‘Isul-ob Ninyo ang Hataas-nga-Pailob’
‘Isul-ob Ninyo ang Hataas-nga-Pailob’
“Isul-ob ninyo ang malumong mga pagmahal sa pagkamabination . . . ug hataas-nga-pailob.”—COLOSAS 3:12.
1. Iasoy ang usa ka maayong panig-ingnan sa pagpakitag hataas-nga-pailob.
SI Régis, kinsa nagpuyo sa habagatan-kasadpang Pransiya, nahimong bawtismadong Saksi ni Jehova sa 1952. Sulod sa daghang tuig gihimo sa iyang asawa ang tanan aron mababagan siya sa iyang mga paningkamot sa pag-alagad kang Jehova. Gisulayan sa iyang asawa pagpahiyos ang mga ligid sa iyang sakyanan aron dili siya makatambong sa mga tigom, ug sa usa ka higayon gisundan pa gani siya sa iyang asawa samtang nagwali siya sa mensahe sa Bibliya sa balay-ug-balay, nga nagbugalbugal kaniya samtang nakigsulti siya sa mga tagbalay bahin sa maayong balita sa Gingharian. Bisan pa niining padayong pagsupak, si Régis nagpadayon sa pagpakitag hataas-nga-pailob. Busa, si Régis maoy usa ka maayong panig-ingnan alang sa tanang Kristohanon, tungod kay gibaoran ni Jehova ang tanan niyang mga magsisimba nga magpakitag hataas-nga-pailob sa ilang mga pakiglabot sa uban.
2. Unsa ang literal nga kahulogan sa Gregong pulong alang sa “hataas-nga-pailob,” ug unsay gipasabot niining pulonga?
2 Ang Gregong pulong alang sa “hataas-nga-pailob” sa literal nagkahulogan ug “pagkataas sa espiritu.” Ang Bag-ong Kalibotang Hubad napulo ka beses nga naghubad niining pulonga nga “hataas-nga-pailob,” tulo ka beses nga “pailob,” ug usa ka beses nga “pagpasundayag ug pagkamapailobon.” Ang Hebreohanon ug Gregong mga pulong nga gihubad ug “hataas-nga-pailob” naglakip sa ideya sa pagpailob, pag-antos, ug pagkahinay sa kasuko.
3. Sa unsang paagi ang Kristohanong panglantaw sa hataas-nga-pailob lahi nianang sa unang-siglong mga Grego?
3 Ang mga Grego sa unang siglo wala mag-isip sa hataas-nga-pailob ingong hiyas. Ang pulong mismo wala gayod gamita sa Stoic nga mga pilosopo. Sumala sa eskolar sa Bibliya nga si William Barclay, ang hataas-nga-pailob “mao ang kaatbang sa Gregong hiyas,” nga nanghambog lakip sa ubang mga butang “sa pagdumili nga motugot sa bisan unsang insulto o pagdaot.” Siya nag-ingon: “Alang sa mga Grego ang tawong may katakos mao ang tawo nga mobuhat sa bisan unsa aron makapanimalos. Alang sa Kristohanon ang tawong may katakos mao ang tawo kinsa, bisan pag makapanimalos siya, modumili sa pagbuhat niana.” Ang mga Grego lagmit nag-isip sa hataas-nga-pailob ingong ilhanan sa kahuyangan, apan dinhi, sama sa ubang mga kaso, “ang binuang nga butang sa Diyos mas maalamon kay sa mga tawo, ug ang mahuyang nga butang sa Diyos mas kusganon kay sa mga tawo.”—1 Corinto 1:25.
Ang Panig-ingnan ni Kristo sa Pagpakitag Hataas-nga-Pailob
4, 5. Unsang maayo kaayong panig-ingnan sa pagpakitag hataas-nga-pailob ang gihatag ni Jesus?
4 Ikaduha lamang kang Jehova, si Kristo Jesus naghatag ug maayong panig-ingnan sa pagpakitag hataas-nga-pailob. Sa dihang nailalom sa grabeng pagpit-os, si Jesus nagpakitag katingalahang pagpugong. Bahin kaniya kini gitagna: “Siya gipit-os pag-ayo, ug iyang gitugotan nga siya sakiton; apan wala niya bukha ang iyang baba. Siya gidala sama gayod sa usa ka karnero aron pagaihawon; ug sama sa usa ka bayeng karnero nga atubangan sa iyang mga tigtupi naamang, siya usab wala mobuka sa iyang baba.”—Isaias 53:7.
