Giya Gikan sa Diyos sa Pagpili ug Kapikas sa Kaminyoon

“Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.”—SALMO 32:8.

1. Unsang mga butanga ang kinahanglanon alang sa malamposong kaminyoon?

 ANG usa ka sirkador milukso gikan sa iyang nagtabyogtabyog nga trapeze, mitikubo, ug hanite nga misirkosirko sa kahanginan. Unya sa gipatuyhad niya ang iyang lawas, gituy-od niya ang iyang mga kamot ug gisakgaw kini sa nagbalit-ad nga sirkador gikan sa atbang. Usa ka parisan sa lalaki ug babaye nga nag-eskeyt sa yelo hanoyng nagpadailos-dailos diha sa rink. Unya, gialsa sa lalaki ang iyang paris ug giitsa siya sa hangin. Ang babaye mituyok nga suwabeng mitugpa nga usa ra ka tiil ang nagdapat, ug dayon mipadayon pagtuyok uban sa lalaki diha sa yelo. Kanang duha ka pasundayag gihimo nga halos walay hago. Apan, kinsa god intawon ang mosulay niana nga wala magbansay, walay hanas nga paris, ug ilabina walay hustong matang sa giya o instruksiyon. Sa susama, ang usa ka maayong kaminyoon morag kalit lang mahitabo. Apan, kini usab nagdepende sa usa ka maayong paris, sa hiniusang paningkamot, ug ilabina sa maalamong tambag. Sa pagkatinuod, gikinahanglan ang hustong giya.

2. (a) Kinsay nagsugod sa kahikayan sa kaminyoon, ug sa unsang katuyoan? (b) Sa unsang paagi gihimo ang pipila ka kahikayan sa kaminyoon?

² Kinaiyanhon na sa usa ka batan-ong ulitawo o dalaga nga maghunahuna bahin sa usa ka kapikas sa kaminyoon—usa ka kauban sa kinabuhi. Sukad kini sugdi ni Jehova nga Diyos, ang kaminyoon sa lalaki ug babaye nahimong normal nga paagi sa kinabuhi. Apan ang unang tawo, si Adan, wala mopili sa iyang asawa. Si Jehova mahigugmaong naghatag sa babaye ngadto kaniya. (Genesis 2:18-24) Maoy iyang katuyoan nga ang unang magtiayon mosanay aron ang yuta sa ngadtongadto mapuno sa mga tawo. Human niadtong unang kaminyoon, ang mga kahikayan sa kaminyoon kasagarang gihimo sa mga ginikanan sa pangasaw-onon ug sa pamanhonon, usahay human motugot kadtong nalangkit niana. (Genesis 21:21; 24:2-4, 58; 38:6; Josue 15:16, 17) Bisan tuod komon gihapon ang gihikayng-daan nga mga kaminyoon diha sa pipila ka nasod ug mga kultura, daghan karon ang mopili mismo sa ilang kapikas sa kaminyoon.

3. Sa unsang paagi pilion ang usa ka kapikas sa kaminyoon?

³ Sa unsang paagi pilion ang usa ka kapikas sa kaminyoon? Ang pipila naimpluwensiyahan sa panagway—ang ilang giisip nga matahom ug madanihon. Ang uban mangitag materyal nga mga benepisyo, sa usa nga moatiman pag-ayo kanila ug kinsa motagana sa ilang mga panginahanglan ug mga gusto. Apan ang bisan hain ba niining mga paagiha sa pagpili mao lamang ang motultol sa malipayon ug makapatagbaw nga relasyon? “Ang pagkamadanihon mahimong malimbongon, ug ang kaanyag mahimong kawang,” matod sa Proverbio 31:30, “apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.” Ug diha niana nahasandig ang hinungdanong punto: Ilakip si Jehova sa dihang mopili ug kapikas.

