“Magkita Ta sa Gingharian sa Diyos”

“Minahal nga Higala! Rupert, karong adlawa ako gihukman ug kamatayon. Ayaw pagbangotan tungod kanako. Ako nagpadala sa akong gugma kanimo ug sa tanan diha sa balay. Magkita ta sa Gingharian sa Diyos.”

SA HUNYO 8, 1942, gisulat ni Franc Drozg kining mga pulonga pipila ka minutos una pa siya pusila sa mga sundalo sa Nazi. Nganong gipatay man siya?

Sumala sa mga rekord diha sa Museum of National Liberation sa Maribor, Slovenia, kining 38-anyos nga tigsalsal ug puthaw midumili sa pag-apil sa Wehrmannschaft, usa ka Aleman nga paramilitaryong grupo sa Slovenia nga giokupar sa Alemanya niadtong tungora. Siya maoy usa ka Bibelforscher, o Estudyante sa Bibliya, nga maoy pagkaila kanhi sa mga Saksi ni Jehova nianang dapita. Sa paglihok kaharmonya sa Isaias 2:4, wala niya paluyohi ang kalihokan sa gubat sa Nazi, nga nagpahayag sa iyang kaugalingon ingong sakop sa Gingharian sa Diyos.—Mateo 6:33.

Sa iyang lungsod nga natawhan sa Ptuj, si Franc nailhan ingong masibotong magwawali sa maayong balita sa Gingharian sa Diyos. (Mateo 24:14) Bisan pa sa daghang kalisdanan, siya nagsangyaw sa maayong balita nga walay hunong hangtod nga gidakop siya sa Mayo 1942.

Daghang Saksi sa Slovenia ang gilutos pag-ayo sa mga Nazi. Si Franc maoy usa niadtong unang gipatay tungod sa iyang relihiyosong mga tinuohan. Sama sa unang-siglo nga mga Kristohanon, siya napalig-on sa mga pulong: “Kita kinahanglang mosulod sa gingharian sa Diyos pinaagi sa daghang kasakitan.” (Buhat 14:22) Ang iyang pagtuo sa pagkatinuod nianang langitnong kagamhanan nadayag diha sa iyang kataposang mga pulong, “Magkita ta sa Gingharian sa Diyos.”

[Picture Credit Lines sa panid 32]

Franc Drozg: Photo Archive-Museum of National Liberation Maribor, Slovenia; sulat: Ang orihinal gitipigan sa Museum of National Liberation Maribor, Slovenia