5 Pagkatalagsaong hataas-nga-pagpailob ang gipakita ni Jesus sa tibuok niyang ministeryo dinhi sa yuta! Giantos niya ang malipotong mga pangutana sa iyang mga kaaway ug ang mga insulto sa mga magsusupak. (Mateo 22:15-46; 1 Pedro 2:23) Siya mapailobon sa iyang mga tinun-an, bisan pag nagsige silag lalis kon kinsa ang labing dako. (Marcos 9:33-37; 10:35-45; Lucas 22:24-27) Ug pagkadalayegong pagpugong ang gipakita ni Jesus sa gabii sa pagbudhi kaniya sa dihang si Pedro ug Juan nangatulog human sultii nga “magpadayon sa pagbantay”!—Mateo 26:36-41.
6. Sa unsang paagi nakabenepisyo si Pablo sa pagpakita ni Jesus ug hataas-nga-pailob, ug unsay atong makat-onan gikan niini?
6 Human sa iyang kamatayon ug pagkabanhaw, si Jesus padayong nagpakitag hataas-nga-pailob. Si apostol Pablo ilabinang nakaamgo niini, tungod kay kanhi siya usa ka maglulutos sa mga Kristohanon. Si Pablo misulat: “Kasaligan ug bug-os nga dalawaton ang mga pulong nga si Kristo Jesus mianhi sa kalibotan aron sa pagluwas sa mga makasasala. Niini nila ako maoy kinalabwan. Bisan pa niana, ang hinungdan kon nganong ako gipakitaag kaluoy mao nga pinaagi kanako ingong kinalabwang pananglitan si Kristo Jesus makapasundayag sa tanan niyang hataas-nga-pailob ingong usa ka sanglitanan niadtong magabutang sa ilang pagtuo kaniya alang sa kinabuhing walay kataposan.” (1 Timoteo 1:15, 16) Bisan unsay atong kagahapon, kon motuo kita kang Jesus, siya magpakitag hataas-nga-pailob kanato—samtang, siyempre, magdahom kanato nga magpatunghag “mga buhat nga nahiangay sa paghinulsol.” (Buhat 26:20; Roma 2:4) Ang mga mensahe nga gipadala ni Kristo sa pito ka kongregasyon sa Asia Minor nagpakita nga bisan tuod siya nagpakitag hataas-nga-pailob, nagdahom siya ug pag-uswag.—Pinadayag, mga kapitulo 2 ug 3.
Usa ka Bunga sa Espiritu
7. Unsay kalabotan sa hataas-nga-pailob ug sa balaang espiritu?
7 Sa ikalimang kapitulo sa iyang sulat sa mga taga-Galacia, gitandi ni Pablo ang mga buhat sa unod sa bunga sa espiritu. (Galacia 5:19-23) Tungod kay ang hataas-nga-pailob maoy usa sa mga hiyas ni Jehova, kining hiyasa naggikan kaniya ug maoy usa ka bunga sa iyang espiritu. (Exodo 34:6, 7) Sa pagkatinuod, ang hataas-nga-pailob gilista nga ikaupat sa paghubit ni Pablo sa bunga sa espiritu, lakip sa “gugma, kalipay, pakigdait, . . . kalulot, pagkamaayo, pagtuo, kalumo, pagpugong-sa-kaugalingon.” (Galacia 5:22, 23) Busa, sa dihang ang mga alagad sa Diyos magpasundayag ug diyosnong pailob, o hataas-nga-pailob, gibuhat nila kana ilalom sa impluwensiya sa balaang espiritu.