Mahigugmaong Giya Gikan sa Diyos

4. Unsang tabang ang gitagana sa Diyos maylabot sa pagpili ug kapikas sa kaminyoon?

⁴ Ang atong mahigugmaong langitnong Amahan, si Jehova, nagtagana sa iyang sinulat nga Pulong aron sa paggiya kanato sa tanang butang. Siya nag-ingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17)  Nan, dili ikatingala nga makita diha sa Bibliya ang epektibong mga lagda alang sa pagpili ug kapikas sa kaminyoon. Buot ni Jehova nga ang atong kaminyoon magmalungtaron ug magmalipayon. Busa, nagtagana siya ug tabang aron masabtan ug mapadapat nato kining maong mga lagda. Dili ba mao man kana ang angay natong dahomon sa atong mahigugmaong Maglalalang?—Salmo 19:8.

5. Unsay hinungdanon alang sa dumalayong kalipay diha sa kaminyoon?

⁵ Sa dihang gisugdan ni Jehova ang kahikayan sa kaminyoon, katuyoan niya nga kini mahimong usa ka malungtarong bugkos. (Marcos 10:6-12; 1 Corinto 7:10, 11) Mao nga “iyang gidumtan ang pagdiborsiyo,” nga nagtugot lamang niini kon ang hinungdan mao ang “pakighilawas.” (Malaquias 2:13-16; Mateo 19:9) Busa, ang pagpili ug kapikas sa kaminyoon maoy usa sa labing seryosong mga lakang nga atong mahimo ug dili angayng pakamenoson. Pipila lang ka desisyon ang dunay susamang kalaoman nga magmalipayon o magmasulub-on. Samtang ang usa ka maayong pagpili magpatugob sa kinabuhi sa usa ka tawo ug maghimo niining makapatagbaw, ang dili-maalamong pagpili makapahinabog walay-kataposang kagul-anan. (Proverbio 21:19; 26:21) Aron magpadayon ang kalipay, hinungdanon nga maalamong mopili ug magmaandam sa paghimog malungtarong pakigsaad, kay gisugdan sa Diyos ang kaminyoon ingong panag-ubanay nga molambo diha sa panaghiusa ug pagtambayayongay.—Mateo 19:6.

6. Nganong ang mga batan-ong lalaki ug babaye ilabinang angayng mag-amping sa pagpili ug kapikas, ug sa unsang paagi mahimo nila ang labing maalamong desisyon?

⁶ Ang mga batan-ong lalaki ug babaye ilabinang angayng mag-amping nga ang pisikal nga kaibog ug kusganong mga panukmod dili magtuis sa ilang panghukom sa dihang sila mopili ug kapikas. Gani, ang relasyon nga gipasukad lamang sa maong mga butang dali rang mosangpot sa pagtamay o bisan sa pagdumot. (2 Samuel 13:15) Sa laing bahin, ang malungtarong gugma mahimong ugmaron samtang masinati nato ang atong kapikas ug samtang mas masabtan usab nato ang atong kaugalingon. Kinahanglang maamgohan usab nato nga ang labing maayo alang kanato dili tingali maoy gitinguha sa atong kasingkasing sa sinugdan. (Jeremias 17:9) Mao nga hinungdanon kaayo ang giya sa Diyos nga makita diha sa Bibliya. Motabang kini kanato sa pagsabot kon sa unsang paagi makahimo kita sa labing maalamong mga desisyon sa kinabuhi. Ang salmista naghawas kang Jehova nga nag-ingon: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” (Salmo 32:8; Hebreohanon 4:12) Bisan tuod ang kaminyoon makatagbaw sa atong kinaiyanhong panginahanglan alang sa gugma ug  pag-ubanay, aduna usab kiniy mga problema nga nagkinahanglag pagkahamtong ug pagsabot.

7. Nganong ang uban dili modawat sa pinasukad-sa-Bibliya nga tambag bahin sa pagpili ug kapikas, apan motultol sa unsa kining maong dalan?

