuhi.”—magasing Discover.

ANG kinabuhi gitandi nga samag naglakaw sa usa ka lugar nga gilubngan ug mga mina, kay ang pagkasamad o kamatayon mahitabo sa bisan unsang panahon, nga sagad kalit lang nga moabot. Ang mga butang nga mohatag ug kapeligrohan nagkalainlain sa matag nasod. Kini naglakip sa mga aksidente sa trapiko, sibil nga gubat, kagutom, AIDS, kanser, sakit sa kasingkasing, ug daghan pang uban. Diha sa sub-Sahara nga Aprika, pananglitan, ang AIDS nahimong numero unong pumapatay, nga sa tuig nga di pa dugay “nakakalas ug 2.2 ka milyong kinabuhi, 10 ka pilo nga gidaghanon kay sa nangamatay gumikan sa tanang sibil nga mga gubat sa Aprika,” nagkanayon ang U.S.News & World Report.

Kasamtangan, ang kalibotan nagagasto ug bilyon-bilyon aron molugway ug dugay ang kinabuhi ug mamenosan ang risgo sa sakit ug pagkabaldado. Daghan sa ideya nga giduso, sama sa makataronganong mga batasan sa pagkaon ug pag-inom ug pisikal nga ehersisyo, mohatag ug pipila ka maayong mga resulta. Apan, adunay usa ka tuboran sa kasaligang impormasyon sa matag hinungdanong bahin sa kinabuhi nga makatabang kanimo aron matagamtam ang mas luwas, mas may kasegurohang kinabuhi. Kana nga tuboran mao ang Bibliya. Kini nasudlan ug mga giya aron maatubang ang nagkalainlaing mga problema nga makaapektar sa atong panglawas ug kaayohan. Siyempre, ang Bibliya wala maghisgot sa matag problema nga detalyado. Bisan pa niana, kini nagtagana ug maayo kaayong mga prinsipyo nga mogiya kanato may kalabotan sa mga butang sama sa mga batasan sa pagkaon, pisikal nga kahimsog, tinamdan sa hunahuna, sekso, paggamit sa alkoholikong ilimnon, tabako, ug ang gitawag nga mga droga nga panglingaw-lingaw, ug daghan pang ubang mga butang.

Ang kinabuhi sa daghang tawo nabug-atan usab sa kawalay kasegurohan may kalabotan sa panalapi. Niining bahina usab, ang Bibliya makatabang kanato. Dili lamang nagdasig kini bahin sa maalamong paglantaw sa salapi ug pagdumala sa salapi kondili nagpakita usab kini kon unsaon sa pagkahimong mas maayong empleyado o amo. Sa yanong pagkasulti, ang Bibliya maoy usa ka maayong giya, dili lamang alang sa pinansiyal nga kasegurohan ug pisikal nga kaayohan, kondili sa kinabuhi mismo. Interesado ka bang mahibalo kon unsa ka praktikal ang Bibliya karong panahona? Nan palihog padayon sa pagbasa.