Mga Pangutana Gikan sa mga Magbabasa

Sa 1 Pedro 4:3, atong mabasa nga ang pipila ka Kristohanon nakig-ambit kaniadto sa “gidiling mga idolatriya.” Dili ba ang tanang idolatriya gihukman ug gidili sa Diyos?

Oo, sa panglantaw sa Diyos, ang tanang idolatriya gidili. Kadtong nagtinguha sa iyang pag-uyon dili mahimong malangkit sa idolatriya.—1 Corinto 5:11; Pinadayag 21:8.

Apan, mopatim-aw nga si apostol Pedro naghisgot sa idolatriya gikan sa lahi nga punto-de-bista. Ang usa ka katarongan mao nga, taliwala sa daghang karaang mga nasod, ang idolatriya maoy komon ug dili supak sa balaod sa mga awtoridad. Sa ato pa, ang balaod sa nasod wala magdili sa maong idolatriya. Ang ubang idolatriya maoy bahin pa gani sa polisa sa nasod o kagamhanan. Niana nga diwa, ang pipila nakig-ambit sa ‘mga idolatriya nga dili supak sa balaod’ una pa mahimong mga Kristohanon. (New World Translation, 1950 nga edisyon) Pananglitan, tingali ilado kaayo nga ang Hari sa Babilonya nga si Nabukodonosor nagpatindog ug idolatrosong larawan nga bulawan, apan ang mga alagad ni Jehova nga si Sadrak, Mesak, ug Abednego midumili sa pagsimba niana.—Daniel 3:1-12.

Gikan sa laing panglantaw, daghang idolatrosong mga rituwal naglakip sa mga buhat nga tatawng sukwahi sa bisan unsang kinaiyanhong balaod o moral nga pagbati nga naggikan sa napanunod nga tanlag. (Roma 2:14, 15) Misulat si apostol Pablo bahin sa imoral nga mga buhat nga “sukwahi sa kinaiyahan” ug “malaw-ay,” ug kini nahimo nang bahin diha sa relihiyosong mga rituwal. (Roma 1:26, 27) Ang mga lalaki ug babaye nga nakig-ambit sa gidiling idolatriya wala magsunod sa ilang kinaiyanhong pagbati kon unsay maayo ug daotan. Haom gayod nga kadtong nahimong mga Kristohanon mibiya niadtong dunot nga mga buhat.

Dugang pa sa nahisgotan na, ang maong mga idolatriya nga komon taliwala sa mga dili-Hudiyo gihukman ni Jehova nga Diyos. Busa kini maoy supak sa balaod. a—Colosas 3:5-7.

[Footnote]