⁷ Maalamong magpatalinghog sa giingon sa Tigpasiugda sa kaminyoon bahin sa pagpili ug kapikas. Apan, dili tingali kita modawat sa dihang ang pinasukad-sa-Bibliya nga tambag maggikan sa mga ginikanan o sa Kristohanong mga ansiyano. Bation tingali nato nga wala gayod sila makasabot kanato, ug ang kusganong emosyonal nga mga tinguha mahimong magtukmod kanato sa pagsunod sa kiling sa kasingkasing. Apan, pagkataudtaod, sa dihang mag-atubang na sa tinuod nga mga hitabo sa adlaw-adlaw nga pagkinabuhi, basolan tingali nato nga wala kita magpatalinghog sa maalamong tambag nga gihatag alang sa atong kaayohan. (Proverbio 23:19; 28:26) Mabilanggo tingali kita sa usa ka walay-gugmang kaminyoon, nga maglisod sa pag-atiman sa mga anak ug tingali maminyo pa gani sa usa ka dili-magtutuong kapikas. Pagkamakapasubo kon ang usa ka kahikayan nga maghatag unta kanato ug dakong kalipay mahimo na hinuong tuboran sa dakong kagul-anan!

Diyosnong Debosyon—Usa ka Hinungdanong Butang

8. Sa unsang paagi ang diyosnong debosyon makatabang nga magmalungtaron ug magmalipayon ang kaminyoon?

⁸ Tinuod, ang kaibog alang sa usag usa motabang sa pagpalig-on sa kaminyoon. Apan ang mga prinsipyo nga parehong gituohan mas labi pang hinungdanon aron ang kaminyoon magmalungtaron ug magpatunghag kalipay. Ang debosyon sa magtiayon kang Jehova nga Diyos maghimo ug usa ka dumalayong bugkos ug magpalambo sa panaghiusa sa paagi nga dili mahimo sa ubang butang. (Ecclesiastes 4:12) Sa dihang isentro sa Kristohanong magtiayon ang ilang kinabuhi diha sa matuod nga pagsimba kang Jehova, sila nahiusa sa espirituwal, mental, ug sa moral. Sila magdungan pagtuon sa Pulong sa Diyos. Sila magdungan pag-ampo, ug kana maghiusa sa ilang kasingkasing. Magkuyog sila sa pagtambong sa Kristohanong mga tigom ug magkauban sa pagsangyaw diha sa kanataran. Kining tanan motabang sa pagpatungha ug espirituwal nga bugkos nga magpasuod pa kanila sa usag usa. Mas hinungdanon pa, moresulta kini sa panalangin ni Jehova.

9. Unsay gibuhat ni Abraham maylabot sa pagpangitag asawa alang kang Isaac, ug uban sa unsang resulta?

 ⁹ Tungod sa iyang diyosnong debosyon, ang matinumanong patriarka nga si Abraham naningkamot sa pagpahimuot sa Diyos sa dihang panahon na sa pagpili ug asawa alang sa iyang anak nga si Isaac. Sa iyang piniyalan nga sulugoon, si Abraham miingon: “Ikaw papanumpaon ko pinaagi kang Jehova, ang Diyos sa mga langit ug ang Diyos sa yuta, nga ikaw dili magkuha ug asawa alang sa akong anak gikan sa mga anak nga babaye sa mga Canaanhon nga sa taliwala kanila ako nagapuyo, hinunoa ikaw moadto sa akong yuta ug sa akong mga paryente, ug ikaw magkuha gayod ug usa ka asawa alang sa akong anak, alang kang Isaac. . . . [Si Jehova] magpadala sa iyang manulonda una kanimo, ug ikaw tinong magkuha ug usa ka asawa alang sa akong anak gikan didto.” Si Rebeca nahimong usa ka maayong asawa, nga gimahal pag-ayo ni Isaac.—Genesis 24:3, 4, 7, 14-21, 67.

