Mga Magmamantala sa Gingharian Nagtaho

Ang Diyos Nagpahid sa Iyang mga Luha

ANG mga tawo nga nagpahiuyon sa ilang kinabuhi sa mga balaod ug mga prinsipyo ni Jehova gipanalanginan pag-ayo. Bisan tuod ang paghimo sa gikinahanglang kausaban dili kanunayng sayon, daling mabatonan ang tabang ug ang pagdasig. (Salmo 84:11) Ang mosunod nga kasinatian gikan sa Habagatan-sidlakang Asia nag-ilustrar niini.

Samtang nagbakasyon, usa ka Saksi nga babaye gikan sa Pransiya nakigsulti bahin sa katuyoan ni Jehova alang sa yuta ngadto sa usa ka tag-iya sa shop nga ginganlag Kim. a Siya nagbilin usab kang Kim ug usa ka kopya sa librong Ikaw Mabuhing Walay Kataposan sa Paraiso sa Yuta. Samtang nagbasabasa sa libro, nabasahan ni Kim ang mga pulong, “iyang pagapahiran ang tanang luha gikan sa ilang mga mata.” (Pinadayag 21:4) “Kining tekstoha nakapatandog pag-ayo kanako,” nahinumdom si Kim. “Tungod kay sayag ang akong panagway didto sa trabahoan, kinsay mahibalo nga sa dihang mopauli ako sa amoa sa magabii, ako maghilak hangtod nga mahikatulog?” Nagbutyag sa hinungdan sa iyang kaguol, siya miingon: “Nakigpuyo ako sa usa ka lalaki sulod sa 18 ka tuig ug ako nasubo pag-ayo tungod kay siya nagdumili sa pagpakasal kanako. Buot kong hunongon na kining paagiha sa kinabuhi, apan tungod kay ako dugay na kaayong nakigpuyo kaniya, wala akoy kaisog sa pagbuhat niana.”

Wala madugay sa ulahi, si Kim midawat ug usa ka pagtuon sa Bibliya uban sa usa sa mga Saksi ni Jehova nga ginganlan ug Linh. “Maikagon ako nga ipadapat ang mga pagtulon-an sa Bibliya,” nag-ingon si Kim. “Pananglitan, wala na ako mosimba sa akong mga katigulangan, bisan tuod ug kini mitultol sa pagsupak sa akong pamilya. Dugang pa, naningkamot ako nga himoong legal ang among pakigloon, apan ang akong puyopuyo midumili sa pagbuhat niana. Sa maong malisod nga panahon, ang Saksi sa Pransiya nagpadayon sa pagpadala kanako ug mga publikasyon sa Bibliya, ug si Linh makapadasig kaayo kanako. Ang pailob ug ang mahigugmaong tabang niining mga igsoong babaye nakatabang kanako nga makalahutay hangtod naila ko kon unsa gayod ang tinuod nga batasan sa akong puyopuyo. Nadiskobrehan ko nga siya aduna na diay 5 ka ‘asawa’ ug 25 ka anak! Kini nakahatag kanako ug kaisog nga biyaan siya.

“Ang pagbiya sa usa ka hamugaway nga balay aron mopuyo sa usa ka gamayng apartment dili sayon. Dugang pa, ang akong kanhing puyopuyo nagpit-os kanako nga mobalik pag-usab sa pakig-ipon kaniya, nga naghulga pa gani kanako nga daoton ang akong nawong pinaagi sa asido kon ako modumili. Uban sa tabang ni Jehova, nakahimo ako sa pagbuhat sa matarong.” Si Kim nagpadayon sa pag-uswag ug sa kataposan siya nabawtismohan niadtong Abril 1998. Dugang pa, duha sa iyang mga igsoong babaye ug ang iyang tin-edyer nga anak nga lalaki nagsugod pagtuon sa Bibliya uban sa mga Saksi ni Jehova.

“Kaniadto akong gihunahuna kanunay nga ang akong kinabuhi wala nay paglaom,” nag-ingon si Kim. “Apan, karon ako malipayon ug dili na ako mohilak sa magabii. Gipahiran na ni Jehova ang mga luha gikan sa akong mga mata.”

[Footnote]