8. Unsay makapaarang kanato sa pag-ugmad sa bunga sa espiritu, lakip na sa hataas-nga-pailob?
8 Apan, wala kini magpasabot nga ipugos ni Jehova ang iyang espiritu diha sa usa ka tawo. Kinahanglang kinabubut-on kitang mopasignunot sa impluwensiya niini. (2 Corinto 3:17; Efeso 4:30) Tugotan nato ang espiritu nga molihok diha sa atong kinabuhi pinaagi sa pag-ugmad sa mga bunga niini diha sa tanan natong ginabuhat. Human ilista ang mga buhat sa unod ug ang bunga sa espiritu, si Pablo midugang: “Kon kita nagkinabuhi pinaagi sa espiritu, magpadayon usab kita sa paglakaw nga mahusay pinaagi sa espiritu. Ayaw pagpahisalaag: Ang Diyos dili kayagayagaan. Kay bisan unsay ginapugas sa usa ka tawo, kini usab iyang anihon; tungod kay siya nga nagapugas alang sa iyang unod moani ug pagkadunot gikan sa iyang unod, apan siya nga nagapugas alang sa espiritu moani ug kinabuhing walay kataposan gikan sa espiritu.” (Galacia 5:25; 6:7, 8) Aron kita molampos sa pag-ugmad sa hataas-nga-pailob, kinahanglang ugmaron usab nato ang ubang bunga nga gipatungha sa balaang espiritu diha sa mga Kristohanon.
“Ang Gugma Hataas-ug-Pailob”
9. Ngano kahang giingnan ni Pablo ang mga taga-Corinto nga “ang gugma hataas-ug-pailob”?
9 Gipakita ni Pablo nga adunay linaing kalambigitan ang gugma ug hataas-nga-pailob sa dihang siya miingon: “Ang gugma hataas-ug-pailob.” (1 Corinto 13:4) Usa ka eskolar sa Bibliya, si Albert Barnes, nagsugyot nga gipasiugda ni Pablo kini tungod sa panag-indig ug panagbangi nga naglungtad diha sa Kristohanong kongregasyon sa Corinto. (1 Corinto 1:11, 12) Si Barnes miingon: “Ang pulong nga gigamit dinhi [alang sa hataas-nga-pailob] maoy kaatbang sa pagdalidali: sa masuk-anong mga pulong ug hunahuna, ug sa pagkapungtanon. Nagpasabot kini sa kahimtang sa hunahuna nga MAKAANTOS UG DUGAY sa dihang gidaogdaog, gihagit.” Ang gugma ug hataas-nga-pailob dako gihapog ikatampo sa kalinaw sa Kristohanong kongregasyon.
10. (a) Sa unsang paagi ang gugma motabang kanato sa pagpakitag hataas-nga-pailob, ug unsang tambag ang gihatag ni apostol Pablo bahin niini? (b) Unsay komento sa usa ka eskolar sa Bibliya bahin sa hataas-nga-pailob ug kalulot sa Diyos? (Tan-awa ang potnot.)
10 “Ang gugma hataas-ug-pailob ug maluloton. Ang gugma . . . dili mangita sa kaugalingong kaayohan niini, dili mapasuko.” Busa, sa daghang paagi, ang gugma motabang kanato sa pagpakitag hataas-nga-pailob. a (1 Corinto 13:4, 5) Ang gugma motabang kanato sa pagpailob sa usag usa ug paghinumdom nga kitang tanan dili hingpit ug adunay mga sayop ug mga sipyat. Motabang kini kanato nga mahimong mahunahunaon ug mapinasayloon. Si apostol Pablo nagdasig kanato sa paglakaw “uban ang bug-os nga pagpaubos sa hunahuna ug kalumo, uban ang hataas-nga-pailob, nga mag-inantosay sa usag usa diha sa gugma, sa matinuoron manlimbasog nga mosunod sa pagkausa sa espiritu sa nagahiusang bugkos sa pakigdait.”—Efeso 4:1-3.
11. Nganong ilabinang hinungdanon nga magpakitag hataas-nga-pailob diha sa Kristohanong mga komunidad?
11 Ang hataas-nga-pailob sa bahin sa mga membro niini makatampo sa kalinaw ug kalipay sa Kristohanong mga komunidad, diha man sa mga kongregasyon, mga puy-anang Bethel, puy-anan sa mga misyonaryo, mga tem sa konstruksiyon, o mga tunghaan. Tungod sa mga kalainan sa personalidad, mga gusto, pagmatuto, mga sukdanan sa pagkamatinahoron, bisan sa paghinlo, ang masulayong mga situwasyon mahimong motungha matag karon ug unya. Motungha usab kini diha sa mga pamilya. Ang pagkahinay sa kasuko hinungdanon. (Proverbio 14:29; 15:18; 19:11) Ang hataas-nga-pailob—mapailobong paglahutay, sa paglaom nga moarang-arang ang kahimtang—gikinahanglan sa tanan.—Roma 15:1-6.