10. Unsa ang Kasulatanhong mga obligasyon sa mga bana ug asawa?

¹⁰ Kon kita dili-minyong mga Kristohanon, ang diyosnong debosyon motabang kanato sa pag-ugmad sa mga hiyas nga makapaarang kanato sa pagkab-ot sa Kasulatanhong mga kinahanglanon sa kaminyoon. Lakip sa mga obligasyon sa mga bana ug asawa mao kining gihisgotan ni apostol Pablo: “Ang mga asawa kinahanglang magpasakop sa ilang mga bana ingon nga sa Ginoo . . . Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini . . . Ang mga bana angay nga maghigugma sa ilang mga asawa sama sa ilang kaugalingong mga lawas. . . . Higugmaon gayod sa matag usa ang iyang asawa sama sa iyang kaugalingon; sa laing bahin, ang asawa angay nga adunay halawom nga pagtahod sa iyang bana.” (Efeso 5:22-33) Ingon sa atong makita, ang dinasig nga mga pulong ni Pablo nagpasiugda sa panginahanglan alang sa gugma ug pagtahod. Ang pagsunod niining tambaga naglangkit sa matahaong pagkahadlok kang Jehova. Nagkinahanglan kini ug kinasingkasing nga panaad latas sa maayo ug dili maayo nga mga panahon. Ang mga Kristohanon nga nagplanong magminyo kinahanglang moabaga niining maong responsibilidad.

Pagdesidir Kon Kanus-a Magminyo

11. (a) Unsang tambag bahin sa kon kanus-a magminyo ang gihatag diha sa Kasulatan? (b) Unsang panig-ingnan ang nagpakita sa pagkamaalamon sa pagsunod sa tambag sa Bibliya nga narekord sa 1 Corinto 7:36?

¹¹ Hinungdanong mahibaloan kon kanus-a kita andam nga magminyo. Sanglit magkalainlain kini sa matag tawo, ang Kasulatan wala magtino sa edad. Apan, gipakita niini nga mas maayong maghulat hangtod nga kita “lapas na sa pagbuswak sa pagkabatan-on,” sa dihang ang kusganong seksuwal nga mga pangagda makatuis sa maayong panghukom. (1 Corinto 7:36) “Sa dihang nakita nako ang akong mga higala nga nakigdeyt ug nagminyo, kadaghanan sa tin-edyer pa sila, usahay lisod ipadapat kining tambaga,” matod pa ni Michelle. “Apan akong naamgohan nga ang tambag gikan kang Jehova, ug isulti niya kanato kon unsa lamang ang makaayo kanato. Samtang naghulat nga magminyo, nakaarang ako sa paghatag ug dakong pagtagad sa akong relasyon kang Jehova ug sa pagbaton ug diyutayng kasinatian sa kinabuhi, nga lagmit dili nimo mabatonan sa imong pagkatin-edyer. Pipila ka tuig sa ulahi, mas andam na akong modumala sa mga responsibilidad maingon man sa mga problema nga motungha diha sa kaminyoon.”

12. Nganong maalamon nga dili magdalidali sa pagminyo samtang batan-on pa?

¹² Kasagarang madiskobrehan niadtong magdalidali sa pagminyo samtang batan-on pa nga ang ilang mga panginahanglan ug mga gusto mausab samtang nagakahamtong sila. Dayon maamgohan nila nga ang mga butang nga nagustoan nila sa sinugdan dili na diay hinungdanon. Usa ka batan-ong Kristohanong babaye determinadong maminyo sa dihang siya 16 anyos. Ang iyang apohan nga babaye naminyo nianang edara, mao man usab ang iyang inahan. Sa dihang usa ka batan-ong lalaki nga iyang nagustoan midumili sa pagpakigminyo kaniya nianang panahona, mipili siya ug laing lalaki nga andam magpakasal. Apan, sa dihang mihamtong na siya gibasolan gayod niya ang iyang hinanaling desisyon.

