Sugilanon sa Kinabuhi

Usa ka Dagaya nga Kinabuhi Diha sa Pag-alagad Kang Jehova

SUMALA SA GIASOY NI RUSSELL KURZEN

Natawo ako niadtong Septiyembre 22, 1907, pito ka tuig sa wala pa ang talagsaong yugto nga nagsugod sa pagbuto sa unang gubat sa kalibotan. Ang among pamilya adunahan sa labing hinungdanong paagi. Human nimo mahibaloan ang pipila ka detalye sa among kasaysayan, ako nagtuo nga mouyon ka.

SA BATA pa siya, si Lola Kurzen nangita na sa kamatuoran bahin sa Diyos. Sa wala pa siya matin-edyer, mitambong siya sa ubay-ubayng lainlain nga mga simbahan diha sa iyang matahom nga lungsod nga natawhan sa Spiez, Switzerland. Sa 1887, pipila ka tuig human siya maminyo, ang pamilyang Kurzen miduyog sa grupo sa mga langyaw nga midunggo sa kabaybayonan sa Tinipong Bansa.

Ang pamilya mipuyo sa Ohio, diin, sa mga tuig 1900, nakaplagan ni Lola ang bahandi nga iyang gipangita. Nakaplagan kini diha sa mga panid sa libro ni Charles Taze Russell nga The Time Is at Hand, sa pinulongang Aleman. Nasabtan dayon niya nga ang iyang nabasa didto naundan sa kahayag sa kamatuoran sa Bibliya. Bisan pag si Lola halos dili makabasa ug Iningles, misuskribir siya sa magasing Bantayanang Torre sa Iningles. Sa ingon nakakat-on siyag dugang nga mga kamatuoran sa Bibliya ug, sa samang higayon, sa pinulongang Iningles. Si Lolo wala gayod magpakitag interes sa espirituwal nga mga butang sama sa gipakita sa iyang asawa.

Sa 11 ka anak ni Lola Kurzen, 2 sa iyang mga anak nga lalaki, si John ug Adolph, ang nagpabili sa espirituwal nga bahanding iyang nakaplagan. Si John maoy akong amahan, ug nabawtismohan siya sa 1904 sa St. Louis, Missouri, sa kombensiyon sa mga Estudyante sa Bibliya, nga maoy pagkatawag kanhi sa mga Saksi ni Jehova. Sanglit kadaghanan sa mga Estudyante sa Bibliya kasarangan lang ug kahimtang sa kinabuhi, ang kombensiyon  gieskedyul tunong sa World’s Fair sa St. Louis aron makapahimulos sila sa may-diskuwentong plete sa tren. Sa ulahi, sa 1907, ang akong uyoan nga si Adolph nabawtismohan sa kombensiyon sa Niagara Falls, New York. Ang akong amahan ug uyoan masibotong nagsangyaw bahin sa ilang nakat-onan gikan sa Bibliya, ug silang duha sa ngadtongadto nahimong bug-os-panahong mga ministro (gitawag karon nga mga payunir).

Busa, sa dihang nahimugso ako sa 1907, ang akong pamilya dato na, sa espirituwal nga diwa. (Proverbio 10:22) Masuso pa ako niadtong 1908 sa dihang gidala ako sa akong mga ginikanan, si John ug Ida, sa “Padayon Hangtod sa Kadaogan” nga kombensiyon sa Put-in-Bay, Ohio. Ang tsirman sa kombensiyon didto mao si Joseph F. Rutherford, nga niadtong panahona maoy usa ka nagapanaw nga ministro. Pipila ka semana una pa niana, miadto siya sa Dalton, Ohio, diin miduaw siya sa among balay ug mihatag ug mga pakigpulong ngadto sa lokal nga mga Estudyante sa Bibliya.