Ang Hataas-nga-Pailob Motabang Kanato sa Paglahutay
12. Nganong hinungdanon ang hataas-nga-pailob panahon sa masulayong mga kahimtang?
12 Ang hataas-nga-pailob motabang kanato sa paglahutay sa masulayong mga kahimtang nga morag wala nay kataposan o walay bisan unsang dihadihang solusyon. Tinuod kini sa kahimtang ni Régis, nga gihisgotan sa sinugdanan. Sulod sa daghang tuig, ang iyang asawa misupak sa iyang mga paningkamot sa pag-alagad kang Jehova. Apan, usa ka adlaw niana miduol ang iyang asawa kaniya nga naghilak ug miingon: “Nahibalo ako nga kini mao ang kamatuoran. Tabangi ako. Gusto kong magtuon sa Bibliya.” Sa ngadtongadto nabawtismohan siya ingong Saksi. Si Régis miingon: “Nagpamatuod kini nga si Jehova nagapanalangin niadtong daghang tuig sa pagpakigbisog, pagpailob, ug paglahutay.” Gigantihan ang iyang pagpakitag hataas-nga-pailob.
13. Unsay nakatabang kang Pablo sa paglahutay, ug sa unsang paagi ang iyang panig-ingnan motabang kanato sa paglahutay?
13 Balik niadtong unang siglo K.P., si apostol Pablo maoy maayong panig-ingnan sa pagpakitag hataas-nga-pailob. (2 Corinto 6:3-10; 1 Timoteo 1:16) Sa naghinapos ang iyang kinabuhi, dihang gitambagan niya ang iyang mas batang kauban nga si Timoteo, gipasidan-an siya ni Pablo nga ang tanang Kristohanon mag-atubang ug mga pagsulay. Gihisgotan ni Pablo ang iyang panig-ingnan ug gisugyot niya ang sukaranang Kristohanong mga hiyas nga hinungdanon sa paglahutay. Siya misulat: “Imong gisunod pag-ayo ang akong gitudlo, ang akong paagi sa pagkinabuhi, ang akong katuyoan, ang akong pagtuo, ang akong hataas-nga-pailob, ang akong gugma, ang akong pagkamainantoson, ang akong mga paglutos, ang akong mga pag-antos, ang mga butang nga nahitabo kanako didto sa Antioquia, sa Iconio, sa Listra, ang matang sa mga paglutos nga akong giantos; apan gikan niining tanan giluwas ako sa Ginoo. Sa pagkatinuod, ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:10-12; Buhat 13:49-51; 14:19-22) Aron makalahutay, kitang tanan nagkinahanglan ug pagtuo, gugma, ug hataas-nga pailob.
Gisul-oban ug Hataas-nga-Pailob
14. Sa unsa gipakasama ni Pablo ang diyosnong mga hiyas sama sa hataas-nga-pailob, ug unsang tambag ang gihatag niya sa mga Kristohanon sa Colosas?
14 Gipakasama ni apostol Pablo ang hataas-nga-pailob ug ang ubang diyosnong mga hiyas sa mga besti nga angayng isul-ob sa Kristohanon human hukasa ang mga buhat nga iya sa “daang pagkatawo.” (Colosas 3:5-10) Siya misulat: “Ingon nga mga pinili sa Diyos, balaan ug hinigugma, isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.”—Colosas 3:12-14.