13. Kadtong maahat sa pagminyo kasagarang nakulangan sa unsa?

¹³ Sa dihang magplano nga magminyo, hinungdanon nga adunay hamtong nga pagsabot sa tanan nga nalangkit. Ang ahat nga kaminyoon makapatunghag daghang problema nga lagmit dili andam nga dumalahon sa usa ka batan-ong magtiayon. Tingali nakulangan sila sa kasinatian ug pagkahamtong nga gikinahanglan sa pagsagubang sa mga kapit-os sa kaminyoon ug sa pagmatuto sa mga anak. Ang kaminyoon kinahanglang himoon lamang sa dihang kita sa pisikal, mental, ug espirituwal andam nang moabaga sa dumalayong panag-ubanay.

14. Unsay gikinahanglan aron madumala ang mga problema diha sa kaminyoon?

 ¹⁴ Si Pablo misulat nga kadtong maminyo “makaagom ug kasakitan sa unod.” (1 Corinto 7:28) Ang mga problema motungha tungod kay adunay duha ka magkalahing mga personalidad, ug magkalain ang mga panglantaw. Tungod sa tawhanong pagkadili-hingpit, lisod tingali ang pagtuman sa atong Kasulatanhong papel diha sa kahikayan sa kaminyoon. (1 Corinto 11:3; Colosas 3:18, 19; Tito 2:4, 5; 1 Pedro 3:1, 2, 7) Nagkinahanglag pagkahamtong ug espirituwal nga kalig-on sa pagtinguha ug pagsunod sa giya sa Diyos aron mahusay ang mga problema sa mahigugmaong paagi.

15. Unsang papel ang gidula sa mga ginikanan sa pag-andam sa ilang mga anak alang sa kaminyoon? Iilustrar.

¹⁵ Maandam sa mga ginikanan ang ilang mga anak alang sa kaminyoon pinaagi sa pagtabang kanila sa pagsabot sa kahinungdanon sa pagsunod sa giya sa Diyos. Pinaagi sa hanas nga paggamit sa Kasulatan ug sa Kristohanong mga publikasyon, ang mga ginikanan makatabang sa ilang mga anak sa pagtino kon sila o ang ilang umaabot nga mga kapikas andam nang magminyo. a Ang 18-anyos nga si Blossom naghunahuna nga nahigugma siya sa usa ka batan-ong ulitawo sa iyang kongregasyon. Ang batan-ong ulitawo usa ka bug-os-panahong payunir nga ministro, ug gusto nilang magminyo. Apan gihangyo si Blossom sa iyang mga ginikanan nga maghulat una ug usa ka tuig, nga mibati nga bata pa kaayo siya. Sa ulahi misulat si Blossom: “Mapasalamaton kaayo ko nga namati ko nianang maalamong tambag. Sulod sa usa ka tuig, mihamtong ko ug diyutay ug nakita nako nga kining maong batan-ong ulitawo wala makabaton sa mga hiyas alang sa usa ka maayong kapikas sa kaminyoon. Ngadtongadto mibiya siya sa organisasyon, ug nakaikyas ako sa mahimo untang katalagman sa akong kinabuhi. Pagkamaayo gayod nga adunay maalamong mga ginikanan kansang panghukom masaligan!”

‘Magminyo Lamang Diha sa Ginoo’

16. (a) Sa unsang paagi tingali masulayan ang mga Kristohanon maylabot sa ‘pagminyo diha sa Ginoo’? (b) Sa dihang gitental sa pagpakigminyo sa dili-magtutuo, unsay angayng palandongon sa mga Kristohanon?