Siyempre, dili nako mahinumdoman mismo kadtong maong mga hitabo, apan nahinumdoman ko gayod ang kombensiyon sa Mountain Lake Park, Maryland, sa 1911. Didto ang akong manghod nga babaye, si Esther, ug ako nakahimamat kang Charles Taze Russell, kinsa maoy nagdumala sa tibuok-kalibotang mga kalihokan sa pagsangyaw sa mga Estudyante sa Bibliya.

Sa Hunyo 28, 1914, ang adlaw nga ang kalibotan nahisugamak sa gubat tungod sa pagpatay kang Arsiduke Ferdinand ug sa iyang asawa sa Sarajevo, ako nagtambong uban sa akong pamilya sa usa ka malinawong kombensiyon sa Columbus, Ohio. Sukad niadtong sayong katuigan, nakapribilehiyo ako sa pagtambong sa daghang kombensiyon sa katawhan ni Jehova. Ang pipila maoy panagtigom sa mga usa ka gatos lang. Ang uban maoy dagko kaayong mga panagtigom diha sa pipila sa kinadak-ang mga estadyum sa kalibotan.

Ang Among Balay Nahimutang sa Usa ka Hinungdanong Dapit

Gikan sa mga 1908 hangtod sa 1918, ang among balay sa Dalton—nahimutang tungatunga sa Pittsburgh, Pennsylvania, ug Cleveland, Ohio—mao ang gitigoman sa gamayng kongregasyon sa mga Estudyante sa Bibliya. Ang among balay nahimong usa ka dapit diin giabiabi ang daghang nagapanaw nga mga mamumulong. Ilang ihigot ang ilang mga kabayo ug mga karwahe sa luyo sa among kamalig ug mag-asoy ug makaiikag nga mga eksperyensiya ug ubang espirituwal nga mga kamatuoran ngadto sa nagtigom. Pagkamakapadasig nga mga panahon kadto!

 Si Papa maoy usa ka magtutudlo, apan gimahal kaayo niya ang kinalabwan sa tanan nga buluhatong pagpanudlo, ang Kristohanong ministeryo. Iyang giseguro nga matudloan ang iyang pamilya bahin kang Jehova, ug matag gabii mag-uban kami sa pag-ampo ingong pamilya. Sa tingpamulak sa 1919, gibaligya ni Papa ang among kabayo ug karwahe, ug sa kantidad nga $175 mipalit siya ug 1914 nga modelo sa awtong Ford aron mas daghang tawo ang iyang maabot sa buluhatong pagsangyaw. Sa 1919 ug 1922, kanang awtoha maoy gisakyan sa among pamilya paingon sa dili-malimtang mga kombensiyon sa mga Estudyante sa Bibliya sa Cedar Point, Ohio.

Ang among tibuok pamilya—si Mama; si Papa; si Esther; ang akong manghod nga si John; ug ako—nakigbahin tanan sa kalihokan nga publikong pagsangyaw. Ako pang mahinumdoman pag-ayo ang unang higayon nga gisukna ako sa tagbalay sa usa ka pangutana bahin sa Bibliya. Mga siyete anyos pa ako. “Dong, unsay Armagedon?” ang lalaki nangutana. Sa diyutayng tabang sa akong amahan, akong nahatag kaniya ang tubag sa Bibliya.

Pagsulod sa Bug-os-Panahong Ministeryo

Sa 1931 ang among pamilya mitambong sa kombensiyon sa Columbus, Ohio, diin malipayon kaming nakig-ambit sa pagdawat sa bag-ong ngalan, mga Saksi ni Jehova. Nahinam kaayo si John mao nga mihukom siya nga kaming duha kinahanglang mosulod sa buluhatong pagpayunir. a Nagpayunir kami, ug ingon man si Mama, Papa, ug Esther. Pagkadakong bahandi ang among nabatonan—usa ka pamilya nga nahiusa sa malipayong buluhaton sa pagsangyaw sa maayong balita sa Gingharian sa Diyos! Wala gayod ako pul-i sa pagpasalamat kang Jehova tungod niini nga panalangin. Apan, bisan tuod kami malipayon kaayo, daghan pang kalipay ang nagpaabot kanamo.