15. Unsay mga resulta sa dihang “isul-ob” sa mga Kristohanon ang hataas-nga-pailob ug ubang diyosnong mga hiyas?
15 Sa dihang “isul-ob” sa mga membro sa kongregasyon ang pagkamabination, kalulot, pagpaubos sa hunahuna, kalumo, hataas-nga-pailob, ug gugma, masulbad nila ang mga problema ug makapadayon nga nahiusa diha sa pag-alagad kang Jehova. Ang Kristohanong mga ansiyano ilabina kinahanglang magpakitag hataas-nga-pailob. Aduna tingaliy mga higayon sa dihang kinahanglan nilang badlongon ang laing Kristohanon, apan adunay lainlaing mga paagi sa pagbuhat niini. Gihubit ni Pablo ang kinamaayohang tinamdan sa dihang misulat siya kang Timoteo: “Pamadlong, pagsaway, panambag, uban sa tanang hataas-nga-pailob ug arte sa pagpanudlo.” (2 Timoteo 4:2) Oo, ang mga karnero ni Jehova kinahanglang kanunay trataron uban ang hataas-nga-pailob, dignidad, ug kalumo.—Mateo 7:12; 11:28; Buhat 20:28, 29; Roma 12:10.
‘Hataas-nga-Pailob sa Tanan’
16. Unsay mahimong moresulta sa dihang kita magpakitag ‘hataas-nga-pailob sa tanan’?
16 Ang pagpakita ni Jehova ug hataas-nga-pailob ngadto sa katawhan nagpailalom kanato sa moral nga obligasyon nga magpakitag ‘hataas-nga-pailob sa tanan.’ (1 Tesalonica 5:14) Nagpasabot kini nga magmapailobon uban sa dili-Saksi nga mga membro sa pamilya, mga silingan, kauban sa trabaho, mga klasmet. Daghang pagpihig ang nabuntog sa mga Saksi kinsa, usahay sulod sa daghang tuig, nag-antos sa makantalitahong mga komento o direktang paglutos gikan sa mga tawo nga gikauban nila sa trabahoan o sa eskuylahan. (Colosas 4:5, 6) Si apostol Pedro misulat: “Hupti ninyo ang maayong panggawi taliwala sa mga nasod, aron nga, sa butang nga ilang gisulti batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita maghimaya sa Diyos sa adlaw sa iyang pagsusi.”—1 Pedro 2:12.
17. Sa unsang paagi masundog nato ang gugma ug hataas-nga-pailob ni Jehova, ug nganong angay natong buhaton kana?
17 Ang pagpakita ni Jehova ug hataas-nga-pailob magkahulogan ug kaluwasan alang sa milyonmilyon. (2 Pedro 3:9, 15) Kon sundogon nato ang gugma ug hataas-nga-pailob ni Jehova, magpadayon kitang mapailobon sa pagwali sa maayong balita sa Gingharian sa Diyos ug pagtudlo sa uban sa pagpasakop sa pagmando sa Gingharian ni Kristo. (Mateo 28:18-20; Marcos 13:10) Kon mohunong kita sa pagwali, sama ra nga buot natong limitehan ang hataas-nga-pailob ni Jehova ug napakyas kita sa pag-ila sa katuyoan niini, nga mao ang pagtultol sa mga tawo ngadto sa paghinulsol.—Roma 2:4.
18. Unsay giampo ni Pablo alang sa mga taga-Colosas?
18 Sa iyang sulat ngadto sa mga Kristohanon sa Colosas, sa Asia Minor, si Pablo misulat: “Mao usab nga kami, sukad sa adlaw nga kami nakadungog niini, wala mohunong sa pag-ampo alang kaninyo ug sa paghangyo nga kamo unta mapuno sa tukmang kahibalo sa iyang kabubut-on diha sa tanang kaalam ug espirituwal nga pagsabot, aron kamo magalakaw nga takos kang Jehova aron bug-os nga makapahimuot kaniya samtang padayon kamong magapamunga sa tanang maayong buhat ug molambo sa tukmang kahibalo sa Diyos, nga gihimong gamhanan sa bug-os nga gahom sumala sa iyang mahimayaong gahom aron makaantos sa bug-os ug magpakitag hataas-nga-pailob uban ang kalipay.”—Colosas 1:9-11.
19, 20. (a) Sa unsang paagi malikayan nato nga lantawon ang padayong pagpakita ni Jehova ug hataas-nga-pailob ingong pagsulay? (b) Unsang mga kaayohan ang modangat tungod sa atong pagpakitag hataas-nga-pailob?