¹⁶ Klaro kaayo ang sugo ni Jehova sa mga Kristohanon: ‘Magminyo lamang diha sa Ginoo.’ (1 Corinto 7:39) Ang Kristohanong mga ginikanan ug ang ilang mga anak masulayan tingali niining bahina. Sa unsang paagi? Ang mga batan-on gusto tingaling magminyo, apan walay maminyoan diha sa ilang kongregasyon. Labing menos morag ingon niana. Tingali diyutay ra ang mga ulitawo kay sa mga dalaga sa usa ka dapit, o morag walay angayang minyoan nianang dapita. Ang usa ka batan-ong ulitawo nga dili dedikadong membro sa kongregasyon magpakita tingalig interes sa usa ka batan-ong Kristohanong dalaga (o ang ulitawo maoy Kristohanon ug ang dalaga dili), ug dunay pagpit-os nga ikompromiso ang mga sukdanan ni Jehova. Nianang mga kahimtanga, maayong palandongon ang panig-ingnan ni Abraham. Ang usa ka paagi nga nahuptan niya ang maayong relasyon sa Diyos mao ang pagtino nga ang iyang anak nga si Isaac maminyo sa usa ka tinuod nga magsisimba ni Jehova. Mao usab kana ang gibuhat ni Isaac maylabot sa iyang anak nga si Jacob. Kinahanglang maningkamot ang tanan nga nalangkit, apan kini nakapahimuot sa Diyos ug misangpot sa iyang panalangin.—Genesis 28:1-4.

17. Nganong ang pagpakigminyo sa dili-magtutuo lagmit nga makadaot, ug unsa ang labing hinungdanong rason nga ‘magminyo lamang diha sa Ginoo’?

¹⁷ Sa pipila ka kaso, ang dili-magtutuo sa ngadtongadto nahimong Kristohanon. Apan, ang mga pagpakigminyo sa mga dili-magtutuo kasagarang misangpot sa kadaotan. Kadtong dili timbang nga pagkayugo dili parehas ug pagtuo, mga prinsipyo, o mga tumong. (2 Corinto 6:14) Makadaot kini sa komunikasyon ug sa kalipay sa kaminyoon. Pananglitan, usa ka Kristohanong babaye naguol pag-ayo sa kamatuoran nga human sa makapalig-on nga tigom, inigpauli niya sa balay dili siya makahisgot ug espirituwal nga mga butang uban sa iyang dili-magtutuong  kapikas. Siyempre, mas hinungdanon pa, ang ‘pagminyo diha sa Ginoo’ maoy pagpakitag pagkamaunongon kang Jehova. Kon sundon nato ang Pulong sa Diyos, dili kita hukman sa atong kasingkasing, kay ginabuhat nato ang “makapahimuot sa iyang mga mata.”—1 Juan 3:21, 22.

18. Sa dihang magplanong magminyo, unsang hinungdanong mga butang ang angayng hatagag pagtagad, ug ngano?

¹⁸ Sa dihang magplano nga magminyo, ang kaligdong ug espirituwalidad sa umaabot nga kapikas kinahanglang maoy pangunang tagdon. Ang Kristohanong personalidad, uban sa gugma alang sa Diyos ug bug-os-kalag nga debosyon ngadto kaniya, mas bililhon pa kay sa pisikal nga katahom. Ang pag-uyon sa Diyos natagamtam niadtong moapresyar ug motuman sa ilang obligasyon nga mahimong lig-on-sa-espirituwal nga mga kapikas sa kaminyoon. Ug malig-on pag-ayo ang magtiayon kon sila adunay debosyon ngadto sa Maglalalang ug bug-os nga modawat sa iyang giya. Niining paagiha mapasidunggan si Jehova, ug ang kaminyoon magsugod diha sa lig-ong espirituwal nga pasukaranan nga makaamot sa malungtarong relasyon.

[Footnote]

Unsaon Nimo Pagtubag?

• Nganong gikinahanglan ang giya sa Diyos sa pagpili ug maayong kapikas sa kaminyoon?

• Sa unsang paagi ang diyosnong debosyon motabang sa pagpalig-on sa bugkos sa kaminyoon?

• Sa unsang paagi maandam sa mga ginikanan ang ilang mga anak alang sa kaminyoon?

• Nganong hinungdanon nga ‘magminyo lamang diha sa Ginoo’?

[Mga Pangutana sa Pagtuon]

[Mga hulagway sa panid 17]

Ang pagpadapat sa tambag sa Diyos sa pagpili sa imong kapikas mahimong moresulta sa dakong kalipay

[Mga hulagway sa panid 18]

Ang dagayang mga panalangin mosangpot tungod sa ‘pagminyo lamang diha sa Ginoo’