Sa Pebrero 1934, nagsugod ako sa pag-alagad didto sa tibuok-kalibotang hedkuwarter sa mga Saksi ni Jehova (nga gitawag ug Bethel) sa Brooklyn, New York. Miapas didto si John pipila ka semana sa ulahi. Magkauban kami sa kuwarto hangtod nga naminyo siya sa iyang pinanggang asawa, si Jessie, sa 1953.

Sa dihang si John ug ako miadto na sa Bethel, ang among mga ginikanan midawat ug mga asaynment sa pagpayunir diha sa lainlaing mga bahin sa nasod ug miuban kanila si Esther ug ang iyang bana, si George Read. Ang among mga ginikanan nagpadayon sa pagpayunir hangtod nga ilang natapos ang ilang yutan-ong dalan sa 1963. Si Esther ug ang iyang bana nakamatuto ug usa ka maayong pamilya, ug gipanalanginan ako ug daghang pag-umangkon, nga akong gimahal pag-ayo.

Trabaho ug Panag-uban sa Bethel

Gigamit ni John ang iyang teknikal nga mga kahanas sa Bethel ug nakigtambayayong sa ubang mga Bethelite sa mga proyekto sama sa paghimog madaladala nga mga ponograpo. Linibo ka Saksi ni Jehova ang naggamit niini diha sa ilang balay-ug-balay nga ministeryo. Mitabang usab si John sa pagdisenyo ug paggamag mga makina alang sa pagputos ug pagngalan sa mga magasin nga ipadala ngadto sa tagsatagsa ka suskritor.

Ang akong pag-alagad sa Bethel nagsugod diha sa tahianan ug libro. Nagtrabaho sa pabrika nianang panahona ang ubang batan-ong mga lalaki nga hangtod karon nag-alagad gihapon nga matinumanon sa Bethel. Lakip niini si Carey Barber ug Robert Hatzfeld. Apil niadtong uban pa nga akong mahinumdoman nga may kahinangop, apan nangamatay na, mao si Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, ug John Perry. Sila dedikadong nagtrabaho sa daghang tuig, nga wala gayod magreklamo o magdahom ug “promosyon.” Bisan pa niana, nabatonan sa daghan niining maunongon, dinihogan-sa-espiritu nga mga Kristohanon ang mas dagkong mga kaakohan samtang nagkadako ang organisasyon. Ang pipila nag-alagad pa ingong mga membro sa Nagamandong Lawas sa mga Saksi ni Jehova.

Ang pagtrabaho uban niining nagsakripisyo-sa-kaugalingon nga mga igsoon nagtudlo kanako ug usa ka hinungdanong leksiyon. Diha sa sekular nga mga trabaho ang mga trabahante gisulwedohan tungod sa ilang kahago. Mao kana ang ilang ganti. Ang pag-alagad sa Bethel mopatunghag dagayang espirituwal nga mga panalangin, ug ang espirituwal nga mga lalaki ug babaye lamang ang makasabot ug mapasalamaton sa maong mga ganti.—1 Corinto 2:6-16.

Si Nathan Knorr, kinsa tin-edyer pa sa dihang misulod sa Bethel niadtong 1923, mao ang magtatan-aw sa pabrika sa katuigan sa 1930. Molibot siya sa pabrika adlaw-adlaw ug motimbaya sa matag  trabahante. Kaming mga bag-ohan sa Bethel mapasalamaton tungod sa maong personal nga interes. Sa 1936 among nadawat ang usa ka bag-ong imprentahan gikan sa Alemanya, ug pipila sa batan-ong mga igsoong lalaki nalisdan sa pag-asembol niini. Busa misul-ob ug sininang pangtrabaho si Brader Knorr ug mitabang kanila sulod sa kapin sa usa ka bulan hangtod nga napaandar nila kini.