19 Ang padayong pagpakita ni Jehova ug hataas-nga-pailob dili usa ka pagsulay kanato kon kita “mapuno sa tukmang kahibalo sa iyang kabubut-on,” nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4) Kita ‘padayon nga magapamunga sa tanang maayong buhat,’ ilabina ang pagwali ‘niining maayong balita sa gingharian.’ (Mateo 24:14) Kon matinumanon kitang magpadayon sa pagbuhat niini, si Jehova maghimo kanatong “gamhanan sa bug-os nga gahom,” nga tungod niini kita “makaantos sa bug-os ug magpakitag hataas-nga-pailob uban ang kalipay.” Kon ginabuhat nato kana, kita “magalakaw nga takos kang Jehova,” ug mabatonan nato ang kalinaw nga modangat tungod sa pagkahibalo nga kita ‘bug-os nga nakapahimuot kaniya.’
20 Hinaot bug-os kitang makombinsir sa kaalam sa pagpakita ni Jehova ug hataas-nga-pailob. Kini moresulta sa atong kaluwasan ug kaluwasan niadtong mamati sa atong pagwali ug pagpanudlo. (1 Timoteo 4:16) Ang pag-ugmad sa bunga sa espiritu—gugma, kalulot, pagkamaayo, kalumo, ug pagpugong-sa-kaugalingon—makapaarang kanato nga malipayong magpakitag hataas-nga-pailob. Mas makaarang kita sa pagkinabuhing malinawon uban sa mga membro sa atong pamilya maingon man sa atong mga igsoong lalaki ug babaye sulod sa kongregasyon. Ang hataas-nga-pailob motabang usab kanato nga magmapailobon sa atong mga kauban sa trabaho o kauban sa tunghaan. Ug ang atong pagpakitag hataas-nga-pailob adunay katuyoan, nga mao ang pagluwas sa mga makasasala ug paghimaya sa Diyos sa hataas-nga-pailob, si Jehova.
[Footnote]
a Nagkomento bahin sa giingon ni Pablo nga “ang gugma hataas-ug-pailob ug maluloton,” ang eskolar sa Bibliya nga si Gordon D. Fee nagsulat: “Sa teolohiya pinasukad sa mga sulat ni Pablo kini [hataas-nga-pailob ug kalulot] naghawas sa duha ka bahin sa tinamdan sa Diyos ngadto sa tawo (cf. Roma 2:4). Sa usa ka bahin, ang mahigugmaong pagkamainantoson sa Diyos gipasundayag pinaagi sa pagpugong niya sa iyang kasuko gumikan sa pagrebelde sa tawo; sa laing bahin, ang iyang kalulot makita diha sa libolibo ka pilo nga pagpasundayag sa iyang kaluoy. Busa ang paghubit ni Pablo sa gugma nagsumikad niining duha-ka-pilo nga paghubit sa Diyos, kinsa pinaagi kang Kristo nagpakita sa iyang kaugalingon nga mainantoson ug maluloton ngadto niadtong takos sa paghukom sa Diyos.”
Makapatin-aw Ka Ba?
• Sa unsang mga paagi si Kristo usa ka maayo kaayong panig-ingnan sa pagpakitag hataas-nga-pailob?
• Unsay motabang kanato sa pag-ugmad ug hataas-nga-pailob?
• Sa unsang paagi ang pagpakitag hataas-nga-pailob motabang sa mga pamilya, Kristohanong mga komunidad, ug mga ansiyano?
• Sa unsang paagi ang atong pagpakitag hataas-nga-pailob maghatag ug kaayohan kanato ug sa uban?
[Mga Pangutana sa Pagtuon]
[Hulagway sa panid 15]
Bisag nailalom sa grabeng pagpit-os, si Jesus mapailobon sa iyang mga tinun-an
[Hulagway sa panid 16]
Ang Kristohanong mga magtatan-aw giawhag sa pagpakitag maayong panig-ingnan sa pagpasundayag ug hataas-nga-pailob sa pagpakiglabot sa ilang mga igsoon
[Hulagway sa panid 17]
Kon sundogon nato ang gugma ug hataas-nga-pailob ni Jehova, magpadayon kita sa pagwali sa maayong balita
[Hulagway sa panid 18]
Si Pablo nag-ampo nga ang mga Kristohanon “magpakitag hataas-nga-pailob uban ang kalipay”