Mga Pangutana Gikan sa mga Magbabasa

Sanglit si Jehova andam nga mopasaylo sa mga sala pinasukad sa halad lukat, nganong ang mga Kristohanon kinahanglang mosugid niini ngadto sa mga ansiyano sa kongregasyon?

Ingon sa makita sa kaso ni David ug Bat-seba, gipasaylo ni Jehova ang sala ni David, bisan pag grabe kadto, tungod sa tinuod nga paghinulsol ni David. Sa dihang ang manalagnang si Natan miadto kaniya, prangkang misugid si David: “Ako nakasala batok kang Jehova.”—2 Samuel 12:13.

Apan, dili lamang kay modawat sa sinserong pagsugid ug mopasaylo si Jehova sa makasasala kondili siya usab naghimog mahigugmaong mga tagana sa pagtabang sa nakasala aron sa ngadtongadto siya maulian sa espirituwal. Sa kaso ni David, miabot ang tabang pinaagi sa manalagnang si Natan. Karong adlawa, diha sa Kristohanong kongregasyon, anaa ang tigulang nga mga lalaki nga hamtong sa espirituwal, o mga ansiyano. Ang disipulong si Santiago nag-ingon: “Aduna bay masakiton kaninyo [sa espirituwal]? Magpatawag siyag mga ansiyano sa kongregasyon, ug paampoa sila alang kaniya, nga maghaplas kaniya ug lana sa ngalan ni Jehova. Ug ang pag-ampo sa pagtuo mag-ayo sa usa nga naluya, ug si Jehova magbangon kaniya. Dugang pa, kon siya nakasala, siya pagapasayloon.”—Santiago 5:14, 15.

Ang eksperyensiyadong mga ansiyano dakog ikatabang sa paghupay sa kasakit sa kasingkasing nga gibati sa nagbasol nga makasasala. Maningkamot sila nga sundogon si Jehova diha sa ilang mga pakiglabot  sa makasasala. Dili gayod nila buot nga mahimong mapig-oton, bisan tuod nga nahiangay tingali ang bug-at nga disiplina. Hinunoa, sila maluluy-ong magtagad sa dinaliang mga panginahanglan sa indibiduwal. Sa pagkamapailobon sila maningkamot nga ipasibo pag-usab ang panghunahuna sa nakasala pinaagi sa Pulong sa Diyos. (Galacia 6:1) Bisan pag ang usa ka tawo dili boluntaryong mosugid sa iyang sala, mahimong siya matukmod sa paghinulsol kon duolon siya sa mga ansiyano, sama kang David sa dihang giduol siya ni Natan. Busa ang pagpaluyo nga ihatag pinaagi sa mga ansiyano motabang sa nakasala aron malikayan ang kapeligrohan sa pagkasala pag-usab ug ang seryosong mga sangpotanan nga mahimong usa ka tig-a nga mamumuhat ug sala.—Hebreohanon 10:26-31.

Dili gayod sayon ang pagsugid ngadto sa uban sa mga buhat nga ikaulaw sa usa ug mangayog pasaylo. Nagkinahanglan kanag pangsulod nga kalig-on. Apan, palandonga sa makadiyot kon dili kini buhaton. Usa ka tawo nga wala magsugid sa iyang seryosong sala ngadto sa mga ansiyano sa kongregasyon miingon: “Gibati ko ang kaguol sa akong kasingkasing nga dili gayod mawala. Gipauswag ko ang akong mga paningkamot sa buluhatong pagsangyaw, apan ang pagbati sa pagbasol nagpabilin gihapon.” Iyang gibati nga igo na ang pagsugid ngadto sa Diyos pinaagi sa pag-ampo, apan tin-aw nga dili gayod, tungod kay iyang gibati ang sama sa mga gibati ni Haring David. (Salmo 51:8, 11) Pagkalabing maayo gayod nga dawaton ang mahigugmaong tabang nga gitagana ni Jehova pinaagi sa mga ansiyano!