Trabahante kaayo si Brader Knorr nga kadaghanan kanamo dili makatrabaho nga ingon ka makugihon kaniya. Apan mahibalo usab siyang morelaks. Bisan human siya matudlo sa pagdumala sa tibuok-kalibotang mga buluhaton sa pagsangyaw sa mga Saksi ni Jehova sa Enero 1942, magdula siya usahay ug besbol uban sa mga membro sa pamilyang Bethel ug mga estudyante sa tunghaan sa misyonaryo sa Gilead didto sa kampus duol sa South Lansing, New York.

Sa Abril 1950, ang pamilyang Bethel mibalhin ngadto sa bag-ong gitukod nga napulo-ka-andanang seksiyon sa among puy-anang tinukod nga nahimutang sa 124 Columbia Heights, Brooklyn, New York. Ang bag-ong lawak-kan-anan nagpaposible kanamong tanan nga mag-uban sa among pagpangaon. Sa mga tulo ka tuig nga gikamulo pagtukod kining maong puy-anan, wala kamiy programa sa pagsimba sa buntag. Pagkamalipayong panahon kadto sa dihang nabalik kana nga programa! Giasayn ako ni Brader Knorr sa paglingkod uban niya diha sa lamesa sa tsirman aron makatabang ko niya sa paghinumdom sa mga ngalan sa mas bag-ong mga membro sa among pamilya. Sulod sa 50 ka tuig naglingkod ako diha sa mao gihapong puwesto alang sa pagsimba sa buntag ug pamahaw. Dayon, sa Agosto 4, 2000, kana nga lawak-kan-anan gisirhan, ug giasayn ako ngadto sa usa sa giayo nga mga lawak-kan-anan sa kanhing Towers Hotel.

Sa makadiyot niadtong katuigan sa 1950, akoy nagpadagan sa Linotype nga makina sa pabrika, nga nag-andam ug mga hugpong sa tipo nga giasembol isip mga panid ingong bahin sa proseso sa paggamag mga palid alang sa pag-imprenta. Wala kaayo nako magustohi kadtong trabahoa, apan si William Peterson, kinsa ilalom sa iyang superbisyon ang pagpadagan sa maong mga makina, buotan kaayo nako maoy hinungdan nga nalipay ra ko gihapon sa akong panahon nga gigugol didto. Dayon, sa 1960, nagkinahanglan ug mga boluntaryo aron pintalan ang bag-ong gitukod nga puy-anan sa 107 Columbia Heights. Nalipay ko sa pagtanyag sa akong mga serbisyo aron makatabang sa pag-andam niining bag-ong mga pasilidad alang sa among nagkadako nga pamilyang Bethel.

Wala madugay human mapintali ang 107 Columbia Heights nga tinukod, may kahimuot nga natingala ako nga gihatagan sa trabaho sa pag-abiabi sa mga bisita sa Bethel. Ang milabayng 40 ka tuig sa akong pag-alagad ingong tigdawat ug bisita maoy ingon ka makapalipay sa ubang mga tuig nga akong gigugol sa Bethel. Mga bisita man o bag-ong mga membro sa pamilyang Bethel ang moabot, makapahinam ang pagpalandong sa mga resulta sa among tiningob nga mga paningkamot sa paghago alang sa pag-uswag sa Gingharian.

Mainitong mga Estudyante sa Bibliya

Ang among pamilya sa Bethel mauswagon sa espirituwal tungod kay ang mga membro niini nahigugma sa Bibliya. Sa akong unang pag-abot sa Bethel, akong gipangutana si Emma Hamilton, kinsa nagtrabaho ingong proofreader, kon kapila na niya mabasa ang Bibliya. “Trayentay-singko ka beses,” siya mitubag, “ug unya wala na nako maihap.” Si Anton Koerber, laing lig-on nga Kristohanon nga nag-alagad sa Bethel halos sama na ka dugay kang Emma, miingon kanhi: “Kinahanglang dunay Bibliya kanunay sa duol.”

Human sa kamatayon ni Brader Russell sa 1916, si Joseph F. Rutherford maoy mipuli sa pag-atiman sa organisasyonal nga mga kaakohan mga giabaga ni Russell. Si Rutherford maoy puwersado, batid nga mamumulong sa publiko, kinsa ingong usa ka abogado nakiglantugi sa mga kaso dapig sa mga Saksi ni Jehova atubangan sa Korte Suprema sa Tinipong Bansa. Human mamatay si Rutherford sa 1942, si Brader Knorr maoy mipuli kaniya ug naghago pag-ayo aron maugmad ang iyang katakos sa pagpakigpulong sa publiko. Sanglit ang akong lawak duol sa iyaha, sagad nako siyang madungog nga balikbalik nga nagbansay sa iyang mga pakigpulong. Sa ngadtongadto, tungod sa maong makugihong mga paningkamot, nahimo siyang usa ka maayong mamumulong sa publiko.

Sa Pebrero 1942, si Brader Knorr miabag sa pag-organisar ug usa ka programa sa pagtabang kanamong tanan nga mga igsoong lalaki sa Bethel nga mapauswag ang among katakos sa pagpanudlo ug pagpakigpulong. Ang tunghaan nasentro sa pagpanukiduki sa Bibliya ug sa pagpakigpulong sa publiko. Sa sinugdanan, ang matag usa kanamo giasayn sa paghatag ug mugbong mga pakigpulong  bahin sa mga karakter sa Bibliya. Ang akong unang pakigpulong maoy bahin sa tawong si Moises. Sa 1943 usa ka kaamgid nga tunghaan ang gisugdan diha sa mga kongregasyon sa mga Saksi ni Jehova, ug kini nagpadayon hangtod karon. Ang gipasiugda sa Bethel mao gihapon ang pagbaton ug kahibalo sa Bibliya ug pag-ugmad ug epektibong mga paagi sa pagpanudlo.

Sa Pebrero 1943 nagsugod ang unang klase sa tunghaan sa misyonaryo sa Gilead. Karon, ang ika-111 nga klase sa Gilead bag-o lang migraduwar! Sa kapin 58 ka tuig niini sa paghatag ug instruksiyon, ang tunghaan nakabansay ug kapin sa 7,000 ka tawo sa pag-alagad ingong mga misyonaryo sa tibuok kalibotan. Makahuloganon nga sa pagsugod sa tunghaan sa 1943, diha lamay kapin sa 100,000 ka Saksi ni Jehova sa tibuok kalibotan. Karon, duna nay kapin sa 6,000,000 nga nakigbahin sa pagsangyaw sa maayong balita sa Gingharian sa Diyos!

Mapasalamaton Tungod sa Akong Espirituwal nga Panulondon

Sa wala pa maorganisar ang Gilead, dihay tulo kanamo gikan sa Bethel nga giasayn sa pagduaw sa mga kongregasyon sa tibuok Tinipong Bansa. Moestar kami sulod sa usa ka adlaw, pipila ka adlaw, o usa pa ka semana sa paningkamot nga mapalig-on sa espirituwal kining maong mga kongregasyon. Gitawag kami ug mga alagad sa mga igsoon, usa ka termino nga giilisan sa ulahi ug alagad sa sirkito, o magtatan-aw sa sirkito. Apan, wala madugay human magsugod ang Tunghaang Gilead gihangyo ako sa pagbalik aron sa pagtudlo ug pipila ka kurso. Nag-alagad ako ingong regular nga instruktor gikan sa ika-2 hangtod sa ika-5 nga mga klase, ug mipuli usab ako sa usa sa regular nga mga instruktor ug nagtudlo sa ika-14 nga klase. Ang pagsubli uban sa mga estudyante sa talagsaon nga unang mga hitabo sa modernong-adlaw nga kasaysayan sa organisasyon ni Jehova—daghan niana akong maasoy agig personal nga kasinatian—naghimo kanako nga labi pang mapasalamaton tungod sa akong dagayang espirituwal nga panulondon.

Ang laing pribilehiyo nga akong natagamtam latas sa katuigan mao ang pagtambong sa internasyonal nga mga kombensiyon sa katawhan ni  Jehova. Sa 1963, mibiyahe ako sa tibuok kalibotan kauban sa kapin sa 500 ka uban pang mga delegado ngadto sa “Walay Kataposang Maayong Balita” nga mga kombensiyon. Ang lain pang makasaysayanhong mga kombensiyon nga akong natambongan mao kadtong gihimo sa Warsaw, Polandia, sa 1989; Berlin, Alemanya, sa 1990; ug Moscow, Rusya, sa 1993. Sa matag kombensiyon, may kahigayonan ako nga mahimamat ang pipila sa among minahal nga mga igsoong lalaki ug babaye nga milahutay sa daghang tuig sa paglutos ilalom sa rehimeng Nazi, sa rehimeng Komunista, o niining duha. Pagkamakapalig-on sa pagtuo kadtong maong mga eksperyensiya!

Ang akong kinabuhi diha sa pag-alagad kang Jehova tinuod gayod nga dagaya sa espirituwal! Ang suplay sa espirituwal nga mga panalangin wala gayoy hunong. Ug, dili sama sa materyal nga mga bahandi, kon sige natong ipakig-ambit kining bililhong mga butang, mas modaghan ang atong katigayonan. Matag karon ug unya makadungog ko sa pipila nga moingong nangandoy sila nga wala na lang unta sila matutoa ingong mga Saksi ni Jehova. Sila moingon nga nagtuo silang mas mapabilhan nila ang mga kamatuoran sa Bibliya kon nasinati una nila ang kinabuhi sa gawas sa organisasyon sa Diyos.

Mabalaka gayod ako sa dihang akong madungog ang mga batan-on nga mosulti niini tungod kay nag-ingon gayod sila nga mas labing maayo kon dili mamatuto sa kahibalo bahin sa mga dalan ni Jehova. Apan, hunahunaa ang tanang daotang mga kinaiya ug dunot nga hunahuna nga kinahanglang wad-on sa mga tawo sa dihang ilang makaplagan ang kamatuoran sa Bibliya sa ulahing bahin sa kinabuhi. Kanunay akong mapasalamaton kaayo nga ang akong mga ginikanan nagmatuto sa ilang tulo ka anak diha sa dalan sa pagkamatarong. Si John nagpabilin nga matinumanong alagad ni Jehova hangtod sa iyang kamatayon sa Hulyo 1980, ug si Esther hangtod karon nagpabiling usa ka matinumanong Saksi.

Mahinumdom ako uban ang dakong kahinangop sa daghang maayo nga mga panaghigalaay nga akong natagamtam uban sa matinumanon nga Kristohanong mga igsoong lalaki ug babaye. Ako karon migugol na ug kapin sa 67 ka malipayong mga tuig sa Bethel. Bisan pag wala ako maminyo, ako dunay daghang espirituwal nga mga anak nga lalaki ug babaye, maingon man espirituwal nga mga apo. Ug nalipay ako sa paghunahuna bahin sa tanang minahal nga bag-ong mga membro sa among tibuok-kalibotang espirituwal nga pamilya nga himamaton ko pa, ang matag usa bililhon. Pagkatinuod sa mga pulong: “Ang panalangin ni Jehova—mao kana ang makapadato”!—Proverbio 10:22.

[Footnote]

[Hulagway sa panid 20]

Gikan sa wala paingon sa tuo: akong amahan nga nagsabak sa akong igsoong si John, si Esther, ako, ug ang akong inahan

[Mga hulagway sa panid 23]

Nagtudlo sa usa ka klase sa Gilead sa 1945

Ibabaw nga tuo: mga instruktor sa Tunghaang Gilead nga si Eduardo Keller, Fred Franz, ako,ug si Albert Schroeder

[Hulagway sa panid 24]

Nagpamalandong bahin sa akong dagaya nga kinabuhi diha sa pag-alagad kang Jehova